Vishwaas

 Ramesh Kumar peshe se ek vyapaari hain. Unki patni ka naam, Raakhi Kumar hain. Ramesh aur Raakhi ke do bete hain. Bade bete ka naam, Suraj Kumar hain aur chote bete ka naam, Aditya Kumar hain. Suraj aur Aditya dono hi, Ramesh ke saath vyapaar mein haath bantate hain. Veh dono Bhai abhi tak kunware hain. Teeno baap-bete har subah tayyar hokar apne dukaan ke liye nikal padte hain aur shaam mein kaam khatam hote hi, apne ghar laut aate hain. 

Ek din ki baat hain. Shaam ka waqt tha aur Ghar mein sabhi sadasya saath mein baithe hue the. Sabhi Ghar wale aapas mein baat-cheet kar rahe the. 

Ramesh - "Kaam toh acche se chal raha hain. Hamare dono beton ne behad shaandar tareeke se kaam ko sambhal liya hain."

Raakhi - "Haan dono hi ladke bade mehanti hain."

Suraj aur Aditya dono muskurate hain. 

Ramesh - "Ab dono ladke bade zimmedar ban gaye hain. Ab waqt aa gaya hain ki ek-ek karke in dono ki zimmedariyan zara badha di jaaye."

Suraj - "Matlab Papa ?"

Ramesh - "Are Bhai aaj nahi toh kal, Biwi-Bacchon ki zimmedari toh uthani hi hogi na."

Aditya - "Lekin Papa abhi itni jaldi hi kya hain."

Raakhi - "Yahi sahi waqt hain Beta."

Ramesh - "Ab waqt aa gaya hain ki tum dono ki Shaadi ke baare mein socha jaaye. Yeh ab zaroori bhi hain."

Raakhi - "Ab main bhi thak chuki hoon tum logon ke liye khaana banate-banate. Ab meri Bahuyein aakar kaam karengi aur main Maharani ki tarah aaram karungi."

Sab log hans padte hain. Phir Ramesh badi hi aans se apne dono Beton ki aur dekhta hain aur puchta hain, "Toh kya khayal hain tum dono ka Beta ?"

Dono Bhai zara sharmaate hain aur phir woh dono 'Haan' mein apna sar hilaate hain. 

Raakhi - "Abhi se hi tum dono itna sharma rahe ho ? Dekho toh chehra sharam se laal ho gaya hain."

Ramesh - "Are Bhai agar itna sharmaaoge, toh hone wali Bahuon se khul kar baat-cheet kaise kar paaoge ?"

Raakhi - "Sabse zaroori baat toh main tum dono ko batana bhool hi gayi."

Suraj - "Woh kya Mummy ?"

Raakhi - "Kal aur Parson yeh do din, aap log Dukaan par nahi jaayenge."

Aditya - "Woh kyun ?"

Raakhi - "Ladki wale aayenge, main kuch saamaan mangwaungi aap logon se. Mujhe list bhi banani hogi. Acche se tayyariyan karni hogi."

Ramesh - "Haan. Tum thik keh rahi ho. Do din baad, woh log aane hi wale hain; Suraj ko dekhne ke liye. Ladki walon ka swaagat acche se hona chahiye. Dhyaan rahe, kisi bhi cheez ki kami na pade."

Raakhi - "Suraj ki Shaadi tay ho jaati toh accha ho jaata."

Ramesh - "Ho jaayega. Sab accha ho jaayega."

Agle din, Raakhi saamaano ki parchi tayyar karke Suraj ko pakda deti hain aur kehti hain, "Ja apne hone wale Sasural Walon ke liye kharid-daari kar aa."

Suraj muskurata hain aur kehta hain, "Thik hain Mummy." Phir woh chala jaata hain.

Hall mein Parivaar ke sabhi sadasya baithe hue the. Raakhi Aditya se kehti hain, "Beta tumhe kis tarah ki ladki chahiye ?"

Aditya - "Ab main kya bolun ?"

