Parishram

Abhay ek mehnati naujawan hain. Usne Computer Engineering kiya hain. Lekin use kahi acchi naukri nahi mil paa rahi thi. Aakhir mein use ek company mein Cab Driver ki naukri mil gayi. Mahine ka 15,000 Rupaye uski salary hain.

Abhay ke ghar mein uske maata-pita aur uski ek choti behan hain. Uske Pita ka naam Suresh hain aur uski behan naam Sheela hain. Sheela abhi college mein graduation ki padhayi kar rahi hain. 

Woh aksar alag-alag shift mein kaam par jaata rehta hain. Kabhi-Kabhi woh over time bhi karta hain. Over Time kaam karke woh 2,000-3,000 Rupaye extra kama leta hain. 

Ek din, woh kaam khatam karke shaam mein apne ghar par aaya. Tab woh haath-muh dhokar aur fresh hokar, apne ghar walon ke saath khana khaane ke liye baitha. Parivaar mein baat-cheet ho rahi thi. Tabhi baat karte-karte Abhay ke pita ne kaha, "Sheela abhi 2nd year mein padh rahi hain, agle saal uska bhi graduation khatam ho jaayega. Phir hum uski shaadi kisi acche ghar mein kara denge."

Abhay - "Kya aapne koi ladka dekha hain abhi ?"

Suresh - "Nahi beta. Abhi toh nahi."

Abhay - "Ek accha kamata hua ladka ho. Jo acchi naukri karta ho ya business kare toh aur badhiya hain."

Suresh - "Lekin beta hamari utni capacity bhi toh nahi hain. Utna dahej bhi toh hume dena hoga ? Ek toh aaj kal acche ladke jaldi kahi milte nahi hain."

Abhay - "Hmm. Yeh baat toh hain Papa. Main dekhta hoon. Kuch plan karta hoon taaki thodi acchi kamayi ho."

Suresh - "Kya kaam karoge ?"

Abhay - "Abhi toh sochunga Papa."

Suresh - "Lekin jo bhi kaam karna bohut soch samajh kar karna beta."

Abhay - "Haan Papa."

Poore parivaar ne khana khatam kiya aur sabhi apne-apne kamre mein sone ke liye chale gaye. 

Abhay raat mein lete-lete soch raha tha ki log aakhir kaisi-kaisi zindagi jeete hain. Aur hum log bas Roti, Kapada Aur Makaan ke aage kabhi bhi soch hi nahi paate hain. Bas khud ka ek ghar ho jaaye, toh aisa lagta hain ki zindagi mein sab kuch haasil kar liya. Iske aage bhi toh bohut kuch hoga. Sheela ki shaadi bhi kisi acche ghar mein karani hain. Dahej bhi toh accha khaasa dena hoga hume? Apni utni capacity bhi toh honi chahiye? 

Uske baad usne socha ki woh khud ka kuch kaam shuru karne ki koshish karega. Usne kai freelancing sites par apna account banaya aur uski thodi bohut kamayi shuru ho gayi. Ab woh mahine ka 3,000-4,000 Rupaye freelancing se kama hi leta tha aur woh poora paisa ghar ke liye kharch karta tha. Ghar mein sabhi log bohut khush the. Lekin Abhay itne se santusht nahi tha. Use apne aap se bohut saari ummedin thi. Uska target tha ki woh mahine ka kam se kam chaalis se pachas hajaar kamaye. 

Waqt bohut tez gati se daud raha tha aur Abhay bhi rukne walon mein se nahi tha. Usne apni ek website banayi jisme woh Computer Engineering se related jaankari di jaayegi. Jaise ki Computer Engineering kya hota hain. Woh karne ke baad kounsi companies mein accha scope hain. Aur Computer Engineering se related market mein kounsi acchi kitabein maujood hain. Usne yeh baat apne ghar par aur apne doston ko bhi batayi. Abhay Ke Pita ne yeh baat apne rishtedaaron ko bhi batayi. Kuch mahino baad uski mehnat rang laayi. Dheere-Dheere uski website par visit badhne lage aur usne apni website se kamana bhi shuru kar diya. Ab woh mahine ka 25,000-30,000 Rupaye kama raha tha. 

Abhay Ke Pita ne Sheela ke liye ek ladka pasand bhi kar liya tha. Woh ladka ek young businessman tha. Uske ghar mein uske maata-pita the aur ek chota bhai bhi tha. Woh ladka dikhne mein bhi bohut khubsurat aur shareef tha. Aakhir mein woh Rishta tai hua aur Sheela ki shaadi badi dhoom-dhaam se hui. Un logon ne koi bhi dahej nahi liya. Sabhi log bohut khush the. 

