Vaada

Sanjay Kumar ek businessman hain. Unki ek patni hain. Sanjay ki patni ka naam hain Urmila Kumar. In dono ke do bete hain. Bade bete ka naam hain Rajeev Kumar aur chote bete ka naam hain Ranveer Kumar. Dono bhaiyon mein 2 saal ka antar hain. Rajeev ki umar 15 saal hain aur Ranveer ki umar 13 saal hain. Dono hi Bhai padhayi mein bohut mehnati hain. Sanjay Kumar jab bhi apna kaam khatam karke ghar laut te toh, woh apne dono laadle beton ke liye chocolates le aate. Yeh poora parivaar aksar shaam mein saath baithe saath bitate the. Hansi Khushi chal rahi thi inki zindagi. 

Ek din ki baat hain, jab Sanjay Kumar ko apne business mein thoda sa jhataka laga. Market down hone ki wajah se unka business din ba din neeche hi girta jaa raha tha. Munaafa hona toh dur ki baat hain, Sanjay ko din-ba-din nuksaan pe nuksaan jhelna pad raha tha. Aakhir mein unhone Bank se loan liya aur use apne business mein invest kiya. Lekin waha par bhi inhe nuksaan hi hua. 

Ek din Sanjay apne ghar ke Hall mein baithe kuch soch rahe the. Urmila Hall mein aayi toh unhone dekha ki Sanjay bohut pareshan lag rahe hain. Woh Sanjay ke pass gayi aur unke kandhe par apna haath rakh diya. Sanjay ne Urmila ko dekha aur kuch nahi kaha. "Kya main aapke liye Chai le aaon ?" Urmila ne pucha.

Sanjay - "Nahi rehne do."

Urmila - "Thoda sa Chai pee lijiye thakan dur ho jaayegi aapki."

Sanjay - "Thik hain."

Thodi der baad Urmila Sanjay ke liye Chai le aati hain aur use Chai ka pyaala thama kar uske saamne baith jaati hain. 

Urmila - "Sab kuch thik toh hain na ?"

Sanjay - "Hmm."

Urmila - "Aap kaafi pareshan lag rahe hain ?"

Sanjay - "Nahi woh bas aise hi."

Urmila - "Koi problem ho toh bataiye."

Sanjay - "Tum nahi samjhogi. Business mein thoda sa nuksaan jhelte jaa raha hoon."

Urmila - "Toh ab kuch raasta nahi mil raha hain ?"

Sanjay - "Saamne sirf aur sirf andhera hi nazar aa raha hain."

Urmila - "Hum log kaise bhi reh lenge."

Sanjay - "Aur bacche ? Woh kaise reh paayenge ? Unka bhavishya kaisa hoga ?"

Urmila - "Chinta karne se kuch hoga kya Ji ?"

Sanjay - "Hmmm. Waise yeh dono bacche hain kaha par ?"

Urmila - "Filhal toh tution mein hain. Aate hi honge."

Sanjay - "Dekho baccho ko kisi bhi tarah ki kami mehsus nahi honi chahiye."

Urmila - "Thik hain Ji."

Thodi der baad bacche ghar aaye aur Sanjay aur Urmila se lipat gaye. Sanjay ke aankhon mein aansun aa gaye. Yeh dekhkar Rajeev ne pucha, "Papa kya hua ?"

"Kuch nahi beta." Sanjay ne kaha.

Ranveer - "Toh phir aap ro kyun rahe ho ?"

Sanjay - "Nahi beta woh bas aankhon mein kachra chala gaya tha."

Rajeev - "Koi tension hain kya Papa ?"

Sanjay - "Nahi beta, kuch bhi nahi hain. Mere pass itne honhaar do bete hain. Mujhe kya tension hogi ?"

Dono bete Sanjay ke gale lag gaye. Shaam mein poore parivaar ne saath mein khaana khaya aur sab log so gaye. 

Agle din Sanjay ek meeting karne ke liye gaye aur meeting successful rahi. Ek hafte baad deal sign honi thi. Deal sign hone ke do pehle ki baat hain, ghar pahuchne par Sanjay ne dekha ki Rajeev ka chehra utra hua hain aur woh apni aankhen band karke leta hua hain. Sanjay ne Rajeev ke chehre par haath rakha aur use dekhte hi Rajeev ne aankhen kholi. "Papa."

