Dwaidh

Tarun Kumar aur Varun Kumar yeh dono bhai hain. Tarun ki umar Varun se do saal zyada hain. Dono bhai saath milkar ek business chalate hain, jise unke pita ne shuru kiya tha. Unke kapdon ki dukaan hain. Unke pita ko guzare chaar saal ho chuke hain aur maa ko guzare ek saal ho gaya hain. Dono bhai ko do-do bacche hain. Tarun ki beti ka college khatam hone wala hain. Ghar ke baaki bacche filhal chote hain aur woh log abhi bhi school mein padhte hain. Dono bhai ek dusre ki sehmati ke saath hi business mein nirnay lete hain. 

Ek din, Varun ne Tarun se kaha, "Bhaiyaa Hyderabad ki ek textile mill se ek business proposal aaya hain. Proposal accha hain. Ek baar hume unko apna quotation bhej dena chahiye."

Tarun - "Yeh company aakhir kitni purani hain ?"

Varun - "Pata nahi. Kyun ?"

Tarun - "Kya tumhe us company ke baare mein kuch jaankari hain ?"

Varun - "Nahi."

Tarun - "Kya tumne us company ke baare mein koi jaankari nikaalne ki koshish ki ?"

Varun ne 'Na' mein apna sar hilaya.

Tarun - "Tab hum unke saath kaise baat ko aage badha sakte hain ?"

Varun - "Lekin bhaiyaa. Hume business company ke saath karna hain ya unke itihaas se ? Baat yeh maayne rakhti hain ki aakhir company kitni badi hain."

Tarun - "Bhai. Jo company khud ko jitna bada dikhati hain, woh andar se utni hi khokli hoti hain."

Varun - "Toh ab ?"

Tarun - "Bhool jaao us company ko. Koi dusri jagah baat karenge."

Varun - "Thik hain bhaiyaa." Woh baat wahi par khatam ho gayi. 

Agle din, Varun school mein jaakar baaki baccho ki fees bhar aaya. Uske baad, woh dukaan mein chala gaya. Din bhar dukaan mein kaam karne ke baad, shaam mein, dono bhai ghar laut aaye. Woh dono saath baithkar vyapaar ki baat-cheet karne lage. Baat-Cheet karte-karte, Tarun ne Varun se kaha, "Varun tum ek kaam karo. Tum kal Banaras ke liye nikal jaao. Wahan par hum jitne bhi logon ke saath business karte hain, ek baar tum unki textile mills mein jaakar ho aao."

Varun - "Thik hain bhaiyaa."

Agle din, Varun Banaras ke liye nikal pada aur Tarun har roz ki tarah, apne dukaan mein jaa baitha. Kareeb ek hafte ke baad, Varun wapas ghar laut aaya. Ghar pohuchne ke baad, woh haath-muh dhokar fresh hua aur shaam mein dono bhai saath mein baithkar baatein karna shuru kiye. 

Tarun - "Tumhara Banaras ka tour kaisa tha ?"

Varun - "Accha tha Bhaiyaa."

Tarun - "Wahan par humne jo bhi orders diye the, unki delivery ek hafte tak ho jaayegi."

Varun - "Chaliye accha hain. Main Banaras mein ek textile mill ke maalik se mila tha."

Tarun - "Accha."

Varun - "Unki factory mein bhi gaya tha."

Tarun - "Toh kya baat hui ?"

Varun - "Woh keh raha tha ki, agar hum pandrah se bees laakh deposit kare, toh woh hume saal bhar ka contract de dega."

Tarun - "Yeh sahi nahi hain Varun."

Varun - "Matlab ?"

Tarun - "Deposit dekar hum phans bhi sakte hain."

Varun - "Yeh baat aapko pehle se kaise pata hain ki hum wahan par phans hi jaayenge ?"

Tarun - "Agar kal ko woh paise lekar palat gaya toh ?"

Varun - "Agar woh nahi palta toh ?"

Tarun - "Lekin uske apne vaade se mukarne ki zyada sambhavna hain."

Varun - "Sambhavna se toh vyapaar nahi chalta hain na Bhaiyaa."

Tarun - "Tum kehna kya chahte ho Varun ?"

Varun - "Pehle aapne Hyderabad wali company ke saath vyaapar karne se mana kar diya. Phir aapke hi kehne par main Banaras gaya. Jo kaam aapne kaha, maine woh kiya. Ab Banaras ki hi ek dusri company main laakar de raha hoon, use bhi aap kharij kar de rahe ho."

Tarun - "Maine apni baat kahi hain."

Varun - "Aur meri baat ? Uska koi mahattva nahi hain. Hain na Bhaiyaa ?"

Tarun - "Tum kya chahte ho Varun ?"

Varun chup tha. Uske chehre par naarazgi saaf dikhayi de rahi thi aur yeh baat Tarun bhaanp chuka tha. Baat ko sambhalte hue, Tarun ne kaha, "Thik hain. Hum Banaras ki us company ko ek order de denge."

Varun - "Nahi Bhaiyaa. Hume dene ki koi zaroorat nahi hain. Main de dunga."

