Kanyadaan

Anand ek businessman hain. Woh ek bohut hi mehnati aadmi hain. Uski auto parts banane ki company hain. Aaj uski company aasman ki bulandiyon par hain. Uski company mein kariban 500 workers kaam karte hain.

Anand ki biwi ka naam Sheetal hain. Unki do betiyan hain. Badi wali beti ka naam hain Shikha aur choti wali beti ka naam hain Archana. 

Dono hi college mein padhti hain aur unki shaadi ki umar aa rahi hain. Anand ne Shikha ke liye ladka dekhna shuru bhi kar diya hain. Kai logon se milne ke baad, usne ek ladka pasand kiya. Usne socha ki woh rishte ki baat ko aage badhane se pehle, ek baar Shikha se baat karega. Shaam mein jab woh ghar aaya toh, uske chehre par halki si muskaan thi. Use khush dekh kar uski biwi aur dono betiyan bhi khush thi. Jab Sheetal ne us se uski muskurahat ki wajah poochi, tab usne bataya, "Maine Shikha ke liye ek ladka dekha hain." 

Yeh sunkar sabhi bohut khush hue aur Shikha thoda sa sharma rahi thi. Anand ne apne mobile se ladke ki tasveer dikhayi. Ladka dikhne mein behad khubsurat tha. Woh ek dum Rajkumar ki tarah dikh raha tha. Us ladke ka naam tha Suresh. Suresh khud bhi ek businessman tha. Anand ne jab Shikha se uski marzi poochi, tab usne bhi 'haan' kar di. Dono parivaar mile aur unke beech rishta tay hogaya. Jald hi un dono ki sagaai ho gayi. Pandit Ji ko bulaakar shaadi ka muhurat nikaala gaya aur ek saal baad ki tareekh tay hui. 

Aakhir kaar Shaadi ka muhurat aaya aur dono ki shaadi badi dhoom-dhaam se hui. Apni badi beti ka kanyadan karke Anand aur Sheetal bohut khush the. 

Anand ab Archana ke liye ladka dekhna shuru kar raha tha. Shikha ki tarah, jab Archana se bhi Anand ne shaadi ke baare mein baat ki, tab usne bataya ki use ek ladka pasand hain. Usne bataya ki us ladke ka naam Amol hain aur woh ek middle class family se hain. Yeh jaankar, Anand ne us ladke se milne ki iccha jatayi. Archana ne Amol ko call karke use apne ghar milne ke liye bulaya. Amol ko dekhne ke liye Shikha aur Suresh bhi aaye hue the. Agle din shaam ko 5 baje Amol unke ghar aaya. Amol dikhne mein behad sundar dikh raha tha. Anand aur Suresh ne uska bohut acche se swaagat kiya. Phir Suresh ne Amol se ghar ke andar aane ka aagrah kiya. Andar aane ke baad Anand ne usse baithne ke liye kaha. Amol baitha aur uske baad baaki sab log bhi baithe. 

Anand - "Toh Amol beta, zara kuch apne baare mein batao."

Amol - "Uncle main ek company mein job karta hoon engineer ki post par. Main mahine ka keval 25,000 Rupaye hi kamata hoon. Mere ghar mein sirf mummy aur papa hain."

Anand - "Toh beta aap jo ghar mein rehte ho kya woh khud ka hain ?"

Amol - "Nahi uncle us ghar mein, main rent par reh raha hoon, mummy aur papa ke saath. Uncle main jaanta hoon ki meri salary bohut kam hain aur mera ghar bhi aapke ghar ke muqable bohut chota hain, aur haan yeh baat bhi hain ki meri aukaat nahi hain aapke ghar mein shaadi karne ki, main bas aapse thoda sa time chahta hoon, taaki meri kamayi jab aur badhe tab main aapse Archana ka haath maangne ke kaabil ban sakun."

Anand - "Nahi beta woh baat nahi hain. Archana ki khushi mein hi meri khushi hain. Aapke Mummy aur Papa se kab mulaakaat ho sakti hain humari ?"

Amol - "Jab aap chaho ?"

Anand aur uska parivaar Amol ke ghar gaya uske maata-pita se milne ke liye. Unka ghar thoda chota tha aur woh area bhi thoda sa pichda hua tha. Amol ke maata-pita ne unka acche se swaagat kiya aur woh log saath baithe. Unhone saath mein, duniya bhar ki baatein ki aur aakhir mein Anand ne kaha, "Main soch ke batata hoon." Aur phir woh sab apne ghar wapas laut gaye. 

Ghar pahuchne ke thodi der baad Archana ne pucha, "Papa aapne kya socha hain ?"

Anand - "Beta tum kaise reh paaogi wahan par ?"

Archana - "Papa hum dono ek dusre ko bohut chahte hain."

Anand - "Lekin pyaar se zindagi nahi chalti hain beta."

Archana - "Woh bohut accha ladka hain."

Anand - "Hmm. Par kya tum us maahol mein adjust kar paaogi ?"

Archana - "Haan Papa main reh lungi waha par."

Anand - "Is ladke ke future plans kya hain ?"

Archana - "Woh khud ki company start karna chahta hain."

