Sneh

Raj ek businessman hain. Woh ek grocery store chalata hain. Uski dukaan uske ghar ke pass hi hain. Woh roz subah uthkar tayyar hokar apne store par jaata aur shaam mein kaam khatam karke apne ghar wapas aa jaata hain. Ek din uske store par ek ladki aayi usne kuch samaan kharide aur woh bill pay karke wapas chali gayi. Woh ladki dikhne mein behad khubsurat thi. Kuch dino baad, raat ke 9 baj rahe the, Raj apna store band hi kar raha tha, ki woh ladki bhaagte hue uske pass aayi aur boli, "Excuse Me. Mujhe thoda urgent mein kuch samaan kharidna tha."

Raj - "Iam sorry mam. Store band ho chuka hain."

Woh ladki boli, "Please Sir. Thoda urgent hain."

Raj - "Lekin mam. Store toh band ho chuka hain na."

Woh ladki dubara boli, "Agar aap meri thodi si madad kardenge, toh main aapki bohut shukraguzar houngi."

Raj - "Lekin Mam."

Raj ki baat kaat te hue us ladki ne kaha, "Please thoda sa Co-Operate kar lijye."

Raj - "OK." Uske baad, usne apna store dubara khola. Ladki ne dher saare samaan kharide aur apna bill pay karke woh muskura kar boli, "Thank You very much."

Raj - "My pleasure Mam. Lekin aap kal bhi toh aa sakti thi."

Ladki boli, "I know lekin, mujhe abhi urgent mein groceries chahiye thi. Iam sorry."

Raj - "No issues Mam."

Kuch dino baad ki baat hain. Shaam ke 5 baj rahe the. Raj apne dukaan ke counter par baitha hua tha. Usne apne liye Chai mangwayi aur woh Chai ke chuske lena shuru hi kar raha tha, ki woh ladki dubara uske dukaan mein aayi. Usne bohut saare saaman liye aur counter par chali aayi, aur woh bill pay karne ke baad boli, "Thank You very much Sir, us din help karne ke liye."

Raj - "Kis din Mam ?"

Ladki boli, "Us din jab raat mein aap apna store band kar rahe the, tab main achanak se aayi aur aapse request kar rahi thi store kholne ke liye."

Raj - "No issues Mam. It's totally fine." Ladki muskura kar wapas chali gayi. 

Ek din ki baat hain, jab Raj apne ghar par hi tha. Aaj woh apne dukaan nahi jaane wala tha. Woh subah utha, uski maa ne uske liye Chai banaya aur woh fresh hokar usne Chai pee li. Uske baad, woh apne society ke garden mein tehalne ke liye chala gaya. Usne dekha ki wohi ladki garden mein jogging kar rahi hain. Raj use apni society mein dekhkar chaunk gaya. Pehle Raj ke kadam badhe uski aur lekin, usne socha ki shayad use accha na lage aur woh ruk gaya. Uske baad, woh garden ke bench par baith gaya. Thodi der baad, woh ladki uske pass aayi aur boli, "Hello Sir."

Raj - "Hello Mam. Aap yahan ?"

Ladki boli, "Haan Sir. Woh main do din pehle hi shift hui hoon yahan par. Kya aap bhi isi society mein rehte hain ?"

Raj - "Ji haan Mam."

Ladki puchi, "Aapka naam kya hain ?"

Raj ne kaha, "Mera naam Raj hain. Aur aapka Mam ?"

Ladki ne jawab diya, "Mera naam Tina hain."

Raj - "Toh Tina Mam aap karti kya ho ?"

Tina - "Main ek company mein job karti hoon. Main Project Manager hoon."

Raj - "That's Great. Aap yahan kounse flat number par rehti ho ?"

Tina - "Main B-501 mein rehti hoon."

Raj - "Oh what a co-incidence, main B-502 mein rehta hoon."

Tina - "Kya hum padosi hain ?"

Raj - "Hamara flat aamne-saamne hain."

Tina - "Yeh toh bohut acchi baat hain. Milte rahenge phir Sir."

Raj - "OK Mam."

Tina - "Bye Sir."

Raj - "Bye-Bye Mam."

Uske baad, Tina wahan se chali jaati hain. Aamne-Saamne flats hone ki wajah se, woh log aksar shaam mein ek dusre ko dekhkar, Hi Hello karte rehte the. Waqt beet ta gaya aur woh dono hi ek dusre ke acche dost ban gaye. Mam aur Sir ko bhoolakar ab woh dono ek dusre ko naam se hi pukarne lage aur saath hi saath woh dono hi ab 'Aap' se 'Tum' par aa gaye.

