Bade Ghar Ki Beti

Sudhir Kumar peshe se ek Vakil hain. Unki ek patni hain aur do bete hain. Patni ka naam Nirmala hain. Bade bete ka naam hain Sanjay Kumar aur chote bete ka naam hain Sunil Kumar. Sanjay filhal college mein graduation kar raha hain aur Sunil abhi chauthi kakshaa mein padhta hain. Dono bhaiyon mein umar ka bohut bada antar hain. Unka poora parivaar bohut sneh aur prem ke saath rehte hain. Sanjay apne chote bhai Sunil ko bohut prem karta hain. Woh Sunil ka bohut acche se khayal rakhta hain. College se aane ke baad woh aksar Sunil ko apne saath bithakar use padhta bhi hain aur phir raat mein Sanjay use apne kamre mein hi sula deta hain. Sunil, Sanjay ki har ek baat maanta hain. In dono bhaiyon ki aaj ke yug ke Ram aur Laxman ki jodi hain. 

Sanjay ki padhayi khatam hone wali hain. Bas final exams khatam hote hi, woh ek acchi naukri pakad lega. Ek din Sudhir ne Sanjay se kaha ki, uske liye ek rishta aaya hain. Sanjay ne yeh keh kar baat taal di ki woh naukri par lagne ke baad Shaadi ke baare mein sochega. 

Ek mahine ke baad Sanjay ka result aaya aur use 85 % marks mila. Yeh jaankar ghar mein sabhi bohut khush hue. Sudhir aur  Nirmala ko apne bete ki upalabdhi par bada naaz ho raha tha. Tab Nirmala ne Sudhir se kaha, "Suniye, is ladke ne bohut mehnat aur lagan se padhayi ki hain. Din Raat ek kar diya tha hamare bete ne. Ise kuch paise de dijiye. Aaj yeh thoda bahar ghum phir aayega."

Sudhir - "Tum thik keh rahi ho Nirmala." Sudhir gaya aur usne ghar ki almaari mein se 5,000 Rupayee nikaale aur Sanjay ko dete hue kaha, "Jaao beta. Aaj tumhara din hain. Jo jee mein aaye karo." Sanjay ne Sudhir se paise liye aur woh chala gaya.

Shaam mein woh wapas ghar lauta. Uske haathon mein kuch packets the. Yeh dekh kar Sudhir ne Sanjay se pucha, "Yeh sab kya hain beta ?"

Sanjay - "Bas woh Sunil ke liye kuch kitaabein laaya tha main." 

Sudhir - "Apne liye kuch nahi liye beta ?"

Sanjay - "Nahi Papa, mujhe filhal kisi cheez ki zaroorat nahi hain." "Maa maine bahar se paneer laaya hain toh aaj shaam mein aap mutter paneer ki sabzi banaiyega." 

Nirmala - "Thik hain beta."

Sunil Sanjay ke paas daudte hue aata hain aur woh kitaabon ko dekh kar bohut khush ho jaata hain.

Shaam mein poore parivaar ne saath mein baithkar khaana khaya. Khaana khaane ke baad Sudhir ne Sanjay se kaha, "Tumhare liye ek rishta aaya hain beta."

Sanjay - "Abhi toh main naukri par bhi nahi laga hoon Papa. Kamaayi shuru hone ke baad, main Shaadi ke baare mein sochunga."

Sanjay ne kai jagah interviews diye. Kuch dino tak interviews dene ke baad aakhir kaar Sanjay ko naukri mil hi gayi. Ek mahine ke baad use salary bhi mili. Ghar ke sabhi log bohut khush the. 

Ek din shaam mein khaana khaate samay, Sudhir ne Sanjay se kaha, "Shaadi ke baare mein kuch socha hain tumne beta ?"

Sanjay - "Papa abhi kamayi toh kam hain meri."

Sudhir - "Lekin beta toh kab karoge tum shaadi ?"

Sanjay - "Dekhunga Papa."

Sudhir - "Tum zara apne maa ke baare mein toh socho. Bahu ghar aayegi toh Nirmala ka kaam mein thoda haath bhi bata legi. Tumhari maa ko thoda aaram bhi mil jaayega beta."

 Sanjay ne thodi der socha aur phir kaha, "Papa main aapse kuch baat karna chahta hoon."

Sudhir - "Haan bolo beta."

Sanjay - "Papa main ek ladki se pyaar karta hoon."

Sudhir - "Koun hain woh ?"

Sanjay - "Woh mere saath college mein padhti thi."

Sudhir - "Kya naam hain us ladki ka ?"

Sanjay - "Uska naam Diya hain."

Sudhir - "Uske Pita kaam kya karte hain ?"

Sanjay - "Unka khud ka business hain."

Sudhir - "Kaisa business ?"

Sanjay - "Unki kapdon ki dukaan hain."

Sudhir - "Kya tum us ladki ke pita se mil chuke ho ?"

Sanjay - "Haan Papa main mil chuka hoon."

Sudhir - "Uske parivaar mein koun-koun hain ?"

Sanjay - "Woh apne maa-baap ki iklauti ladki hain."

