Shrmashil

Radish Shetty peshe se ek mechanic hain. Woh ek car company mein naukri karta hain. Ek saal pehle hi uski biwi ek bimari ke chalte guzar chuki thi. Radish ne bohut koshish ki thi use bachane ki. Apni biwi ke ilaaj ke liye, usne apne rishtedaar aur kuch doston se udhaar bhi liya hua tha. Par afsos woh bach na saki. Unka ek beta hain. Uska naam hain, Ishaan Shetty. Haalanki, sabhi log chahte the, ki Radish dusri shaadi kar le. Rishtedaaron ne use bohut samjhaya tha, par Radish apne dusri shaadi na karne ke faisle par adaa raha.

Ishaan bohut hi pyaara baccha hain aur apne pita ka laadla hain. Woh, Radish ki zindagi hain. Apne bete ke ujjawal bhavishya ke liye, woh din raat mehnat karta rehta hain. Subah uthkar, Radish pehle Ishaan ko tayyar karta hain aur khud bhi tayyar hota hain. Phir woh dono ka tiffin banata hain. Uske baad, woh Ishaan ko school chodte hue apne kaam par chala jaata hain. 

Radish ki kamaayi thik-thak ho rahi thi. Lekin, use apne bete ke bhavishya ki chinta ghere hue thi. Woh aksar sochta tha, ki, 'Kal ko jab Ishaan bada hoga, use ek acche mehnge college mein admission dilwa dunga aur use padha-likhakar ek acchi zindagi dunga.' 

Haalanki, Radish ki kamayi se dono baap-bete ka guzara acche se ho raha tha. Lekin, use apne bete ke bhavishya ke liye, aur kamayi ki zaroorat thi. Isiliye woh pichle kai mahino se ek Car banane ki koshish mein laga hua tha. Woh pichle kai mahino se designs bana raha tha. Aur ab jaakar uski design poori ho chuki hain. 

Radish apni design lekar, apne maalik ke pass gaya. Unka naam tha, Ramesh Desai. Radish, Ramesh Desai ke cabin ke bahar khada unka darwaaza knock kar raha tha. Ramesh Desai ne use dekha aur Radish ko andar aane ka ishaara kiya. Radish Ramesh ke saamne gaya aur kaha, "Sir."

Ramesh Desai - "Haan Radish bolo."

Radish - "Sir mujhe aapse kuch baat karni thi."

Ramesh Desai - "Baitho."

Radish, Ramesh Desai ke saamne baith gaya. 

Ramesh Desai - "Kaho Radish. Kya baat thi ?"

Radish - "Sir mujhe kuch important baat karni thi."

Ramesh Desai - "Kya tumhe kuch paison ki zaroorat hain ?"

Radish - "Nahi Sir. Woh baat nahi hain."

Ramesh Desai - "Phir ?"

"Sir woh maine kuch designs banaye hain. Aap agar ek baar dekh lete toh..." Yeh kehte hue, Radish ne apni file Ramesh ko dene ke liye haath badhaya. Ramesh ne woh file li aur us file ko khol kar dekhne laga. Ramesh un designs ko bohut baariki se dekh raha tha. Usne panne palate hue, ek-ek karke Radish ki sabhi designs dekhi. Kuch der Ramesh ne socha aur uske baad kaha, "Radish. Tumhe yeh baat bohut acche se pata hain, ki yeh ek Car Repairing Store hain."

Radish - "Haan Sir."

Ramesh - "Mujhe yeh designs dikhakar tumhe kya fayda hoga ? Haalanki, tumhari yeh designs kamaal ki hain. Lekin, tum inhe kisi Car showroom mein dikhao. Waha par hi tumhari baat ban paayegi."

Radish - "OK Sir."

Ramesh - "Ishaan kaisa hain ?"

Radish - "Woh thik hain Sir."

Ramesh - "Chalo accha hain. Kal se kaam khatam hone ke baad, tum zara Car Showrooms ke chakkar lagana shuru karo. Unhe apni designs E-MAIL karo. Dekho kya hota hain."

Radish - "Sir aapko koi dikkat toh nahi hain na mere is design ke kaam se ?"

Ramesh - "Bilkul bhi nahi. Tum yahan par mehnat se kaam karte raho aur apni designs ko bahar bechne ki koshish bhi karte raho. Ek baar apne is kaam se accha khaasa kamayi aane lage toh beshak tum yeh naukri chod dena."

Radish - "Sir yeh aap kaisi baat kar rahe hain."

Ramesh - "Main apni poori khushi se yeh baat keh raha hoon. Radish main bohut acche se jaanta hoon, ki tum bohut mehanati ho. Lekin, kismat tumhe tumhare mehnat ka phal nahi de rahi hain. Shayad tumhari kismat isi kaam se khulegi. Ishaan ka bhavishya sirf aur sirf tumhare haath mein hain. Tumhari tarakki se sabse zyada khushi mujhe hi hogi. Aur yeh baat main dil se keh raha hoon."