Ek din jab raat mein Raj apne ghar pahucha, tab Tina ne use dekha aur kaha, "Hi Raj."

Raj - "Hi Tina. Kaisi ho tum ?"

Tina - "Main thik hoon Raj. Tum kaise ho ?"

Raj - "Main bhi thik hoon."

Tina - "Mujhe tumse kuch kehna tha."

Raj - "Haan kaho."

Tina - "Kal mera Birthday hain. Toh shaam mein ghar par ek choti si party rakhi hain. Toh kal tum ghar thoda jaldi aana."

Raj - "Oh wow. Congratulations Happy Birthday."

Tina - "Thank You. Lekin please kal zaroor aana tum."

Raj - "Haan main zaroor aaunga."

Agle din Tina ka Birthday bohut acche se hua. Raj ne use ek Cadbury gift ki. Is par Tina ne kaha, "Ise kehte hain Business. Apne store se hi laaye honge tum ?"

Is par Raj hans diya. Aur usne kaha, "Haan ab kya karun."

Tina - "This is called business."

Aur phir woh dono hi hans diye. 

Ek din, Tina ki tabiyat achanak se kharab ho gayi aur use maata-pita ne use aspataal mein admit karaya. Jab Raj ko yeh baat pata chali, toh woh turant aspataal gaya. Doctor ne bataya ki use food poisoning hua hain aur woh do teen din ke liye aspataal mein bharti rahegi. Raj andar Tina se milne ke liye gaya. Use dekhte hi Tina muskurayi. Raj ne kaha, "Hi Tina."

Tina - "Hi Raj."

Raj - "Kaisi ho tum Tina ?"

Tina - "Main thik hoon. Tum kaise ho ?"

Raj - "Filhal toh tumhari tabiyat ka haal-chal lena chahiye mujhe."

Tina - "Hmm."

Thodi der tak Tina se baat-cheet karne ke baad, woh waha se chala gaya. 

Kuch dino ke baad, Tina ko aspataal se discharge mil gaya. Use dekhte hi Raj ne pucha, "Aakhir kaar discharge mil gaya tumhe ?"

Tina - "Haan Raj."

Raj - "Abhi tumhari tabiyat kaisi hain ?"

Tina - "Abhi thik hain."

Raj - "Apna khayal rakho."

Tina - "Haan zaroor Raj."

Har roz shaam mein aksar woh dono, ek dusre se khub baatein kiya karte the. Dheere-Dheere woh dono ek dusre ke bohut nazdeek ho gaya the. Woh dono kabhi shopping ke liye saath jaate, toh kabhi movie dekhne ke liye bhi saath jaate the. 

Ek din woh dono shaam mein saath movie dekhne ke liye gaye the. Movie ke dauraan jab propose scene chal raha tha, tab achanak se un dono ka haath ek dusre se takraya. Dono ki nazrein ek dusre se mili aur kuch seconds ke liye, woh dono ek dusre ko dekhte hi reh gaye. Movie khatam hone ke baad, woh dono Raj ki bike par baithe saath aa rahe the. Tabhi achaanak se Tez hawa aayi aur Tina ne Raj ko kas ke pakad liya. Us din un dono ne shayad kuch ajeeb mehsus kiya. Raaste bhar un dono ne ek dusre se koi bhi baat nahi ki. Society par pahuchne ke baad, woh dono apne-apne ghar chale gaye. Us din ke baad se, woh dono ek dusre se thik se baat-cheet nahi kar paa rahe the. Ek alag si bhavna chal rahi thi un dono ke mann mein. Do-Teen tak un dono ne ek dusre se koi bhi baat-cheet nahi ki. 

Ek din, jab raat mein Raj ghar lauta, tab usne dekha, ki Tina bahar hi khadi hain. Dono ne ek dusre ko dekhkar muskura diya. Raj uske pass gaya aur kaha, "Hi Tina."

Tina - "Hi Raj."

Raj - "Kya baat hain. Do-Teen din se tum mujhse baat-cheet nahi kar rahi ho ?"

Tina - "Main nahi kar rahi hoon ? Ya tum nahi kar rahe ho ?"

Raj - "OK. Kuch kehna chahti ho tum ?"

Tina - "Haan. Lekin samajh mein nahi aa raha hain, ki kaise kahoon."

