Mohabbat

Ajay ek jawan ladka hain. Woh apne Maata-Pita ka iklauta ladka hain. Haal hi mein usne ek college mein admission liya hain. Woh B.Com ki padhayi kar raha hain. College mein kai ladke aur ladkiyon se uski dosti hui hain.

Ek din College mein Teacher's Day ka programme tha. College ke kai bacche Teacher bane hue the. Unme se ek ladki Arpita bhi thi. Aaj Arpita, Gulaabi rang ki Saree pehen kar aayi hui thi. Ajay use dekhte hi dekhta reh gaya. Haalanki Ajay ne aaj se pehle use kai baar dekha hain. Ek do baar baat-cheet bhi hui thi uski Arpita se. Lekin aaj ki baat hi kuch aur thi. Aaj woh behad khoobsurat lag rahi thi. Ajay usse baat karna chahta tha. Woh usse kehna chahta tha, ki aaj woh kitni khoobsurat lag rahi hain, lekin jhijhak raha tha. 'Kya pata woh kya sochegi.' 'Agar use bura lag gaya toh.' Yeh sab soch kar usne apni nazar hata li Arpita se. Uska woh look Ajay ke dil mein baith chuka tha. Jab bhi woh akela rehta, use baar-baar Arpita ka hi khayal aata. Woh baar-baar usi ke baare mein hi sochta rehta tha.

Ek din ki baat hain, jab Ajay class mein baitha hua tha lectures attend karne ke liye. Class mein kareeban-kareeban sabhi log aa chuke the. Class mein Professor aaye aur Attendance Sheet ek ladke ke haath mein pakda diye aur Professor ne usse kaha, "Apna naam likh kar Signature kar dijiye aur dusre ko Attendance Sheet pass kariye." Do minute baad Arpita classroom ke darwaze par khadi thi aur usne kaha, "Sir may I come in ?"
Professor - "Yes please come in."
Ajay ki nazar uspar padi aur woh use hi dekh raha tha. Aaj Arpita ne Kaale Rang ka Salwaar Suit pehna hua tha. Uske Kaale rang ka dupatta halki hawa mein thoda sa ud raha tha. Woh apne baithne ke liye jaga dhund rahi thi. 'Main kaha par baithu ?' Woh yahi soch rahi thi shayad. Ajay bas use hi dekh raha tha. Tabhi Ajay ke haath se Pen gir gaya. Pen ke girne ki awaaz sun kar Arpita ki nazar us par padi. Usne dekha ki Ajay ke bagal wali seat khaali hain. Woh Ajay ke pass gayi, aur uske bagal mein aakar baith gayi.
Ajay jaise hawa mein ud raha tha. Use aaj, apni kismat par naaz ho raha tha. Jis ladki ko woh pehli nazar mein dekhte hi dekhta reh gaya tha, woh aaj uske bagal mein aakar baithi hui hain.
Lecture shuru hua. Lecture ke dauraan Ajay ka dhyaan lecture mein kam aur Arpita par zyada jaa raha tha. Tabhi Professor ne Ajay se pucha, "Ajay tumhara kya khayal hain ?"
Ajay ne nahi suni yeh baat. Uska dhyaan lecture se bhatka hua tha. Professor ne use uske naam se pukaara, "Ajay. Ajay ?" Tabhi use abhaas hua ki koi use pukaar raha hain. "Haan Sir." Ajay ne professor ki tarah dekh kar kaha.
Professor - "Ajay tun kaha khoye hue ho ?"
Ajay - "Nahi Sir. Main nahi khoya hoon."
Professor - "Batao tumhari kya rai hain ?"
Ajay - "Kis baare mein Sir ?"
Professor - "Jo maine abhi kaha." Ajay chup tha.
Professor ne kaha, "Agar tumhare account mein 5,000 Rupaye ka debit ho jaaye. Toh tum profit mein rahoge ya loss mein ?"
Ajay - "Profit mein Sir." Do second baad uske muh se nikala, "Nahi Sir main loss mein rahunga."
Professor - "Good."
Ajay - "Thank You Sir."
Uske Professor ne dubara padhana shuru kiya. Thodi der ke baad, Lecture khatam hua. Lecture khatam hone ke baad, sabhi log uth kar classroom se bahar jaa rahe the. Tabhi Arpita ne Ajay se kaha, "Lecture par dhyaan diya karo tum." Uski meethi awaaz sun kar woh madhosh ho gaya tha. "Abhi bhi tumhara dhyaan kahi aur hain." Arpita ne kaha.
Tabhi Ajay ne kaha, "Haan, haan main dhyaan dunga."
Arpita - "Kis Par ?"
Ajay - "Jis par tum chaho."
Arpita muskura di. Phir usne Ajay se kaha, "Canteen chaloge tum ?"
Ajay - "Haan. Chalo chalte hain."
Woh dono saath Canteen mein gaye. Ajay ne Arpita se pucha, "Tum kya khaaogi ?"
Arpita - "Jo bhi tum khaaoge main bhi wahi khaaungi."
Ajay - "Thik hain."
Thodi der ke baad, Ajay do plate samosa le aaya. Aur samosa khaate-khaate donon mein baat-cheet shuru hui.
Arpita - "Tum kaha par rehte ho ?"
Ajay - "Main college ke pass mein hi rehta hoon."
Arpita - "Kaha par ?"
Ajay - "Woh Katraj Nagar hain na. Wahi par. Tum kaha par rehti ho ?"
Arpita - "Main Viman Vihar mein rehti hoon."
Ajay - "Tumhare Papa kya kaam karte hain ?"
Arpita - "Woh Aluminum ka business karte hain. Aur tumhare Papa kya kaam karte hain ?"
Ajay - "Woh Steel ka business karte hain."
Arpita - "Tumhare ghar mein koun-koun hain ?"
Ajay - "Bas main, Papa aur Mummy. Aur tumhare ghar par ?"
Arpita - "Papa, Mummy aur mera chota Bhai bhi hain."
Ajay - "Woh kya karta hain ?"
Arpita - "Woh abhi 8th standard mein hain. Tum college mein mujhse milte rehna."
Ajay - "Yeh bhi koi puchne ki baat. Main College toh tumse hi..."
Arpita - "Kya ?"
Ajay - "Kuch bhi nahi."
Arpita - "Nahi. Nahi jo tum bol rahe the, use pura karo."
Ajay - "Jaane do."
Arpita - "Bolo na Ajay ?"
Ajay - "Main College tum sabse milne ke liye hi toh aata hoon ?"
Arpita - "Tum sab matlab ?"
Ajay - "Tum. College mein baaki sabhi dost."
Arpita - "Toh tum padhayi karne ke liye nahi aate ho ?"
Ajay - "Nahi padhayi toh sabse zyada zaroori hain. Padhayi ke alaava main sabhi doston se bhi mil le ta hoon."
Arpita - "OK." Yeh kehkar Arpita muskura deti hain. Uske hothon ki muskurahat dekh kar woh uski taraf aur aakarshit hota hain.

