Hataash

Rohan ek naujawan ladka hain. Woh apne maata-pita ka eklauta ladka hain. Uske pita peshe se ek doctor hain. Unka naam Ajay Kumar hain. Woh ek aspataal mein naukri karte hain.

 Rohan ne Computer Engineering ka course kiya hua hain. Kai jagah par interviews dene ke bawjood, use kahi par bhi naukri nahi mili.  Thak-Haar kar ek din woh apne kamre mein baitha hua tha. Woh behad udaas tha. Uske pita uske pass aaye aur kaha, "Beta kya hua ? Tum itne dukhi kyun ho ?"

Rohan - "Kuch nahi Papa. Bas aise hi ?"

Ajay Kumar - "Kuch toh baat hogi. Kya hua hain tumhe ?"

Rohan - "Abhi tak mujhe kahi par bhi naukri nahi mili. Main aage kya karun, mujhe kuch bhi samajh mein nahi aa raha hain."

Ajay Kumar - "Beta koshish karte raho. Kuch na kuch ho hi jaayega."

Rohan - "Pichle do mahino se toh main koshish hi kar raha hoon. Kuch bhi toh nahi ho paa raha hain Papa."

Ajay Kumar - "Kabhi na kabhi toh naukri milegi hi na. Aise udaas nahi hote hain."

Rohan - "Kya aapko pata hain, pichli baar jab maine interview diya tha, tab mera selection almost hone hi wala tha, lekin sirf ek problem ho gayi thi."

Ajay Kumar - "Kya hua tha ?"

Rohan - "Mera interview hone ke baad, wahan par ek dusra candidate aaya, jise job ka experience bhi accha tha. Toh use le liya aur main reject ho gaya."

Ajay Kumar - "Yeh sab toh zindagi bhar laga rahega. In sab baaton ka tension nahi lete hain."

Rohan - "Ab main aage kya karoon, mujhe kuch samajh mein nahi aa raha hain."

Ajay Kumar - "Tum sirf apne interviews acche se dete raho. Baaki sab dheere-dheere thik ho jaayega."

Rohan - "OK Papa."

Ajay Kumar - "Ab tum khaana kha kar so jaao. Aur abhi tum ek do din ghar par hi raho. Uske baad dete rehna interviews. OK ?"

Rohan - "OK Papa."

Teen din tak ghar par rehne ke baad, Rohan chauthe din interview ke liye gaya. Interview par jaane se pehle, usne apne maa-baap ka aashirwad liya aur unhone bhi use khub protsahit kiya. Office par pahuchne ke kareeb do ghante baad, Rohan ko interview ke liye bulaya gaya. Interviewer ne pehla sawaal kiya, "Apna introduction do Rohan."

Rohan - "Mera naam Rohan Pillai. Maine apni engineering  Mumbai University se poori ki hain. Mere pita ek doctor hain aur meri maa ek housewife hain."

Interviewer - "Kya aapne is se pehle kahi par bhi kaam kiya hain ? Kya aapko kaam karne ka koi anubhav hain ?"

Rohan - "Ji nahi Sir. Yeh meri pehli naukri hogi."

Interviewer - "Hum aapko naukri kyun de ? Hume anubhavi log bhi mil rahe hain."

Rohan - "Sir insaan ko kahi na kahi se shuruat toh karni hi hogi."

Interviewer - "Yeh koi jaayaz wajah nahi banti hain naukri dene ki."

Yeh sunkar Rohan thoda sa soch mein pad gaya. Usne kuch seconds ke liye socha aur kaha, "Sir main kabhi bhi haar nahi maanta hoon. Aap mujhe jo bhi kaam denge, main woh bohut acche se pura karunga aur woh bhi diye gaye samay ke andar."

Interviewer - "Aur agar aap kaam mein koi aisi badi galti kar do, jo ki nazarandaaz na kiya jaa sake ?"

Rohan - "Sir main aapse bina puche koi kaam nahi karunga. Jahan par bhi mujhe kaam samajh mein nahi aayega, main wahan par aapse ya office ke kisi bhi senior se mashwara lekar hi koi kadam utaunga."

Interviewer - "Lekin phir bhi insaan toh galtiyon ka putla hota hain. Agar koi aisi badi galti ho gayi, jo ki maaf nahi kiya jaa sake ?"

Rohan - "Aap mujhe bina salary diye hi naukri se nikaal dena Sir."

Interviewer - "OK. Aap thodi der ke liye bahar intezaar kariye, main aapko bulata hoon."

Rohan - "OK Sir." Yeh kehkar woh bahar reception mein chala jaata hain. 

Intezaar karte-karte shaam ho jaati hain. Shaam mein kareeban 7 baje use bulaya jaata hain aur kaha jaata hain, ki uska selection nahi hua. Woh muh latkakar wapas apne ghar par chala jaata hain. Lagatar mil rahe rejections se woh ab bohut tang aa chuka hain. Use aisa lagne lag raha hain, ki woh kisi layak hi nahi hain. 

