Abhishek Khanna ek company mein naukri karte hain. Unki patni ka naam Sneha hain. Un dono ke do bete hain. Bade bete ka naam Sanjay hain aur chote bete ka naam Sandeep hain. Sneha Abhishek ki dusri patni hain. Abhishek ki pehli patni se Sanjay paida hua tha aur Sandeep, Sanjay aur Sneha ka beta hain.
Dono bhaiyon mein koi khaas nahi banti hain. Haalanki, in dono bhaiyon mein kabhi koi manmutaav nahi raha hain lekin, dono ko ek dusre se koi khaas lagaav bhi nahi hain. In dono bhaiyon ke beech bas naam ka rishta hain.
Abhishek ke dono bete, alag-alag company mein naukri karte hain.
Ek hi jagah par baitha poora parivaar alag-alag kaam mein vyast tha. Sab saath baithe toh the, lekin phir bhi sab ek saath nahi the. Inki ekta mein bhi anekta saaf dikh rahi thi.
Tabhi Abhishek kehta hain, "Main ghar ke sabhi sadasya ka dhyaan apni aur chahunga." Sabhi log Abhishek ki aur dekhte hain. Abhishek apni baat shuru karte hue kehta hain, "Main kal retire hone wala hoon."
Sneha - "Toh kal aapki naukri ka aakhri din hain ?"
Abhishek - "Haan. Uske baad, main apne pension ke liye arzi daalunga. Pension aane mein waqt lagega."
Sanjay - "Chaliye accha hain. Aapko ab accha aaram bhi mil jaayega."
Abhishek - "Haan beta."
Sanjay - "Main agle hafte Chennai jaa raha hoon. Company ke kaam se."
Abhishek - "Toh tum wapas kab aaoge ?"
Sanjay - "Hafta das din lagega."
Abhishek - "Aur itne din tumhara waha par rehne ka koi bandobast hain ?"
Sanjay - "Haan Papa woh company ek hotel mein room book kar degi."
Abhishek - "Wahan par tum apna khayal rakhna beta."
Sanjay - "Haan zaroor Papa."
Aakhir mein Sanjay ke jaane ka din aa jaata hain. Sanjay ke jaane ke ek shaam pehle, Abhishek Sanjay ko apne paas bulata hain aur kehta hain, "Beta kal tum jaane wale ho. Toh tum ghar se bhi kuch paise apne saath lete hue jaana."
Sanjay - "Thik hain Papa."
Abhishek - "Wahan par apna khayal rakhna tum. Main tumhe phone karta rahunga."
Sanjay - "Haan Papa."
Agle din, Sanjay Chennai ke liye nikal jaata hain. Shaam mein Abhishek, Sneha aur Sandeep saath mein baithe hue rehte hain. Tabhi Sneha kehti hain, "Woh ghar mein sabzi khatam hone aa rahi hain. Kal aap bazaar jaakar sabzi le aana."
Abhishek - "Thik hain. Dekh lo ghar mein aur koi zaroori samaan laana ho toh bata dena."
Sneha - "Aur toh kisi zaroori saaman ki kami toh lag nahi rahi hain ghar mein."
Abhishek - "Thik hain. Main kal sabzi lekar chale aaunga."
Sneha - "Thik hain Ji."
Agle din, Abhishek subah hi tayyar hokar, sabzi kharidane ke liye nikal padta hain. Woh bazaar jaata hain aur kai alag-alag kism ki sabziyan kharidta hain. Aaloo, Baingan, Tamaatar, wagera-wagera.
Aaj kaafi dino ke baad, woh ghar se bahar nikla hain. Jis wajah se uska ghar wapas jaane ka mann hi nahi kar raha tha. Reh-Rehkar use apni naukri ke din yaad aa rahe the. Jab woh stop par rukkar bus ka intezaar karta rehta tha. Sadak par kandhe par bag liye ghai-ghai mein chal rahe naujawaano ko office jaata dekh use apni jawaani ke din yaad aa rahe the. 'Aakhir woh bhi kya din the.' Abhishek sochta hain.
Uske baad, Abhishek ghar ke aur laut ta hain. Ghar lautne ke baad woh saara saaman Sneha ko de deta hain aur Hall mein ek kursi par baith jaata hain. Abhishek apne purane dino ki yaadon mein poori tarah se khoya hua tha. Tabhi darwaaze ki ghanti bajti hain. 'Pata nahi kaun hain. Mera saara mazaa kirkira kar diya.' Abhishek sochta hain. Darwaaze ki ghanti dubara bajti hain aur woh darwaaze ki aur jaata hain aur use kholta hain. Darwaaza kholte hi, woh dekhta hain ki bahar Ajay Kumar khade hain. "Are Kumar sahab kaise ho aap ? Kaafi dino ke baad darshan ho rahe hain aapke." Abhishek kehta hain.
