Judaai

Atul ek young businessman hain. Uska import export ka business hain. Darjano log, uski company mein kaam karte hain. Atul ka ek bada parivaar hain. Sab kuch hain uski zindagi mein bas, ek jeevan saathi ki kami hain. 

Apne business meetings ke silsile mein uska videsh mein bhi daura hote rehta hain. 

Ek din, kaam bohut zyada hone ke wajah se, use apne office mein der raat tak rukna tha. Kaam karte-karte raat ke do baj chuke the. Ab use neend aane lagi thi. Baar-Baar uski aankhen band hoti. Woh apne cabin se bahar nikala aur apne office ke canteen mein jaakar Coffee liya. Coffee pene ke baad woh dubara office mein aaya. Office ke andar aate hi usne dekha ki ek khubsurat ladki jo ki lagbhag 25-26 saal ki hogi woh abhi tak computer par kaam kar rahi hain. Kyunki office ke zyadatar staff jaa chuke the, toh office ki bohut saari lights band ho chuki thi. Atul use dhyaan se dekhna chahta tha, lekin hichkicha raha tha. Us ladki ko thik se dekhne ke liye, us ladki ke nazdeek jaana zaroori tha, lekin, use aisi harkat karna sahi nahi laga. Woh apna sir ghuma kar apne cabin ki aur chala gaya. 

Agle din shaam mein Atul ne meeting bulayi aur woh ummeed kar raha tha ki woh ladki bhi aayegi. Meeting mein sab log aaye aur Atul ke ummeed ke mutaabik woh ladki bhi waha par maujood thi. Meeting mein usne sabko samjhaya ki aage kya kadam uthana hain aur kaise plan karke kaam ko aage badhana hain. Baat karte-karte usne us ladki se uska naam pucha. Usne badi hi dabi hui aawaz mein kaha, "Bhagyashree." Woh meeting khatam hui aur sab dubara apne kaam par laut gaye. 

Atul ke sar par bas ek hi surur chadha hua tha ki, kaise bhi karke us ladki se jaan pehchan badhayi jaaye. Lekin use samajh mein nahi aa raha tha ki woh kaise kare yeh kaam. Use is baat ka bhi darr tha, ki office mein sab log kya sochenge ? Woh ladki kya sochegi ? Log tarah-tarah ki baatein karenge. Use samajh mein nahi aa raha tha ki woh aakhir kare toh kya kare. 

Ek din ki baat hain, raat kaafi ho chuki thi. Atul apne cabin se bahar nikala aur tabhi achaanak se uske saamne Bhagyashree aa khadi hui. "Oops sorry sir." Bhagyashree ne kaha.

Atul - "Sorry for what ?"

Bhagyashree - "Nothing Sir."

Atul - "Aapka shift kya hain ?"

Bhagyashree - "Sir main rotational shifts mein kaam karti rehti hoon. Mera koi bhi fixed timing nahi hain."

Atul - "Kya aapka kaam khatam ho gaya hain ?"

Bhagyashree - "Yes Sir."

Atul - "Abhi aap kaise jaaogi apne ghar par ?"

Bhagyashree - "Dekhti hoon. Koi Bus ya Auto mil jaaye shayad."

Atul - "Abhi milna toh mushkil hain."

Bhagyashree - "Oh shit."

Atul - "Aap kaha par rehti ho ?"

Bhagyashree - "Sir main Bajaj Nagar mein rehti hoon."

Atul - "Agar koi problem na ho toh kya main aapko chod doon ?"

Bhagyashree - "Aap kyun takleef lete ho Sir ?"

Atul - "Takleef ki baat nahi hain. Raat bohut ho chuki hain. Is waqt aapka akele jaana safe nahi hoga. Aur aapko koi gaadi bhi nahi milegi. Isliye main keh raha hoon."

Bhagyashree ne kuch der ke liye socha aur phir kaha, "Thik hain Sir. Aap mujhe chod dijiye." 

Dono office ke bahar nikal kar parking mein gaye aur Atul ki Car mein baithe. Atul ne apni Car start ki aur gadi chal padi. 