Ab Abhay apne jeevan mein aur aage badhna chahta tha. Uski soch din prati din badi hoti gayi. Woh apni naukri se pori tarah se mukt hona chahta tha. Usne khud ki ek IT Company kholne ka sapna dekha. Usne IT Companies se related jaankari lena shuru kiya. Dekhte Hi Dekhte usne kuch mahino mein hi bohut saari jaankari ikattha kar li thi. Ab usne apne kaam ko aur zyada gati di. Lekin company ka registration karane se lekar poora set up lagane tak mein bohut bade nivesh ki aavashyakata thi. Saal bhar nikal chuka tha lekin Abhay wahi ka wahi par khada tha. Yadi woh Bank se loan leta toh use apna ghar girvi rakhna padta. Isliye woh yeh kadam nahi uthana chahta tha. Woh aage badh nahi paa raha tha. Ab woh bohut zyada tension lene lag gaya tha. Uske Pita ne use samjhaya ki use apne jeevan mein, ummeed kabhi bhi nahi khoni chahiye. 

Abhay - "Lekin ab main aage badhu kaise ?"

Suresh - "Ho jaayega beta sabr rakhna seekho. Jeevan mein safalta kisi ko raato raat nahi milti hain. Dekho safalta ki raah aasaan nahi hoti hain. Uske liye bohut kathin pareeksha deni padti hain. Aadmi ko jeevan mein bohut sangharsh karna padta hain."

Abhay - "Lekin Papa ab main aage kya karun kuch bhi samajh mein nahi aa raha hain."

Suresh - "Dekho beta manushya ko apne jeevan mein jo kuch paana hain, woh paane ke liye use duniya bhar ke dhakke khaane padte hain. Is duniya mein ko bhi raato raat safal nahi bana hain. Jo bhi kaam karo poore dil se karo. Bohut mann laga kar kaam karo. Bina mehnat ke koi bhi aage nahi badh sakta hain. Tum tension mat lo aur abhi khaana kha ke so jaao."

Pita ki baat maante hue, Abhay khaana kha leta hain. Lekin uska sar tension se bohut phat raha tha. Toh usne sar dard ki goli kha li aur phir woh so gaya. Woh apni website se kamaa raha tha lekin, ab woh khush nahi tha. Uska saara dhyaan keval isi baat par tha, ki woh kaise apni IT Company khole. 

Ek din Suresh ne Abhay se kaha ki, "Tum ek kaam karo. IT Companies se related jitni saari jaankaari tum online dhoondh sakte ho dhoondho."

Abhay - "Maine bohut saari jaankari li hain."

Suresh - "Jaankari ki gehrai mein jaao. In-Depth knowledge lo. Gyaan ke bina ek padha-likha manushya bhi kuch prapt nahi kar sakta hain. Ek Agyaani hi hain jise lagta hain ki woh sab kuch jaanta hain. Aur aisa manushya jeevan mein keval sar pakad kar ro sakta hain. Lekin ek Gyaani hamesha Gyaan ka bhookha hota hain. Woh hamesha kuch na kuch naya sikhne ka prayas karte rehta hain. Aur Gyaan ek aisa topic hain, jise jitna jaano utna kam hain. Gyaan kabhi bhi khatam nahi hota hain. Gyaan anant hain. Aur keval Gyaan prapt karna hi kaafi nahi hota hain. Use Amal mein bhi laana padta hain. Bina implementation ke knowledge ki koi bhi value nahi hoti hain."

Abhay - "Lekin main yeh kaise jaanu ki sahi kadam kounsa hain. Sahi aur Galat ke beech ka fark mujhe pata kaise chalega. Main jis raaste par chal raha hoon uski manzil kya hogi, iske baare mein mujhe kaise pata chalega ?"

Suresh - "Galtiyan toh tum karoge. Bina galti kiye insaan apne jeevan mein aage badh hi nahi sakta hain. Galtiyan karne se mat daro. Un galtiyon se seekho aur aage badhne ki ran-neeti banao. Aur saath hi saath ek aur baat, jo yojna manushya aage badhne ke liye banata hain; zaroori nahi hain ki, wahi yojna use shikhar par pohuvhaye. Aadmi ko apni yojnao ko baar-baar badalna padta hain. Use apni yojnao ko, samay aur paristhiti anusar badalna padta hain."

Apne pita ki baatein sunkar Abhay ko bohut prerna mili. Use ehsaas hua ki, jeevan mein safalta keval saal do saal ki mehnat ka hi parinaam nahi hota hain. Manushya ko safalta saalon saal ki mehnat ke baad hi mil paati hain. Usne socha ki woh bas poori shiddat ke saath sirf aur sirf mehnat karta rahega aur parinaam ke baare mein zyada nahi sochega. 

