Ehsaas

Ajay apne mata-pita ka eklauta ladka tha. Bachpan mein hi usne apni Maa ko kho diya tha. Mohabbat mein insan ko kitni takleef jhelni padti hain, use kitna tadapna padta hain; yeh sab ka ehsaas use bachpan mein hi ho gaya tha. Apne pita ki peeda dekhkar usne bachpan mein hi nirnay le liya tha ki woh aajeevan kunwara hi rahega. Uski maa ki mrutyu ek car haadse mein hui thi.
Apna Graduation karne ke baad use ek company mein Marketing Executive ki naukri lagi. Woh Digital Marketing ka kaam karta tha. Ek baar ki baat hain, jab uski Company ke dwara, use bahar gaon bhej diya gaya tha, Business Tour ke liye.Saari tayaari karne ke baad woh bahar gaon ke liye nikal pada.
Uske Company dwara uska kamra ek 3 Star Hotel mein book kar diya gaya tha. Hotel Room mein pohuchkar woh fresh hua aur tayyar hokar woh apne meeting ke liye chal diya. Uska Business Tour kaafi lamba hone wala tha, kyunki, Ajay ko us shahar mein kai companies mein jaakar meetings karni thi.
Din bhar ke kaam-kaaj ke baad akhir kaar woh apne Hotel ke kamre mein pohucha, aur jald hi use neend lag gayi. Kaafi der baad uski Ajay ki neend khuli, usne ghadi ki aur dekha, raat ke 11 baj rahe the. 'Oh Shit!' usne socha 'Ab na jaane khana kaha par milega.' Usne jaldi apna haath muh dhoya aur Hotel ke Resturant Section ki aur bhaga, par afsos woh band ho chuka tha. 'Bad Luck' usne socha aur ulte pair apne kamre ki aur badhne laga. Kamre ka raasta Reception se hote hue jaata tha. Itni Raat ko itni hadbadahat mein woh jaa raha tha, toh Receptionist ne use dekh liya. Woh sochi, 'na jaane kya hua jo itni hadbadahat mein jaa raha hain yeh ladka. Kahi koi Police ka maamla toh nahi.' Itni raat ko ek anjaan ladke ko tokna bhi sahi nahi hoga, yeh sochkar woh ruk gayi. Lekin kya pata agar kal ko kuch maslaa ho jaaye toh main hi phasungi, yeh sochkar usne himmat jutayi aur Ajay ko aawaz lagayi.

Receptionist - ''Excuse Me Sir.''
Ajay - "Ji Mam"
Receptionist - "Kya main aapki kuch madad kar sakti hoon?"
Ajay - "Yahan par kahi aas-paas khana kaha par milega?"
Receptionist - "Filhal toh milna muskhil hain."
Tabhi Ajay ka phone bajta hain. Call uske Pita ka tha. Baat karte-karte Ajay unhe batata hain ki woh Khaana kha chuka hain aur apne kamre ki aur chala jaata hain.

Agle din wohi hota hain. Woh dubaara bhagta hua jaata hain khaana dhoondhne ke liye aur khaali pet wapas aa jaata hain. Is baar Receptionist usse wajah puchti hain. Ajay use batata haoin ki din bhar kaam karne ke baad woh behad thak jaata hain. Jis wajah se use kamre mein pohuchte hi gehri neend lag jaati hain.

Agle din jab woh Hotel mein pohuchta hain toh use dekhte hi Receptionist use rok deti hain.
Receptionist - "Sir aap apne kamre se fresh hokar Restaurant Section mein aaiye."
Ajay - "Par Kyun?"
Receptionist (Muskurate Hue) - "Humne aapke liye khaana bana diya hain. Aur kyunki hume aapki choice ke baare mein nahi pata tha, isliye humne Chapati aur Sabzi banayi hain. Toh please aap jaldi se fresh hokar Resturant Section mein aaiye aur please is baar so mat jaayega."
Ajay  - "Thank You."

Kuch der baad Ajay Restaurant Section mein pohuchta hain, aur khaana khata hain. Uske baad woh apna Khane ka bill pay karta hain aur apne kamre ki aur badhta hain. Woh bohut prabhavit tha is baat se ki Dinner Time khatam hone ke baawjood us ladki ne uske liye Khaana tayyar karwaya.

Agle din jab woh dubaara apne kaam ki aur jaa raha hota hain tabhi woh Receptionist usse puchti hain ki woh khaane mein kya khana pasand karenge.
Ajay - "Veg mein kuch bhi banwa dijiye."
Yeh silsila tab tak chalta raha jab tak ki woh shahar nahi chod diya. Ajay Bus mein baitha hua tha aur woh apne ghar wapas jaa raha tha. Use achanak se us Receptionist ki yaad aayi. Woh uske baare mein yeh soch raha tha ki woh acchi ladki thi. Jis bhi ladke se uski Shaadi hogi woh bohut khush kismat hoga.
Tabhi uske antarman se aawaz aayi, 'Yahi hota hain mahatva ek Aurat ka zindagi mein. Ek ladki jis sneh aur pyaar ke saath aapka khayal rakh legi, woh khayal ek aadmi apna khud ka bhi nahi rakh sakta hain.
Aakhir kaar Ajay ko jeevan mein ek stree ke mahatva ka ehsaas ho gaya. Ek anjaan ladki ne mujhe is baat ka ehsaas kara diya. Woh yeh soch kar muskurata hain aur Bus chal padti hain.

                                                                        - Ved Vineet Gautam