Woh dono College mein aksar saath mein hi hote hain. Lectures mein bhi saath baithte hain. Recess ke dauran aur College ka samay khatam hone ke baad, woh dono aksar Canteen mein jaate hain. Woh dono ek dusre se dher saari baatien kiya karte hain. Kabhi apne baare mein. Kabhi apne parivaar ke baare mein. Kabhi apni pasand aur napasand ke baare mein. Dheere-Dheere woh dono ek dusre ke kaafi kareeb aa gaye the. Woh dono ek dusre ke bohut acche dost ban chuke the. Dono ne ekdusre se apna contact number bhi share kar liya tha.

Ek din ki baat hain. Woh din Sunday ka din tha aur Ajay thoda sa late utha hua tha. Usne apne mobile mein dekha toh dopahar ke 12 baj rahe the. Tabhi usne dekha ki Arpita ka message aaya hua hain. 'Ajay tum jab bhi free raho, mujhe call karna.' Message padhte hi, Ajay ne use call kiya. Arpita ne turant call receive kiya aur kaha, "Hello Ajay."
Ajay - "Hi Arpita."
Arpita - "Hi Ajay. Happy Sunday."
Ajay - "Happy Sunday."
Arpita - "Aur batao, kaise ho tum ?"
Ajay - "Main thik hoon. Tum kaisi ho ?"
Arpita - "Main bhi thik hoon. Kya tum ready ho chuke ho ?"
Ajay - "Ready ? Kahi jaane ka plan hain kya ?"
Arpita - "Nahi. Maine aise hi puch liya."
Ajay - "Nahi. Abhi tak toh maine Brush bhi nahi kiya hain."
Arpita - "OK. Ready ho jaao aur uske baad tum mujhe call karna."
Ajay - "Nahi. Abhi baat kar lete hain na hum."
Arpita - "Nahi. Pehle tum waqt se tayyar ho jaao. Uske baad tum mujhe call karna."
Ajay - "Lekin us waqt tum agar busy rahi toh ?"
Arpita - "Aaj Sunday hain Ajay. Toh main bhi poora din free hoon."
Ajay - "OK. Main jaldi se ready hokar tumhe call karta hoon."
Arpita - "OK. Bye."
Ajay - "Bye-Bye."