"Toh Bhagyashree. Aapke ghar mein koun-koun hain ?" Atul ne pucha.

Bhagyashree - "Papa, Mummy aur main."

Atul - "Koi Bhai ya Behan ?"

Bhagyashree - "Nahi. Main iklauti santaan hoon Sir."

Atul - "Iske pehle aap kaha kaam karti thi ?"

Bhagyashree - "Yeh meri pehli job hain Sir."

Atul - "Education kya kiya hain aapne ?"

Bhagyashree - "Maine MBA kiya hain Sir."

Atul - "Chalo accha hain."

Bhagyashree - "Aapke ghar mein koun-koun hain Sir ?"

Atul - "Meri joint family hain aur main apne ghar mein sabse bada ladka hoon."

Bhagyashree - "Aur aapke wife aur bacche ?"

Atul - "Meri abhi tak shaadi nahi hui hain."

Bhagyashree - "OK. Toh aap kab kar rahe ho shaadi ?"

Atul - "Dekhte hain. Koi pasand bhi toh aani chahiye na ?"

Bhagyashree - "Haan woh baat toh hain Sir."

Tabhi Bhagyashree ka ghar aa gaya aur usne Atul se gaadi rokne ke liye kaha. Atul ne Car roki aur woh boli, "Thank You very much Sir."

Atul - "Mention Not."

Phir woh Car se bahar nikal kar apne flat ki aur chali gayi. Atul bhi apni Car start karke apne ghar ke liye chala gaya.  

Agle din daily normal routine ki tarah kaam ho raha tha. Tabhi Atul ko abhaas hua ki kisi ne uske cabin ke darwaze ko knock kiya hain. Usne dekha ki, Bhagyashree uske cabin ke bahar khadi hain. Atul ne use andar aane ka ishaara kiya. Woh andar aayi aur muskura kar boli, "Good Afternoon Sir."

Atul - "Good Afternoon Bhagyashree. Aaiye please baithiye."

Bhagyashree uske saamne baithi. "Sir in papers par aapke signatures chahiye the." Yeh kehte hue usne Atul ke haath mein file de di. Atul ne file li aur kaha, "Kya signatures karna urgent hain ?"

Bhagyashree - "No Sir."

Atul - "Thik hain phir aap shaam mein file lekar chale jaaiyega."

Bhagyashree - "OK Sir." Phir woh chali gayi. 

Shaam mein woh Atul ke cabin mein aayi aur kaha ki, "Sir woh signatures."

Atul - "Are haan. Main bhool hi gaya. Aap baithiye thodi der ke liye." Atul ne file padhna shuru kiya aur file padhte-padhte uski nazar baar-baar Bhagyashree par pad rahi thi. Aur shayad woh bhi is baat notice kar rahi thi. Usne ek-ek kar sabhi kagaz padhe aur unpar signatures kiye. Uske baad usne woh file use de di. "Thank You Sir." Keh kar woh wapas chali gayi. 

Woh dono office mein aksar milte the. Lekin bas kaam-kaaj ki hi baatein kiya karte the. Office mein log kya kahenge is darr se Atul, Bhagyashree se thik se baat-cheet nahi kar paata tha. Lekin woh uske kareeb jaana chahta tha. Woh use bohut acche se jaan na chahta tha. 

Ek shaam, jab Atul parking mein apni Car start kar raha tha, toh woh nahi hui. Kaafi der tak koshish karne ke bawjood Car start nahi ho paa rahi thi. Usne socha ki shayad koi gadbadi aa gayi ho gaadi mein, woh parking se paidal hi bahar nikla aur auto ke liye wait karne laga. Thodi hi der baad, Bhagyashree uske bagal mein aa khadi hui. Atul ko dekhte hi woh boli, "Hello Sir."

 Atul - "Hi Bhagyashree. Aap yahan ?"

Bhagyashree - "Yeh sawal toh mujhe aapse karna chahiye Sir. Aapki Car kaha hain ?"

Atul - "Woh achanak se kharab ho gayi hain. Toh isliye main aaj auto pakadne ke liye aaya hoon."

Tabhi ek auto inke saamne aa khadi hoti hain. Atul us auto wale se puchta hain, "Bhaiyaa Bajaj Nagar chaloge ?"

