Purshottam Sahay ek company mein naukri karte hain. Woh manager ki post par tainaat hain. Unki ek patni hain. Patni ka naam Poonam Sahay hain. Un dono ke do bacche hain. Ek beta aur ek beti. Bete ka naam Sumit Sahay hain aur beti ka naam Arpita Sahay hain. Dono bhai behen judwa hain.
Purshottam ne badi mehnat aur lagan se apne parivaar ko ek acche mukaam par pohuchaya hain. Aaj unka khud ka ek flat hain aur unke pass ek Car bhi hain.
Jitni tezi se dono bacche bade ho rahe hain, utni hi tezi se Purshottam aur Poonam par umar ka asar chadhna shuru ho raha hain. Dekhte Hi Dekhte aaj dono baccho ka graduation poora ho chuka hain. Aaj us dampati ko apne dono baccho par naaz ho raha hain.
Ghar mein sabhi sadasya saath mein baithe hue hain. Har kisi ke chehre par muskaan hain. Tabhi Purshottam kehta hain, "Mere pyaare baccho aaj tum dono ne hume bada garvaangit kiya hain."
Poonam - "Haan bilkul. Tum dono itne acche ank ke saath pass hue ho. Pata hain, Urmila Bhabhi keh rahi thi; ki Bhabhi ab toh tum aaram karo aur chaar dhaam ki yatra kar aao. Kyunki, ab toh tumhare dono bacche ghar sambhalne ke layak ban chuke hain."
Sumit aur Arpita muskurate hain. Poonam aage kehti hain, "Bas ab mere dono baccho ki acche se shaadi ho jaaye, toh main bade sukun ke saath jaa sakungi."
"Maa yeh kaisi baat kar rahi ho tum." Sumit kehta hain.
Purshottam - "Poonam tum bilkul thik keh rahi ho. Ab kuch hi mahino mein hum apne dono baccho ki shehnai bajwaayenge."
Arpita - "Lekin Papa abhi toh hum dono naukri par bhi nahi lage hain. Shaadi itni jaldi kaise kar lein ?"
Purshottam - "Dekho beta. Har cheez ka ek sahi samay hota hain. Aur yeh samay tumhare dulhan ban ne ka hain."
Sumit - "Lekin Papa shaadi karne ke baad, zimmedari bohut badh jaayegi aur kharcho ka bhaar alag se pad jaayega. Filhal hum dono tayyar nahi hain shaadi karne ke liye."
Poonam - "Kya tumne dekha nahi, Verma bhabhi ne apne liye kitni acchi bahu dhoondh laayi hain. Unke ghar mein kitni khushiyan aayi hain. Jab bhi milo, bhabhi hamesha muskurati rehti hain."
Purshottam - "Haan beta. Ab humare ghar mein bhi khushiyaan aayengi aur main toh bade shaan ke saath apne bahu aur damaad ka naam lunga."
Arpita - "Papa ab bohut ho chuka hain mazaak."
Purshottam - "Main mazaak nahi kar raha hoon beta."
"Mujhe maaf kariyega Papa lekin, main filhal shaadi nahi kar paaunga." Sumit thoda gambhirta se kehta hain.
Purshottam - "Lekin kyun ?"
Sumit - "Main filhal tayyar nahi hoon."
Arpita - "Main bhi."
Ab maahol thoda sa gambhir ho chuka hain.
Poonam - "Lekin agar abhi nahi karoge toh tum dono shaadi karna kab chahte ho ?"
Arpita - "Filhal toh kaafi waqt hain usmein."
Sumit - "Main bhi 3-4 saal tak toh shaadi nahi karunga."
Poonam - "Aur hum ? Hamara kya beta ? Hum dono ne itni tapasya ke saath tum dono ko paal-poskar bada kiya hain. Kya hamari us tapasya ki koi ahmiyat hi nahi hain ?"
Sumit, Poonam ke paas jaata hain. Woh uska haath pakadta hain aur kehta hain, "Aisi baat nahi hain Mummy. Hum dono ko thoda sa waqt chahiye."