Tarun - "Thik hain tum hi de dena."

Varun - "Apni dukaan se."

Tarun - "Haan toh hamara order hamari dukaan se hi jaayega na."

Varun - "Main meri apni dukaan ki baat kar raha hoon Bhaiyaa."

Tarun - "Tum kehna kya chahte ho ?"

Varun - "Main ab batwara karna chahta hoon."

Tarun - "Yeh baat kaha se kaha jaa rahi hain Varun ? Main samajh nahi paa raha hoon. Maine toh kaha na, tum Banaras wali us company ko order de do."

Varun - "Yahi fark hain Bhaiyaa. Vyaapar ke saare faisle aap lete ho. Main kisi bhi nayi company se baat karke aaun, toh aap sabse pehle usmein nuskh dhundhna shuru kar dete ho. Uske baad aap mere kaam mein duniya bhar ki kamiyaan nikaalne lagte ho aur phir anth mein, mere dwara laaye gaye us kaam ko khaarij kar dete ho. Mujhe batwara hi chahiye. Agar aap kuch nahi dena chahte ho, toh bhi mujhe manzoor hain. Lekin, ab mujhe apna alag vyaapar chahiye." 

Tarun - "Ismein alag hone ki baat kaha se aa gayi Varun ? Thik hain. Ab se wahi hoga, jo tum chahoge."

Varun - "Main batware ke alaava aur kuch nahi maan paaunga Bhaiyaa."

Tarun - "Yeh baat kaha se kaha jaa rahi hain ?"

Varun - "Meri ek baat ho, jise aapne maana ho. Haan jin logon ke saath hum pehle se vyaapar karte aa rahe hain, unke saath ki gayi deals ki baat alag hain. Lekin, bahar se main jo bhi vyaapar laa raha hoon, use aap seere se nakaar dete ho."

Tarun - "Agar tumhe chahiye toh main sab kuch tumhare naam kar dunga."

Varun - "Mujhe kya aapne bhikmangaa samajh rakha hain Bhaiyaa ? Mujhe ab bas mera hissa chahiye. Na usse ek rupyaa kam, aur na hi zyada."

Tarun - "Kya kisi tarah ka samjhauta nahi ho sakta hain ?"

Varun ne 'Na' mein apna sar hilaya. 

"Thik hain Varun. Agar tum yahi chahte ho, toh yahi hoga." Tarun ne bohut dukhi swar mein kaha. 

Varun ab bhi chup tha. Uske baad, Tarun ne kaha, "Kya tum meri ek aakhri baat maanoge ?"

Varun - "Haan boliye."

Tarun - "Dekho Papa ne bohut mehnat aur lagan se is vyaapar ko khada kiya hain. Unhone is shehar mein bohut izzat kamayi hain. Hum dono is ghar mein ek saath rahenge. Chahe kuch bhi ho jaaye, hume alag-alag ghar nahi banana hain. Kya tumhe meri yeh baat swikaar hain ?"

Varun - "Thik hain. Mujhe aapki yeh shart manzoor Bhaiyaa."

Varun ne apni alag dukaan khol di. Ab samaaj sawaal karne se kabhi chuka hain bhala ? Shahar ke sabhi jaan-pehchan wale, ados-pados wale jab bhi punchte, ki, "Aisa kyun hua ?" Tab dono bhai ek hi jawab de dete ki, "Humne bas vyaapar badhane ke liye dusri dukaan kholi hain."

Dono bhai apne-apne parivaar ke saath ek chath ke hi neeche the, lekin, ab pehle jaisi baat nahi rahi. Dono bhaiyon mein ab pehle ki tarah khul kar baat-cheet nahi hoti hain. 

Ek din ki baat hain, shaam mein Tarun apni dukaan se ghar jaldi laut aaya aur woh Varun ka intezaar karne laga. Kaafi der ho gayi, lekin, Varun abhi tak ghar nahi lauta tha. Aakhir mein, raat ke nau baje Varun ghar lauta. Varun ko dehkte hi, Tarun ne Varun se kaha, "Mujhe tumse kuch baat karni thi."

Varun - "Bhaiyaa main abhi ghar lauta hoon, main paani peekar thoda sa fresh hokar aata hoon, tab baat karte hain."

Tarun - "Thik hain."

Tarun, Hall mein Varun ka besabri se intezaar kar raha tha. Aakhir mein, aadhe ghante ke baad, Varun Hall mein aaya. Tarun use dekh kar muskura diya. Varun ke chehre par koi bhaav nahi tha. Phir Tarun ne kaha, "Baitho."

Varun chup chap sofa par baith gaya. Tarun uske saamne baitha. 

Varun - "Kahiye bhaiyaa. Kya baat thi ?"

Tarun - "Nikita ke liye ek ladka dekha hain maine."

"Accha ?" Varun ne khushi se kaha.

Tarun - "Haan."

Varun - "Kya karta hain ladka ?"

Tarun - "Woh ek doctor hain."

Varun - "Toh doctor kyun ? Kisi acche bade ghar mein hamari beti ki shaadi karaiye. Koi vyaapar karne wala ladka ho toh zyada behtar rahega."