Auto Wala - "Haan Sahab."

Bhagyashree auto mein baithti hain. Aur kehti hain, "Sir aap bhi aa jaaiye."

Atul - "Are you sure ?"

Bhagyashree - "Haan auto share bhi ho jaayegi."

Atul - "OK." 

Phir woh auto mein uske bagal mein baith jaata hain. Dono hi auto mein dher saari baatien karte hain. Kuch kaam aur office se judi baatein toh kuch apne personal life ke baare mein baatein. Baat karte-karte Atul us se puch leta hain, "Toh koi Boyfriend hain aapka ?"

Bhagyashree - "Nahi Sir."

Atul - "Kyun ?"

Bhagyashree - "Aaj tak koi bhi pasand hi nahi aaya. Aapki koi Girlfriend hain Sir ?"

Atul - "Nahi."

Bhagyashree - "Kyun Sir ?"

Atul - "Wahi wajah jo aapki hain. Aaj tak koi bhi mujhe pasand hi nahi aayi hain. Waise aapki pasand kaisi hain ?" 

Bhagyashree - "Kuch pata nahi Sir. Koi aisi khaas category nahi banayi hain. Bas acche nature ka ho. Understanding aur Caring ho. Koi acchi naukri karta ho."

Atul - "Aur agar business karta ho toh ?"

Bhagyashree - "Tab toh aur bhi acchi baat hain. Main dher saari shopping karungi. Uske paise main bohut acche se udaungi." Phir dono hi hans padte hain. 

Tabhi Bhagyashree kehti hain, "Aapko kaisi ladki pasand hain Sir ?"

Atul - "Bas acche nature ki ho. Caring ho. Khoobsurat ho. Mujhe samjhe. Main agar kabhi late ghar pahuchu toh mujh par shak na kare. Bas hanste-hanste zindagi kat jaaye."

Thodi hi der baad, Bhagyashree ka ghar aa jaata hain aur woh Auto se utarti hain. Uske baad woh, "Thank You Sir" kehkar chali jaati hain.

Agle din woh dono office aate hain aur apni rozmarra ka kaam karte hain. Shaam mein Bhagyashree, Atul ke cabin knock karti hain. Atul use andar aane ka ishaara karta hain aur woh andar aati hain. 

Atul - "Baithiye."

Bhagyashree uske saamne baithti hain aur kehti hain, "Sir aapke signatures chahiye the." Aur file uske saamne rakhti hain. Atul use bohut dhyaan se dekhta hain. Aaj Bhagyashree bohut khoobsurat dikh rahi thi. Usne White Top aur Blue Jeans pehna hua tha. Uske hothon par gulaabi rang ki lipstick lagi hui thi. Atul ki nazrein us se hath nahi paa rahi thi. "Sir. Sir." Bhagyashree ki aawaz sunkar woh hosh mein aaya aur kaha, "Haan."

Bhagyashree - "Sir aapke signatures ?"

Atul - "Haan. Sorry main thoda busy hoon. Aap thodi der baad aaiyega."

Bhagyashree - "Kya main file yahi par chod kar jaaun ?"

Atul - "Haan."

Bhagyashree - "OK Sir." Kehkar woh chali jaati hain. 

Shaam mein woh dubara Atul ke cabin par knock karti hain aur woh use andar aane ka ishaara karta hain. Andar aate hi woh kehti hain, "Sir woh signatures ?" 

Atul - "Haan. Maine signatures kar diye hain." Kehkar woh file uske haath mein deta hain. Phir woh kehta hain, "Bhagyashree?"

Bhagyashree - "Haan Sir ?"

Atul - "Kya main ek baat kahun ?"

Bhagyashree - "Kya Sir ?"

Atul - "Aap bura toh nahi maanogi ?"

Bhagyashree - "Nahi Sir."

Atul - "Aaj aap bohut khoobsurat dikh rahi ho."

Bhagyashree muskura kar kehti hain, "Thanks for the compliment Sir."

Uske baad woh wahan se chali jaati hain. 

