Dooriyan

 Sameer ek naujawan ladka hain. Woh ek company mein marketing ki naukri karta hain. Ek din, woh ek motivational seminar dekhne ke liye jaata hain. Seminar khatam hota hain aur woh apni seat se uthkar chal hi raha hota hain, tabhi woh dekhta hain ki ek ladki wahan par pareshan khadi thi. Woh shayad kuch dhoondh rahi hain. Sameer uske pass jaata hain aur us ladki se kehta hain, "Kya main aapki koi madad kar sakta hoon Mam ?"

Ladki Sameer ki aur dekhti hain aur kehti hain, "Darasal mera mobile kho gaya hain."

Sameer - "Kya aap mujhe apna number bata sakti ho, call lagte hi ring bajegi toh mobile ka location pata chal jaayega."

Ladki apna number deti hain aur Sameer uspar call karta hain. Tabhi mobile ki ring bajti hain. Ladki turant apne mobile ko dhoondh nikalti hain. Uske baad woh Sameer ka shukriyada karke chali jaati hain. Aur woh bhi apne ghar ke liye chala jaata hain. 

Ek din ki baat hain. Sameer ek rickshaw rokta hain aur kehta hain, "Bhaiyaa Karve Nagar chaloge ?"

Isse pehle ki woh rickshaw wala koi jawaab deta, tabhi dusri aur se ek ladki ki awaaz aati hain, "Bhaiyaa jaldi se Gulmandi Road chaliye."

Rickshaw Wala - "Madam yeh sahab ne pehle kaha tha."

Dono ek dusre ko dekhte hain aur dono ko aisa lagta hain ki shayad woh dono pehle kabhi mile ho. Ladki kehti hain, "Maine aapko pehle kabhi dekha hain."

Sameer - "Haan mujhe bhi aisa hi lagta hain."

Tabhi ladki jhat se kehti hain, "Are Mobile. Seminar."

Sameer ko abhi bhi yaad nahi aata hain. Ladki kehti hain, "Hum dono us motivational seminar mein mile the. Mera phone kho gaya tha."

Sameer - "Are haan. Haan. Yaad aaya."

Ladki - "Kya hum dono saath mein jaa sakte hain ? Mujhe bhi thoda urgent hain."

Sameer - "Thik hain."

Dono saath mein rickshaw mein baithte hain. Ladki kehti hain, "Aapka naam kya hain ?"

"Mera naam Sameer hain." Woh jawab deta hain.

Sameer - "Aur aapka naam kya hain ?"

Ladki kehti hain, "Mera naam Shikha hain."

Sameer - "Toh aap Gulmandi Road kisi kaam se jaa rahi thi ?"

Shikha - "Main wahi par rehti hoon."

Sameer - "Toh aap apne parivaar ke saath rehti ho ?"

Shikha - "Haan. Aur aap ?"

Sameer - "Main bhi."

Shikha - "Aap kaam kya karte ho ?"

Sameer - "Main ek company mein marketing executive hoon. Aur aap ?"

Shikha - "Main ek beauty parlour mein kaam karti hoon."

Baatein karte-karte Shikha ka ghar aa jaata hain. Rickshaw rukti hain. Shikha Rickshaw se utarti hain. Uske baad woh Rickshaw Wale ko paise dekar, Sameer ko "Bye" kehkar chali jaati hain. 

Kuch din baad ki baat hain. Ek baar Sameer se uski company ek beauty parlour mein jaane ke liye kehti hain. Sameer waha par jaata hain aur us beauty parlour ki maalkin se baatein karte hue apne products ki jaankari deta hain. Tabhi achaanak se Shikha uske saamne aa jaati hain aur kehti hain, "Hi."

Sameer - "Oh hi Shikha. What a pleasant surprise ?"

Shikha - "Aap yahan ?"

Sameer - "Haan main woh apne marketing ke kaam se aaya hua tha. Aur aap yahan kaise ?"

Shikha - "Main yahi par kaam karti hoon."

Sameer - "Accha."