Tarun - "Haan. Tum jo keh rahe ho, woh bhi sahi hain. Lekin, ladka accha hain. Usmein koi aib bhi nahi hain."

Varun - "Chaliye accha hain."

Tarun - "Main kal hi uske ghar jaa raha hoon. Tum bhi mere saath chalna. Agar tumhe pasand aaye, toh hum shaadi tai kar denge."

Varun - "Thik hain bhaiyaa."

Ghar ki ladki ki Shaadi ki baat chal rahi hain. Ghar mein ek khushi ka maahol banne jaa raha hain, isi baat ko dhyaan mein rakhte hue, dono bhai apne beech ke mad-bhed bhulakar agle din ladka dekhne ke liye chale gaye. Ladka dono bhaiyon ko bohut pasand aaya. Us ladke ka naam Yash tha. Tabhi Varun ne jhat se ladke walon se kaha, "Hume yeh rishta manzoor hain." Yeh sunte hi, Tarun ne kaha, "Lekin main ek baar apni beti se baat karna chahta hoon."

Ladke walon ko zara ajeeb lagi. Unke chehre ka badla hua bhaav dekh kar, baat ko sambhalte hue, Varun ne kaha, "Bhai Sahab. Aaj Kal zamana badal gaya hain. Aaj Kal ke bacche apna faisla khud lena pasand karte hain. Main yeh chahta hoon ki ek baar Yash aur Nikita ek dusre se mile. Dono ki jaan pehchan ho jaaye. Dono ek dusre ko pasand kar le, toh yeh behtar rahega. Aakhir mein dono ko apni saari zindagi saath mein bitani hain."

Tab Yash ke pita ne kaha, "Aap sahi keh rahe ho Bhaisahab. Thik hain. Aap ek baar apni beti ki marzi jaan lijiye. Uske baad, dono ki ek dusre se mila denge. Chahe aapke yahan, chahe hamare yahan. Ek baar, dono bacche ek dusre se khul kar baat-cheet kar le, uske baad un dono ka jo bhi faisla hoga, hume manzoor hoga."

"Shukriya Bhaisahab. Aapka bohut-bohut shukriya." Tarun ne Yash ke pita se kaha.

 Uske baad, dono bhai ghar ke liye laut pade. Raaste mein Varun ne kaha, "Bhaiyaa."

Tarun - "Haan."

Varun - "Parivaar toh accha lag raha hain."

Tarun - "Haan. Bade suljhe hue lag rahe hain."

Varun - "Ghar pohunchte hi hum Nikita se baat kar lenge."

Tarun - "Haan. Bas ek baar Nikita ka ghar bas jaaye, toh accha hi hoga."

Dono bhai ghar pohunchte hain.

Ghar pohunchne ke baad, unhe pata chalta hain ki, Varun ke bete ki tabiyat bigad chuki hain. Use bohut tez bukhar chadha hua hota hain. Dono bhai use turant aspataal mein le jaate hain aur der raat ko use lekar ghar par laut te hain. 

Tabhi Varun ki patni kehti hain, "Jab aap dono saath aspataal jaa sakte hain, toh saath mein kaam kyun nahi kar sakte hain ?"

Varun - "Hamara saath kaam karna namumkin hain."

Varun Ki Patni - "Aisa kyun ?"

Varun - "Kyunki hamare vichaar nahi milte hain. Hum dono ka kaam karne ka tareeka bhi alag-alag hain."

Tarun - "Saath mein kaam karna aur saath mein rehna do alag-alag baatein hoti hain. Vichaaron mein mad-bhed hone se rishte khatam nahi hote hain. Waise bhi hum ek mahattvapurn baat batana toh bhool hi gaye the."

Tarun Ki Patni - "Kya baat ?"

Tarun - "Main chahta hoon ki yeh baat tum batao Varun."

Varun - "Hum dono ne Nikita ke liye ek ladka pasand kiya hain. Ladka behad sundar aur sushil hain. Woh parivaar bhi bohut suljha hua hain. Agar Nikita ki 'Haan' ho, toh hum unhe apne ghar par nimantran de sakte hain. Uske baad, Nikita jo faisla legi, woh hi hoga. Aakhir mein use apni zindagi ka faisla khud lene ka haq hain."

Nikita - "Thik hain. Main ladke se milne ke liye tayyar hoon."

Tarun turant Yash ke pita ko call lagata hain aur unse thodi der baat-cheet karta hain. Agle din, dono parivaar milte hain aur unke beech dher saari baatein hoti hain. Yash aur Nikita bhi ek dusre se kaafi samay tak baat-cheet karte hain aur dono hi ek dusre ko pasand bhi kar lete hain. 

Dono parivaar ke beech rishta tai ho jaata hain aur shaadi ki tayyari shuru ho jaati hain. Nikita ki shaadi mein ghar ka har ek sadasya poore utsaah ke saath, kaam par lag jaata hain aur nam aankhon se uski bidaai kar di jaati hain. 

                   - Ved Vineet Gautam