Sanjay ne muskura diya. Tabhi Sanjay ko mehsus hua ki Rajeev ko tez bukhar chadha hua hain. "Tumhe toh bukhar hain ?"

Rajeev - "Hmm."

Sanjay - "Kab bukhar chadha tumhe ?"

Rajeev - "Dopahar se."

Sanjay - "Mummy ne doctor ko dikhaaya ?"

Rajeev - "Nahi."

Sanjay andar gaya aur Urmila se pucha, "Tum Rajeev ko hospital kyun nahi le gayi ?"

Urmila - "Ab thoda sa bukhaar hain ?"

Sanjay - "Yeh thoda sa bukhaar hain ? Tumne dekha uska chehra kitna tap raha tha ?"

Urmila - "Ab itna gussa kyun kar rahe ho ? Aap aa gaye ho na aap le jaaiye use aspataal."

Sanjay ka paara chadha hua hota hain. Sanjay ko uspar bohut gussa aata hain. Lekin woh Urmila se kuch nahi kehta hain. Sanjay Rajeev ko apne saath aspataal le jaata hain. Aur doctor uska blood test karte hain. Phir woh kehte hain ki Rajeev ko do teen din ke liye, admit karna hoga. Raajev ko admit kar diya jaata hain aur Sanjay wahi par ruk jaata hain. 

Agle din, Doctor Sanjay se kehte hain ki, "Ise blood chadhana hoga. Aap apna do bottle blood use de dijiye."

Sanjay - "Main nahi de sakta hoon use apna blood."

Doctor - "Kyun kya hua ?"

Sanjay - "Kyunki mujhe Blood Cancer hain aur yeh kabhi bhi cure nahi ho sakta hain."

Doctor - "Kya yeh baat aapne apne parivaar walon ko batai hain ?"

Sanjay - "Nahi. Lekin main nahi chahta hoon, ki mere parivaar walon ko is baare mein pata chale."

Rajeev doctor ke cabin ke bagal wale kamre mein hi rehta hain aur woh yeh saari baatein sun leta hain. Rajeev ko bohut dhakka lagta hain. 

Phir Doctor ek donor dhundh kar Rajeev ko blood chadha dete hain aur do teen din baad, woh use discharge bhi kar dete hain. 

Hospital se bahar nikal kar dono baap bete car mein baithte hain aur ghar ke liye nikal padte hain. Rajeev bohut gehri soch mein duba rehta hain. Woh kaafi der se kuch soch raha hota hain. Yeh dekhkar Sanjay usse puchta hain, "Rajeev. Kya soch rahe ho ?"

Rajeev apne hi khayalon mein duba hua tha jis wajah se use Sanjay ki baatein sunai nahi di. Woh gaadi chalate-chalate Rajeev ke kandhe par thap thapata hain. Rajeev uski taraf dekhta hain. Phir Sanjay puchta hain, "Kya soch rahe ho Rajeev ?"

Rajeev - "Kuch nahi Papa."

Sanjay - "Nahi tum kuch toh soch rahe the."

Rajeev - "Nahin Papa main kuch nahi soch raha tha."

Sanjay - "OK."

Rajeev - "Papa aapse ek baat puchu ?"

Sanjay - "Haan pucho."

Rajeev - "Aap bura toh nahi maanoge ?"

Sanjay - "Nahi. Main nahi bura maanunga."

Rajeev - "Aapke paas kitna time hain Papa ?"

Yeh sunte hi Sanjay ko jhatka lagta hain aur woh achaanak se gaadi ka break laga deta hain. Woh kuch der ke liye Rajeev ki taraf dekhta hain aur kuch bhi nahi kehta hain. Rajeev apni nam aankhon se puchta hain, "Aapko Cancer hain Papa ?"

"Yeh baat tumhe kisne batai ?" Sanjay hairaani se puchta hain.

Rajeev - "Maine aapki aur doctor ki saari baatein sun li thi. Doctor ne aapse kaha blood donate karne ke liye. Lekin aapne mana kar diya aur aapne hi Doctor se kaha tha ki aapko Cancer hain. Kya yeh sach hain Papa ?"

Sanjay - "Haan Beta."

Rajeev - "Kitna time hain aapke pass Papa ?" Yeh puchte hi Rajeev ki aankhen bhar aati hain.

