Yaadein

Anuj Singh ek bank mein naukri karta hain. Woh cashier ki post par hain. Uski patni ka naam Priya Singh hain. Aur unke do bacche hain, ek beta aur ek beti. Bete ka naam Karan Singh hain aur beti ka naam Kajal Singh hain. Dono bhai-behen ke beech mein teen saal ka antar hain aur un dono ke beech bohut sneh hain.  

Ab Anuj ke retirement ka waqt nazdeek aa raha hain. Dono bacchon ki padhayi bhi ab khatam ho chuki hain aur woh dono apne liye naukri dekh rahe hain. Kareeb do mahine beet jaane ke baad, un dono ko naukri mil gayi hain. Anuj ke bank mein unke retirement ka programme bohut acche se hua. Ab ghar ka kharcha unke dono bachho ki salary se hi chal raha hain. 

Ek din, Anuj ne apne dono baccho se kaha, "Beta ab toh main retire ho chuka hoon. Aur tum dono bhi bohut mehnat kar rahe ho. Ghar ko bohut acche se tum dono ne sambhal liya hain." Dono bacche muskura diye. Phir Anuj ne apni baat aage badhayi, "Beta meri ek darkhast hain tum dono se. Main ab ek baar apne gaon jaana chahta hoon apne poore parivaar ke saath."

Karan - "Lekin Papa hum gaon jaakar karnege kya ?"

Anuj - "Beta main waha settle hone ke liye nahi bol raha hoon. Main bas kuch dino ke liye waha par rehne ke liye keh raha hoon."

Kajal - "Papa gaon gaye hue, hume kitne saal ho gaye hain. Hum dono ke bachpan mein hum log gaon gaye the. Uske baad se hum log aaj tak kabhi bhi gaye nahi. Toh ab kyun ?"

Anuj - "Waha hamare bohut saare jaan pehchan ke log rehte hain. Tumne dekha hi hoga, ki main aksar phone par baatein karte rehta hoon. Ab bas un logon se milna hain. Bas un logon ke saath, thoda sa waqt beetana hain."

Karan - "Lekin Papa hum sab log yahan par khush hain."

Anuj - "Haan beta woh baat toh hain. Lekin..."

Karan - "Lekin kya Papa ?"

Anuj - "Jaane do tum nahi samjhoge."

Karan - "Nahi Papa aap kahiye na."

Anuj - "Dekho beta. Mera poora bachpan waha par guzra hain. Maine apni zindagi mein apne gaon ke maahol se bohut kuch seekha hain. Waha par bhi bohut saare mere apne hain. Main bas ek baar un logon se milna chahta hoon. Un logon ke saath thoda sa waqt beetana chahta hoon. Bas ek baar apne ghar ko dekhna chahta hoon."

Karan ne thodi der ke liye socha aur kaha, "Thik hain Papa. Hum log Diwali ki chhuttiyon mein is baar, waha par zaroor jaayenge." 

Anuj - "Thank You So Much Beta."

Karan - "It's OK Papa."

Kareeb do mahino ke baad, Diwali ki chhuttiyan aane wali thi. Karan aur Kajal dono ne hi apne-apne office mein chutti ki arzi daal di thi. Un logon ne train ki tickets book ki. Anuj apne gaon jaane ke liye bohut utsuk tha. Aakhir kaar, woh din aa hi gaya. Woh log Railway Station pahuche aur Train mein jaakar, apne seats par baithe. Kareeb aadhe ghante baad, TC ne seeti bajayi aur Train chal padi. Train Station ko paar karte hi Anuj ki khushi ka thikaana na tha. Woh bohut khush tha. Gaon jaane ki utsukta, uske chehre par saaf dikh rahi thi. Thodi der baad, Karan ne kaha, "Papa jab hum pichli baar gaon gaye the. Toh hum kaha par ruke the ?"

Anuj - "Hum log Ajay Chacha ke ghar ruke the."

Karan - "Koun Ajay Chacha Papa ?"

Anuj - "Woh mera chachera Bhai hain. Jab hum log pichli baar gaye the. Tum bohut chote the. Woh aksar tumhe apne tractor par bithakar kheton mein ghumane le jaaya karte the."