Tabhi us beauty parlour ki maalkin kehti hain, "Main aapko contact karungi."

"Thik hain main chalta hoon phir." Sameer kehta hain. Uske baad woh Shikha ki aur dekh kar kehta hain, "Kya aap abhi free ho ?"

Shikha - "Mera shift ek ghante mein khatam ho jaayega."

Sameer - "Thik hain."

Shikha - "Kya aap ek ghante ke baad mujhse mil sakte ho ?"

Sameer - "Main koshish karunga."

Uske baad woh waha se chala jaata hain. Ek ghante baad, jab Shikha apna kaam khatam karke, beauty parlour se bahar nikalti hain; toh woh dekhti hain ki Sameer bahar hi khada hain. Shikha Sameer ke pass jaati hain aur kehti hain, "Aap abhi tak yahi khade ho ?"

Sameer - "Mera kaam poora khatam ho gaya tha. Main yahi se guzar raha tha, toh maine socha ki thoda intezaar kar lete hain."

Shikha - "Kahi saath mein baith te hain."

Sameer - "Thik hain."

Dono saath mein ek restaurant mein jaate hain. Wahan par baithkar woh dono, dher saari baatein karte hain. Kuch apne kaam ke baare mein. Kuch apne parivaar ke baare mein. Uske baad, dono ek dusre ka number le lete hain. Ab dono ki aksar phone par kabhi call par toh, kabhi message par baatein hoti rehti hain. 

Ek din, Shikha ka Sameer ko call aata hain. Sameer call uthate hi, "Haan Shikha. Kaisi ho tum ?"

Shikha - "Main thik hoon. Tum kaise ho Sameer ?"

Sameer - "Main bhi thik hoon. Aur batao tumhare ghar mein sab kaise hain ?"

Shikha - "Sabhi thik hain. Tumhare ghar mein sab kaise hain ?"

Sameer - "Sab log thik hain."

Shikha - "Accha. Mujhe tumse kuch puchna tha."

Sameer - "Kya baat hain ?"

Shikha - "Kya tum kal free ho ?"

Sameer - "Haan."

Shikha - "Kya tum kal mujhse mil sakte ho ?"

Sameer - "Thik hain. Kaha par milna hain ?"

Shikha - "Jashn Restaurant mein. Aaj shaam 6 baje."

Sameer - "Thik hain. Shaam mein milte hain."

Sameer shaam mein waqt par Restaurant pohuch jaata hain. Woh Shikha ko dekhta hain. Shikha ko dekhte hi woh bas use dekhta hi reh jaata hain. Aaj woh behad khoobsurat dikh rahi thi. Usne gulabi rang ki saree pehni hui thi aur uske haathon mein laal rang ki chudiyaan thi. Dono ekdusre ko dekh kar muskurate hain. Dono ek dusre ke kareeb aate hain aur woh dono ek dusre ko kuch pal ke liye bas dekhte hi reh jaate hain. Sameer ki nazrein, Shikha ki khoobsurati ki tareef kar rahi thi. Uski aankhen hi bata rahi thi ki aaj woh uski khoobsurati se kitna prabhavit hua hain. 

Shikha thoda sa sharmati bhi hain. Uske baad, woh kehti hain, "Andar Restaurant mein chalo. Andar baithkar baatein karte hain."

Sameer - "Thik hain."

Dono saath mein andar jaate hain. Uske baad woh dono ek table par ek dusre ke aamne-saamne baithte hain. Sameer ab bhi chup tha. Phir Shikha kehti hain, "Kya tumhe pata hain, ki maine tumhe yahan par kyun bulaya hain ?"

Sameer - "Nahi."

Shikha - "Main tumse kuch kehna chahti hoon Sameer."

Sameer ki dil ki dhadkane tez ho jaati hain. Sameer ko chup chap baitha dekh, Shikha kehti hain, "Kya tum mujhe sunn rahe ho Sameer ?"

Sameer - "Haan kaho na Shikha. Tum kuch kehna chahti thi."

Shikha - "Main kal jaa rahi hoon Sameer."

Sameer - "Kaha par ?"