Anand ko shak hua ki kahi yeh ladka 'Gold Digger' toh nahi hain. Use darr tha ki kahi yeh Archana se shaadi karne ke baad use paison ke liye pareshan toh nahi karega. Yeh sab baatein Anand ko pareshan karna shuru kar rahi thi. Din-Ba-Din woh bohut tension le raha tha.

Kuch din beete, Archana ne Anand se uske faisle ke baare mein us se phir se pucha. Anand - "Itni jaldi bhi kya hain beta?" keh kar baat ko taal diya. Dheere-Dheere Archana ki baichaini badhti jaa rahi thi aur har baar uske poochne par ki usne kya faisla liya hain, Anand us baat ko kisi na kisi wajah se taal deta. Ek din Archana se raha nahi gaya aur usne Anand se kaha, "Papa aaj main aapka faisla sun na chahti hoon."

Anand - "Main soch ke bataunga."

Archana - "Nahi Papa, aaj aapko apna decision sunana hi hoga."

Anand - "Toh suno phir. Aakhir woh ladka tumhe zindagi ki kounsi khushi de paayega ? Aakhir kaise rahogi tum us mohalle mein ?"

Archana - "Main reh lungi Papa."

Anand - "Tum nahi reh paaogi."

Archana - "Lekin main us ladke se pyaar karti hoon Papa."

Anand - "Lekin woh nahi karta hain. Woh sirf tumhe bewakoof bana raha hain. Woh ladka bas tumhare baap ki sampatti ka waris ban na chahta hain. Yahi uska iraada hain."

Archana - "Papa aap aisa kaise soch sakte ho ?"

Anand - "Kyunki yahi sach hain."

Archana - "Papa hum dono ek dusre ko bohut pyaar karte hain."

Anand - "Uska yeh pyaar sirf ek dhokha hain. Yeh shaadi kisi bhi haal mein nahi ho sakti hain."

Archana rote hue apne kamre mein chali jaati hain. Kuch din beet jaate hain aur Archana ko, Amol ka call aata hain. Archana use batati hain ki, uske pita is rishte ke khilaaf hain. Amol use samjhata hain ki dheere-dheere sab kuch thik ho jaayega. 

Ek din ki baat hain, Anand ek hotel mein ek business meeting ke liye jaata hain. Woh apni meeting khatam karta hain aur jab woh hotel se bahar nikal raha hota hain, tab woh dekhta hain ki Amol wahan par baitha Sharaab pee raha hain. Anand use dekh kar thoda sa chaunk jaata hain. Woh do second ke liye kuch sochta hain aur phir uske baad woh uske peeche baithkar bas uska nireekshan karta rehta hain. Woh bohut dhyaan se use dekh raha hota hain aur woh is baat ka bhi dhyaan rakh raha tha ki Amol ko uske hone ka aabhas na ho. 

Amol table par akela baitha hua tha. Use Amol ka chehre maayus dikh raha tha. Karib aadhe ghante baad Amol waha se uth ta hain aur woh bahar chala jaata hain. 

Anand hotel ke manager ke paas jaata hain aur us se puchta hain, "Kya yeh ladka iske pehle bhi kabhi yahan par aaya tha?"

Manager - "Kounsa ladka Sir ?"

Anand - "Wohi jo abhi is hotel se bahar gaya. Woh jisne safed rang ka shirt aur neele rang ki jeans pehni hui thi."

Manager - "Sir main aapko aise kaise bata sakta hoon ?"

Anand - "Main us ladke ko jaanta hoon, is wajah se main aapse yeh sawaal kar raha tha."

Manager - "Nahi Sir. Aaj se pehle yeh ladka yahan par kabhi nahi aaya tha."

Anand - "Are you sure ?"

Manager - "Yes Sir, Iam damn sure."

Anand - "Aap yahan par kabse kaam kar rahe ho ?"

Manager - "Main pichle ek saal se yahan par job kar raha hoon sir."

Anand - "OK. Thank You."

Manager - "You are most welcome sir."

Uske baad Anand wahan se chala jaata hain. Ghar pahuchte hi woh Sheetal aur Archana ko apni aankhon dekhi sunata hain. Yeh sun kar Archana ka paara saantve aasmaan mein pahuch jaata hain. Woh kehti hain, "Papa aap is tarah se Amol ki beizzati nahi kar sakte ho." 

Anand - "Maine use apni aankhon se dekha hain Sharaab peete hue."

Archana - "Papa aap sach keh rahe ho, main is baat ko kaise maan loon."

Yeh sun kar Anand bohut hairaan reh gaya. 

Anand - "Kya tumhe mujh par bharosa nahi hain ? Kya main jhooth bolunga ?"

Archana - "Ho bhi toh sakta hain. Amol aapki aankhon mein chubhta jo hain."

Is baat par Sheetal, Archana ko ek thappad maar deti hain. Archana rote hue apne kamre mein chali jaati hain.

Sheetal - "Kya aapne Amol ko sach mein Sharaab peete hue dekha hain ?"

Anand - "Haan main sach keh raha hoon."

Sheetal - "Aapne uska koi photo click kiya ya koi video shoot kiya ?"