Kajal - "Par Papa, kya woh log hume pehchan paayenge ? Itne lambe samay ke baad, hum log jaa rahe hain."

Anuj - "Zaroor pehchanenge beta. Woh log humare apne hain."

Train mein raaste bhar woh log bohut saari baatein karte rahe. Kuch gaon ke purani yaadon ki, toh kuch shahar ke ghar mein bitaye hue purani yaadein. Raaste bhar sirf yaadon ki hi baatein chalti rahi. Baatein karte-karte shaam ho gayi aur train ek station par ruki. 

Tabhi Karan ne kaha, "Papa main bahar se kuch khaane ke liye, le aata hoon." 

Anuj - "Thik hain beta."

Karan bahar chala jaata hain. Thodi der ke baad, woh garma garam Samose le aata hain aur Train dubara chal padti hain. Sabhi log saath mein Samosa khate-khate apni baatein karna dubara shuru karte hain. Safar bohut hanste muskurate kat raha tha. Kareeb ek raat aur ek din ka safar poora karne ke baad, aakhir kaar un logon ki yaatra samapt hui. Woh log Banaras Station par pahuch gaye. Banaras jo ki Anuj ka gaon tha. Uska poora bachpan jahan par beeta, aur jise usne kai saalon pehle chodkar shahar ek acchi zindagi ki talaash mein aaya tha, aakhir mein woh wahan par dubara pahuch hi gaya. Wahan se taxi karke woh log apne purane ghar pahunche. 

Anuj ko dekhte hi, Ajay turant uske pass daud aaya aur dono bhaiyon ne ek dusre ko gale se laga liya. Dono ki hi aankhen bhar aayi thi. Ajay ne Priya se kaha, "Namastey Bhabhi."

Priya - "Namastey Bhaiyya."

Uske baad woh sab log Ajay ke ghar par gaye. Agle din Ajay ne Anuj ke purane ghar ki saaf safai karwadi aur Anuj apne biwi aur bacchon ke saath, us ghar mein shift ho gaya. Gaon mein yeh baat pata chalte hi, ki Anuj apne parivaar ke saath gaon dubara aaya hua hain, sabhi jaan pehchan ke log un sabse milne ke liye aane lage. 

Anuj gaon ke sabhi jaan-pehchan walon ke yahan par jaata aur kabhi kabhi un logon mein se kisi-kisi ke ghar par woh raat mein ruk bhi jaata tha. Phir woh agle din apne ghar laut ta tha. 

Anuj ab bohut prasanna rehne lag gaya tha. Uske mann bohut shant aur tript ho chuka tha. Uske chehre par, ek ajeeb si khushi ki muskaan rehne lag gayi thi. 

Ek din, Kajal ne Karan se kaha, "Bhaiyaan yahan par log hume kitna pyaar karte hain na ?"

Karan - "Haan. Sabhi log bohut khayal rakhte hain humara. Yahan se toh ab jaane ka mann hi nahi karta hain."

Kajal - "Yahan par aane ke baad, Papa kitne khush rehne lag gaye hain. Unme bohut badlaav aa gaya hain."

Karan - "Haan. Woh baat toh hain. Dekhna shahar wapas jaate waqt, Papa bohut dukhi honge."

Kajal - "Haan, lag toh yahi raha hain. Khair woh sab toh baad ki baat hain. Abhi hum log yahan par sabke saath khub ghul-mil gaye hain. Toh abhi bas isi waqt ka luft uthate hain."

Karan - "Haan yeh bhi sahi baat hain."

Gaon walon se mila hua pyaar dekhkar Karan aur Kajal bohut khush hue. Ab woh dono bhi, gaon walon se bohut jud chuke the. Aakhir mein un logon ki chhuttiyan khatam ho gayi aur ab unka shahar wapas jaane ka samay aa gaya tha.  

