Bhaagya

Ramesh peshe se ek Judge hain. Unke ghar mein unki patni aur saath mein do bacche hain. Unki patni ka naam Sheela hain. Unhe ek ladka aur ek ladki hain. Unke dono bacche BA ki padhayi kar rahe hain. Ladke ka naam Rohit hain aur ladki ka naam Shikha hain. In dono ke beech mein do saal ka antar hain aur Rohit umar mein Shikha se bada hain. 

Ramesh ko apne dono baccho se bahut saari aashayein hain. Woh bas yahi chahte hain ki unke dono bacche bhi padh likh kar ek acchi sarkari naukri pakad le. 

Is saal Rohit ka graduation bhi poora ho chuka hain. Result bhi bohut accha aaya hain. 95 % marks se woh pass hua hain. Ghar mein sabhi log bohut khush hain. Ramesh aur Sheela dono hi Rohit ki uplabdhi par bohut garv mehsus kar rahe hain. 

"Aaj ladke ne sar uncha kar diya." Ramesh ne kaha.

Sheela - "Haan usne mehnat bhi bohut ki hain. Ab aage dekhte hain, ki uske bhaagya mein kya likha hain." 

Ramesh - "Usme dekhna kya hain ? Woh itne acche marks laaya hain, koi acchi sarkari naukri karega aage chal kar."

Sheela - "Kya aapne us se kuch baat ki ?"

Ramesh - "Main is baare mein, us se kal baat karunga."

Agle din Rohit apne sabhi jaan pehchan walon ke yahan mithai baantne ke liye gaya. Woh din bhar kai logon ke yahan jaakar shaam mein ghar lauta. Raat mein ghar ke sabhi logon ne saath milkar khaana khaya. Khaana khane ke baad, Ramesh ne Rohit se kaha, "Toh beta ab aage ka kya plan hain tumhara ? Kounse competitive exam ka form bharoge tum ?" Rohit chup tha.

Ramesh ne kaha, "Bolo beta. Tum chup kyun ho ?"

Rohit ne lambi saans li aur kaha, "Papa main aapse kuch kehna chahta hoon."

Ramesh - "Haan kaho kya baat kehna chahte ho tum ?"

Rohit - "Papa main jo kehne jaa raha hoon, woh kehne ke baad aap mujhe please meri baat explain karne ka bhi mauka dijiyega."

Ramesh - "Kya baat hain Rohit ?"

Rohit ne kaha, "Papa ab main aage padhna nahi chahta hoon."

Yeh sunkar ghar ke sabhi log bohut chaunk gaye. "Padhna nahi chahte ho matlab ?" Ramesh ne pucha.

Rohit - "Papa ab main naukri karna chahta hoon ek private company mein aur aage chal kar jab mujhe thoda accha experience ho jaayega, tab main khud ka business start karunga."

Ramesh - "Tumhara dimag toh kharab nahi ho gaya hain ? Business ke baare mein kuch pata bhi hain tumhe ? Competative exams ki tayaariyan karo. Tum bas ek do exams de doge, toh koi bhi acchi sarkari naukri mil jaayegi tumhe. Uske baad, tumhari saari zindagi bohut aaram se kategi."

Rohit - "Papa maine aapse pehle hi kaha tha, mujhe please explanation ka mauka toh dijiye."

Ramesh - "Thik hain. Explain karo tum."

Rohit - "Papa agar aap kahenge, toh main competitive exams mein baith bhi jaaunga, lekin uska koi bhi fayada nahi hoga, kyunki main woh clear hi nahi kar paaunga."

Ramesh - "Kya tumhara dimaag ab padhayi se hath chuka hain ?"

Rohit - "Papa mera dimaag ab business mein shift ho chuka hain."

Ramesh - "Aur agar business mein tum fail ho gaye toh ? Tab tum kya karoge ?"

Rohit - "Papa main yeh baat toh nahi jaanta hoon. Lekin haan, yeh baat zaroor hain ki, main chahe kitni bhi mehnat kyun na kar loon; main simple se simple competitive exam bhi clear nahi kar paaunga."

Ramesh - "Tumhare pass koi plan toh hoga ?"

Rohit - "Haan plan toh hain Papa."

Ramesh - "Aur woh kya hain ?"

Rohit - "Filhal main kisi bhi ek private firm mein naukri karunga aur uske baad jab mere pass thoda accha experience ho jaayega. Mujhe business ka accha khaasa knowledge jab ho jaayega, tab main apna business start karunga."

Ramesh - "Aur tum kounsa business start karoge ?"

Rohit - "Woh toh abhi socha nahi hain maine."

Ramesh - "Tumhe jo bhi sahi lage woh tum karo. Bas meri yeh ek baat yaad rakna ki, kahi tumhe zindagi bhar pachtana na pad jaaye." Yeh kehkar Ramesh andar chala jaata hain.

Agle din se Rohit apne liye naukri dhoondhna shuru karta hain. Kai jagah par interviews dene ke baad, aakhir mein use ek private company mein sales and marketing ki naukri milti hain. Woh ek pen company hain mein naukri karna shuru kar deta hain. Rohit kabhi dukaan-dukaan jaa jaakar marketing karta, toh kabhi laptop par baithkar online marketing karta. Aur uska mahine ka vetan keval 15,000 /- Rupaye hi the. 

