Jyot

Arjun ek naujawan ladka hain. Uske pita ka plastic ka business tha. Woh business ab band pad chuka hain. Unki factory bik chuki hain aur saari zameen jayadad bhi chali gayi hain. Aaj ki tareekh mein agar unka kuch bacha hua hain, toh woh hain, bas unka apna ghar. Aaj, Arjun ki zindagi mein keval andhera hi reh gaya hain. Kai jagah par interviews dene ke baad, aakhir mein use ek company mein naukri mili. Mahine ka 10,000 Rupaye hi uski salary hain. Uski maa bhi thodi bimar chal rahi hain. Jaise-Taise bas un logon ki zindagi kat rahi hain. 

Woh din bhar kaam karne ke baad, shaam mein apne ghar laut ta hain. Kabhi-Kabhi akele mein apne jeevan ke swarn samay ko yaad kar woh ro padta hain. Itni takleef hain uske jeevan mein ki, use koi aasha ki kiran nazar nahi aati hain.  

Ek din woh jab apne ghar ki aur laut raha tha, tab uske company ke maalik Ramesh Bansal apni car se jaa rahe the. Raaste mein unhone Arjun ko dekha toh apne driver se kehkar apni car uske nazdeek khadi kar di aur apne car ka sheesha neeche karke us se kaha, "Arjun. Kaha jaa rahe ho tum ?"

Arjun - "Main apne ghar ki aur jaa raha hoon."

 Ramesh Bansal - "Chalo main tumhe ghar chod deta hoon. Andar aa jaao."

Arjun - "Nahi Sir main chala jaata hoon. Thank You."

Ramesh Bansal - "Are beta zid mat karo main tumhe chod deta hoon. Aao gaadi mein baitho."

Arjun - "Thik hain Sir." 

Arjun Mr. Bansal ko mana nahi kar paaya aur woh unki car main baith gaya. Car chal padi. 

Ramesh Bansal - "Toh Arjun kaise ho tum ?"

Arjun - "Main thik hoon Sir."

Ramesh Bansal - "Aur batao tumhare ghar mein sab kaise hain ?"

Arjun - "Woh log bhi thik hain Sir."

Ramesh Bansal - "Tumhare Papa kya kaam karte hain ?"

Arjun - "Unka khud ka business tha."

Ramesh Bansal - "Business tha ? Matlab ?"

Arjun - "Ab band ho chuka hain."

Ramesh Bansal - "Unka kounsa business tha ?"

Arjun - "Papa ki Plastic Factory thi."

Ramesh Bansal - "Aur ab ?"

Arjun - "Ab sab kuch bik chuka hain Sir."

Ramesh Bansal - "Oh Iam sorry. Toh abhi Papa kya kar rahe hain ?"

Arjun - "Koshish kar rahe hain bas Sir."

Ramesh Bansal - "Dekho beta itna dukhi nahi hote hain. Har insaan ki zindagi mein bura waqt aata hi hain. Ise apni destination samajhkar haath pe haath rakh kar nahi baithna hain tumhe. Main aksar dekhta rehta hoon, tum bohut mehnat se kaam karte ho. Bas tum sabr mat khona. Aage chalkar kuch na kuch accha hi hoga."

Arjun - "Thank You Sir motivate karne ke liye."

Ramesh Bansal - "Aur tum hamesha khush raho. Haste Muskurate raho. Aise tension lekar ya dukhi hokar kuch bhi nahi hoga beta."

Arjun - "OK Sir."

Ramesh Bansal - "Bas apna khayal rakha karo. Apne ghar walon ka khayal rakho. Aur bas mehnat karte raho. Vartaman mein bhi jiyo aur bhavishya ki bhi yojana banate raho. Aur tum hamesha khush raha karo. Thik hain ?"

Arjun - "Thik hain Sir."

Tabhi Arjun ka ghar aa jaata hain aur woh Car se utarkar apne ghar chala jaata hain. 