Raj - "OK. Ek kaam karte hain. Kal kahi bahar chalte hain."

Tina - "OK."

Raj - "Kaha chale ?"

Tina - "Koi movie dekhne ke liye chalte hain."

Raj - "OK."

Tina - "OK. Main chalti hoon phir."

Raj - "Bye."

Tina - "Bye."

Agle din woh dono saath mein movie dekhne ke liye gaye. Movie khatam hone ke baad, Raj ne kaha, "Dinner par chale ?"

Tina - "OK."

Woh dono saath mein ek restaurant mein gaye dinner karne ke liye. Dono apna-apna order diya. Uske baad, Raj ne kaha, "Aaj tum bohut khubsurat lag rahi ho Tina."

Tina - "Thank You Raj."

Raj - "Toh aur batao. Kaisi chal rahi hain zindagi ?"

Tina - "Acchi chal rahi hain. Aur tumhari zindagi kaisi chal rahi hain ?"

Raj - "Meri bhi acchi chal rahi hain. Main tumse kuch kehna chahta hoon Tina."

Tina - "Haan bolo na Raj."

Raj - "Kya tumhe lagta hain ki hum sirf dost hain, ya dost se kuch zyada hain ?"

Tina - "Matlab ?"

Raj - "Main tumhe bohut pasand karta hoon Tina. Kya tumhare dil mein kuch hain mere liye ?"

Tina - "Haan. Pyaar toh main bhi tumse karti hoon. Par ab aage kya ?"

Raj - "Aage kya matlab ?"

Tina - "Main itne jaldi shaadi nahi karungi."

Raj - "Main keh bhi nahi raha hoon. Lekin kabhi na kabhi toh tum karogi na shaadi ?"

Tina - "Haan. Aur main tumse hi shaadi karungi Raj."

Raj - "Kya uncle aunty maan jaayenge Shaadi ke liye ?"

Tina - "Maan toh jaane chahiye. Aur kya tumhare Papa-Mummy maan jaayenge ?"

Raj - "Haan."

Tabhi Tina kehti hain, "Tum zindagi bhar mere saath rahoge na ?"

Raj - "Hamesha."

Uske baad, woh dono saath apne-apne ghar chale gaye. 

Ek din, Raj ne chai patti ka ek bada order diya tha. Saaman ki delivery hone ke baad, use pata chala ki woh saara material kharab nikala hain. Raj ne us aadmi ko contact kiya aur woh usse kaha ki, ya toh woh material replace karde ya phir woh material wapas lekar uske paise wapas karde. Woh dono hi suraton mein maan ne ke liye tayyar nahi tha. Kuch waqt ke baad se, Raj ka business dheere-dheere kharab hota gaya. 

Usi dauran, ek shaam Tina Raj se milne ke liye uske shop par aayi. 

Tina - "Hi Raj kaise ho tum ?"

Raj - "Main thik hoon. Tum kaisi ho ?"

Tina - "Main bhi thik hoon. Accha suno kya tum kal shaam mein free ho ?"

Raj - "Haan. Kyun ?"

Tina - "Woh mummy aur papa ko tumse kuch baatein karni thi."

Raj - "Kya baat karni thi ?"

Tina - "Ab woh toh wahi log jaante hain."

Raj - "OK. Kal shaam mein hum log mil lenge."

Tina - "Aur kal tum thoda jaldi hi aana haan, aur acche se fresh hokar aana. Kal ka din bohut mahattvapoorn hain."

Raj - "OK."

Tina - "Kuch pareshan lag rahe ho tum ?"

Raj - "Haan woh thoda sa kaam ka tension hain. Aur bas kuch bhi nahi."

Tina - "OK. Bye."

Raj - "Bye."

Uske baad, Tina waha se chali jaati hain. 

Agle din shaam mein ghar par pahuchne ke baad, Raj tayyar hota hain aur woh Tina ke ghar ka Door Bell bajata hain. Tina darwaaza kholti hain. Raj use dekhkar dekhta hi reh jaata hain. Tina ne hare rang ki saree pehni hui thi aur usne apne gale mein ek accha sa necklace bhi pehna hua tha. Woh Raj se kehti hain, "Hi Raj."

Raj - "Hi Tina."

Tina - "Andar aa jaao."

Raj ghar ke andar jaata hain. Raj ko dekhte hi, Tina ke maata-pita use dekhkar muskurate hain. Tina ke pita kehte hain, "Hello Raj Beta."