Sudhir -"Kya woh hamare saath reh paayegi ?"

Sanjay ne bade aascharya se pucha, "Aap yeh kyun puch rahe ho ?"

Sudhir - "Nahi woh bas aise hi."

Sanjay - "Papa aap khul ke bataiye, aap jo bhi kehna chahte ho. Apne mann mein kuch mat rakhiye."

Sudhir - "Nahi woh ek bade ghar ki ladki hain, toh, bas yahi baat thi ki woh humare saath itne kam mein adjust kar paayegi kya ?"

Sanjay - "Haan woh reh legi. Usme kya problem hain ?"

Sudhir - "Thik hain. Tum bhi ab bade ho gaye ho. Tum apna accha bura khud soch sakte ho. Tumne soch samajhkar hi faisla liya hoga."

Sanjay Sudhir ke pass jaata hain aur uske dono haathon ko pakad kar kehta hain, "Papa kya main zindagi mein, kabhi bhi aapke faisle ke khilaaf jaa sakta hoon ?"

Sudhir - "Nahi woh baat nahi hain beta. Hum log toh apni zindagi jee chuke hain. Mujhe bas Sunil ki fikar hain. Mere baad tumhe hi uska khayal rakhna hain."

Sanjay - "Papa kya main kabhi Sunil ke saath koi nainsaafi hone dunga ?"

Sudhir - "Nahi beta woh baat nahi hain. Mujhe tum par poora vishwaas hain. Lekin waqt badal chuka hain. Aaj kal ke logon ki neeyat badal chuki hain. Agar sangat buri ho jaaye, toh samjhdar se samjhdar insaan bhi bhatak jaata hain. Insaan chahe kitna bhi shareef kyun na ho, saanp ke saath rehkar use bhi phoonk maarne ki aadat lag hi jaati hain."

Sanjay - "Papa agar aap kahoge toh main us ladki se shaadi kabhi bhi nahi karunga. Yeh baat aap bhi bohut acche se jaante ho, ki main aapke faisle ke khilaaf kabhi bhi nahi jaaunga. Lekin aap kam se kam ek baar us ladki se aur uske parivaar se mil toh lijiye." 

Nirmala - "Agar woh itna keh raha hain, toh ek baar aap mil lijiye na un logon se."

Sudhir - "Thik hain beta. Tum un logon se baat kar lo. Woh jab bhi kahenge hum log unse milne ke liye zaroor jaayenge."

Sanjay - "Main bas un logon se baat karke thodi der mein aata hoon."

Sudhir - "Thik hain Beta."

Sanjay side mein gaya aur usne call lagaya aur thodi der tak phone par baat-cheet karne ke baad woh Sudhir ke pass wapas aaya aur kaha, "Papa un logon ne hume kal apne ghar par milne ke liye bulaya hain."

Sudhir - "Thik hain beta. Hum kal unke ghar zaroor jaayenge."

Agle din woh log Diya ke ghar gaye aur Diya ke pita ne un logon ka bohut khushi se swaagat kiya. Phir baat karte-karte Diya ke pita ne poonch liya, "Agar aap logon ki kuch demand ho toh... ?"

Sudhir - "Bas yahi hain ki Bahu hamare saath mil julkar rahe. Iske alava hamari aur koi bhi ummeed nahi hain."

Diya Ke Pita - "Lekin aap logon ki kuch iccha zaroor hogi. Kuch ummed hogi hum logon se."

Sudhir - "Dekhiye Bhaisahab mere bete ki kamayi kam hain. Hum log shayad aapki ladki ki har ek iccha poori na kar paaye. Lekin, hum log is baat ki koshish karenge ki use kabhi bhi kisi cheez ki kami mehsus na ho."

Diya Ke Pita - "Dekhiye Bhaisahab bhale hi yeh meri iklauti santaan hain, lekin maine ise itna zaroor sikhaya hain ki Shaadi ke baad ladki ka sasural hi uska sab kuch hota hain. Woh aapke taur tarike se hi aapke ghar mein rahegi."

Sudhir - "Dekhiye Bhaisahab main apne ghar Bahu lekar jaa raha hoon, koi ghulam nahi jo use taur tarike nibhane pade. Woh hamare ghar mein apni iccha anusaar rahegi. Yeh ghar usi ka hi hain."

Diya Ke Pita - "Toh kya main yeh rishta pakka samjhun ?"

Sudhir - "Jee zaroor Bhaisahab." 

Dono parivaar ke beech rishta tai ho gaya aur Pandit Ji ko bulaakar Sanjay aur Diya ki Shaadi ki tareekh tai ki gayi. Kuch dino ke baad un dono ki Shaadi ho gayi. Shaadi badi dhoom dhaam se hui thi. Dono hi parivaar bohut khush the.

Pehle din se hi Diya ne ghar ka kaam sambhaal liya tha. 

Ek din ki baat hain, jab Sanjay shaam mein ghar aaya. Uske haath mein ek packet tha. Andar aate hi usne Diya ko apne pass bulaya aur kaha, "Tumhare liye Saari layi hain maine. Shayad tumhe pasand aaye." Diya ne bohut khushi se woh packet liya. Woh Saari dekh kar bohut zyada khush hui thi. Usne apni Saari, Nirmala ko bhi dikhayi.