Ek din Atul ek mall mein jaata hain. Wahan par achanak se koi peeche se uske kandhe par haath rakhta hain. Woh peeche mud kar dekhta hain aur Bhagyashree ko dekh kar chaunk jaata hain. 

Bhagyashree - "Sir aap yahan ?"

Atul - "Hi Bhagyashree. What a co-incidence."

Bhagyashree - "Aap shopping ke liye aaye ho Sir ?"

Atul - "Nahi woh main movie dekhne ke liye aaya tha."

Bhagyashree - "What a co-incidence main bhi movie dekhne ke liye hi aayi hui thi."

Atul - "Koun si movie ?"

Bhagyashree - "Aashiqui 2."

Atul - "Main bhi wahi movie dekhne ke liye aaya tha."

Bhagyashree - "Aap dekh chuke ho movie ?"

Atul - "Nahi. Aur aap ?"

Bhagyashree - "Main bhi nahi."

Atul - "Toh kya hum saath mein movie dekhe ?"

Bhagyashree - "OK Sir."

Atul counter par jaakar ticket nikaalta hain aur woh dono cinema hall ke andar jaakar saath mein baithte hain. Movie ke dauran galti se Atul ka haath Bhagyashree ke haathon se chua jaata hain. Dono ki nazrein milti hain aur woh muskura deti hain. Movie khatam hone ke baad, woh dono saath mein bahar nikalte hain aur Atul us se puchta hain, "Kya hum saath mein coffee pee sakte hain ?"

Bhagyashree - "OK Sir."

Woh dono saath mein ek coffee shop mein jaate hain aur saath mein coffee peete hue ek dusre se dher saari baatein karte hain. Ek dusre ki pasand, napasand ke baare mein discussion karte hain. Us din woh dono ek dusre ko bohut acche se samajh paate hain. Uske baad woh dono Coffee Shop se bahar nikalte hain, toh achaanak se baarish shuru ho jaati hain. Dono ek dusre ka haath pakad kar Atul ki Car ki aur bhaagte hain. Car mein baithte hi, dono ki nazrein milti hain. Phir Atul ki nazar Bhagyashree ke honthon par jaati hain. Uske laal honth jo bheegne ki wajah se aur bhi zyada khile hue lag rahe the. Atul bas un honthon mein hi kho jaata hain. Na chahte hue bhi uska haath Bhagyashree ke honthon par chala jaata hain. Uske hothon ka sparsh hote hi Atul uske aur kareeb jaata hain. Atul ki ungliyon ka sparsh apne honthon par mehsus kar Bhagyashree ki bhi aankhen band ho jaati hain. Aisa lag raha tha maano, woh dono hi ek dusre mein kho gaye ho. Dheere-Dheere woh dono hi madhosh ho chuke the. Bhagyashree ke gale se phisalta hua paani dekh Atul uske aur kareeb jaata hain.  Tabhi achaanak se baadal garaj uthta hain aur woh dono hosh mein aate hain. Dono hi ek dusre se dur ho jaate hain. Bhagyashree ki aankhen sharam ke maare neeche ho jaati hain. Tabhi Atul kehta hain, "Main aapko ghar par chod deta hoon." Atul Car start karta hain aur raaste bhar dono hi ek dusre se koi bhi baat-cheet nahi karte hain. Bhagyashree ka ghar aata hain aur woh Atul se bina kuch kahe aur bina us se nazrein milaaye Car se utarkar chali jaati hain. 

Agle din dono office mein milte hain lekin, ek dusre se thik se baat nahi kar paate hain. Pichle din, un dono ne ek dusre ke liye shayad kuch mehsus kar liya tha. Ab woh dono hi ek dusre ko kuch alag hi nazron se dekhte hain. Kai din beet gaye lekin, us ehsaas ko woh dono hi bhula nahi paa rahe the. 

Ek din Atul ne Bhagyashree ko apne cabin mein bulaaya aur woh andar aayi. Movie wale vaakye ko kaafi din beet chuke the, lekin, woh dono aaj bhi ek dusre se pehle ki tarah baat karne mein sahaj mehsus nahi kar paa rahe the. 

