Aashvast

 Akshay Ahlawat ek businessman hain. Unki patni ka naam Reema Ahlawat hain. Us dampati ke do bacche hain. Ek ladki aur ek ladka. Ladki ka naam Ahana Ahlawat hain aur ladke ka naam Parth Ahlawat hain. Ahana ka college poora ho chuka hain aur usne B.Sc ki degree haasil ki hain. Parth filhal saantvi kaksha mein padh raha hain. 

Ek din ki baat hain. Shaam mein poora parivaar saath mein baitha hua tha aur sabhi aapas mein, dher saari baatein kar rahe the. Baat-Cheet ke dauraan, Akshay ne Ahana se kaha, "Ahana."
Ahana - "Haan Papa ?"
Akshay - "Beta mujhe tumse kuch baat karni thi."
Ahana - "Haan kahiye na Papa."
Akshay - "Darsal beta, tumse yeh baat tumhari mummy karengi."
Reema - "Nahi aap hi kahiye usse."
Akshay - "Nahi. Nahi. Tum kaho."
Ahana - "Kya baat hain ?"
Reema - "Ab toh tum badi ho gayi ho. Tumhari padhayi bhi poori ho chuki hain. Toh ab aage kya socha hain tumne beta ?"
Ahana - "Dekhungi koi acchi job mil jaaye toh accha rahega."
Akshay - "Beta zindagi ke baare mein tumne aage kya socha hain ?"
Ahana - "Abhi toh bataya na. Job karungi."
Reema - "Aur parivaar ke baare mein ?"
Ahana - "Matlab ?"
Akshay - "Beta darsal woh mummy shaadi ke baare mein baat kar rahi hain."
Ahana chup thi. Uski taraf se koi pratikriya na milne par, Reema ne kaha, "Kya soch rahi ho beta ?"
Ahana - "Nahi. Woh kuch nahi."
Akshay - "Beta tum humse khul kar baat karo."
Ahana - "Papa. Main kaise kahoon, mujhe khud nahi pata."
Akshay - "Dekho beta. Shaadi ek bohut bada faisla hota hain. Yeh tumhari poori zindagi ka sawaal hain. Is maamle mein kabhi bhi parivaar se kisi bhi tarah ka parda nahi rakhna  chahiye. Tum jo bhi kehna chahti ho, saaf-saaf kaho."
Ahana - "Lekin aap log mujhe galat mat samajhiyega."
Reema - "Hum dono ko tumpar poora bharosa hain. Tum aaj apne dil ki baatein khul kar kaho."
Ahana ne ek lambi saans li aur kaha, "Papa. Mummy. Main ab jo kehne jaa rahi hoon, use aap mere nazariye se bhi samajhne ki koshish kariyega."
Dono hi Ahana ki aur dhyaan se dekh rahe the. Uske baad, Ahana ne apni baat kehna shuru ki, "Main ek ladke ko pasand karti hoon. Aur woh bhi mujhe pasand karta hain. Uska naam Aryan hain."
Kuch pal ke liye dono hi chup the. Poore ghar mein ek ajeeb si khamoshi cha chuki thi. Uske baad, Akshay ne kaha, "Woh kaam kya karta hain ?"
Ahana - "Filhal use ek MNC company mein job lag gayi hain."
Reema - "Aur us ladke se tumhari jaan-pehchan kaise hui ?"
Ahana - "Mummy woh mere saath hi college mein padhta tha."
Akshay gambhir soch mein pad gaya. Use is tarah khamosh dekh kar, Ahana ne kaha, "Papa kuch toh kahiye."
Akshay - "Beta ab tum badi ho gayi ho. Apna accha-bura khud soch sakti ho."
Ahana - "Aisi baat nahi hain Papa. Main aap dono ka dil dukha kar yeh shaadi nahi karna chahti hoon. Agar aap nahi kahenge toh shaadi karna toh dur, main us ladke se milungi bhi nahi. Lekin, please aap ek baar Aryan se aur uski family se mil lijiye."
Reema - "Kya tum uske parivaar se mil chuki ho ?"
Ahana - "Nahi mummy."
Reema - "Agar kal ko woh log mana kar de toh ? Agar kal ko woh ladka koi aib wala nikla toh ? Tumhari toh saari zindagi chaupat ho jaayegi beta."
Tab Akshay ne Reema se kaha, "Mujhe apni beti par poora vishwaas hain. Agar usne koi ladka pasand kiya hain, toh woh sahi hi hoga." Phir Akshay ne, Ahana ki aur dekh kar kaha, "Lekin beta. Zamana bohut badal chuka hain. Mujhe bas yahi chinta hain ki, agar kal ko woh ladka sahi nahi nikla toh ? Kya hoga tumhari zindagi ka ?"
Ahana - "Papa aap bas ek baar Aryan se mil lijiye. Aur haan main kisi bhi haal mein, aap dono ke faisle ke khilaaf kabhi bhi nahi jaaungi."
Akshay - "Thik hain. Agar tumhari yahi iccha hain, toh hum us ladke se mil lenge. Uske parivaar mein koun-koun hain ?"
Ahana - "Uske Mummy, Papa aur ek choti behan bhi hain."
Akshay - "Aur uske pita kya karte hain ?"
Ahana - "Woh ek bank mein manager the. Retire ho gaye hain."
Akshay - "Thik hain. Tum kal us ladke ko ghar par dinner ke liye bulao. Ek baar hum use dekh le. Thoda use samajh le. Phir faisla karenge."
Ahana - "Thik hain Papa."