Ramesh - "Are Bhai kuch toh socha hoga tumne. Ladki kis tarah ki honi chahiye. Us ladki mein kya-kya khoobi honi chahiye."

Aditya - "Kabhi yeh khayal aaya hi nahi Papa. Bas itna chahta hoon ki, ladki jo bhi ho; woh bas aap dono ka khayal rakhe, sabke saath mil-julkar rahe. Woh bas is Parivaar ko apna maane."

Ramesh - "Zaroor Beta. Hume Bahuyein acchi hi milegi."

 Veh log yahan-wahan ki baat-cheet karte hain. Kuch der baad, Suraj saamaan kharid kar ghar aa jaata hain. Tayaarion mein yeh do Din kaise nikal jaate hain, kisi ko pata hi nahi chal pata hain. 

Aakhir Kaar, Ladki wale un logon ke ghar aa jaate hain. Ghar ke sabhi log unka bohut acche se swaagat karte hain.  Ramesh ladki ke Pita se kehta hain, "Aap aaye, hamare ghar mein rounak aa gayi."

Ladki Ke Pita - "Yeh toh hamare liye saubhagya ki baat hain ki, hum logon ka aapas mein rishta judne ki baat ho rahi hain."

Ramesh - "Aaiye baithiye."

Ladki Ke Pita ka naam, Pravin Sahay hain. 

Pravin Sahay, Sofa par baith jaate hain. Ramesh unke saamne baith ta hain.

Raakhi - "Namastey Bhai Sahab."

Pravin Sahay - "Namastey Bhabhi."

Raakhi - "Bhabhiji ko nahi laaye Bhaisahab."

Pravin Sahay - "Aap log Ghar aaiye aur agar hamari Beti aapko pasand aa jaaye, toh lage haath; aap use apna lijiyega."

Ramesh - "Ji Zaroor. Waise aapka kaam-kaaj kaisa chal raha hain ?"

Pravin Sahay - "Bohut accha chal raha hain."

 "Aap log baatein kariye, main Chai le aati hoon." Kehte hue, Raakhi andar chale jaati hain. 

Phir Ramesh, Suraj ki aur ishaara karte hue kehta hain, "Yeh hain ladka."

Pravin Sahay - "Aur Beta kaise ho aap ?"

Suraj - "Thik hoon Uncle."

Pravin Sahay - "Apne Papa ke saath vyapaar mein haath bantate ho aap."

Suraj - "Ji Uncle."

Pravin Sahay - "Bohut badhiya hain."

Veh log aapas mein baat-cheet kar rahe the. Kuch der baad, Raakhi Chai le aati hain. Chai ki chuskiyan lete-lete veh log baatein karte hue; ek dusre ko samajhte hain. Chai khatam hote hi, Pravin Sahay kehte hain, "Dekhiye, main seedha aur saaf-saaf kahunga. Mujhe aapse rishta jodne mein poori dilchaspi hain. Ek baar aap log mere ghar aakar, meri Beti se mil lijiye. Ghar ke baaki logon ko bhi acche se samajh lijiye. Phir jo bhi aap logon ka faisla hoga, hum log aapke us faisle ko apne sar-aankhon par rakhenge."

Ramesh - "Jab aap kahiye, hum tab mil lenge." 

Pravin Sahay - "Dekhiye mera yeh maan na hain ki, shubh kaam mein deri nahi karni chahiye. Agar hamara rishta judne ke aasar ban hi rahe hain, toh kyun na aap log kal hi hamare ghar darshan dene ke liye aa jaaye ?"

Ramesh - "Yeh toh bohut hi acchi baat hain. Hum kal shaam mein hi aapke yahan aa jaayenge."

"Toh thik hain phir. Ab aap log mujhe ijaazat dijiye." Kehte hi, Pravin Sahay uth khade hote hain. Sabhi log unke saath khade hote hain. Phir Ramesh aur Pravin Sahay ek dusre ke gale lagte hain aur Pravin Sahay wahan se chale jaate hain. 