Poore hafte bhar mehnat karne ke baad, aaj Arjun ki chutti hain aur woh apne ghar par hi baitha hua hain. Baithe-Baithe usne socha ki, 'Agar main koi business start karun toh kaisa rahega ?' Yeh khayal aate hi uske mann mein kai saare sawal bhi khade ho gaye. 'Kya main safal ho paaunga ?' 'Agar kahi main asafal ho gaya toh ? Tab main kya karunga ?' 'Kya main apne jeevan mein kabhi bhi in haalaton se bahar nikal paaunga ?' Yeh saare sawal use pareshan kar rahe. Zindagi ab use ek paheli lagne lagi thi. Lekin, Arjun har haal mein ek safal vyakti ban na chahta tha.

Usne socha, 'Aisa kya kaam hain jo main bohut acche se kar sakta hoon ?' Tabhi uske antarmann se ek aawaz aayi, 'Painting.' Phir usne socha, 'Lekin main aage kaise badhunga ?' Kuch der sochne ke baad bhi use jawab nahi mila. Toh usne socha, 'Dekhte hain. Pehle kam se kam koshish karna toh shuru kar doon main.' 

Mahine ka aakhri din aaya aur uski salary bhi use mil gayi. Agle din Arjun ki chutti thi. Toh woh dukaan jaakar Painting se  jude saare samaan kharid le aaya. Paint Colour, Brush, Canvas aur jo bhi samaan Painting ke kaam ke liye lagta hain. Agli shaam se usne apna kaam shuru kiya. Kariban do mahine tak kaam karne ke baad uski painting poori tarah se tayyar ho gayi thi. Ab woh bas use bechna chahta tha.  

Arjun ne Instagram par apna ek naya account banya. Yeh account uske personal account se alag tha. Aur apne banaye hue us naye account mein usne apni painting ki photo upload ki, jiski tasveer woh apne mobile camera se le chuka tha. Kuch hi dino mein use dher saare likes aur comments mile. Usne apne jaan pehchan walon ko bhi Instagram par apne painting wale account follow request bheji. Kai log follow kiye, toh kai log nahi kiye. Ab woh apne khaali samay mein bas painting banata aur apne Instagram account par upload kar deta. Aisa kai mahino tak chalta raha. Kyunki woh choti moti paintings hi banata tha, isiliye woh kam samay mein zyada se zyada paintings banane mein safal raha. Lekin uski kamayi abhi tak shuru nahi ho paa rahi thi. Bas isi baat se woh thoda sa udas bhi rehta tha. 

Takreeban dedh saal ke baad aakhir kaar, uski mehnat rang laayi. Kyunki usne apne instagram account mein apna contact number bhi daala hua tha, toh ek din use ek anjaan number se call aaya. Arjun ne call receive kiya. Call receive karne ke baad usne kaha, "Hello."

Call ke us aur se awaaz aayi, "Kya main Mr. Arjun se baat kar sakta hoon ?"

Arjun - "Haan main bol raha hoon. Aap koun bol rahe ho Sir ?"

"Mera naam Sunil Saxena hain aur main ek businessman hoon." Phone Call ke dusre aur se aadmi ne kaha. 

Arjun - "OK Sir."

Sunil Saxena - "Maine Instagram par aapki paintings dekhi hain. Mujhe takreeban aapki har ek painting pasand aayi hain."

Arjun ne bohut khushi se kaha, "Thank You Sir." 

Sunil Saxena - "Dekhiye main apne ghar ke liye ek painting banwana chahta hoon. Toh mujhe us baare mein discussion karna hain. Kya aap mere ghar par aa sakte hain ?"

Arjun - "Haan zaroor Sir. Kyun nahi. Main zaroor aaunga. Kab aur kaha par aana hain meeting ke liye ?"

Sunil Saxena - "Kya aap is Sunday ko aa sakte ho mere ghar par ?"

Arjun - "Ji haan zaroor Sir. Sunday ko kaha aur kitne baje aana hain mujhe ?"

Sunil Saxena - "Aap jab chahe tab aa jaiyega. Main Sunday ko aksar free hi rehta hoon. Aur aapke isi contact number par main aapko apna address bhej deta hoon."

Arjun - "Thik hain Sir. Main Sunday ko zaroor aaunga Sir."