Ahana ne Aryan se phone par baat kar li aur agle din shaam mein, usne unke ghar mein dastak di. Aryan lamba-tamba aur tandrust tha. Akshay ne uska swagat kiya aur woh dono saath mein Hall mein baithe. Reema ne cold drinks laayi aur table par rakh diya. Akshay ne Aryan se kaafi der tak baat-cheet ki. Baat-Cheet karte-karte Akshay ne Aryan se kaha, "Agar aap bura na maano, toh kya main aapse ek sawaal kar sakta hoon ?"
Aryan - "Haan uncle poochiye na ?"
Akshay - "Kya koi shauk hain aapko ?"
Yeh sawaal sunte hi, Aryan chup ho gaya. Woh samajh nahi paa raha tha, ki woh kya kahe. Use khamosh dekh kar, Akshay ne Aryan se kaha, "Agar aap batane mein comfortable nahi hain, toh koi baat nahi."
Aryan - "Uncle main cigarette peeta hoon."
Akshay - "Aapne sach kaha. Accha laga. Kya yeh aadat chut nahi sakti hain ?"
Aryan - "Uncle main koshish karunga lekin, mushkil hain."
Akshay - "Thik hain. Koi baat nahi. Hum log aapke parivaar se milna chahenge."
Aryan - "Aap jab kahiye uncle."
Akshay - "Aapke maata-pita jab bhi free ho, hum mil lenge."
Aryan - "Thank You so much uncle."
Uske baad, Aryan waha se chala jaata hain.

Kuch dino ke baad, woh dono parivaar milte hain aur unke beech rishta tai ho jaata hain. Jald hi Ahana aur Aryan ki shaadi ho jaati hain. Shaadi badi dhoom dhaam se ki jaati hain.