Radish - "Thank You so much Sir."

Ramesh - "You are welcome."

Radish cabin se bahar nikla aur dobara apne kaam par lag gaya. 

Agle din se, Ramesh ke kahe anusaar, Radish Car Companies ke showrooms ke chakkar lagana shuru kar diya. Par kaamyabi use itni aasani se nahi milne wali thi. Aur yeh baat woh bhi bohut acche se jaanta tha. 

Kai mahine beet gaye, lekin use har jagah se 'Na' hi sunne ke liye mil raha tha. Radish ne kariban-kariban apne shahar ke har Car showroom mein apne designs dikha aaya tha. Lekin, uske haath kuch nahi laga. 

Ek din ki baat hain. Shaam mein Radish apne bed par leta hua tha aur Ishaan mobile par video game khel raha tha aur woh bed par lete-lete yahi soch raha tha ki usne abhi tak jahan-jahan par apni designs dikhayi hain, unmein se kaha-kaha se baat aage badhne ki ummeed jag sakti hain. Tabhi achaanak se ek visfoth ki awaaz use sunayi di. Radish ekdum se apne bed par se chaunk utha. Woh khidki se bahar ki aur taank-jhaank karne laga. Lekin, bahar ekdum sannata tha. Phir woh andar gaya aur waha par bhi woh khidki se bahar ki aur dekhne laga. Lekin, har aur bas sannata hi chaayaa hua tha. 

Tabhi Ishaan ne peeche se Radish ko aawaz lagai, "Papa."

"Kya hua beta ?" Radish ne uski taraf dekhte hue kaha.

Ishaan - "Aap yahan-wahan kya dekh rahe ho Papa ?"

Radish - "Woh achaanak se kuch phatne ki zor se aawaz aayi hui thi."

Ishaan ne apne maathe par haath rakhte hue kaha, "Are Papa. Woh mere mobile se aawaz aayi thi. Main apne mobile par game khel raha tha na."

Radish - "Oh. Accha." 

Woh dubara bed par jaa baitha. Ishaan uske paas aaya aur uske haathon mein apna haath rakhte hue kaha, "Kya hua Papa ? Aap bohut zyada tension mein lag rahe ho."

Radish - "Nahi toh."

Ishaan - "Pata nahi kyun, mujhe aisa lag raha hain. Koi problem hain kya Papa ?"

Radish - "Kuch nahi hua beta. Kuch bhi nahi hua hain. Accha ab tum sone chalo. Kal subah tumhe school bhi toh jaana hain na."

Ishaan - "Kya Papa. Aapko toh kuch bhi yaad nahi rehta hain. Kal School kaise hoga ? Kal toh Sunday hain."

Radish apne mobile mein dekhta hain aur use aaj ka din Saturday dikha raha hota hain.

Radish - "Are haan. Thik hain. Ek kaam karte hain, kal hum sab log kahi ghumne chalenge."

Ishaan - "Sab log koun Papa ? Ghar mein toh sirf hum do hi hain na."

Radish - "Are bhai, sab log ka matlab hain; main, tum aur tumhara yeh mobile. Hum ismein dher saari photos lenge na ?"

Ishaan - "Haan."

Radish - "Chalo. Chalo. Jaldi se so jaao. Kal subah hume ghumne ke liye jaana hain."

Ishaan jhat se bed par leat jaata hain aur kuch hi der mein woh gehri neend mein so jaata hain. Radish bhi sone ke liye apne bed par jaata hain. Kaafi der ho jaati hain, lekin, use neend nahi lagti hain. Kuch der ki mashakkat ke baad bhi woh jaga hua hi tha. Ab woh sone ki koshish karke bhi poori tarah se thak chuka tha. Dheere-Dheere uski aankhon mein neend chadhne lagi aur kuch der ke baad, kab uski aankh lag gayi; use khud pata nahi chala. 

Agle din, dono baap-bete bahar ghumne ke liye chale gaye. Woh dono sabse pehle ek chidiya ghar gaye. Waha par alag-alag jaanwaron ko dekh kar, Ishaan bohut utsaahit ho gaya tha. Reh-Reh kar woh khushi ke maare uchal raha tha. Un dono ne kaafi der us chidiya ghar mein bitaya. Uske baad, woh dono ek movie dekhne ke liye cinema hall gaye. Aur shaam mein ek restaurant mein dinner karte hue, woh dono ghar pahunche.

Agle din se, dono apni rozmarra ki zindagi mein lag gaye. Ishaan school chala gaya aur Radish repair store mein. Tabhi achaanak se Ramesh Desai uske pass aaya aur kaha, "Radish."

Radish - "Haan Sir."

Ramesh Desai - "Kya tum koi urgent delivery ka kaam kar rahe ho ?"

Radish - "Nahi Sir."

Ramesh Desai - "Thik hain. Tum isi waqt mere cabin mein aao."

Radish - "OK Sir."

