Dil Ki Saazishein

 Aryan peshe se ek Radio Jockey hain. Woh Mumbai ke ek Radio Station par kaam karta hain. Uska shift subah se shaam tak ka hain aur use apne kaam se bohut lagaav hain. Ek din, uski chutti thi aur woh apna raashan bharne ke liye ghar ke nazdeek ke ek departmental store mein gaya. Woh departmental store haal hi mein naya-naya khula tha. Usne trolley bhar ke saaman liye. Uske baad, woh wahi par ulajhan mein khada tha. 

Tabhi use peeche se ek aawaz sunayi di, "Excuse Me. Kya main aapki koi madad kar sakti hoon ?"

Aryan ne peeche mud kar dekha. Ek behad khubsurat ladki khadi hui thi. Woh dubli patli aur lambi kad kaathi wali ladki thi. Kandhe tak uske kaale, lambe aur ghane baal the. Uske patle honth aur choti si naak thi. Us saadharan se kapde mein bhi woh kisi khubsurti ki murat lag rahi thi. Aisa lag raha tha ki; maano swarg lok se koi apsara, dharti par aayi hui ho. Aryan us ladki ko dekh kar, bas dekhta hi reh gaya. 

"Hello. Kya main aapki koi madad kar sakti hoon Sir ?" Us ladki ne dubara kaha.

Aryan - "Je haan. Main thoda sa confused hoon actually."

Ladki - "Kaisa confusion Sir ?"

Aryan - "Darsaal woh mujhe chawal lena tha. Lekin, yahan sabhi chawal thode se mehnge dikh rahe hain. Mere budget ke bahar jaa rahe hain."

Ladki - "Kya main aapko koi sasta wala chawal dikha doon ?"

Aryan - "Je haan. Badi meharbaani hogi aapki."

Ladki - "Ismein meharbaani kaisi ? Yahi toh meri duty hain."

Ladki ne thoda yahan-wahan dekha aur phir woh ek packet lekar aayi aur kahi, "Sir yeh hamare yahan sabse sasta chawal hain aur iski price keval 200 Rupaye kilo hain."

Aryan - "Thank You so much mam. Billing counter kaise jaana hain ?"

Ladki - "Straight jaake left."

Aryan - "Thank You."

Agle din, Aryan Radio Station par waqt se pohuch kar, apna show shuru kiya. "Khoobsurti. Aakhir kya hain khoobsurti ? Khoobsurti sirf surat mein nahi hoti. Balki, swabhav mein bhi hoti hain. Kal hi main.." Kehte-Kehte woh ruk gaya. "Sorry doston. Kisi aur din. Toh haan, main khoobsurti ke baare mein keh raha tha. Insaan ka swabhaav khoobsurat hona chahiye. Uska vyavhaar khoobsurat hona chahiye. Baaki chehra toh, aaj hain, kal nahi." Uska show khatam ho jaata hain. 

Kuch din baad ki baat hain. Ek din, Aryan apna kaam khatam karke, Radio Station se bahar nikla. Woh kuch kadam chala aur use apne mobile par ek call aaya. Usne apni jeb se mobile nikaala aur chalte-chalte kaha "Hello."

"Hello. Kya main Arjun se baat kar sakta hoon."

Aryan - "Sorry. Wrong Number." Aur agle hi pal woh kisi se takraaya aur neeche gir gaya. "Iam so sorry." Usne khade hote hue kaha. 

"It's OK." Ladki ne kehte hue uski taraf dekha. 

Dono ek dusre ko kuch seconds ke liye, dekhte rahe, jaise ki shayad yeh dono pehle bhi mil chuke ho. Tabhi ladki ne kaha, "Sir aap ?" Aryan use aise dekh raha tha, jaise woh use jaanta hi na ho.

"Sir hum us din departmental store mein mile the." Ladki ne kaha.

Aryan - "Are haan, haan. Yaad aaya. Kaisi ho aap Mam ?"

Ladki - "Main thik hoon. Aap yahan kya kar rahe hain ?"

Aryan - "Main yahan Radio Station mein kaam karta hoon."

Ladki - "Kaisa kaam ?"

Aryan - "Main ek Radio Jockey hoon."

Ladki - "Oh wow Sir. Ek kalakaar se mulakat hui hain, yeh baat us din pata nahi thi. Kya main aapka autograph le sakti hoon."

Aryan - "Ab toh aap meri taang kheech rahi ho Mam."

Ladki - "Bilkul nahi Sir. Waise aapka naam main puncha bhool gayi."

"Mera naam Aryan hain." Aryan ne kaha.

Ladki ne apna haath aage badhate hue kaha, "Mera naam Upasana hain."

Dono ne haath milaaya. 

Aryan - "Toh aap yahan kya kar rahi ho Upasana Mam ?"

Upasana - "Bas thodi si shopping."

Aryan - "Apni groccery store chodkar kisi aur jagah shopping ?"

Yeh sunkar woh hans padi. Aur boli, "Nahi aisi baat nahi hain. Bas kuch kapde wagarah. Toh kya aap filhal free ho Mr. Aryan ?"