Akshay ne Ahana ki shaadi toh kara di, lekin, use ab bhi is baat ka yakeen nahi tha, ki Aryan uska acche se khayal rakh paayega. Use apni beti ke bhavishya ki chinta hone lagi. Akshay ko baar-baar yeh darr satata tha, ki kahi woh Ahana ko pareshan karna na shuru kar de. Woh thik se so bhi nahi paa raha tha. Akshay ko apni aankhon ke saamne apni maasom beti ka chehra baar-baar nazar aata tha. Reh-Reh kar uska mann karta, ki woh turant Ahana ke sasural jaaye aur apni masoom beti ko apne paas bithakar uska sukh-dukh baante. Lekin, woh yahi soch kar ruk jaata, ki 'Abhi-Abhi toh beti ki nayi-nayi shaadi hui hain. Uske haathon ki mehandi ka rang bhi halka nahi hua hain aur main uske sasural mein jaa baithun ? Kya sochenge uske sasural wale ? Kya pata mere wahan se lautne ke baad, shayad woh log Ahana ko vaastav mein tang karne lage.' Akshay bas isi kashmakash mein reh raha tha.

Ek din ki baat hain, Akshay ek jagah ek business meeting ke liye gaya hua tha. Business meeting khatam karne ke baad, jab woh building se bahar aaya. Woh apni car ki aur jaa hi raha tha, ki usne dekha, ki Aryan ek nukkad par chaar-panch ladko ke saath khada baatein kar raha hain. Akshay wahi par ruk gaya aur woh wahi se hi Aryan par nazar rakh raha tha. Woh dur se Aryan ki harkaton par nazar gaade hue tha. Usne dekha ki Aryan ne baatein karte-karte apni jeb se cigarette ka packet nikaala aur apne saath khade sabhi ladko ko usmein se ek-ek cigarette di. Sabhi ladke saath mein khade cigarette ka kash kheechte hue aapas mein baatein kar rahe the. Kuch pandrah minute ke baad, Aryan ne un sab ladkon se haath milaaya aur apni bike par baith kar nikal pada. Akshay soch mein pad gaya. Woh sochne laga, 'Aakhir koun hain yeh ladke ?' 'Aakhir Aryan ka in ladkon se kya kaam hain ?' 'Kya yeh ladke shareef hain ?' 'Kya Aryan shareef hain ?' Kuch is tarah ke kai sawaal, use pareshan kar rahe the. Woh sadak kinare khada, bas khayalon ke Maaya-Jaal mein phansta jaa raha tha. Tabhi Akshay ka phone bajta hain. Woh apni jeb se phone nikaalta hain aur dekhta hain ki Reema ka call aa raha hain. Woh call uthata hain aur kehta hain, "Hello."
Reema - "Aap kaha par ho ?"
Akshay - "Main yahi par hi hoon."
Reema - "Kaha ? Ghar ke pass ?"
Akshay - "Nahi."
Reema - "Phir kaha par ho aap ?"
Akshay - "Main bas thoda kaam se aaya hua hoon."
Reema - "Ghar aane mein aapko kitna waqt lagega ?"
Akshay - "Thoda sa waqt lagega."
Reema - "Thik hain. Main phone rakhti hoon."
Akshay - "Haan thik hain."
Reema phone kaat deti hain. Akshay samajh nahi paata hain ki woh kya kare. Woh wahi par khada kisi naasamajh aadmi ki tarah lag raha tha. Phir woh apne mobile ki aur dekhta hain aur usme shaam ke 6 baj rahe hote hain.
Sochte-Sochte Akshay ko pata hi nahi chalta hain ki itna waqt kaise guzar gaya. Woh apni Car mein baithta hain aur ghar ki aur nikal padta hain.