Uske baad Ajay apne bed par se uchal padta hain. Woh jald se jald tayyar hone ki koshish karta hain. Aakhir mein jab woh tayyar ho jaata hain, tab woh aaine mein khud ko dekhta hain. Aur woh thoda sa hairaan reh jaata hain. Ajay ne dekha ki usne Night Suit hi pehna hua hain. Use Arpita se baat karne ki itni jaldi rehti hain, ki woh naha dhone ke baad, apna Night Suit dubara se pehen leta hain. Woh turant apne kapde badalta hain aur, ek accha sa Shirt aur Jeans pehan leta hain. Apne baalon ko set karne ke baad, woh ek baar aaine mein khud ko dekhta hain.

Uske baad woh apna mobile uthata hain aur Arpita ko Call lagata hain. Phone ki pehli ghanti bajti hain. Uske baad dusri ghanti bajti hain. Aur har ek bajti hui ghanti ke saath uske dil ki dhadkane tez hone lagti hain. Kareeb 5-6 ghatiyon ke baad aakhir kaar Arpita Call receive karti hain. Aur call receive karte hi woh apni maadak aawaz mein kehti hain, "Hello Ajay."
Ajay - "Hi Arpita."
Arpita - "Kaise ho tum Ajay ?"
Ajay - "Main thik hoon. Tum kaisi ho ?"
Arpita - "Main bhi thik hoon. Aur batao tum kya kar rahe ho ?"
Ajay - "Main bas tumse baatein kar raha hoon."
Arpita - "Uske alaava aur kya kar rahe ho ?"
Ajay - "Filhal tumse baatein karne ke alaava main aur kya kar sakta hoon."
Arpita - "Hath Badmaash."
Ajay - "Arpita."
Arpita - "Haan."
Ajay - "Kya main tumse ek baat kahun ?"
Arpita - "Haan kaho ?"
Ajay - "Tum bohut khubsurat ho Arpita."
Arpita - "Thank You Ajay. Aur tum bhi bohut handsome ho."
Ajay - "Thank You so much Arpita."
Arpita - "Accha kal tum College aa rahe ho na ?"
Ajay - "Haan. Main aaunga hi. Aur tum ?"
Arpita - "Haan. Main bhi kal College mein zaroor aaungi. Accha yeh batao, kal main kya pehnu ?"
Ajay - "Tum har kapde mein bohut khubsurat lagti ho."
Arpita - "Thank You so much Ajay. Lekin phir bhi, tumhari koi pasand hogi ?"
Ajay - "Woh Teacher's Day ke din tumne pehna hua tha. Woh Gulaabi rang ki Saree."
Arpita - "Ab bina kisi programme ke main Saree kaise pehan sakti hoon."
Ajay - "Haan. Toh ek kaam karo. Agar tumhare pass koi Laal ya Gulaabi rang ka Salwar Suit ho toh, woh pehan kar aana tum."
Arpita - "Thik hain."
Ajay - "Aur main kya pehnu ?"
Arpita - "Tum Neele rang ka Shirt pehan na."
Ajay - "OK. Kal milte hain."
Arpita - "Good Bye Ajay."
Ajay - "Bye-Bye."

Agle din, Ajay College pahuncha. Aur Class mein baitha woh Arpita ka intezaar karne laga. Thodi der baad, Arpita Class mein aayi. Aur usne halke laal rang ka Salwar Suit pehna hua tha. Ajay use dekhte hi bohut khush hua. Arpita uske bagal wale seat par baithi. Dono ki nazrein mili aur un dono ne ek dusre ko dekh kar muskura diya. Ajay ne bohut dheere se kaha, "Looking Beautiful."
Arpita - "Thank You." Usne bhi bohut dheemi awaaz mein jawab diya.
Recess ke waqt woh dono saath mein Canteen gaye. Canteen pahuch kar Ajay ne Arpita se pucha, "Tum kya khaaogi ?"
Arpita - "Jo bhi tum chaho."
Ajay - "Phir bhi. Apni pasand toh batao."
Arpita - "Aaj main tumhare pasand ki cheez khaungi."
Ajay - "Main bhi wahi lunga jo tumhe pasand hain."
Arpita - "Nahi aaj tumhare pasand ki cheez hongi."
Ajay - "Lekin Arpita." Arpita ne uski baat kaat te hue kaha, "Ajay Please."
Ajay ne muskura kar kaha, "OK. Toh hum log Puff le le ?"
Arpita ne muskura kar 'Haan' mein sar hilaaya.
Ajay - "Main bas abhi aaya." Yeh kehkar woh chala jaata hain. Thodi der baad, woh do plate Puff lekar aata hain. Dono saath mein Puff khate hain. Woh Arpita se kehta hain, "Arpita main tumse kuch kehna chahta hoon."
Arpita - "Kya kehna chahte ho ?"
Ajay - "Kya hum kabhi kahi bahar mile ?"
Arpita - "Kaha par ?"
Ajay - "Kya hum koi movie dekhne ke liye jaaye ?"
Arpita - "OK."
Ajay - "Toh kab chale ?"
Arpita - "Tum batao."
Ajay - "Yeh Sunday ?"
Arpita - "OK."