Aryan - "Ji haan. Main bilkul free hoon."

Upasana - "Main is shehar mein kisi ko jaanti nahi hoon. Kya aap mere saath shopping mein chalenge Aryan ?"

Aryan ne kuch seconds ke liye socha aur kaha, "Thik hain."

Upasana - "Soch lijiye. Ek ladki ke saath shopping ke liye chal rahe ho. Jaldi poori nahi ho paayegi."

Aryan - "Mujhe pata hain. Main aapke saath shopping par chalne ke liye tayyar hoon."

Upasana - "Thik hain."

Uske baad, dono saath-saath shopping ke liye chal pade. Woh dono kai dukaano mein gaye aur dher saari kharidaari ki. Uske baad, woh dono ek auto mein baithkar, Upasana ke ghar ke liye nikal pade. Kuch der ke baad, woh dono Upasana ke ghar pohunche. 

"Coffee ?" Upasana ne poocha.

Aryan - "Yes Ofcourse."

Upasana kitchen mein gayi aur thodi der ke baad, woh do mug coffee lekar Hall mein aayi.

Upasana - "Toh aapka show kitne baje aata hain ?"

Aryan - "Shaam mein paanch baje. Lekin, raat mein dus baje re-telecast hota hain."

Upasana - "Thik hain. Aur aapka show kis baare mein hain ?"

Aryan - "Zindagi ke baare mein hain. Rishton ke baare mein hain. Rishton ke alag-alag pehluon ke baare mein hain. Zindagi ke rishton ke naazuk mod ke baare mein hain." 

Upasana - "Kaafi dilshap hoga aapka programme. Main zaroor sunungi aapko."

Aryan muskura diya.

Dono ne saath mein dher saari baatein ki. Uske baad, unke mulaakaton ka silsila shuru ho gaya. Upasana har raat dus baje ghar ka radio on kar deti aur Aryan ki aawaz mein kahaniyan sunti. Dheere-Dheere Upasana ki Aryan ke show mein dilchaspi badhti gayi. Woh dono aksar mila karte the. Dono ka ghar bhi ek dusre ke nazdeek tha aur saath-hi-saath Upasana jis Departmental Store mein kaam karti thi, Aryan ka ghar uske nazdeek hi tha. 

Kabhi-Kabhi Aryan apna show khatam karke Radio Station ke bahar niklta aur apne office ke buliding ke bahar, Upasana ko khada paata. 

Jis raftaar se waqt guzar raha tha, usi raftaar se woh dono ek dusre ke nazdeek aaye. Dono ek dusre ko bohut acche se ab samajhne lag gaye the. 

Ab toh Radio par Aryan ka show sun na Upasana ki zindagi ka ek hissa ban chuka tha. 

Har roz ki tarah us raat bhi, Upasana ne radio chalu kiya. Aur Aryan ki aawaz mein, show shuru hua. "Doston aaj mein ek kahani sunane jaa raha hoon. Shayad thodi lambi ho sakti hain, lekin main ummeed karta hoon ki, aap logon ko pasand aaye. Toh chaliye bina koi deri kiye kahani par aate hain. Ek kahani Aryan ki zubaani."

Upasana ab Aryan ki kahani sunne ke liye, poori dilachaspi ke saath taiyaar thi. 

Aryan apni kahani suna na shuru karta hain, "Ek ladka tha. Aur ek ladki thi. Dono hi ek dusre ko kisi tarah se jaante the. Dono ek dusre se aksar mila karte the. Un dono ko ek dusre se milna accha lagta tha. Dheere-Dheere unke beech mulaakaten badhi. Dheere-Dheere woh dono ek dusre ke kareeb aaye. Shayad woh dono hi ek dusre ko pasand karne lag gaye the. Unka dil toh yahi kehta tha ki 'Yeh Pyaar Hain.' Lekin, unka dimaag unse kehta tha, 'Kya yahi pyaar hain ?' Jab kabhi unhe apne dil par yakeen karne ka mann karta tha, tab unka dimaag apne sawaalon ka pahaad khada kar deta tha. 'Kya tum sach mein us se pyaar karte ho ?' 'Ya phir yeh sirf ek aakarshan hain ?' 'Agar tum us se apne Dil ki baatein kahoge. Agar tum uske saamne apni bhaavnayein vyakt karoge, kya use tumhare un bhaavnaon ki kadar hogi ?' 'Kahi woh galat na samajh baithe.' 'Yeh jo acchi dosti chal rahi hain hamare beech mein, kahi iska ant na ho jaaye.' 'Shayad hum ek dusre ke liye ajnabi hi thik hain.' 

"Har baar jab bhi hum kisi se apne Dil ki baatein karna chahte hain, tab-tab yeh Dimag uske aade aa jaata hain. Har baar. Har baar, hamara dimaag hi hamare rishton ka, hamari khushiyon ka sabse bada dushman ban jaata hain. Yeh Dil kudrat ki aisi kaarigari hain, jo sabse kamzor aur maasom hota hain. Lekin, phir bhi badi hi aasani se hume majboor bana deta hain. Hamare dukh ki sabse badi wajah, hamara Dil hi toh hain ! Jo kabhi bhi hamare bas mein nahi hota hain."