Ab usne ek nayi soch ke saath dubara shuruat karne ki thaan li thi. Agle din se woh phir se apne kaam mein lag gaya tha. Is baar, usne pehle se zyada josh aur utsaah ke saath kaam karna shuru kiya. Uska rujhaan software mein zyada tha. Toh usne tai kiya ki woh ek software banayega. Kareeban 6 mahino tak kaam karne ke baad usne ek software tayyar kiya. Ab sawaal yeh uthta hain ki use aakhir becha kaise jaaye ? Ab Abhay ne marketing strategy par kaam karna shuru kiya. Usne kai mobile handset, computer aur laptop companies ko e-mails bheje aur woh har roz apne software mein sudhaar ki koshish bhi karte rehta tha. Ek aur apne woh software mein sudhaar laane ke liye din bhar mehnat karta aur dusri aur woh apne software ko bechne ke liye roz alag-alag companies ko e-mails bhejta tha. Aur job toh woh kar hi raha tha. 

Ek din ki baat hain jab uske Cab mein ek passenger aaya aur use thoda zyada dur tak jaana tha. Woh passenger ek bada aadmi lag raha tha. Usne Suit aur Tie pehna hua tha. Joota bohut chamkeela tha uska aur uske haathon mein Rolex ki ghadi aur ek bohut hi mehnga mobile phone tha. 

Cab mein baithte hi usne Abhay ko bata diya tha ki use din bhar ke liye yeh cab lagegi aur shaam mein deri bhi ho sakti hain. Use kai alag-alag jagah par jaana tha meeting ke liye. Abhay maan gaya. 

Woh aadmi ek destination cab ke App mein set karta wahan jaakar meeting karta. Ghante do ghante baad, woh bahar aata. Phir woh dusra destination set karta, aur Abhay use waha samay par pahucha deta. Aisa karte karte shaam ho gayi. Usne Abhay ko bataya ki yeh uski aakhri meeting hogi. Use andaaza lag chuka tha ki Abhay ko bohut bhookh lagi hogi. Toh usne Abhay ko 2,000 Rupaye diye aur kaha ki, "Main yahan se bhi thoda late aaunga toh tum kuch khaa lo tab tak."

Abhay ne pehle mana kar diya. Lekin uske force karne par aakhir mein woh maan gaya aur usne woh paise le liye. Use waqai mein bohut bhookh lagi hui thi. Usne pet bhar ke sandwich khaaya. Phir usne socha ki woh aadmi bhi toh din bhar uske saath hi tha. Shayad usne bhi kuch na khaaya ho. Abhay ne uske liye bhi ek sandwich pack karwa liya. Ek ghante baad woh aadmi bahar aaya aur Abhay ki cab mein dubara baitha. Abhay ne us se pucha, "Sir abhi kaha par aapko jaana hain ?"

Us aadmi ne kaha ki, "Tum mujhe ghar chod do ab." Usne Abhay ko apne ghar ka address bataya. Abhay ne gaadi start ki aur us aadmi ko woh packed sandwich dete hue kaha, "Sir yeh sandwich aapke liye."

Us aadmi ne kaha, "Maine toh tumhe tumhare khaane ke liye paise diye the."

Abhay - "Haan Sir. Main toh kha chuka hoon."

"Phir ?" Us aadmi ne pucha.

Abhay - "Sir aap bhi toh din bhar kuch bhi nahi khaaye honge. Sandwich saste mein hi mil raha tha. Toh isliye maine socha ki aapke liye bhi ek pack karwa loon." Uske baad Abhay ne apne jeb se kuch paise nikale aur kaha, "Sir yeh baaki ke bache hue paise hain."

Us anjaan vyakti ne kaha, "Nahi woh paise tum hi rakh lo. Aaj din bhar itni mehnat kiye ho tum. Din bhar tum mere saath the."

Abhay ne pehle woh paise rakhne se manaa kiya. Lekin baad mein us vyakti ke force karne par usne woh paise rakh liye. Raaste mein woh dono ne duniya bhar ki baatein ki. Baatein karte-karte usne Abhay ko bataya ki woh ek company ka maalik hain aur uski gaadi kharab ho gayi thi toh usne cab book kiya. Jab us aadmi ko pata chala ki Abhay bhi ek company start karna chahta hain, toh usne Abhay ko bohut saare tips diye. Abhay ne woh saare tips apne mobile mein note down kar liye. Abhay ko ehsaas hua ki use business ke baare mein aur IT Industry ke baare mein kuch bhi nahi pata hain. 

Aakhir kaar us aadmi ka ghar aaya aur usne Abhay ko apna card diya aur kaha, "Tum mujhe Saturday ko shaam mein call karna main tumhe bataunga ki tumhe meeting ke liye kab aana hain ?"

Abhay ne use Shanivaar ki shaam mein call kiya aur usne agle din Abhay ko apne office bulaya meeting ke liye. Woh poori tayyari ke saath gaya wahan par. Meeting din bhar chali aur aakhir mein use Abhay ka plan pasand aaya. Woh uske start up mein invest karne ke liye tayyar ho gaya. 

Abhay ka parivaar bohut khush hua yeh jaankar. Abhay ne apni naukri se resign kar diya aur apni company ko shuru karne ki tayyari mein lag gaya.  

                  - Ved Vineet Gautam