Ajay Kumar - "Haan. Kaafi din ho gaye the. Isiliye maine socha ki ek baar aake aapse mil leta hoon."
Abhishek - "Yeh toh aapne bohut hi accha kiya. Aaiye andar aaiye."
Ajay Kumar ghar ke andar aate hain aur dono saath mein baith te hain. Tabhi Abhishek Sneha ko aawaz lagate hue kehta hain, "Are sunti ho. Dekho toh koun aaya hain."
Sneha Hall mein aati hain. Ajay Kumar ko dekhte hi kehti hain, "Namastey Bhaisahab kaise ho aap ?"
Ajay Kumar - "Namastey Bhabhi. Main thik hoon. Aap kaisi ho ?"
Sneha - "Main bhi thik hoon."
Ajay Kumar - "Aur Sanjay aur Sandeep kaise hain ?"
Sneha - "Woh dono bhi thik hain. Bhaisahab aap adrak wali chai lenge ya, bina adrak wali ?"
Ajay Kumar - "Adrak wali chai hi bana dijiye Bhabhi."
"Thik hain." Kehte hue Sneha andar kitchen mein chali jaati hain.
Abhishek - "Aur batao Kumar Sabab, kya chal raha hain ?"
Ajay - "Sab thik chal raha hain Khanna Sahab. Darasal main aapse kuch baat-cheet karne ke liye aaya tha."
Abhishek - "Kya baat-cheet ?"
Ajay - "Ab tumhare dono bete jawaan ho gaye hain. Accha Khaasa kamate bhi hain. Unki shaadi ke baare mein kuch socha hain ?"
Abhishek - "Abhi toh kuch nahi. Lekin, agar rishta accha ho toh main baat kar sakta hoon. Lekin, filhal main sirf Sanjay ki shaadi karana chahta hoon. Sandeep ki shaadi ke baare mein, main ek saal ke baad hi sochunga."
Ajay - "Thik hain. Maine bhi jo ladki dekhi hain woh Sanjay ke liye hi sochkar rakhi hui hain."
Abhishek - "Koun hain ladki ? Kya karti hain woh ?"
Ajay - "Abhi Abhi uski padhayi poori hui hain. Woh meri sagi bhanji hain."
Abhishek - "Jab tumhari apni bhanji hain toh usmein sochna kya hain ?"
Ajay - "Lekin ab zamaana badal gaya hain Abhishek. Main chahta hoon ki tum ek baar Sanjay se is baare mein baat kar lo."
Abhishek - "Thik hain. Sanjay kal hi bahar gaon gaya hain kaam se. Woh agle hafte wapas aa jaayega, tab main usse baat kar lunga."
Ajay - "Toh main chalta hoon phir."
Abhishek - "Are bhai khaana toh khaa kar jaao."
Ajay - "Phir kabhi."
Abhishek - "Aao main tumhe bahar tak chod deta hoon." Dono saath mein bahar chale jaate hain aur Ajay apne ghar ke liye nikal padta hain. Abhishek wapas ghar mein aata hain aur woh Sanjay ko call lagata hain. Sanjay call nahi uthata hain. Abhishek sochta hain ki, "Woh shayad kaam mein vyast hoga."
Kuch ghanto ke baad, Abhishek ka phone bajta hain aur woh dekhta hain ki, Sanjay ka call aa raha hain. Abhishek call uthata hain aur bohut khushi se kehta hain, "Haan Sanjay bolo."
Sanjay - "Namastey Papa."
Abhishek - "Khush raho beta. Kaise tum ?"
Sanjay - "Main thik hoon. Aap kaise ho ?"
Abhishek - "Main bhi thik hoon."
Sanjay - "Aur ghar mein baaki sab log kaise hain ?"
Abhishek - "Sab thik hain beta."
Sanjay - "Papa main aapse yeh baat kehna chahta tha ki, mera kaam khatam ho chuka hain. Toh main kal nikal raha hoon yahan se aur parson pahunch jaaunga."
Abhishek - "Are yeh toh bohut hi khushi ki baat hain."
Sanjay - "Toh ab main rakhta hoon Papa."
Abhishek - "Thik hain beta."
Do din baad, Sanjay ghar pahunch jaata hain. Woh haath muh dhokar kapde badal kar bahar nikalta hain aur Hall mein aata hain. Use dekhte hi, Abhishek kehta hain, "Baitho beta." Sanjay uske saamne baitha hain.
Abhishek - "Aur batao. Kaisa raha tumhara Chennai ka daura ?"