Poonam - "Kitna waqt chahiye ?"
Sumit - "Woh toh nahi bata sakta hoon. Lekin, aap hum dono ko thoda sa waqt de dijiye. Ek baar hamari zindagi raftaar pakad le, toh hum waisa hi karenge; jaisa ki aap chahogi."
Purshottam - "Beta aisa hain na, ki shaadi karne ke baad, aadmi khud-ba-khud zimmedar ban jaata hain. Shaadi ke baad, insaan ki soch mein aur rehan-sehan mein bohut parivartan aata hain. Lekin, yeh sab baatein tumhe shaadi ke bandhan mein badhne ke baad hi samajh mein aayegi."
Arpita - "Aur agar shaadi karne ke baad bhi hum dono utne zimmedar nahi ban paaye, jitna ki hona chahiye toh ? Tab hum kya karenge Papa ?"
Sumit - "Papa hum yeh nahi keh rahe hain, ki hum shaadi nahi karenge. Lekin, pehle hamari utni kamayi toh ho ? Abhi tak toh naukri dhoondhna bhi shuru nahi kiya hain."
Purshottam - "Agar tum dono ko koi pasand hain, toh hume bata do. Hume tumhari pasand se koi aitraaz nahi hoga. Hume apne dono aankhon ke taaron par poora bharosa hain."
Arpita - "Papa agar aapke bacche kisi ko pasand karte hain, toh kya woh aapko us insaan ke baare mein batayenge nahi ?"
Ghar mein ekdum khaamoshi cha jaati hain. Aisa lag raha tha, maano har koi kisi gehre soch ke saagar mein dooba hua hain. Purshottam ek gehri saans leta hain aur kehta hain, "Thik hain baccho. Main tum dono ki baat maan jaaunga. Lekin, meri bhi ek shart hain."
Dono bacche Purshottam ki aur bade dhyaan se dekhte hain. Phir woh kehta hain, "Tum dono saal bhar ke andar shaadi karoge."
Sumit - "Papa mujhe do se teen saal ka waqt lagega."
Purshottam - "Agar tumhari shaadi karne ki iccha hi nahi hain, toh saaf-saaf kyun nahi keh dete ho ? Yeh baaton ko gol-gol ghumana band karo."
Ab Sumit bhi aag babula ho chuka tha aur usne bade gusse mein kaha, "Agar koi ladki ka baap rishta lekar bhi darwaze tak pohucha toh main yeh ghar chod kar chala jaaunga." Yeh kehte hi woh apne kamre mein chala gaya.
Agle din, Sumit apne liye naukri dhoondhne nikal padta hain. Woh na keval naukri dhoondhne ke liye nikla tha, balki safalta ka woh mukaam dhoondhne ke liye woh chal pada tha; jaha par pohuchne ke baad; samaj us insaan ko apne sar par bitha deti hain.
Lekin, zindagi mein kaamyabi naam ka taj paana aasan nahi hota hain. Insaan ko kaafi sangharsh karna padta hain. Ghor tapasya ke baad hi yeh mumkin ho paata hain. Sumit bhi jeevan ke is kathin pareeksha ka saamna karne ke liye apni raah chun chuka tha.
Arpita ghar par hi thi aur apne maata-pita ko samjhane ke prayaas mein lagi hui thi. Haalanki, woh naukri ke liye online apply kar hi rahi thi.