Tabhi Sunil bhaagte hue Sanjay ke paas aaya aur pucha, "Bhaiyaa mere liye kya laaye ho aap ?"

Sanjay - "Woh main bhool gaya."

Yeh baat sun kar Sudhir ko bada jhatka laga. Use yeh baat teer ki tarah chubh gayi. Sunil thoda sa maayus hua. Yeh dekh kar Sudhir bahar gaya aur unse dukaan se kuch chocolates kharida aur Sunil ko de diya.

Ab Sanjay ka samay Sunil aur Diya mein bant chuka tha. Is parivaar mein bohut saare badlaav aa gaye the.

 Ek din ki baat hain, jab Sunil school se ghar aaya, tab use bohut tezz bukhaar chadh chuka tha. Achaanak se Sunil ki tabiyat kharaab ho gayi thi. Sudhir use apne saath aspataal lekar gaya. Doctor ne bataya ki use pneumonia ho gaya hain aur kuch dino ke liye use aspataal mein admit karna padega. Sunil ko aspataal mein admit kiya gaya aur uska ilaaj shuru hua. Dheere-Dheere uske ilaaj mein kharcha badhta gaya. Ab thoda aur zyada paison ki zaroorat padne lagi thi.

Sudhir aur Sanjay dono ne hi apne-apne doston se baat karke madad maangi. Doston ne madad bhi ki. Kuch dino ke baad aur paison ki zaroorat padi. 

Diya se Sunil ke baare mein baat karte-karte Nirmala achaanak se ro padi. Diya ne use samjhaya ki, sab kuch thik ho jaayega aur dilaasa diya. 

Agle din Sanjay ke phone par Diya ke pita ka call aaya aur unhone Sunil ki tabiyat ki jaankaari li. Sanjay ne unhe jaankaari di. Uske baad Diya ke pita ne Sudhir se baat karne ki iccha jataayi. Sanjay Sudhir ke pass gaya aur kaha, "Papa woh Diya ke Papa aapse baat karna chahte hain."

Sudhir ne phone apne haathon mein liya aur kaan par laga kar Diya ke Pita se baat-cheet ki. Diya ke Pita ne Sudhir ko dilaasa diya aur unse unka Bank Account Number maanga. Pehle toh Sudhir ne mana kiya. Lekin Diya ke Pita ke anurodh karne ke baad woh aakhir mein, maan gaye aur unhe apna Bank Account details de diya. Uske baad, Diya ke Pita ne unke Bank Account mein kuch paise bheje. 

Sudhir - "Aaj in logon ne hamari, bohut badi madad ki hain."

Sanjay - "Papa aap tension mat lijiye, sab kuch thik ho jaayega."

Sudhir - "Kya tumne unse madad maangi thi ?"

Sanjay - "Papa aapse bina punche kya main un logon ko call lagaunga?"

Sudhir - "Phir ?" Sudhir ne hairaani se sawaal kiya.

Sanjay - "Diya ne khud hi apni taraf se Uncle ko Call lagaya tha. Baad mein mujhe Uncle ne call kiya aur kaha ki woh aapse baat karna chahte hain. Lekin us waqt main bahar tha. Phir maine unhe bataya ki main shaam mein aspataal pohuchunga. Uske baad ab inka call aaya aur aapse baat hui uncle ki."

Tabhi Sanjay ko Diya ka Call Aaya. Sanjay ne Call receive kiya, "Suniye Maine khaana bana diya aap logon ka. Aap shaam mein ghar aakar tiffin le jaiye. Aur aap log bahar ka khaana mat khaana. Nahi toh aap log bhi bimaar pad jaaoge."

Sanjay - "Thik Hain." 

Diya - "Abhi Sunil ki tabiyat kaisi hain ?"

Sanjay - "Filhal toh thik hain."

Diya - "Doctor ne kya kaha ?"

Sanjay - "Abhi tabiyat poori tarah se thik hone mein thoda sa time lagega."

Diya - "Main aap logon ke liye khaana banakar tiffin pack kar dungi. Aap shaam mein ghar par aa jaaiyega aur tiffin lekar chale jaana. Warna bahar ka khaana kha kar aap dono bhi bimar ho jaaoge."

Sanjay - "Thik hain."

Yeh keh kar usne call kaat diya.

Sudhir - "Kiska Call aaya tha ?"

Sanjay - "Diya ka call tha."

Sudhir - "Bahu kya keh rahi thi ?"

Sanjay - "Woh keh rahi thi ki, woh hum logon ka khaana bana kar rakh degi aur main shaam mein ghar aakar khaana le jaaun."

Yeh sunkar Sudhir ki aankhon mein aansun aa gaye aur usne kaha, "Woh bade ghar ki beti hain." 

Sudhir ab aashwasth ho chuka tha ki uski bahu ghar ka bohut acche se khayal rakh legi. Saath hi Sunil ke bhavishya ko lekar bhi ab woh poori tarah se nischint ho chuka hain.  

                 -  Ved Vineet Gautam