Sanjay - "Bohut hi accha tha Papa."
Abhishek - "Ab naukri bhi kar rahe ho. Accha kama rahe ho. Ghar ki zimmedari uthana tum seekh rahe ho."
Sanjay muskurata hain.
Abhishek - "Ab zaroori hain. Aage ke baare mein sochna."
Sanjay - "Matlab ?"
Abhishek - "Are bhai. Zindagi mein kabhi na kabhi toh tum shaadi toh karoge hi na."
Sanjay - "Abhi tak toh maine shaadi ke baare mein socha hain nahi Papa."
Abhishek - "Darasal tumhare liye ek rishta aaya hua hain."
Sanjay - "Accha."
Abhishek - "Ajay ne rishta laaya hain. Ladki Ajay ki sagi bhanji hain."
Sanjay - "Thik hain. Kya aapne ladki dekhi hain ?"
Abhishek - "Abhi tak nahi. Main bas tumhari iccha jaan na chahta tha. Isiliye, maine abhi tak Ajay ko koi bhi jawab nahi diya hain."
Sanjay - "Thik hain Papa. Mujhe koi aitraaz nahi hain. Aap aage ki baat kar lijiye."
"Thik hain beta." Yeh kehte hue Abhishek ghar ke bahar jaata hain aur Ajay ko call lagata hain. Woh Ajay se kuch der tak baat-cheet karne ke baad, ghar ke andar aata hain.
Do Teen din baad, Ajay ladki aur uske parivaar ko lekar ghar aata hain. Dono parivaar mein dher saari baatein hoti hain aur unke beech mein rishta tai ho jaata hain.
Kuch mahino ke baad, Sanjay ki us ladki se shaadi bhi ho jaati hain. Jis ladki se Sanjay ki shaadi hoti hain, uska naam Naina hain. Ghar mein aate hi, kuch hi dino mein Naina ghar ka haal bhaanp leti hain. Woh jald hi is baat ko acche se samajh jaati hain ki, Sanjay ki Sneha aur Sandeep se zyada nahi banti hain.
Ek din, jab Sanjay ghar se bahar hota hain. Tab Naina, Abhishek ke pass jaati hain aur kehti hain, "Papa."
Abhishek - "Haan beta ?"
Sneha - "Woh main yeh soch rahi thi, ki ghar mein ek havan karwate hain."
Abhishek - "Thik hain beta. Jaisa tum chaho."
Naina - "Hawan ke liye sabhi dost aur rishtedaaron ko ghar par nyota dena chahiye hume."
Abhishek - "Woh sab tum dekh lo beta."
Naina - "Thik hain Papa."
Kuch dino ke baad, ghar mein hawan hota hain. Aur pandit ji gyaan ki baatein karna shuru kar dete hain. Woh kehte hain, "Jeevan mein hum sab ko ek na ek din is sansaar ko chodkar jaana padega. Hume is shaher ko tyagna hoga. Toh jab tak hum hain, kyun na hum sabke saath mil julkar rahe."
Naina ki bhi kuch saheliyan aayi hui hoti hain aur Naina unse jamkar apne sasuraal walon ki tareef bhi karti hain. Naina ke swabhaav se ghar mein sabhi log bohut prabhaavit hote hain.
Ek din, Naina Abhishek se kehti hain, "Papa kya kisi din hum sab kahi bahar ghumne ke liye chale ?"
Abhishek - "Thik hain beta."
Naina har tarah se lagatar koshish kar rahi thi ki ghar mein ekta ban jaaye. Aur dheere-dheere is baat ka sabhi ko ehsaas bhi ho raha tha. Ghar ka ek sadasya itne prayaas kar raha hain sabko ekatrit karne ke liye, yeh dekhte hi, sabhi log apne aapsi matbhed bhulakar dheere-dheere ek dusre ke kareeb aane lagte hain aur dekhte hi dekhte kuch mahino mein sab ek ho jaate hain.
Parivaar mein ek atoot ekta ban jaati hain. Ek din, sabhi parivaar saath baithe hue aapas mein bohut khul kar baat-cheet kar rahe the. Tabhi baat-cheet karte-karte Naina kehti hain, "Ab toh Sandeep ki bhi shaadi ki umar ho rahi hain."
Ispar Abhishek kehta hain, "Lekin beta Sandeep ke liye ladki ka chayan tum karogi."
Naina - "Aisa kyun keh rahe ho aap Papa ?"
Abhishek - "Kyunki yahi sahi bhi hoga beta. Jis tarah se tumne sabko ekjut kar diya, ghar ke faislon mein tumhari rai bohut mahattvapoorn hogi. Ghar ki asli mukhiya tum ho beta."
Comments
Post a Comment