Tabhi achaanak se Aryan ko apni aankhon ke saamne Upasana ka chehra dikhayi deta hain. Woh khud apni is bhaavna ko samajh nahi paata hain aur woh dabe gale se kehta hain, "Aaj ke liye bas itna hi. Kal phir mulaakat hogi, isi samay." Woh turant apne Mike ka switch band kar deta hain aur uski aankhon se aansun tapak padte hain. Woh apne aansun ponchta hain. 

Dusri aur Upasana bhi bilkul khaamosh ho jaati hain. Aaj use apne zindagi ke akelepan ka ehsaas ho raha hain. Aryan ki baatein uske Dil mein gehrai se pohunch chuki thi. Woh is waqt use apni aankhon ke saamne, Aryan ko hi dekhna chahti thi. Woh apna mobile utha ti hain, use call karne ke liye. Lekin, agle hi pal use yaad aata hain ki, yeh kahani toh Aaryan hi suna raha tha. Uska shift khatam hone mein abhi bhi ek ghanta baaki hain. 

Aaj dono ko ek dusre ke saath ki zaroorat mehsus ho rahi thi. Dono hi ek dusre ko isi shan dekhna chahte the. Lekin, woh dono yeh nahi samajh paa rahe the, ki aakhir unka Dil aisa kyun chahta hain. 

Upasana apne bed se uthati hain aur turant apne ghar ka darwaaza kholti hain. Woh Aryan se isi waqt milna chahti hain. Jaise hi woh darwaaze ke bahar kadam rakhti hain, use yaad aata hain, ki yeh re-telecast programme tha. Original programme toh shaam mein paanch baje hota hain. Toh is waqt Aryan Radio Station par nahi hoga. Woh apne ghar par hoga. Woh dubara ghar ke andar chali jaati hain aur darwaaza band karke bilkul udaas baithi rehti hain. Un dono ki hi raat baichaini mein kat ti hain. Woh dono hi poori raat so nahi paate hain. 

Agle din, Upasana khaali Mann se tayyar hoti hain aur apne ghar se bahar nikalti hain. Paidal chalte hue woh kahi khoyi-khoyi si rehti hain. Woh kuch mod chalti hain aur tabhi use peeche se aawaz sunayi deti hain, "Aaj Store nahi jaana hain kya ?"

Upasana peeche mudkar dekhti hain, toh Aryan ko khada paati hain. Woh yahan-wahan dekhne ka naatak karti hain. Aryan dheere-dheere uske kareeb aata hain aur uske saamne aakar ruk jaata hain. Upasana Aryan se nazrein churane lagti hain. Jabki, Aryan use ek alag hi nazron se dekh raha hota hain. Dono hi chup the. Kuch pal baad, woh kehta hain, "Kaisi ho tum Upasana ?"

"Main thik hoon." Upasana Aryan se bina nazrein milaye jawab deti hain.

Aryan - "Yeh baat meri aankhon mein dekh kar kaho."

"Mujhe kaam hain. Mujhe jaane do." Upasana Aryan se bina nazrein milaye jaane lagti hain. Aryan uska haath pakad leta hain. Woh Aryan ki aur dekhti hain.

Aryan - "Kya hua Upasana ? Aaj tum muskura nahi rahi ho. Kaha gum ho gayi hain, tumhari muskurahat ?"

Upasana - "Meri muskaan laapta hone ki wajah toh tum bakhubi jaante ho. Wajah tum ho. Toh ab tum hi dhoondh laao meri muskurahat ko."

Aryan - "Pehle tum mujhe mera sukoon lautao."

Upasana - "Tumhari zindagi. Tumhara sukoon. Main kaise uski zimmedar ho sakti hoon ?"

Aryan - "Kya tum yeh baat apne Dil par haath rakh kar keh sakti ho ?"

"Haan." Upasana dusri aur dekh kar jawaab deti hain.

Aryan - "Yahi baat tum mujhse nazrein mila kar kyun nahi kehti ho ?"

Upasana - "Kyunki main nahi keh sakti hoon. Haan main tumse aksar milna chahti hoon. Haan shayad main tumse mohabbat karti hoon. Lekin kya hum saari zindagi ek saath reh sakte hain ?"

Aryan - "Ek kaam karte hain. Hum apni zindagi ka ek-ek din ek dusre se milne mein guzar denge. Aur hamesha ki tarah bahar nahi. Balki, ghar mein. Hamare ghar mein. Mera aur tumhara ghar. Aur jis din hume saath nahi rehna hain, us din hum saath bahar jaayenge is baat ka pata karne ke liye, ki hum ek dusre se dur kyun rahe ?"

Upasana Aryan ke gale lag jaati hain aur dono ke aankhon se aansun behte rehte hain.

                  - Ved Vineet Gautam