Sanjay - "Jab tak main kheech sakun beta."

Rajeev - "Isiliye aap itne tension mein rehte hain hamesha ?"

Sanjay - "Hmm. Tension toh hoga hi na Beta."

Rajeev - "Mummy ko bataya hain aapne ?"

Sanjay - "Nahi beta. Urmila kuch nahi jaanti hain. Aur yeh baat ab kisi ko bhi pata nahi chalni chahiye."

Rajeev - "Lekin aap aakhir kab tak chupaaoge yeh baat Papa ? Kabhi na kabhi toh sach bahar aa hi jaayega."

Sanjay - "Lekin tab tak main tum logon ke saath hansi khushi reh toh lunga."

Rajeev - "Aur aapke jaane ke baad hamara kya hoga Papa." Yeh kehte hi Rajeev ke aankhon se aansun aa jaate hain. 

Sanjay - "Beta upar wala hain. Kuch na kuch woh raasta dikhayega. Dekho tum ghar ke bade ladke ho aur mere jaane ke baad, ghar ki zimmedari tum par hi hogi. Tumhe sabko sambhaalna hain."

Rajeev - "Aur kya main itna bada ho gaya hoon ki main sab kuch sambhaal lunga ?"

Sanjay - "Beta waqt sab kuch sikha deta hain. Moam Se Moam Insaan bhi Pathar ban jaata hain. Bas upar wale par bharosa rakho aur chalte jaao. Sahi waqt aane par tumhe apne har sawaal ka jawab milega. Aur ab yeh raaz tum kisi ko bhi nahi bataoge. Mujhse Vaada karo." Sanjay apna haath Rajeev ke saamne rakh deta hain. Rajeev ke aankhon se aansun rukne ka naam nahi le rahe the. Sanjay us se phir se kehta hain, "Mujhse Vaada karo beta."

Rajeev - "Haan main Vaada karta hoon Papa."

Sanjay - "Mere haathon mein apna haath rakh kar yeh baat kaho tum."

Rajeev - "Main Vaada karta hoon Papa. Main sabka khayal rakhunga."

Sanjay - "Tum apni zindagi ke kisi bhi mod par kabhi bhi kamzor nahi padoge. Vaada karo mujhse."

Rajeev - "Haan. Main kabhi bhi kamzor nahi padunga."

Sanjay - "Jeevan mein aane wali har baadha aur chunauti ka saamna tum puri needarta ke saath hi karoge."

 Rajeev - "Haan Papa. Main Vaada karta hoon. Main har haal mein strong bana rahunga aur jeevan ke har ke chunauti ka saamna puri needarta ke saath karunga."

Sanjay - "Aur ek aur baat beta. Tum apni zindagi mein kabhi bhi ummeed ka saath nahi chodoge. Insaan apni zindagi mein sab kuch haar jaaye chalega. Lekin, agar usne ummeed hi kho di, toh woh sirf or sirf daldal mein hi phansta chala jaata hain. Toh hamesha ummeed ka daaman thame rakhna. Tumhe jeevan ke har tarah ki paristhiti ka saamna karne ki shakti milegi. Jo kaali andheri raat mein bhi ujaale ki pratiksha karta hain, woh jeevan mein kabhi bhi niraash nahi rehta hain." 

Rajeev - "OK Papa."

Sanjay - "Kal ko main bhale hi na rahoon par, mera aashirwad hamesha tumhare saath hi rahega. Main hamesha tumhe aasmaan se dekhta rahunga."

Ghar pahuchne ke baad Rajeev bohut normal bartaav karta hain. Lekin use yeh baat andar hi andar khaaye jaa rahi thi, ki woh apne pita ke liye chah kar bhi kuch nahi kar paa raha hain.