Kuch der ke baad, Arjun ke contact number par address aa gaya aur usne address padha. Woh Sunil Saxena se milne ke liye betaab ho raha tha. Woh bas isi ummed mein tha ki woh use koi ek accha bada order de de, toh use ek acchi rakam mil jaayegi. Arjun khush bhi tha aur thoda sa nervous bhi tha. Woh ek ek din gin raha tha. Use ab bas aane wale Sunday ka hi intezaar tha. Sunil Saxena ne use call kiya bhi tha toh Monday ko kiya tha. Woh yeh soch raha tha ki, 'Poora ek hafta wait karna hain mujhe order lene ke liye.' Ab Arjun  Facebook, Instagram aur baaki social media platforms par Sunil Saxena ke baare mein jaankaari nikaalne ki koshish kar raha tha. Lekin, use koi bhi jaankari haasil nahi hui. Woh itna excited tha ki, woh Sunil Saxena se milne ki tayyari bhi bohut alag dhag se kar raha tha. Woh aaine ke saamne baith kar kuch badbadata rehta. Arjun ke ghar walon ko lag raha tha, jaise ki woh kisi interview ki tayyari kar raha hain. Usne toh yeh tak soch liya tha ki, woh kya pehnega. 

Aakhir mein Sunday aa hi gaya. Aaj Arjun utsuk bhi tha aur thoda sa bechain bhi tha. Woh subah uthkar naha dhokar acche se tayyar hua aur  uski maa ne use naashta diya. Ghar se bahar jaane se pehle usne pair chukar apne maa baap ka aashirwad liya. Uske pita ne ghar par hi auto bulwa li thi. Arjun ne apne paintings ke do teen samples bhi saath liye hue the. Woh auto mein baitha aur us address ki aur auto nikal padi. Manzil ki aur badhte hue auto ke saath hi saath Arjun ki dil ki dhadkane bhi badh rahi thi. Use aisa lag raha tha ki ab bas uska dil bahar hi nikal aayega. Aakhir kaar takreeban ek ghante ke baad auto us address par pahuchi. Arjun aakhir kaar Sunil Saxena ke ghar par pahuch chuka tha. Usne apni paintings bahar nikaali aur woh thodi si ghabrahat, thodi si khushi aur dher saari ummeedon ke saath Sunil Saxena ke bangle ke gate ke saamne pahucha. Usne gate ki Bell bajayi. Takreeban teen minute ke baad gate khula. Ek 30-35 saal ke aadmi ne gate khola. Gate shayad kisi servant ne khola hoga yeh soch kar usne us aadmi se pucha, "Sunil Saxena ji hain ghar par ?" 

Us aadmi ne kaha, "Sahab abhi bahar gaye hue hain."

"Darasal unhone aaj mujhe bulaaya tha milne ke liye." Arjun ne kaha. 

"Aap do minute ke liye rukiye." Yeh kehkar woh aadmi andar gaya aur thodi der ke baad woh wapas aaya. Dubara aate hi usne kaha, "Aap andar aa jaaiye." Arjun us aadmi ke saath andar gaya aur us aadmi ne Arjun ko bangle ke hall mein le gaya. Phir us naukar ne kaha, "Aap baith jaaiye. Sahab abhi bahar gaye hue hain. Unhe aane mein thoda sa waqt lagega."

"Thik hain." Yeh keh kar Arjun Sofa par baith gaya. 

Phir naukar ne pucha, "Kya aap kuch lenge ? Chai, Coffee, Ya Juice ?"

"Jee nahi shukriya." Arjun ne muskurakar kaha. 

Sunil Saxena ke bangle ka interior dekh kar, Arjun bohut hairaan reh gaya. Bangla itna khubsurat tha aur us par do teen paintings bhi lagi hui thi. Use kaafi der tak intezaar karna pada. 

Takreeban teen ghante ke baad, Sunil Saxena apne bangle ke andar aaya. Woh suit pehna hua tha. Use dekhte hi Arjun khada hua aur Sunil Saxena uske saamne aaya. Phir usne apna haath aage badhaya aur kaha, "Hi Iam Sunil Saxena."

Arjun - "Iam Arjun. Aapse hi phone par baat hui thi meri Sir ?"

