Antarmukhi

 Pranav apne maata-pita ka iklauta ladka hain. Woh ek Call Center mein naukri karta hain. Woh swabhaav se behad shaant aur sharmila kism ka hain. Haal hi mein uska graduation poora hua hain. Lekin, use kisi company mein naukri na milne ki wajah se woh Call Center mein naukri kar raha hain. 

Pranav office mein zyada kisi se baat-cheet nahi karta hain aur na hi apne ghar walon se. Bachpan se hi use akelepan mein jeene ki rahi aadat hain. Na woh apni society mein aur na hi jaan pehchan walon se ghul-milkar nahi reh paata hain. Yahan tak ki, woh apne maata-pita se bhi khul kar baat-cheet nahi karta hain. 

Pranav ke pita ka naam Pratik hain aur maa ka naam Sheetal hain.

Ek din ki baat hain, Pranav kaam khatam karke apne ghar pahuncha. Ghar pahunchte hi usne dekha ki uske ghar mein kuch mehmaan aaye hue hain. Pratik ne kaha, "Pranav beta aao." Pranav andar aata hain. Phir uske pita ghar aaye mehamanon se kehte hain, "Yeh hain mera beta Pranav."

Pranav unhe 'Namastey' karta hain. Woh log bhi jawab mein, 'Khush Raho' kehkar use aashirwad dete hain. 

Pranav andar apne kamre mein jaa raha hota hain. Tabhi uske pita us se kehte hain, "Beta haath muh dhokar Hall mein hi aa jaana."

Pranav - "Thik hain Papa."

Woh log aapas mein baatein karte rehte hain. Thodi der baad, Pranav Hall mein aata hain aur apne pita ke bagal mein baith jaata hain. 

Pratik - "Inse milo beta. Yeh hain Ajay Kumar Ji aur yeh inki patni Nirmala aur yeh hain inki beti Pallavi."

Pallavi - "Hi Pranav."

Pranav - "Hi."

Nirmala - "Beta tum kaam kya karte ho ?"

Pranav - "Main ek call center mein naukri karta hoon."

Ajay - "Salary kya hain tumhari beta ?"

Pranav - "15,000 Rupaye."

Ajay - "Aur tumne padhai kaha tak ki hain ?"

Pranav - "Graduation tak."

Nirmala - "Kounse stream mein beta ?"

Pranav - "Commerce."

Ajay - "Tumhari hobbies kya-kya hain beta ?"

Pranav - "Kitabein padhna."

Ajay - "Aur koi shauk hain ?"

Pranav 'Na' mein apna sar hilata hain. 

Nirmala - "Tum bhi koi sawaal karo na beta ?"

Pranav - "Ab main kya sawaal karun ?"

Ajay - "Kuch bhi poocho na beta ?"

Tabhi Pranav ke pita kehte hain, "Beta tumhe guitar bajane mein dilchaspi hain na toh kuch us baare mein sabko batao zara."

Pranav - "Guitar ko bajaya jaata hain. Usmein notes hote hain. High aur low notes. Kai strings hoti hain aur bas use dil se bajaya jaata hain."

Pranav keval sawalaaon ke jawaab de raha tha. Woh vartaalaap mein hissa nahi le paa raha tha. Woh ghul-mil nahi paa raha tha. Ghar aaye hue mehmaano ko is baat ka ehsaas hote hue hi, woh log aakhir mein bahana banakar chale gaye. 

Raat ka samay tha. Jab saari duniya so rahi thi. Tab achaanak se Pranav ki neend khuli. Use pyaas mehsus ho rahi thi aur woh kitchen ki aur chal pada. Kitchen mein pahunchkar woh paani piya aur jaise hi woh apne kamre ki aur jaa raha tha, tabhi use kuch aawazein sunayi di. Yeh aawaz uske maata-pita ke kamre se aa rahi thi. Woh unke kamre ke darwaaze ke nazdeek gaya aur kaan lagakar unki baatein sun ne ki koshish karne laga. Pranav ko un dono ki baat-cheet sunayi dene lagi.

Sheetal - "Woh logon ka is tarah se jaana thoda ajeeb nahi laga aapko ?"

Pratik - "Haan ajeeb toh tha."

Sheetal - "Woh ladki toh badi pyaari thi."

Pratik - "Haan."

Sheetal - "Aapko kaisi lagi ?"

Pratik - "Thik hain ?"

Sheetal - "Kya woh log aapko pasand nahi aaye ?"

Pratik - "Nahi aisi baat nahi hain. Acche swabhav ke log toh lag rahe hain woh log. Bade khule dil ke hain."

Sheetal - "Ek baar woh log baat ko aage badhaye, toh hum log jald se jald Pranav ki shaadi us se kara denge."

Pratik - "Mujhe nahi lagta hain, ki woh log baat ko aage badhayenge."

Sheetal - "Aisa kyun ?"

Pratik - "Kya tumne dekha nahi ki woh log kitni jaldbaazi mein chale gaye. Aisa lag raha tha ki woh log hamare ghar se bas bhagkar nikal gaye ho."

Sheetal - "Matlab ?"

Pratik - "Sheetal tum is baat ko dil par mat lena, lekin, sach baat yeh hain ki kami hamare bete mein hain."

Sheetal - "Aakhir itne acche swabhav ka toh hain hamara beta. Na kisi se zyada baat-cheet karta hain. Na hi kisi tarah ka shauk hain use. Apne kaam se kaam rakhta hain bas."