Kareeb saat mahino ke sangharsh ke baad, aakhir kaar Sumit ko ek badi company mein naukri mil gayi. Use mahine ka 40,000 ki pagaar mil rahi thi. Aaj woh bohut khush tha. Woh jald se jald yeh baat apne parivaar ko batana chahta tha. Agar woh chahta toh, woh phone call karke bhi yeh baat apne ghar walon ko bata sakta tha; lekin, woh is pal ko bohut khaas banana chahta tha. Isliye woh jab ghar ke liye nikla tab, usne raaste mein ek mithai ka dabba kharida aur apni laadli behan ke liye chocolate bhi liya. Bhale hi Sumit aur Arpita bade ho chuke ho, lekin un dono bhai behan ke beech mein aaj bhi utna hi sneh hain, jitna ki bachpan mein hua karta tha. Raaste bhar, woh yeh sochta raha ki aakhir woh apne ghar mein yeh baat kis tarah se batayega. Kaafi dino ke baad, aaj use apne maata-pita ke chehre par wahi muskaan dekhne ke liye milegi; jo ki pehle hua karti thi. Kuch dino pehle hue is behas ke wajah se aur naukri na mil paane ke tanaav ke wajah se parivaar ke darmiyaan kaafi mat-bhed aa chuke the. Aaj is khush-khabri se parivaar ke beech ka sneh ek naye seere se ban ne wala tha.
Sumit bus se ghar ki aur wapas aa raha tha. Bus har ek jagah par rukte hue behad dheemi gati se chal rahi thi aur bus ki is dheemi gati Sumit ko bada pareshan bhi kar rahi thi. 'Aakhir yeh bus aaj kuch zyada hi dheemi nahi chal rahi hain ? Kya aaj hi ke din driver ko susti aani thi ?' Woh sochta hain. Tabhi sadak par kisi chote se gaddhe ke wajah se, bus ek jhatka leti hain aur bus mein baithe sabhi yatri us jhatke ke wajah se zara sa uchalte hain. Sumit muskura deta hain. Dekhte Hi Dekhte uska stop aa jata hain. Woh bus se utarta hain aur nazdeek ke ek mithayi ki dukaan ki aur chal padta hain. Lekin, waha par kaafi bheed thi. Shayad zyada der ho jaayegi, yeh sochkar woh dubara ghar ki aur paidal chal padta hain. Kuch minto mein hi woh ghar pohuch jaata hain. Uske chehre par ab bhi wahi muskaan barkarar thi. Woh ghar ki ghanti bajata hain aur Arpita darwaaza kholti hain. Uski aankhon mein aansun the. Arpita ka aisa udaas chehra dekh kar, Sumit ke bhi chehre ka bhaav badal jaata hain aur woh poochta hain, "Kya hua Arpita ?"
Arpita - "Pehle tum andar aa jaao bahiyaa."
Sumit ghar ke andar aata hain aur kehta hain, "Kya hua hain ?"
Arpita - "Bhaiyaa. Papa ke office mein jo nahi Khanna Uncle the ?"
Sumit - "Haan."
Arpita - "Woh ab is duniya mein nahi rahe ?"
Sumit - "Kya ? Yeh tum kya keh rahi ho ?"
Arpita - "Haan main sach keh rahi hoon. Khanna Uncle guzar chuke hain. Papa aur Mummy unhi ke yahan par gaye hue hain."
Sumit - "Par kaise ?"
Arpita - "Woh unka accident ho gaya tha."
Yeh sunkar, Sumit ka dil baith jaata hain. Dono bhai behen ghar mein baithe hue the aur dono hi chup the. Aise haalat mein Sumit, Khanna Sahab ke ghar jaana chahta tha. Par is waqt uska ghar mein rehna bhi zaroori tha. Kyunki, Arpita ko bhavnaatmak sahare ki zaroorat thi.
Purshottam aur Poonam der raat ghar laut te hain. Sumit un dono se kuch der baat karta hain aur poora parivaar apne-apne kamre mein chala jaata hain.
Agli subah Sumit ki neend khulti hain aur woh Hall mein aata hain. Woh dekhta hain ki Purshottam Sofa par baitha hua hain aur woh ab bhi udaas hain. Sumit uske pass jaata hain aur uske kandhe par haath rakh deta hain. Yeh aabhas hote hi, Purshottam Sumit ki aur dekhta hain. Woh chup tha aur dukhi bhi. Phir Sumit kehta hain, "Papa jo ho gaya, woh ho gaya. Ab honi ko toh koi bhi nahi taal sakta hain na ?"