Anand - "Nahi."

Sheetal - "Toh phir woh kaise aap ki baat par vishwaas kar le." 

Anand - "Yeh tum aakhir kaisi baat kar rahi ho Sheetal ? Kya main kabhi Archana ka bura soch sakta hoon ? Main uska baap hoon."

Sheetal - "Lekin ab aapki beti badi ho gayi hain aur aaj ka daur bohut badal chuka hain. Aaj kal ke zamane mein zyadatar log toh prem vivah hi kar rahe hain. Jis ladke ke saath aapki beti apni saari zindagi beetana chahti hain, uspar aap prashn chinh khada kar rahe ho, aakhir woh kaise aapki baaton par yakeen kar le."

Anand chup tha. 

Kuch din beet gaye aur Anand ne socha ki woh ek baar Archana ko samjhane ki koshish karega. Ek din jab woh shaam mein apne ghar wapas aaya, tab woh aate hi Archana ke kamre mein gaya aur Anand  ne peeche se aapne haath Archana ke aankhon par rakh kar unhe band kar diya. Usne haath hataya toh dekha ki uske saamne bohut saare chocolates hain. Woh bohut khush hui aur phir usne peeche mud kar dekha toh Anand khada tha. 

Archana - "Yeh chocolates aapne laaye Papa ?"

Anand - "Haan Beta. Tumhe chocolates bohut pasand hain na ?"

Archana - "Haan bohut. Thank You Papa."

Anand - "You are welcome beta."

Archana - "Kya main abhi yeh chocolates kha sakti hoon ?"

Anand - "Haan zaroor. Is se pehle ki Shikha aa jaaye, kha kar khatam kar do yeh saare chocolates."

Archana - "Kya sach mein Didi aa rahi hain ?"

Anand - "Haan."

Archana - "Aur Jiju ?"

Anand - " Haan, Suresh bhi aa raha hain."

Archana - "Kab ?"

Anand - "Bas ghante do ghante mein."

Archana bohut khush hui. 

Do ghante baad Suresh aur Shikha ghar pahuche aur Anand ne bohut khushi se un dono ka swaagat kiya. Kaafi lambe samay baad, poora parivaar ek saath baith raha hain. Baat karte-karte Suresh ne pooch liya, "Papa Archana ki shaadi kab karwa rahe ho aap ?"

Anand - "Haan abhi dekhunga koi ladka."

Yeh sunte hi, Archana ka chehra utar gaya. 

Suresh - "Kya baat hain Archana, tum achanak se itni udaas kyun ho gayi ?"

Archana - "Kuch nahi Jiju. Bas aise hi."

Shikha - "Kya baat hain Archana ? Mujhe toh batao."

Archana ke aankhon se aansun chalak pade. 

Shikha - "Kya hua Archana ? Tum ro kyun rahi ho ?"

Archana kuch na kehti bas, royi hi jaa rahi thi. 

Suresh - "Kya baat hain Papa ?"

Anand ne Amol ke baare mein shuruwat se ant tak sab kuch bataya. Suresh aur Shikha bohut dhyaan se uski baatein sun rahe the. Saari baatein sun ne ke baad woh dono kuch der ke liye chup the. Phir Suresh ne kaha, "Papa aaj kal duniya bohut badal gayi hain. Aaj kal logon ke liye sharaab aur cigarette bohut normal ho chuka hain Papa."

Shikha - "Humare building mein hi ek ladka rehta hain. Bas 22-23 saal ka hi hoga woh bhi sharaab aur cigarette ka sevan karta hain."

Suresh - "Papa bas is baat par ki koi ladka cigarette ya sharaab peeta ho hum us par koi sahi rai nahi bana sakte hain. Hume bas yahi dekhna hoga ki aakhir uska nature kaisa hain aur woh apne career ko lekar aakhir kitna serious hain."

Anand - "Lekin agar kal ko kuch ho gaya toh, uski toh saari zindagi barbaad ho jaayegi."

Shikha - "Papa baat ko samajhne ki koshish kariye. Aaj kal bacche bhaag kar bhi shaadi kar rahe hain. Duniya bohut fast ho gayi hain. Bhagwaan na kare agar Archana bhi koi aisa kadam utha le toh, hum kaha muh dikhayenge. Kam se kam aapki izzat ka khayal toh hai use. 

Suresh - "Papa aaj kal ke logon mein patience level bohut kam ho chuka hain aur apni zindagi ke tensions se thoda sa raahat paane ke liye zyadatar log nasha ka sevan karte hi hain. Now it's normal."

Suresh aur Shikha ke samjhane par Anand aakhir kaar maan gaya aur usne Amol ko call karke apne ghar bulaya. Anand ne Amol se kaha ki woh uske parivaar se dubaara milna chahega aur woh dono parivaar mile aur unke beech rishta tay ho gaya. 

Kuch dino baad, Amol aur Archana ki shaadi kara di gayi. Aaj unki shaadi ko do saal ho gaye hain aur Archana un logon ke saath bohut khush hain. Ab toh Amol ne apni ek choti si mithaai ki dukaan  bhi khol li hain.

                  

                 -  Ved Vineet Gautam