Kuch mahino ke baad Sanjay ki tabiyat kharab hone lag jaati hain aur Rajeev phir bhi chup rehta hain. Kyunki usne apne Pita se Vaada kiya hua tha. Aakhir mein woh din aa hi gaya, jab sach sabke saamne aana tha. Ek din ki baat hain, jab Sanjay shaam mein kaam khatam karke apne ghar par aata hain. Woh apne bed par baitha kuch soch raha hota hain, ki tab achaanak se uske sar mein dard shuru ho jaata hain. Dheere-Dheere use aisa mehsus hone lagta hain jaise, koi uske sar par hathode se vaar kar raha ho. Woh bed par se uthta hain aur mushkil se hi do kadam hi chal paata hain. Do kadam chalne ke baad woh farsh par dhadhaam se gir jaata hain. Rajeev turant Car nikaalta hain aur woh teeno Sanjay ko car mein baithate hain. Rajeev Car start karta hain aur woh log jald hi nazdeek ke ek hospital mein Sanjay ko admit karte hain. Jab Ranveer aur Urmila ko Sanjay ki bimaari ka pata chalta hain, toh unke pairon tale se zameen khisak jaati hain. Rajeev un dono ko sambhaalne mein laga hua hota hain. Rajeev kabhi zaroori dawaiyan le aata, toh kabhi Urmila aur Ranveer ko bhavanatmak sahara deta. Kareeb do mahino tak ilaaj chalne ke baad, aakhir kaar Sanjay apna dam tod deta hain. Uski mrityu ho jaati hain. Sabhi aas pados wale aur rishtedaar aakar shok jatate hain. Rajeev bas yahi sochta rehta hain, ki use apne pita se kiya hua Vaada nibhaana hain. Woh apne ek padosi se baat karke apne liye naukri ka intezaam kar deta hain. Woh naukri ke saath-saath apni aur Ranveer ki padhayi par bhi dhyaan deta tha. Aur Jaise-Taise is parivaar ki gaadi chal rahi thi. Lekin ab pehle jaisi baat nahi reh gayi thi. 

Rajeev bohut mehnat se naukri kar raha tha. Uska ek hi sapna tha ki woh apne Pita ka naam banaye rakhe aur apne Maa aur Bhai ko duniya ki har khushi de. Aakhir mein Rajeev ki padhayi poori ho gayi aur woh ek badi company mein  naukri par lag gaya. Use ek badi post mili thi aur Salary bhi acchi mil rahi thi. Wahan par do saal tak naukri karne ke baad, usne tai kiya ki woh khud ka business shuru karega. 

Ek din ki baat hain jab woh shaam mein kaam khatam karke ghar aaya. Urmila ne use paani diya aur woh paani peene ke baad Urmila se kaha, "Mummy main aapse kuch baat karna chahta hoon."

Urmila - "Haan. Bolo beta."

Rajeev - "Mummy main soch raha hoon ki main naukri chod doon."

Urmila - "Lekin beta agar tum naukri chod doge, toh kaise ghar chal paayega ?"

Rajeev - "Main khud ka business start karna chahta hoon Mummy."

Urmila - "Lekin beta tumhe business ka toh kuch bhi gyaan nahi hain. Kaise karoge tum business ?"

Rajeev - "Kya Papa ko pehle se business ka knowledge tha. Lekin mushkilon ka saamna karte-karte seekhen na woh. Zindagi mein dhakke kha-kha kar hi toh insaan aage badhta hain na Mummy."

Urmila - "Tumhe jo sahi lage woh tum karo. Lekin bas ek hi baat kehna chahti hoon main. Agar tum maan sako toh, main bhi thoda nischint ho jaaungi."

Rajeev - "Aap jo bologi main woh karunga Mummy."

Urmila - "Beta bas agar tum Ranveer ki padhayi khatam hone tak ka intezaar kar lete toh ? Ranveer ke naukri par lagne ke baad agar tum, business shuru karte toh accha rehta beta."

Rajeev - "Thik hain Mummy."

Kuch mahino ke baad Ranveer ki padayi poori ho gayi aur woh naukri dhoondhne mein lag gaya. Uske naukri par lagne ke do teen mahino ke baad Rajeev ne apna business shuru kiya. Use kai baar asafalta ka saamna karna pada, lekin, use apne pita ki kahi baatein yaad aati aur apne pita se kiya hua Vaada bhi yaad aata, 'Ki woh apne jeevan ke har parishthi ka saamna karega.' Bohut sangharshon ke baad, aakhir mein Rajeev apna business shuru karne mein safal raha aur dheere-dheere usne tarakki bhi karna shuru kar diya. Ab toh usne ek zameen bhi kharid li hain. Rajeev ne hamesha apne pita ka maan banaye rakha. 

                  - Ved Vineet Gautam