Agle din, Ramesh apne poore Parivaar ke saath, Pravin Sahay ke Ghar jaate  hain. Veh log unka bohut garam-joshi se swaagat karte hain. Dono Parivaar ki aapas mein bohut khul kar baat-cheet hoti hain aur phir aakhir mein dono Parivaar ka rishta tay ho jaata hain. Jis ladki se, Suraj ki Shaadi tay hui thi; us ladki ka naam Pooja tha. 

Do Mahine baad, Suraj aur Pooja ki Shaadi ho jaati hain. Shaadi ke baad, kuch dino tak hansi-khushi ka Maahol rehta hain. 

Ek din ki baat hain. Shaam ka waqt tha aur Ghar ke sabhi log saath mein baithe hue the. Ramesh Pooja se kehta hain, "Toh Beta is Ghar mein aapko kaisa lag raha hain ?"

Pooja - "Bohut accha lag raha hain Papa."

Ramesh - "Kisi se koi shikayat toh nahi hain na ?"

Pooja - "Bilkul bhi nahi Papa."

Ramesh - "Jabse tum is ghar mein aayi ho, tabse tum kahi bahar ghumne ke liye nahi gayi."

Pooja muskurati hain. 

Ramesh - "Toh ab maine yeh socha hain ki, tum kal Suraj ke saath thoda yeh shehar ghoom aao."

Pooja - "Papa aap sab log bhi saath mein chaliye na."

Ramesh - "Nahi Beta. Tum akele Suraj ke saath jaao."

Pooja - "Thik hain Papa."

Agle Din, Suraj aur Pooja saath mein ghumne ke liye jaate hain. Shaam mein Pooja ghar laut aati hain. Lekin, woh Suraj ke saath nahi aati hain.  Pooja ke saath ek dusra ladka tha. Yeh dekh ghar ke sabhi log thoda aashchary mein pad jaate hain. 

Sabko dekhte hi, Pooja kehti hain, "Yeh mera dost hain, Shyam."

Shyam sabko namastey karta hain. Veh log bhi namastey karte hain. Ramesh Shyam se kehta hain, "Aao Beta baitha na."

Ramesh - "Suraj nahi aaya ?"

Pooja - "Woh darasal unhe achaanak se kuch kaam aa gaya tha, toh woh wahi par chale gaye. Suraj raat tak aa jaayenge."

Shyam baith jaata hain. Phir Ramesh kehta hain, "Toh Beta aap kaam kya karte ho ?"

Shyam - "Ji main ek Company mein Naukri karta hoon."

Ramesh - "Aur Pooja ke aap dost ho."

Shyam - "Ji Uncle hum dono College mein saath mein padhte the." 

Ramesh - "Aapki Shaadi ho gayi ?"

Shyam - "Ji nahi Uncle."

Phir Ramesh aur Shyam kuch der tak baatein karte hain aur uske baad, Shyam kehta hain, "Accha ab main chalta hoon Uncle."

 Ramesh Shyam se kehta hain, "Beta tumhe jab bhi chaho, yahan Pooja se milne ke liye aa sakte ho."

Shyam - "Ji Shukriya Uncle."

Uske baad, Shyam chala jaata hain. Pooja sochti hain, ki shayad un logon ko uska Shyam ke saath aana pasand na aaya ho. Use lagta hain, ki shayad veh log ab kisi bhi waqt usse kuch sawaal karenge. Lekin, aisa kuch bhi nahi hota hain. 

Kaafi der hone ke bawjood jab veh log, Pooja se koi bhi sawaal nahi karte hain; toh woh sochti hain ki, 'Shayad Suraj ke aane ke baad, veh log mujhse is baare mein baat-cheet kare.' 

Pooja ko Suraj ke aane ka intezaar rehta hain. Kaafi der ho jaati hain lekin, Suraj ghar nahi laut ta hain. Pooja Ramesh se puchti hain, "Papa Suraj abhi tak ghar nahi aaye ?"