Ek shaam apne kamre mein lete-lete woh bohut kuch soch raha tha. Uske zehen mein bohut kuch chal raha tha. Woh khayalon ka samundar mein doob raha tha. Rohan soch raha tha, 'Kya main is layak bhi nahi hoon ki mujhe ek maamuli si naukri bhi nahi mil sakti hain ?' 'Kya main apni zindagi mein kuch kar bhi paaunga ya nahi ?' 'Mere jeevan ka aakhir upyog kya hain ?' 'Kya main apne jeevan mein koi bhi lakshya prapt kar paaunga ya nahi ?' 'Kya main apne jeevan mein kisi manzil tak pahuch bhi paaunga ?' Yeh sab sochte-sochte use neend lag gayi. 

Agle din woh utha aur tayyar hokar dubara naukri dhundhne ke liye nikal pada. Aur waha se bhi reject hokar woh wapas ghar laut aaya. Dheere-Dheere Rohan ab Depression mein jaane laga tha. Use yeh lagne laga tha ki woh apne Maa-Baap par bojh banta jaa raha hain. Rohan ka atmavishvas kareeban khatam ho chuka tha. 

Use jaldi neend nahi lagti thi. Kabhi-Kabhi raat mein woh kitchen mein jaata aur table par pade hue stand par se alag-alag chaku utha kar unhe dhyaan se dekhta aur dubara stand par rakh deta. 

Rohan ke bartaav mein aaye hue badlaav dekhkar uske maata-pita ab chintit hone lag gaye the. Kyunki Rohan ke pita ek doctor the, toh woh bohut samjhadaari se us se baat karke uske mann ki baatein ugalvaane ki koshish karte the aur phir us hisaab se Rohan ko samjhane ki koshish karte the. 

Ek din Ajay Kumar ne usse kaha, "Beta kal hum sab log bahar jaayenge."

Rohan - "Kaha par Papa ?"

Ajay Kumar - "Kal hum sab saath mein shopping ke liye jaayenge."

Rohan - "OK Papa."

Ajay Kumar - "Kya tumne khana kha liya hain beta ?"

Rohan - "Haan."

Ajay Kumar - "Thik hain. Tum so jaao, kal hum sab milkar thoda sa enjoy bhi karenge."

Rohan - "OK Papa."

Ajay Kumar - "Good Night beta."

Rohan - "Good Night Papa."

Agle din, woh sab log ghumne ke liye gaye. Ghar ke nazdeek ke ek Mall mein jaakar, pehle un logon ne ghar ke sabhi zaroori saaman kharide aur phir Mall ke hi Cinema Hall ke bahar jaa khade hue. 

Ajay Kumar - "Toh beta tum kounsi movie dekhoge ?"

Rohan - "Nahi mera koi bhi movie dekhne ka mood nahi hain."

Ajay Kumar - "Aaj dekh lete hain na beta. Bohut din ho gaye hain, hum logon ne saath mein koi bhi movie nahi dekhi hain."

Rohan - "OK. Mr. Bean dekhte hain hum log."

Ajay Kumar - "Good Choice Beta."

Ajay Kumar ne counter par jaakar tickets nikaale aur uske baad woh sab log andar jaakar movie dekhna shuru kiye. Interval mein, Ajay Kumar ne Rohan se pucha, "Beta kya tum kuch khaaoge ?"

Rohan - "Nahi bas Cold Drink Papa."

Ajay Kumar - "Kuch toh khaa lo beta."

Rohan - "Nahi woh mera mann nahi hain."

Ajay Kumar - "OK lekin movie ke baad, kuch na kuch khaana hi padega. Aaj raat mein hum sab dinner bahar karenge."

Rohan - "OK Papa."

Woh log movie dekhne ke liye, wapas andar chale gaye. Movie khatam hone ke baad, woh log ek restaurant mein gaye aur saath mein khaana khaye. Khaana khatam hone ke baad, Ajay Kumar ne kaha, "Rohan ab tum Ice-Cream loge ya Cold Drink ?"

Rohan - "Butter Scotch Ice Cream."

Ajay Kumar ne Ice-Cream order kiya aur Rohan ke khaane ke baad, woh log Car mein baithkar wapas ghar ke liye nikal gaye. 

Rohan ke badle hue bartaav ko dekhkar, Ajay Kumar ko andaaza lag chuka tha, ki woh depression mein jaa chuka hain. Apne bete ki haalat ko dekhkar woh bohut chintit ho chuke the. Woh Rohan ki mano stithi ko alag-alag tarikon se samjhne ki koshish karte aur kabhi uske pass baithkar use samjhaate, toh kabhi use apne saath bahar ghumane ke liye le jaate. 

Ek din, Ajay Kumar ne Rohan se kaha, "Dekho beta. Jab tak tum poore atmavishwas ke saath baat-cheet nahi karoge, tab tak tum apne jeevan mein aage nahi badh paaoge. Main aur tumhari mummy saari zindagi tumhare saath nahi rahenge. Ek na ek din, tumhe apni zindagi ki saari mushkilon ka saamna khud karna hoga. Toh yeh sab kuch handle karna seekho tum." 