Bhagyashree uske saamne wali kursi par baithi hain. Atul bina us se nazrein milaaye kehta hain, "Shayad hume ek do baar bahar milna chahiye."

Bhagyashree kuch bhi nahi kehti hain. 

Atul kehta hain, "Kuch toh kaho tum." Bhagyashree ki nazrein neeche hoti hain.

"Yeh sab baatein hum office mein nahi kar sakte hain." Bhagyashree bina us se nazrein milaaye kehti hain. "Main aapse milna chahti hoon. Kuch der baat karna chahti hoon, woh bhi ek aisi jagah par jahan hamare siva aur koi bhi na ho. Khaas kar hamare aas-pass koi jaan pehchan ka aadmi na ho."

Atul - "Thik hain. Filhal mere ghar wale sab bahar gaon gaye hue hain. Waha hum dono akele hi honge. Agar tumhe sahi lage, tum jab chahe tab aa jaana."

Bhagyashree - "Thik hain. Main kal shaam aapke ghar aaungi." Yeh kehkar woh wahan se chali jaati hain. Atul use apne ghar ka address deta hain.

Agli shaam Atul besabri se uska intezaar karta hain.

Shaam 6 baje uske bungle ka Door Bell bajta hain. Atul darwaza kholta hain aur uske saamne Bhagyashree khadi hoti hain. Bhagyashree ko dekhte hi woh use bas dekhta hi reh jaata hain. Usne kaale rang ki saaree pehne hui thi. Aur high heels wali sandal pehne, woh bohut zyada khubsurat dikh rahi thi. Atul use andar aane ke liye kehta hain aur woh andar aati hain. Phir woh use baithne ke liye kehta hain. Woh Sofa par baithti hain aur Atul uske saamne baithta hain. Phir Atul puchta hain, "Kya tum kuch logi ?"

Bhagyashree 'Na' mein apna sar hilati hain. Phir woh kehti hain, "Kya aap mujhe apna ghar dikha sakte ho Sir ?"

Atul - "Thik hain."

Atul use ek ek karke apne ghar ka saara hissa dikhaata hain. Hall, Kitchen, Lawn dikhate-dikhate woh use apne Bedroom mein le jaata hain. Bhagyashree uski aankhon mein dekhti hain aur dono ki nazrein milti hain. Phir woh apne Saree ka Pallu niche gira deti hain. Uski is harkat se Atul chaunk jaata hain. "Yeh kya kar rahi ho tum ?"

Bhagyashree - "Wahi. Jiska aap badi besabri se intezaar kar rahe the."

Atul - "Kya tumne mujhe itna gira hua samajh rakha hain ?"

Bhagyashree - "Aap bhale aisa na soche Sir. Lekin, duniya toh yahi sochegi."

Atul - "Kya hum ekdusre se pyaar nahi karte hain ?"

Bhagyashree - "Lekin is pyaar ko yeh duniya nahi samajh paayegi Sir. Duniya toh yahi kahegi ki, maine aapko apne pyaar ke jaal mein phansa kar apna bhavishya surakshit kar liya. Us barsaat mein hum dono ne ek dusre ke liye jo kuch bhi mehsus kiya, woh zindagi bhar mere dil mein bana rahega. Lekin, main is duniya se kya kahungi?"

Atul - "Mujhe duniya ke baaton ki parwaah nahi hain."

Bhagyashree - "Lekin mujhe hain. Kisi na kisi ko toh duniya ko jawab dena hi padega Sir. Hum dono ek dusre ko pasand karte hain, yeh sach hain. Lekin filhal meri aapke patni ban ne ki haisiyat nahi hain. Humare is pyaar ko koi bhi nahi samajh paayega. Behtar yahi hoga, ki aaj hum apne saare rishte tod de. Aur kal mera resignation letter aapke table par hoga."  Yeh kehte hi Bhagyashree waha se chale jaati hain. Agle din woh resignation letter Atul ke haathon mein pakda deti hain. Ek mahine tak kaam karne ke baad, woh Atul ke na sirf office se balki, uski zindagi se bhi hamesha hamesha ke liye chali jaati hain.

                    - Ved Vineet Gautam