Ab Ajay ko aane wale Sunday ka hi intezaar tha. Haalanki, yeh dono College mein har roz milte the aur ek dusre ke saath accha waqt bhi bitate the. Lekin, aane wala Sunday kuch khaas hone wala tha.
Saturday ko College mein milne ke baad Ajay ne Arpita se pucha, "Kal ka kya plan hain ?"
Arpita - "Hum dono movie jaane wale the na ?"
Ajay ne muskura kar kaha, "Haan."
Arpita - "Kya tum bhool gaye the ?"
Ajay - "Nahi. Maine socha ki agar tum bhool gayi ho, toh main tumhe yaad dila doon."
Arpita - "Mujhe yaad hain. Accha yeh batao tum kal kya pehnoge ?"
Ajay - "Jo bhi tum chaho."
Arpita - "Kya tumhare pass Blue rang ka koi shirt ya T-SHIRT hain ?"
Ajay - "Haan hain."
Arpita - "Main chahti hoon, ki kal tum wahi pehno."
Ajay - "OK."

Agle din, Ajay Blue Shirt aur Black Jeans pehna, Cinema Hall ke bahar khada Arpita ka intezaar kar raha tha. 15 minutes ke baad, woh aayi. Arpita ne Pink Colour ki Saree pehni hui thi aur kaale rang ki high heels wali sandal. Use dekhte hi Ajay, ki aankhen khuli ki khuli reh gayi. Usne socha, 'Sach mein Saree mein ladkiyon ki khubsurati ko chaar chand lag jaate hain.'
Arpita Ajay ke pass aayi aur boli, "Hi Ajay."
Ajay kuch nahi bola. Woh uski khubsurati mein kahi ghum ho chuka tha. Arpita ne dubaara kaha, "Ajay."
Usne phir se koi jawab nahi diya. Arpita ne uske aankhon ke saamne chutki bajayi.
Ajay hosh mein aaya.

"Kaha khoye hue ho tum Ajay ?" Arpita ne pucha.
Ajay - "Nahi. Kahi bhi nahi."
Arpita - "Aaj toh tum bohut handsome lag rahe ho."
Ajay - "Tum bhi aaj behad khubsurat lag rahi ho. Hamesha se aaj thoda sa zyada khubsurat lag rahi ho tum."
Arpita thoda sa sharma gayi.
Ajay - "Kya main tumse ek baat kahun ?"
Arpita - "Haan kaho."
Ajay - "Dekho main ghuma phira kar baat nahi karunga. Main tumse seedhe aur saaf shabdon mein kahunga."
Arpita use dhyaan se dekh rahi thi.
Ajay - "Meri filhal koi kaabliyat nahi hain. Main jaanta hoon ki main thoda sa jaldi kar raha hoon, lekin main bas itna hi kehna chahta hoon ki, main tumse pyaar karta hoon."
Arpita chup rehti hain.
Ajay - "Agar tumhe meri baat buri lagi ho toh, Iam sorry Arpita. Lekin, main ab tumhe aur andhere mein nahi rakhna chahta hoon."
Arpita phir bhi chup rehti hain.
Ajay - "Kuch toh kaho Arpita ?"
Arpita - "Main bhi tumse pyaar karti hoon. Lekin mujhse ek Vaada karo."
Ajay - "Kya Arpita ?"
Arpita - "Agar kal ko kisi bhi wajah se hum ek na ho paaye toh, hum is rishte ko kisi ek khubsurat mod par hi chod denge."
Ajay - "Agar tumhare ghar wale nahi maanenge, toh main kabhi bhi tumhe bhaag kar shaadi karne ke liye nahi kahunga. Hum dono hamare bado ki marzi se hi ek honge."
Arpita - "Woh sab toh baad ki baat hain. Lekin yeh khushi ki baat hain ki, hum dono ka rishta aaj ek naya naam le raha hain. I love you Ajay."
Ajay - "I love you too."
Uske baad, woh dono ek dusre ke haathon mein haath daale, movie dekhne ke liye chale jaate hain.

                           - Ved Vineet Gautam