Raj - "Namastey Uncle. Namastey Aunty."

Tina Ki Maa - "Aao beta baitho."

Woh log saath mein baithte hain. Tina andar se chai le aati hain. Phir Tina ke pita kehte hain, "Raj kaise ho tum ?"

Raj - "Main thik hoon uncle."

Tina Ke Pita - "Aur baaki kaam kaisa chal raha hain tumhara ?"

Raj - "Thik chal raha hain."

Tina Ke Pita - "Abhi shaadi ke baare mein kuch socha hain tumne ?"

Raj - "Nahi abhi toh kuch bhi nahi."

Tina Ke Pita - "Toh tum kab karoge shaadi ?"

Raj - "Dekhte hain Uncle."

Tina Ke Pita - "Kya tum Tina ko pasand karte ho ?"

Raj - "Haan."

Tina Ke Pita - "Toh kya tum meri beti se shaadi karna chahoge ?"

Raj - "Haan. Agar aap logon ki ijaazat ho toh."

Tina Ke Pita - "Toh thik hain. Jitna jaldi ho sake apne ghar walon ko bula lo aur unse baat karke, shaadi ki tareekh bhi jaldi tai kar lenge phir."

Raj - "Uncle abhi toh thoda mushkil hoga."

Tina Ke Pita - "Kyun beta kya hua ?"

Raj - "Woh thoda sa mera business down. Thoda sa jhatka khaaya hain maine business mein. Toh abhi shayad main utne acche se Tina ka khayal na rakh paao."

Tina Ke Pita - "Beta business mein up down hote rehta hain na. Iska matlab yeh toh nahi ki tum shaadi hi nahi karoge."

Raj - "Lekin uncle shayad main Tina ka khayal utne acche se nahi rakh paaunga. Shayad ab main uski har zaroorat poori na kar paaun."

Tina Ke Pita - "Lekin beta, ise hi toh zindagi kehte hain. Zindagi mein kam zyada laga hi rehta hain. Aur Tina ko bhi toh tumhare har sukh-dukh mein tumhara saath dena chahiye. Woh tumhari jeevansaathi ban ne jaa rahi hain. Agar shaadi ke baad, tumhare business mein jhatka aata, toh kya tum Tina se yeh kehte ki tum apne ghar chali jaao."

Raj - "Nahi uncle woh baat nahi hain."

Tina Ke Pita - "Beta yeh sab zindagi bhar laga hi rahega. Shaadi mein zyada kharch karne ki bhi koi zaroorat nahi hain. Hum log mil-julkar ek acchi si kam budget mein shaadi kar lenge."

Raj - "Thank You very much uncle."

Tina Ke Pita - "Tumhari agar koi demand ho toh mujhe bata do."

Raj - "Nahi uncle. Hum logon ki koi bhi demand nahi hain. Main apne Maata-Pita ko bula leta hoon aur phir baaki aage aap dono ghar ke bade ho tay kar lijiyega ki kaise aur kaha karni hain shaadi."

Tina Ke Pita - "OK Beta."

Raj - "Main aata hoon phir uncle."

Tina Ke Pita - "OK Beta. Dekho main bhi tumhare pita jaisa hi hoon, isliye ek baat kehna chahta hoon."

Raj - "Haan uncle."

Tina Ke Pita - "Dekho tum kabhi zyada tension mat lo. Zindagi mein musibatein aati hi rehti hain. Lekin zindagi mein kuch lamhe aise hote hain, jinhe hume hamesha khulkar jeena chahiye. Kaam ke tension ke wajah se kabhi bhi zindagi mein hamare apno se hume dur nahi hona chahiye."

Raj - "OK uncle."

Uske baad Raj waha se chala jaata hain apne flat par. Thodi der ke baad, uska door bell bajta hain aur woh apna darwaza kholta hain. Tina ghar ke andar aati hain aur woh Raj ko apne gale se laga leti hain. Raj bhi use apni bahon mein bhar leta hain. Uske baad Tina kehti hain, "Thank You."

Raj - "Thank You toh mujhe kehna chahiye. Tumhare Papa ne humara rishta maan liya, woh bhi yeh jaan ne ke baad, ki main itne mushkil mein chal raha hoon."

Tina - "Hum dono milkar saari mushkilon ka saamna kar lenge."

Raj - "Tum saath ho toh mujhe ab koi bhi chinta nahi hain."

Uske baad, woh dono ek dusre ko kas ke gale laga lete hain. 

                 - Ved Vineet Gautam