Ramesh - "Suraj ka Call aaya tha. Woh keh raha tha ki, use kuch kaam nikal pada hain."

Pooja - "Thik hain Papa." 

Uske baad, Pooja andar ke kamre mein chale jaati hain. Do ghante beet jaate hain. Lekin, Suraj abhi tak ghar nahi lauta tha. Pooja, Suraj ko Call lagati hain. Do ghanti bajne ke baad, Suraj Call uthata hain aur kehta hain, "Haan Pooja kaho."

Pooja - "Are Suraj tum kaha par ho, abhi tak tum ghar nahi laute ?" 

Suraj - "Haan woh main thodi der mein pohunch raha hoon."

Pooja - "Thik hain. Sambhal kar aana."

Suraj - "Thik hain." 

Phir Suraj phone kaat deta hain. Thodi der baad, Suraj ghar pohunch jaata hain. Ghar pohunch kar, Suraj haath muh dhota hain aur apne kapde badal kar Hall mein aa jaata hain. Uske baad, veh log saath mein khaana khaate hain. Lekin, is dauraan bhi ghar ka koi bhi sadasya, Suraj se Shyam ka zikr tak nahi karte hain. Veh log aapas mein bas yahan-wahan ki baat-cheet karte hain. Kuch der baad, sab log apne-apne kamre mein sone ke liye chale jaate hain. 

Der raat ho chuki thi. Suraj ab bhi jaga hua tha. Woh apne Laptop par kaam kar raha tha. Kaafi der tak woh kaam karta raha. Aakhir mein woh apne kaam se kareeb raat ke ek baje khaali hua. Uske baad, woh apni kursi se uthta hain aur woh rasode mein jaakar; ek glass paani peeta hain. Phir woh dobara apne kamre mein aata hain. Uske baad, woh apne bistar par leat jaata hain. 

Pooja - "Suraj kya tum jaag rahe ho ?"

Suraj - "Tum abhi tak jagi hui ho ?"

Pooja - "Haan."

Suraj - "Par kyun ?"

Pooja - "Mujhe neend nahi lagi."

Suraj - "Sone ki koshish karo."

Pooja - "Neend lag hi nahi paa rahi hain."

Suraj - "Accha thik hain. Lekin phir bhi koshish karo tum."

Pooja - "Ek baat kahun Suraj ?"

Suraj - "Haan kaho."

Pooja - "Woh aaj ghar mein mera ek dost aaya tha."

Suraj - "Accha ? Kaha ka Dost ?"

Pooja - "Jab tumhe achaanak se apne kaam se jaana pada tha, tab mujhe mera Dost mil gaya tha. Shyam naam hain uska. Usi ke saath main ghar aayi thi."

Suraj - "Chalo accha ho gaya. Tum kaafi dino ke baad, apne Dost se mili. Accha laga hoga tumhe ?" 

Pooja - "Hmm. Tum naaraz toh nahi ho na is baat se ?"

Suraj - "Are Bhai. Main kyun hounga naaraz ?"

Pooja - "Hmm."

Suraj - "Ghar mein tumse kisi ne kuch kaha kya ?" 

Pooja - "Bilkul bhi nahi."

Suraj - "Dekho Pooja. Hum dono jeevan-saathi hain. Hum dono ka aapas mein pyaar aur vishwaas dono hona zaroori hain. Aur jahan tak sawaal hain ghar walon ka, toh hum sab log ek hi Parivaar hain. Toh hum sab logon ka aapas mein vishwaas hona zaroori hain. Agar hum log tumpar vishwaas nahi kar paayenge, toh hum tumhe apna kaise paayenge ?" 

Pooja - "Hmm. Woh baat toh hain."

Suraj - "Ab jaldi se so jaao aur mujhe bhi so jaane do. Kal subah mujhe kaam par bhi jaana hoga."

Pooja apni aankh band karti hain aur woh nischint ho jaati hain. Ek ajeeb si ghabrahat jo uske mann mein thi, woh khatam ho jaati hain. 

                     - Ved Vineet Gautam