Sunil Saxena - "Haan. Nice to meet you Arjun."

Arjun - "My pleasure Sir."

Sunil Saxena - "Please Baithiye."

Dono sofa par baithe.

Sunil Saxena - "Aap chai ya coffee kuch lenge ?"

Arjun - "Nahi Sir. Thanks Alot." Phir Sunil Saxena ne kaha, "Please aap apni paintings dikhaiye." Arjun ne ek painting kholi aur use lekar Sunil Saxena ke saamne khada ho gaya. Usne kuch der tak dekha aur thoda sa muskura diya. Phir usne kaha, "Yahan par aapka colour thoda sa phail gaya hain." 

Arjun saamne ki aur jhuka aur pucha, "Kaha par Sir ?"

Sunil Saxena ne apni ungli se dikhaya. Arjun ne dekha, wahan par sach mein colour thoda sa phaila hua tha. 

"Is aadmi ko waqai mein painting ki bohut gehri parakh hain." Arjun ne socha. 

Uske baad usne Arjun se dusri painting khulwai aur use bhi thodi der tak dekha. Usne ek-ek karke Arjun se saari paintings khulwai aur unhe dekha. 

Uske baad Sunil Saxena ne Arjun se uski saari paintings ko  ek line mein, ek dusre ke bagal mein khada karwaya aur woh phir se saari paintings par nazar daudaya. 

Kuch der tak sochne ke baad aakhir mein, usne ek painting ki aur apni ungli karte hue kaha, "Aap kitna charge karenge is wali painting ka ?"

Arjun - "Aap jo chahe Sir."

Sunil Saxena - "Kabhi bhi aisa mat kaho."

Arjun uski taraf dhyaan se dekh raha tha. 

Sunil Saxena - "Dekho kabhi bhi, kisi bhi client ke pass aap apni painting dikhana toh apni price zaroor batana use. Ek price kabhi bhi soch lena aur use batana. Uske baad woh aapke saath negotiation karega aur aapse price kam karwane ki ummeed rakhega. Kabhi-Kabhi aapko apni price kam bhi karna pade lekin is baat ka hamesha dhyaan rakhna ki aapki jo cost lagi hain us art ko banane mein us se zyada ka hi price aapko mile use bechne par."

Arjun - "OK Sir."

Sunil Saxena - "Iske making mein aapka kitna cost laga hain ?"

Arjun - "Mujhe toh koi idea nahi hain Sir."

Sunil Saxena - "Thik hain. Next time se jo maine kaha hain, is baat ka dhyaan rakhna. Aap ek kaam kariye, yeh wali painting mujhe de dijiye." Usne ek painting ki aur ungli se ishaara karte hue kaha. 

Uske baad usne Arjun se uska account details pucha aur use online payment kiya. Thodi der baad Arjun ko bank ki taraf se message aaya. Uske account mein 30,000 Rupaye aa chuke the. Woh bohut khush hua aur usne Sunil Saxena ki pasand ki painting use pakda di. 

"Thank You very much Sir." Yeh kehkar uske aankhon mein aansun aa gaye. 

Sunil Saxena - "Yeh aapka pehla painting bika hain ?"

Arjun ne haan mein apna sar hilaya. 

Sunil Saxena - "Dekho beta zindagi mein hum aaj kis paristithi mein hain, yeh maayne nahi rakhta hain. Maayne yeh rakhta hain, ki hum kaha par pahunchna chahte hain. Chahe kuch bhi ho jaaye, tum kabhi bhi apna atmavishwas mat khona. Zindagi mein sab kuch chale jaaye toh bhi wapas aa sakta hain. Insaan chahe toh apni zindagi mein sab kuch haasil kar sakta hain, sirf or sirf apne atmavishwas ke dum par."

Uske baad Sunil Saxena ne coffee mangwayi aur use jeevan ke mahatvapoorn mool mantra diye. Arjun unki baaton se bohut prabhavit hua aur use apne jeevan mein aage badhne ka raasta nazar aaya. Use apne jeevan ke andhkaar se bahar nikalne ka raasta nazar aaya aur uske mann mein aasha ki jyot jagi. 

                - Ved Vineet Gautam