Jaan pehchan walon ko jab yeh baat pata chali toh logon ne kai tarah ki baatein banayi. Log Rohit ke baare mein tarah-tarah ki baatein karte. Ados-Pados ki auratein jab bhi Sheela se milti, tab baat-baat par unse Rohit ke baare mein puchti. Zyadatar samay unka yahi sawal rehta, "Rohit kya kar raha hain ?" Kai auratein toh jaante hue bhi anjaan banti aur Sheela se Rohit ke baare mein jaan bhoj kar sawal karti. Aur jab Sheela unhe batati ki woh ek private company mein kaam kar raha hain, toh woh log uske vetan ke baare mein puchte. Rohit itne kam vetan par naukri kar raha hain yeh jaankar woh log tanj kase bina reh na paati. Kuch log toh muh par hi keh dete, ki Rohit ne Judge Sahab ki naak kaat ke rakh di. 

Baap ki Uplabdhi, aksar bete ka bojh ban jaati hain. 

Phir chahe woh us yogya ho ya na ho. Logon ke liye uski yogyata maayne nahi rakhti hain.

Shayad hamara samaaj hi aisa hain. Samaaj bete se bhi yahi aasha karta hain ki woh apne pita ke hi maarg par chale aur pita ke barabar hi bete ki bhi uplabdhi ho.  

Pehle toh Sheela sun leti thi. Lekin ab, usse logon ka tanj kasna saha nahi jaata hain. Woh zyadatar samay ghar se bahar nikalne se bachti hain, is darr se ki kab kaha koun mil jaaye aur baat ko ghuma phira kar Rohit ke mudde par le aaye. Phir us par kataksh bhare shabd bolkar, khisiyakar chale jaaye.  

Kariban do saal tak naukri karne ke baad, Rohit ne market se loan lekar apna business start kiya. Aur yeh baat jaan ne ke baad Ramesh us par bohut zyada bhadak gaye. 

Ramesh - "Aakhir tum chahte kya ho beta ?"

Rohit - "Matlab ?"

Ramesh - "Tumhe loan lene ki zaroorat kya hain ?"

Rohit - "Kya aap nahi jaante ho ?"

Ramesh - "Pichle do saalon se main aur tumhari maa duniya bhar se taane sunte aa rahe hain. Ab tum kya chahte ho, ki log hamare ghar aana bhi band kar de ?"

Rohit - "Logon ka humse rishta rakhna aur mere loan lene ka kya sambandh hain ?"

Ramesh - "Dekho beta. Kal ko jab lendaar ghar par aayenge, toh aas pados ke log yahi kahenge na ki Rohit ne naadani mein khud ko phansa liya."

Rohit - "Log kya sochenge, yeh soch kar agar hum jeeyenge toh hum kya kar paayenge apne jeevan mein ?"

Ramesh - "Hamara time toh nikal chuka hain. Tum kaise jeeyoge beta ?"

Rohit - "Papa kya aapko is baat ka dukh hain ki maine competitive exam dene se mana kar diya. Kya aapko is baat se mujhse naarazgi hain ? Ya phir aapko sharam mehsus hoti hain ki, main aapke itna padha-likha nahi hoon ?"

Ramesh - "Tum loan chukaoge kaise ?"

Rohit - "Mere pass business plan hain. Profit kama kar chuka dunga."

Ramesh - "Shikha ki shaadi bhi karani hogi hume. Tum set abhi tak hue nahi. Shikha ke liye ladka abhi mila nahi. Apni woh choti si naukri bhi tum chod chuke ho. Ab aage kya ?"

Rohit - "In sab ka Shikha ki shaadi se kya lena dena hain Papa ?"

Ramesh waha se gusse mein chala jaata hain. Rohit apni ek mobile ki dukaan kholta hain. Aur woh apne business mein, din raat ek kar deta hain. Kai tarah ke dhakke khaane ke baad, uske pair dheere-dheere business mein jamna shuru ho gaye. Aakhir mein, uski mehnat rang laana shuru kar di. Rohit ko chote-mote munafe hona shuru ho gaye the.  Uski choti-moti uplabdhi se Ramesh thoda sa nischint hua. 

Ek din jab poora parivaar saath baitha khaana kha raha tha, tab achaanak se Ramesh ne poonch liya, "Tumhara business kaisa chal raha hain beta ?"

Rohit - "Thik chal raha hain Papa. Aapke retirement ko abhi kitna time baaki hain ?"

Ramesh - "Paanch mahine baad retire ho jaaunga. Bas kuch mahine aur uske baad, sirf pension ke sahare hi hume jeena hain."

Rohit - "Main bhi toh kama hi raha hoon na. Sirf pension ke paise kyun ?"

Ramesh - "Nahi abhi tum ghar ka tension mat lo. Bas apne business par dhyaan do. Mujhe bas ek hi baat ka darr rehta hain ki, agar tumhe kabhi koi bada loss ho gaya, toh tum use chuka kaise paaoge."