Woh Ramesh Desai ke peeche-peeche uske cabin mein gaya. Ramesh Desai apni kursi par baitha aur kaha, "Kaise ho tum Radish ?"

Radish - "Main thik hoon Sir."

Ramesh Desai - "Ishaan kaisa hain ?"

Radish - "Woh bhi thik hain Sir."

Ramesh Desai - "Chalo badhiya hain. Accha batao, tumhare Project ki baat kaha tak badhi ? Tumhari Car Design kisi ne pasand ki ?"

Radish - "Abhi tak nahi Sir."

Ramesh Desai - "Thoda sa online bhi koshish karo. Dekho kya hota hain. Himmat mat haaro."

Radish - "Thank You Sir."

Uske baad woh cabin se bahar nikla aur apne kaam mein lag gaya. Shaam mein jab woh ghar par pahuncha, toh usne Ishaan se ek notebook aur pen maanga. Radish ne online kai motor companies mein apni design ke pictures bhej kar, ek business proposal ke liye apply kiya. Saath-Hi-Saath usne apne designs bhi un sabhi companies ko E-MAIL kiye. 

Kareeb teen mahine beet chuke hain. Lekin, abhi tak uske haath kuch nahi aaya.

Ek din ki baat hain. Radish apni naukri par tha. Woh ek Car thik kar raha tha. Tabhi uska ek dost uske pass aaya aur kaha, "Yaar Radish tera phone kaafi waqt se baj raha hain."

Radish - "Accha. Main yeh Car repair kar leta hoon pehle."

Radish Ka Dost - "Kya pata Ishaan ka hi call aa raha ho."

Radish us table ki aur jaata hain, jahan par uska mobile rakha hua tha. Woh apna mobile uthata hain aur dekhta hain ki koi anjaan number se call aa raha hain. Phir woh call receive karta hain aur kehta hain, "Hello."

Phone ke dusri aur se aawaz aati hain, "Kya main Radish Shetty se baat kar sakta hoon ?"

Radish - "Ji main hi bol raha hoon."

Anjaan aadmi - "Dekhiye main ek motor company se bol raha hoon. Aapne apni kuch designs hume bheji thi. Kya aap kal meeting ke liye aa sakte hain ?"

Radish - "Ji haan main aa sakta hoon."

Anjaan aadmi - "Thik hain kal subah dus baje aap hamare office aa jaaiega. Main isi number par aapko address bhej deta hoon." Radish ko ek ummeed ki kiran nazar aati hain. Uske aankhon se aansun chalak padte hain. Woh yeh baat sabse pehle apne humdard aur apne boss, Ramesh Desai ko sunana chahta tha. Woh turant Ramesh Desai ke cabin ke bahar jaata hain aur darwaza khat khata hain. Ramesh Desai, Radish ko andar aane ka ishaara karte hain. Radish andar jaata hain aur Ramesh Desai ke saamne jaakar khada ho jaata hain. 

Uske chehre par muskaan thi. Aaj ek arse ke baad Radish muskura raha tha. Shayad aakhri baar, woh khul kar tab muskuraya tha, jab uski biwi zinda thi. Uski biwi ke is duniya se jaate hi, uski muskaan bhi jaa chuki thi. Lekin, aaj is phone call ne Radish ki khoyi hui muskurahat wapas laa di. 

Radish - "Sir mujhe aapse kuch baat karni hain."

Ramesh Desai - "Kya baat hain Radish ?"

Radish - "Mujhe ek motor company se phone call aaya hain."

Ramesh Desai - "Aur kya kaha unhone ?"

Radish - "Woh kal milna chahte hain Sir."

Ramesh Desai - "All The Best. Kal tumhari chutti."

Radish - "Aapka bohut-bohut shukriya Sir."

Ramesh Desai - "Aur haan. Kal ka din tumhare liye bohut bada din hain, toh kal tum ek acchi si shirt pehen kar jaana."

Radish - "Thik hain Sir."

Ramesh Desai - "Isi waqt tum apne ghar chale jaao aur kal ke presentation ki tayyari mein lag jaao."

"Thank You so much Sir." Yeh kehte hue, Radish wahan se chala jaata hain. 

Woh raat bhar agle din ke presentation ki tayyari mein lag jaata hain. Agli subah, woh apne dil mein ek nayi ummeed ka diya jalakar us company ke office mein jaata hain. Us office ke ek kursi par baitha woh aane wali ghadi ka intezaar kar raha hota hain. Jo shayad uski takdeer badal de. 

Kuch der ke baad, use andar bulaya jaata hain. Radish apna presentation shuru karta hain aur uska presentation approve ho jaata hain. Use ek moti rakam ke cheque ke saath-saath, ek acchi-khaasi royalty amount bhi milti hain. Ab Radish ne Ishaan ko ek acche school mein admission dila diya hain aur apni naukari ke saath-saath apne aane wale car designs par bhi kaam karta rehta hain. 

                - Ved Vineet Gautam