Gaon walon ne nam aankhon se un logon ki bidaayi ki. Wapas jaate waqt, Anuj ki aankhon se aansun rukne ka naam hi nahi le rahe the. Train mein raaste bhar, Anuj khamosh raha. Kuch din beete, lekin ab bhi woh khamosh tha. Anuj ab kahi khoya khoya sa rehne laga tha. Uski aisi haalat dekh kar, ghar mein baaki sab log ab chintit hone lag gaye the.

Ek din ki baat hain, jab Karan aur Kajal dono ki hi chutti thi. Anuj balcony mein baitha hua chup-chap aasmaan ki aur dekh raha tha. Woh dono bhai-behen uske pass aakar baith gaye. Karan ne Anuj ka haath pakda aur kaha, "Papa."

Anuj ne uski taraf dekha aur kaha, "Haan beta ?"

Karan - "Kya hua Papa ?"

Anuj - "Kya beta ?"

Karan - "Papa kya hua hain ?"

Anuj - "Kuch bhi toh nahi beta."

Karan - "Jab se hum log gaon se wapas laute hain, aap bohut khamosh rehne lag gaye ho. Kisi se bhi aap zyada baat-cheet nahi karte ho ?"

Anuj - "Haan beta. Bas aise hi."

Kajal - "Aap gaon ko bohut miss kar rahe ho na Papa ?"

Anuj - "Haan beta. Lekin, yahan par bhi toh hume rehna hi hain na. Kaam bhi toh karna zaroori hain."

Karan - "Hum kabhi na kabhi, gaon dubara jaayenge Papa."

Anuj - "Thank You Beta."

Kuch dino ke baad, naya saal aane wala tha. Naye saal ke jashn ki tayyari bohut jor-shor se chal rahi thi. Shaam mein, office se aane ke baad, Karan aur Kajal bahar jaakar thodi si shopping kiye. Un dono ne ghar ko sajane ke liye thoda sa saaman kharide. Saath hi saath unhone thodi mithaiyan kharidi aur cold drinks aur chips bhi kharide. 

Ghar pahuch kar, dono Bhai-Behen ne ghar ko bohut acche se sajaya. Raat ke 12 bajte hi, sabhi ghar walon ne ek dusre ko naye saal ki mubarakbaad di. Uske baad, poore parivaar ne saath mein baith kar mithaiyan khaayi. 

Kuch dino ke baad, Karan ko company se promotion mila. Aur use dusre shahar shift hone ke liye kaha gaya. Karan ne jab yeh baat apne ghar par batayi, tab Anuj ne kaha, "Kya tumne un logon se kaha nahi ki, tumhari behan bhi naukri karti hain ? Uski job katre mein pad jaayegi.

Karan - "Maine kaha tha Papa. Lekin woh log keh rahe hain ki mujhe shift hona hi padega. Mujhe promotion mil raha hain. Naya kaam hain aur meri salary bhi badha rahe hain woh log."

Anuj - "Thik hain, hum log shift ho jaayenge. Kab shift hona hain ?"

Karan - "Agle mahine."

Anuj - "Thik hain beta."

Kajal ki shaadi ki umar bhi ho chuki thi. Anuj ne Kajal se kaha, "Beta ab waqt aa gaya hain ki hum tumhari shaadi ke baare mein soche."

Kajal - "Lekin Papa. Shaadi itni jaldi kaise ?"

Anuj - "Umar toh yahi sahi hain beta. Agar koi ladka tumhe pasand ho, toh tum khul ke keh do beta." 

Kajal - "Haan Papa. Ek ladka mujhe pasand hain. Woh meri office mein mere saath kaam karta hain."

Anuj - "Naam kya hain uska beta ?"

Kajal - "Uska naam Ajay hain Papa."

Anuj - "Thik hain. Tum Ajay se baat karke humari mulakat us se karwa do."