Rohit - "Papa business mein profit aur loss dono ek dusre ke saath chalte hain. Agar chaar jagah profit hoga, toh do jagah par loss bhi hoga. Shikha ki shaadi ke baare mein kuch socha hain aapne ?"

Ramesh - "Shikha ki shaadi ka tum tension mat lo. Tum bas mann laga kar apna kaam karo. Abhi bas tum apne business par focus karo. Aur bas loss khane se bacho. Shikha ki shaadi ke liye main kuch sochunga."

Rohit - "Thik hain Papa."

Kuch dino ke baad Ramesh ne Shikha ke liye, ladka pasand kar liya. Ladka IPS Officer tha. Shikha ko dekhne ke liye ghar mein, ladke ka parivaar aaya. Un dono parivaar mein rishta tay ho gaya. Kuch dino ke baad, Shikha ki shaadi badi dhoom-dhaam se ho gayi. 

Shikha ki shaadi ke kuch dino ke baad ki baat hain. Ek shaam pura parivaar saath baitha tha. Woh sab log TV par, news dekh rahe the. Tabhi achaanak se khabar aayi ki shehar ke kuch hisson mein bhukamp ke jhatake aaye hain aur un ilaakon mein se ek woh ilaaka bhi tha, jahan par Rohit ka mobile shop hain. Woh turant nikal hi raha tha ki, Ramesh ne kaha, "Rohit main bhi aa raha hoon tumhare saath mein."

Dono baap-bete dukaan ke liye nikal pade. Ghar ke bahar nikal kar dono ne auto pakdi. Raaste bhar dono hi tension mein the. Jitna Rohit tension mein tha, utna hi Ramesh bhi tension mein tha. Thodi der ke baad woh log us jagah par pahuche aur dekha ki Rohit ki dukaan dhwast ho chuki hain. Apni dukaan ko dhaha hua dekh, Rohit ke maathe se paseena aana shuru ho gaya aur dekhte hi dekhte use apne seene mein dard mehsus hone laga. Uska haath seene par laga dekh Ramesh ghabra gaya aur usne Rohit ko pakadte hue kaha, "Rohit. Rohit. Kuch bolo Beta." Lekin uske muh se ek shabd nahi nikal raha tha. Tabhi wahan par logon ki madad se Ramesh ne use turant aspataal mein bharti karwaya. Doctor ne keh diya ki use Heart Attack aaya hain. Uski aisi haalat dekh Sheela bas roti hi rehti thi.

 

Do din ke baad, aakhir kaar, Rohit ko hosh aaya. Jab use hosh aaya, tab usne Ramesh aur Sheela ko apni aakhon ke saamne paaya. Ramesh ne uski hausla-afzai ki. Kuch dino ke ilaaj ke baad, dheere-dheere Rohit ki tabiyat mein sudhaar aana shuru hua. Aakhir mein ek mahine ke baad, use aspataal se discharge mila.  

Ghar pahuchne ke baad, dono baap-bete saath mein khaana khaye. Tab Rohit ne pucha, "Mere ilaaj mein kitna kharcha hua hain ?"

Ramesh - "In sab baaton par tum dhyaan mat do."

Rohit - "Jahan tak mera khayal hain laakh dedh laakh ka kharcha toh aaya hi hoga ?"

Ramesh - "Haan. Kariban itna hi samjho."

Rohit - "Kaha se aaye aapke pass itne paise ?"

Ramesh - "Tum yeh sab mat socho beta."

Rohit - "Nahi kyunki mujhe apna business dubara start karna hoga. Toh agar aapne kahi se loan liya hain, toh pehle use chukane ka intezaam karna hoga hume. Uske baad hi main koi business loan utha paaunga."

Ramesh - "Maine kai relatives se baat karke paise ikattha kiye the. Kisi bahari aadmi se koi bhi loan nahi liya hain maine. Toh tum tension mat lo. Aur abhi, kuch dino tak tum bas aaram karo. Filhal na kahi tumhe jaana hain aur na hi kisi baat ka tension lena hain."

Rohit - "Ab mera business toh khatam ho chuka hain. Ab dubara shuruat karni hogi."

Ramesh - "Haan toh usme dikkat kya hain ? Yeh sab toh zindagi bhar laga rahega."

Rohit - "Sab kuch khatam ho chuka hain."

Ramesh - "Har ek ant ek baad, ek nayi shuruat hoti hain. Ab naye sire se apna business dubara shuru karna tum. Haar-Jeet toh zindagi bhar lagi rahegi. Business mein utaar chadhav toh aate hi rehte hain. Ise hi zindagi kehte hain."

Ek mahine ke baad Rohit ne apna business dubara shuru karne ki koshish ki. Us dauraan, Ramesh use bohut bhavanatmak sahara de raha tha. Kuch mahino ke sangharsh ke baad, woh apna business dubara shuru karne mein safal raha. Ab toh usne ek dusri badi jagah lekar apna mobile ka ek bada showroom khol liya hain. 

  

               - Ved Vineet Gautam