Purshottam - "Haan beta. Lekin, tum bhi jaante ho ki Khanna Sahab mere bohut kareebi dost the."
Sumit - "Papa aap yeh sab se bahar aane ki koshish kariye."
Purshottam - "Beta agar ho sake toh, do-teen din tum kahi bahar mat jaana. Naukri toh baad mein bhi dhoondh hi sakte ho."
Sumit - "Papa mujhe naukri mil chuki hain. Agle hafte se meri training bhi shuru ho jaayegi."
Purshottam - "Yeh toh acchi khabar tum sunaye ho beta. Ab tum shaadi ke baare mein bhi kuch socho."
Sumit - "Papa aap aise samay mein, shaadi ki baat ke baare mein soch bhi kaise sakte ho ?"
Purshottam - "Main tumse kuch baatein karna chahta hoon. Lekin, abhi nahi kuch dino ke baad."
Sumit - "Aap chahe toh abhi baat kariye Papa."
Purshottam - "Main sahi waqt aane par tumse baat karunga."
Sumit - "Aaj aapke dil mein jo bhi hain, kahiye Papa."
Purshottam - "Tum bas aise hi aage badhte raho beta. Khoob mann lagakar kaam karna tum."
Sumit - "Haan Papa."
Phir Purshottam apna maatha masalta hain aur uske chehre ka bhaav tanaav-purn ho jaata hain. Yeh dekhkar Sumit kehta hain, "Kya aapka sar dard kar raha hain Papa ?"
Purshottam - "Haan beta. Thoda sa dard kar raha hain."
"Thik hain. Main aapke liye dawai le aata hoon." Yeh kehte hue, Sumit andar jaata hain aur ek goli aur ek glass paani lekar woh Hall mein dubara aata hain. Phir woh Purshottam ko dawai aur paani ka glass pakda deta hain. Purshottam dawai nigalkar apne kamre mein chala jaata hain aur kuch hi der mein woh gehri neend mein so jaata hain.
Sumit Hall mein hi baitha hua tha. Bohut koshisho ke bawajood, use abhi bhi neend nahi lag paa rahi thi. Kuch der baad, yeh dekhne ke liye ki Purshottam soya hain ki nahi woh uske kamre mein jaata hain aur use gehri neend mein dekh woh aashwast ho jaata hain. Woh mudkar jaa hi raha hota hain ki, use Mez par ek file dikhti hain. Sumit us file ko uthakar kholta hain aur us file mein maujood jaankari dekh kar uske pairon tale zameen khisak jaati hain. Us file mein likha hota hain ki Purshottam ko Cancer hain.
Sumit ko gehra jhatka lagta hain aur woh Hall mein jaakar baith jaata hain. Use samajh mein aa jaata hain ki Purshottam ab zyada din ka mehmaan nahi raha hain. Woh sochta hain ki Purshottam ki khushi ke liye woh shaadi kar lega. Shayad Purshottam ki yeh iccha uski zindagi ki aakhri iccha ho ?
'Ab mujhe bohut samajhdaar ban na hoga. Ghar ki zimmedari ab mere kandhon par aa jaayegi. Mujhe koi accha sa ladka dekh kar, Arpita ki bhi shaadi karani hogi.
Tabhi woh dekhta hain ki Purshottam uske saamne khada hain. Sumit ke haathon mein apni file dekh kar Purshottam bhi chaunk jaata hain aur dono ke aankhon mein aansun aa jaate hain.
Dono ke hi muh se ek lafz nahi nikal paa raha tha aur aankhon se behte hue aansun rukne ka naam nahi le rahe the.
Phir Purshottam bhare hue kanth se kehta hain, "Tum mujhe bahu aur naati-poton ka sukh kab doge ?"
Sumit - "Abse main wahi karunga, jaisa aap kahenge Papa."
Dono ek dusre ko gale lagakar khoob rote hain. Dono hi ek dusre ko kaskar gale lagaye hue the. Yeh sochkar ki kya pata, aakhir kis pal ek dusre ko hamesha ke liye alvida kehna pade.
Comments
Post a Comment