Kajal ne Ajay se baat ki aur do teen din baad, woh unke ghar unse milne ke liye aaya. Ajay ko sabhi ne bohut pasand kiya. Woh bohut hi suljha hua aur sushil ladka tha. Uske baad, dono parivaar mile aur unke beech mein rishta tai ho gaya. Shaadi ki tareekh 6 mahine ke baad ki thi. Is wajah se Karan ne apna promotion rok diya. Aur apna shift karne ka plan bhi rok diya. Un logon ne Kajal ki shaadi ki tayyari karna shuru kar di. Aakhir kaar woh din aa hi gaya, jab woh dulhan bankar tayyar hui. Kajal ki shaadi bohut dhoom-dhaam se hui. Bidaai ke samay, ghar ke sabhi logon ki aankhen bhar aayi. Karan toh bohut phoont-phoont kar ro raha tha. 

Ghar ke sabhi log khush the ki shaadi bohut acche se hui hain. Kuch dino ke baad, Anuj ne Karan se pucha, "Beta woh tumhara promotion hone wala tha na ?"

Karan - "Haan Papa. But Kajal ki shaadi ka plan tab ban gaya toh maine woh baat wahi par hi rok di."

Anuj - "Toh kya abhi bhi koi chance hain ?"

Karan - "Haan shayad. Dekhna padega."

Anuj - "Matlab ?"

Karan - "Matlab ab woh chance mere haathon se chala gaya hain. Ab dekhta hoon, kal ek meeting hain. Usme kya baatein hoti hain, haalat kya bante hain, uske baad hi sab kuch clear hoga."

Anuj - "Tumhara promotion zaroor hoga. Mera dil kehta hain."

Karan - "Thank You Papa."

Agli shaam jab Karan ghar aaya, tab usne apne promotion ki khush khabri sabko sunayi. Sabhi log bohut khush hue. 

Kuch dino ke baad, woh log shift ho gaye. Shuruat mein sab kuch aacha chal raha tha. Lekin, dheere-dheere Karan ab thoda sa udaas rehne lag gaya tha. Woh apna purana ghar miss kar raha tha. Use apne purane doston ki yaad aa rahi thi. Purane shahar ki yaadein uska peecha nahi chod rahi thi. Woh ab bohut khoya khoya sa rehne lag gaya tha. Karan ki yeh haalat dekh kar, Anuj samajh gaya tha ki uske mann mein kya chal raha hain. Ek din, jab shaam mein woh ghar wapas aaya tab Priya ne use paani diya. Phir Anuj ne Karan se kaha, "Kaise ho beta ?"

Karan - "Main thik hoon Papa."

Anuj - "Aaj kal tum bohut udaas rehte ho. Kya baat hain beta ?"

Karan - "Nahi woh bas naya shahar hain. Naye log hain. Adjust karne mein hume waqt lagega."

Anuj - "Tumhe apne purane ghar ki aur apne purane doston ki bohut yaad aa rahi hain na beta ?"

Karan - "Haan thoda."

Anuj - "Yeh sab chalte hi rehta hain. Jab bhi waqt mile tum chutti lekar chale jaana wahan par."

Karan - "Papa aaj ehsaas ho raha hain ki, apno se dur hokar kaisa mehsus hota hain. Yaad hain jab hum log gaon se wapas aaye the, aap kitne udaas rehte the shuruat mein. Tab main samajh nahi paata tha ki aap mein itna badlaav kyun aaya hain. Lekin, ab main samajh sakta hoon."

Anuj - "Kabhi bhi tum apne aap ko akela mat samjhna."

Karan - "Haan Papa."

Anuj - "Yahi zindagi hain beta. Tarakki karte-karte hum log apni zindagi mein itne vyast ho jaate hain ki, hum samajh hi nahi paate hain ki humne humare kitne apno ko kho diya hain. Waqt aisa palta hain ki, hum zindagi mein aage toh nikal jaate hain; lekin peeche reh jaati hain toh bas yaadein. Aur yaadein har samay saaye ki tarah humare saath-saath chalti hain."

Karan - "Ab dheere-dheere samajh mein aa raha hain Papa. Ab aap jab kahenge hum log gaon dubara zaroor jaayenge."

Anuj - "Tumhe bhi jab bhi apne purane doston se milna ho toh hum apne purane shahar wapas kuch dino ke liye chale jaayenge beta."

Dono baap-bete ekdum khamosh ho jaate hain.  

                  - Ved Vineet Gautam