Thodi der ke baad, woh apne ghar pohunch jaata hain. Ghar pohunchne ke baad, woh door-bell bajata hain. Reema darwaza kholti hain. Akshay ghar ke andar jaata hain aur sofa par baith jaata hain.
"Kya main aapke liye paani le aaun ?" Reema ponchti hain.
Akshay 'Haan' mein apna sar hilata hain. Reema andar kitchen mein jaati hain aur thodi der ke baad, wapas Hall mein aati hain. Phir woh paani ka glass Akshay ko pakdati hain aur woh tezi se paani gatak jaata hain. Maano kitne lambe waqt se woh pyaasa ho.
Phir Reema Akshay se kehti hain, "Accha suniye na. Woh mujhe aapse ek baat kehni thi."
Akshay - "Haan kaho."
Reema - "Woh Parth ki tabiyat thodi kharab ho gayi hain."
Akshay - "Kyun kya hua use ?"
Reema - "Dopahar se hi use bukhaar chadha hua hain. Maine use dawai bhi di, lekin, uska bukhaar utar hi nahi raha hain."
Akshay - "Accha ? Kaha par hain Parth ?"
Reema - "Woh apne kamre mein hain."
Phir woh andar Parth ke kamre mein jaata hain aur uske sar par haath rakh kar uska bukhaar check karta hain.
Akshay - "Iska sar toh poori tarah tap raha hain."
"Haan woh kam hi nahi ho raha hain." Reema kehti hain.
Akshay - "Main ise abhi aspataal le jaata hoon."
Akshay Parth ko aspataal le jaata hain aur uska ilaaj kara kar use dobara ghar le aata hain. Phir Reema, Parth ko dawaai dekar sula deti hain.

Agle din, Akshay apne kaam par nikal jaata hain aur shaam mein ghar laut aata hain. Ghar pohuncte hi woh dekhta hain ki, Ahana aur Aryan hall mein baithe hue hain. Akshay ko dekhte hi, woh dono uth te hain aur uska pair chute hain. Woh un dono ko aashirwaad deta hain. Phir woh sab saath mein baithkar baatein karte hain.
Ahana - "Aur bataiye Papa. Kaise ho aap ?"
Akshay - "Main toh thik hoon. Tum apna haal batao."
Ahana - "Main bhi thik hoon."
Akshay - "Aryan. Tum kaise ho beta ?"
Aryan - "Main bhi thik hoon Papa."
Akshay - "Tumhara job kaisa chal raha hain ?"
Aryan - "Accha chal raha hain Papa."
Akshay - "Aur samdhi ji aur samdhan ji kaise hain ?"
Aryan - "Woh log bhi thik hain Papa."
Akshay - "Chalo acchi baat hain."
Uske baad, woh logon ne saath mein baithkar, dher saari baatein ki aur ek saath khaana bhi khaya. Phir Aryan sofa se utha aur kaha, "Thik hain Papa. Toh main chalta hoon."
Akshay - "Thik hain aao beta."
Aryan ghar ke bahar jaane laga. Lekin, Ahana wahi khadi rahi. Yeh dekh kar Akshay ko kuch samajh mein nahi aaya aur woh Ahana se kehta hain, "Aryan jaa raha hain beta."
Ahana - "Haan Papa. Darasal mein ruk rahi hoon."
Akshay - "Kyun ?"
Ahana - "Bas aise hi. Thoda sa Parth ka khayal bhi rakh lungi aur aap logon ke saath, zara waqt bhi bita lungi."
Akshay - "Ek baar Aryan se is baare mein punch lo."
Aryan - "Hamari baat pehle hi ho chuki hain Papa."
Akshay - "Thik hain beta. Aao main tumhe bahar tak chod deta hoon."
Dono Sasur-Damaad saath mein bahar jaate hain aur Aryan, Akshay ka aashirwaad lekar car mein baithkar chala jaata hain. Woh log thodi bohut baat-cheet karke, Parth ko dawaai dekar so jaate hain.

Agle din, Akshay apne kaam se ghar laut raha hota hain. Raaste mein woh dekhta hain ki, Aryan sadak par khade kuch anaath baccho ko kuch paise de raha hain. Yeh dekh kar, Akshay sochta hain, 'Hamara damaad bade Dil wala hain.' Woh ab apni beti ke bhavishya ke baare mein ab nischint ho chuka hain. Aryan ke maamle mein, Akshay ka nazariya poori tarah se badal gaya.

                       - Ved Vineet Gautam