Shikha - "Hyderabad."

Sameer - "Toh tum wapas kab aaogi ?"

Shikha koi jawab nahi deti hain. Uski taraf se koi bhi jawab na milta dekh, Sameer kehta hain, "Main tumse kuch poonch raha hoon Shikha."

Shikha - "Main wahan par shift ho rahi hoon Sameer."

Sameer - "Toh yahan par job karne mein aakhir kya burai hain ?"

Shikha - "Mera wahan par transfer ho raha hain Sameer."

Dono kuch der ke liye chup chap baithe hue the. Uske baad, Sameer ponchta hain, "Toh tum jaa kab rahi ho ?"

Shikha - "Kal."

Sameer - "Aise achaanak se ? Tum shift ho rahi ho. Company tumhara transfer kar rahi hain. Tumhe kuch din pehle hi bataya hoga na Company ne ? Aur tum mujhe aakhri din mein yeh baat bata rahi ho."

Shikha - "Darasal bohut saari tayyari karni thi. Yahi sab mein busy hokar main bhool gayi tumhe batana."

Sameer - "Thik hain. Tum contact mein rehna zaroor."

Shikha - "Hmm."

Sameer - "Bhool mat jaana mujhe tum."

Shikha - "Haan."

Dono hi chup ho jaate hain. Dono ke chehre par ek ajeeb si udaasinta cha jaati hain. Phir waiter aata hain aur kehta hain, "Mam. Sir. Kya aap dono kuch order karna chahenge ?"

Sameer - "Haan. Mere liye paani aur Mam ke liye, unhi se poonch lijiye."

Shikha - "Main bhi kuch nahi lungi." Yeh kehte hi Shikha uthkar restaurant ke bahar chali jaati hain. Sameer uske peeche-peeche jaata hain. Sameer use aawaz lagata hain, "Shikha. Ruko Shikha. Shikha." Woh Shikha ke kareeb jaata hain aur peeche se uska haath pakad leta hain. Shikha peeche mudti hain. Uske aankhon mein aansun hote hain. 

Sameer - "Kya hua Shikha ?"

Shikha - "Kuch nahi."

Sameer - "Toh tumhare aankhon mein aansun kyun hain ?"

Shikha - "Pata nahi. Main is shehar ko chodkar jaa rahi hoon. Mere sabhi apno ko chodkar jaa rahi hoon. Shayad isiliye."

Sameer - "Dekho zindagi mein har insaan, hamare saath saari zindagi rahe, aisa zaroori nahi. Hamari zindagi mein bohut saare log aise hote hain, jo hamari zindagi mein bas kuch pal ke liye hi aate hain. Uske baad, woh hamari zindagi se hamesha hamesha ke liye chale jaate hain."

Shikha - "Iska matlab hum dono ek dusre se saari zindagi nahi milenge Sameer."

Sameer ki nazrein jhunk jaati hain.

Shikha - "Jawab kyun nahi dete ho ? Tum chup kyun ho ? Batao ?"

Sameer kuch nahi keh paata hain.

Shikha rote hue kehti hain, "Hum mile hi kyun the Sameer ? Kyun aaye tum meri zindagi mein ? Kaash us din main us seminar mein hi na gayi hoti."

Shikha rote hue waha se chali jaati hain. Shikha ke jaane ke baad, Sameer bohut rota hain. Agle din, Shikha ka Sameer ko message aata hain, "Main yeh shehar chodkar jaa chuki hoon. Mujhe is shehar ki bohut yaad aayegi. Lekin us se bhi zyada yaad aayenge, toh tumhare saath bitaye hue pal. Hum dono kitne kam waqt mein ek dusre ke kitne kareeb ho gaye the. Tumse dur hokar mujhe bohut zyada takleef ho rahi hain. Agar maine anjaane mein kabhi bhi tumhara dil dukhaya ho, toh please tum mujhe maaf kar dena."

Sameer us message ka use reply karta hain, "Tum hamesha mere dil mein rahogi."