Rohan - "Har jagah se toh main reject hokar aa raha hoon."

Ajay Kumar - "Ek baat samajh lo beta, kal ko toh yeh bhi ho sakta hain ki, bohut acche se kaam karne ke bawjood tumhe bina kisi wajah ke, naukri se nikaal diya jaaye. Isse bura yeh bhi ho sakta hain ki tumhe salary diye bina hi naukri se nikaal diya jaaye. Tab tum kya karoge ?"

Rohan chup tha.

Ajay Kumar ne aage kaha, "Apne aap ko tum sambhalna seekho. Tumhe bohut kuch seekhna hoga. Aur woh sab kuch zindagi tumhe seekhayegi. Tumhe bas ek baat apne dimaag mein baitha leni hain; ki chahe haalat kaise bhi kyun na ho, tum har haal mein apne jeevan ke har paristithi ka saamna poori needarta se karoge."

Rohan apne kamre mein gaya aur kaafi der tak sochta raha. Phir usne socha ki ek baar himmat ka raasta apna kar dekhte hain. Rohan ne apne dimaag mein yeh baat baitha li thi ki, use har haal mein apni zindagi ke har musibat ka saamna karna hi hain. 

Agle din, woh ek company mein interview ke liye gaya. Aur woh waha se bhi reject ho gaya. Is baar bhi woh niraash hua. Lekin, ab usne apni niraasha se ladne ki koshish karna shuru kiya. 

Rohan ne socha, 'Main tai karta hoon ki main tab tak nahi rukunga, jab tak ki 100 interviews dekar poora na kar loon.'

Agle din se usne poore josh ke saath interviews dena shuru kiya. Woh baar-baar apna aatmavishwas badhane ki koshish karte rehta tha. Kareeb do mahino ke baad, Rohan ko ek company mein naukri mil gayi. Use 16,000 / - Rupaye salary mil rahi thi.

 Woh bohut khush tha. Use aisa lag raha tha, jaise ki usne koi jung jeet li ho. Jab usne apni naukri ki baat, apne maata-pita ko batayi, tab woh log bhi bohut khush hue. Lekin, uski yeh khushi zyada din tak tik na paayi. Do mahino ke baad, use wahan se nikaal diya gaya. 

Rohan ne tai kar liya tha, ki woh har haal mein saamna karega. Usne dubara interviews dena shuru kiye aur 15 din baad hi use ek nayi naukri mil gayi. Wahan par use 15,000 / - Rupaye salary mil rahi thi. Kareeb ek saal tak kaam karne ke baad, uski iccha aur aage badhne ki hui. Ab woh poori raftaar ke saath, apni zindagi mein aage badhna chahta tha. 

Kai mahino tak kaam karne ke baad, Rohan ne ek software banaya. Usne kai companies ko contact karne ki koshish ki. Kareeb 6 mahine ke baad, use ek company ne meeting ke liye bulaya. Woh poori tayyari ke saath gaya waha par. Rohan ne apna presentation diya aur uska presentation khatam hone ke baad, company ke board of directors ne kaha, "Hum aapko sochkar batayenge."

Rohan waha se chala gaya. Lekin woh ruka nahi. Agle din, usne ek dusri company ko contact kiya. Us company ne use, ek hafte ke baad, milne ke liye bulaya. Aur woh waha se bhi reject ho gaya. Ya toh uska software reject ho jaata, ya phir us se kehte ki, use call karke bataya jaayega. Aur jab kuch din beet jaate, toh woh un companies ko contact karta, jahan par usne apna presentation diya hua tha. Contact karne ke baad, use pata chalta ki uska software reject kar diya gaya hain. 

Lekin ab in sab baaton se Rohan ko zara bhi fark nahi padta tha. Jeevan mein lagatar mil rahi asafalta se, ab woh nirash nahi hota hain. 

Rohan mein yeh sab badlaav dekhkar uske maata-pita ab uske baare mein nischint ho chuke the. Aur woh log baar-baar uske saamne apni khushi bhi zaahir karte rehte the. In sab baaton se, Rohan ko aur protsahan milta tha. 

Kareeb do saal ki kadi mehnat ke baad, aakhir mein usne safalata ka thoda sa swad chakha. Ek multi-national company ne uska software khareeda aur uske saare rights bhi kharid liye. Uske liye unhone Rohan ko 20 laakh rupaye diye. Rohan bohut khush hua aur uske maata-pita bhi uski tarakki dekhkar khush the. Rohan ke jeevan ko badalta hua dekh kar, jaan pehchan wale sab hairaan the. Woh log jab bhi Rohan ke maata-pita se milte, toh uske taarifon ke pul baandhna na bhulte. Woh sabhi log ab yeh kehne lag gaye hain ki, apne jeevan se hamesha hataash rehne wala ladka, aaj itna aage badh gaya hain. Jeevan mein hamesha nirash rehne wala ladka, aaj ek ke baad ek tarakki ke mukaam tai kiye jaa raha hain. Yeh sab sunkar, Rohan ke maata-pita ko uspar bohut fakr mehsus hota hain. 

                     - Ved Vineet Gautam