Ab dono alag-alag shehar mein rehte hain aur aksar ek dusre se baat-cheet bhi karte rehte hain. Lekin, andar hi andar dono bas toot te hi jaa rahe the. Dono ko apni zindagi mein ek dusre ki kami khal rahi thi. 

Ek shaam Sameer ko Shikha ki bohut yaad satati hain. Use Shikha ke saath bitaya hua har ek pal yaad aa raha hota hain. Woh Shikha ko isi waqt apni aankhon ke saamne chahta tha. Lekin, woh jaanta tha ki yeh mumkin nahi hain. Ab Sameer se raha nahi jaa raha tha aur usne turant Shikha ko call lagaya. Do-Teen ghanti baji, lekin Shikha ne call nahi uthaya. Uske baad, call kat gaya. Sameer bohut dukhi mann se apna phone bagal mein rakh deta hain. Thodi der baad, uske aankhon se aansun chalak padte hain. Tabhi achaanak se uska phone bajta hain. Woh dekhta hain ki Shikha ka call hain. Sameer turant us call ko uthata hain aur kehta hain, "Hello."

Phone ke dusre aur se Shikha kehti hain, "Hello Sameer. Kaise ho tum ?"

Sameer - "Thik hoon. Tum kaisi ho ?"

Shikha - "Main bhi thik hoon."

Sameer - "Kaafi dino ke baad hamari baat ho rahi hain."

Shikha - "Hmm."

Sameer - "Kya tum ro rahi ho ?"

Shikha - "Nahi."

Lekin Shikha ki awaaz se Sameer samajh jaata hain ki woh ro rahi hain. Uske baad woh kehta hain, "Thik hain main tumse baad mein baat karta hoon." Yeh kehkar woh phone kaat deta hain. 

Kareeb dus din baad ki baat hain. Shikha apni company se bahar nikalti hain aur dekhti hain ki Sameer wahan khada hain. Use dekhte hi woh wahi ruk jaati hain. Shikha ko yeh ummed nahi thi ki Sameer usse milne ke liye aayega. Sameer uske kareeb jaata hain aur kehta hain, "Tum chaunk kyun gayi ho ?"

Shikha - "Bas aise hi."

Sameer - "Tumhe bilkul bhi ummeed nahi thi na ki main tumse milne ke liye aaunga ?"

Shikha - "Bilkul bhi nahi."

Sameer - "Kya tum yeh jaanti ho main yahan kyun aaya hoon ?"

Shikha 'Na' mein apna sar hilati hain. 

Sameer - "Main tumhe apni shaadi ka card dene ke liye aaya hoon."

Yeh sunkar Shikha hairaan reh jaati hain. Sameer ki baat, uske dil ko kaante ki tarah chubh jaati hain. "Shaadi ka card toh dekho." Yeh kehte hue Sameer uske haath mein Card pakda deta hain. Shikha Card dekhti hain. Usmein likha hota hain, "Sanjay weds Nikita." Woh hairaani se Sameer ki aur dekhti hain. Phir Sameer kehta hain, "Main tumhare alaawa kisi aur se kaise Shaadi kar sakta hoon. Main tumse bohut pyaar karta hoon Shikha. Kya tum bhi mujhse pyaar karti ho ?"

Shikha - "Haan Sameer. Bohut zyada pyaar karti hoon main tumse."

Dono ek dusre ke gale lagte hain. Phir Shikha kehti hain, "Yeh shaadi ka card kiska hain ?"

Sameer - "Yeh mere bhai ki Shaadi ka card hain. Tum aaogi toh mujhe bohut accha lagega. Ghar wale bhi apni hone wali bahu ko dekh lenge."

Shikha - "Aaj hum dono ne apna pyaar paa liya hain. Is se zyada khushi ki baat aur kya ho sakti hain."

Sameer - "Is duri ne hi hume apni mohabbat ka ehsaas dilaya hain. Agar yeh doori na hoti toh shayad hum dono aakhir tak dosti ke waham mein hi jee rahe hote."

Dono ek dusre ko gale laga lete hain.

                  -  Ved Vineet Gautam