Pratik - "Yahi toh kami hain usmein."

Sheetal - "Aap kehna kya chahte ho ?"

Pratik - "Tum mujhe yeh baat batao, agar kal ko hum dono ki maut ho jaaye, toh aisa koun hain woh Pranav ke sukh-dukh mein uska saath dega ? Use samjhega ? Aisa koun hain jo use thik se jaanta hain ? Hum uske maa-baap hokar bhi, hum khud apne ladke ko thik se nahi jaante hain. Us ladke ke dimaag mein kab kya chal raha hota hain, hume khud nahi pata hain. Woh apni zindagi ke saath kya karega, use khud nahi pata hain."

Yeh sab baatein sunkar Pranav ko bohut aahaat pahuncha. Woh soch mein pad gaya ki ab woh kya kare. Pranav ko khud yeh nahi pata tha, ki woh apni zindagi mein kya karna chahta hain.  

Woh bohut dukhi mann ke saath apne kamre mein gaya. Kamre ka darwaaza andar se band kiya aur woh rone laga. Woh sisak sisak kar ro raha tha. Pranav ne yeh anubhav kiya ki woh khul kar ro bhi nahi paa raha hain. Ab uske mann mein ek hi sawaal aane laga, "Main aakhir apni zindagi mein kya karunga ?"

Usi shan usne tai kar liya ki woh khud ko badlega. Agle din, woh utha aur tayyar hokar apne ghar se dur ek bazaar mein gaya aur wahan se usne kuch sabziyan kharidi aur raaste bhar woh koshish karta raha ki woh kai ajnabiyon se baat-cheet karta rahe. Kuch logon se woh aage jaane ka raasta puchta, jabki use raasta pehle se hi pata tha. Phir bhi apne swabhaav ko badalne ki koshish mein usne is kadam ko mahattvapoorn samjha. Aisa kuch mahino tak chalta raha. 

Dheere-Dheere uske swabhaav mein badlaav aana shuru hua. Woh ab thoda sa khul kar baat-cheet karne mein saksham ho chuka tha. Pranav na keval ghar walon se, balki bahar walon se bhi ghul-milkar baat-cheet karna shuru kar diya tha. 

Pranav mein yeh badlaav dekh kar, uske maata-pita hairaan reh gaye. Khud ke andar is badlaav se Pranav bhi bohut khush tha. Ab Pranav ne khudko aur badalane ki koshish ko aur badhaya. 

Pranav aksar alag-alag seminars mein jaata aur wahan par kisi na kisi bahane agle hone wale seminar ki jaankari le leta. Is prakaar uski baat-cheet karne ki shamta aur behtar hoti chali gayi. 

Ek din, Pratik ne Pranav ko apne pass bulaya aur kaha, "Beta baitho mujhe tumse kuch baat karni hain."

Pranav, Pratik ke saamne baith gaya. 

Pratik - "Beta tumhare andar yeh badlaav dekh kar main bohut khush hoon. Aise hi tum khud ko behtar banate jaao."

Pranav - "Thank You Papa."

Pratik - "Beta tumse kuch vyaktigat baat karni thi."

Pranav - "Haan kahiye na Papa."

Pratik - "Agar sach kahoon toh main bohut khush hoon. Tum isi tarah se aage badhte raho. Lekin, mujhe bas ek kami khal rahi hain."

Pranav - "Woh kya Papa ?"

Pratik - "Beta agar tum shaadi kar lete toh accha hota."

Pranav - "Dekhte hain. Abhi toh waqt hain Papa."

Pratik - "Beta agar tum shaadi ke maamle ko zara gambhirta se lete toh accha hota."

Pranav - "Thik hain. Aap jaisa kahiye."

Pratik - "Agar tumhe koi ladki pasand ho toh bata do beta."

Pranav - "Abhi tak toh koi bhi pasand nahi aayi Papa."

Pratik - "Thik hain beta. Jaao jaakar aaram karo."

Pranav - "OK Papa."

Ek din ki baat hain, Pranav ke pass uske team leader aate hain aur kehte hain, "Pranav yeh call khatam hone ke baad, tum mujhse aakar milna."

Pranav 'Haan' ka ishaaraa karta hain.  

Call khatam hone ke baad, woh apne team leader ke pass jaata hain aur kehta hain, "Sir aapne mujhe bulaya tha."

Team Leader - "Haan Pranav. Company mein naye mentors ki zaroorat hain. Main chahta hoon ki nomination mein tum bhi apna naam do."

Pranav - "Thik hain Sir. Aapka bohut bohut shukriya Sir."

Team Leader - "All The Best Pranav."

Pranav - "Thanks Sir."

Pranav apna naam, nomination mein de deta hain. Agle din se, Pranav ko har din beech-beech mein internal interviews ke liye bulaya jaata hain. Woh poore confidence aur tayyari ke saath interviews de raha tha. Pranav ne vaakai mein bohut mehnat ki thi is post ko paane ke liye. Use badi ummeed thi ki yeh post use zaroor milegi. Aakhir mein ek mahine ke baad, interview ka nateeja aaya aur use pata chala ki uska selection nahi hua hain. 

Woh bohut dukhi ho gaya. Pranav ka aatma vishwaas dagmagane laga. Us din woh bohut gehri soch mein doobkar ghar ki aur jaa raha tha.  Hamesha ki tarah woh us din bhi paidal apne ghar ki aur jaa raha tha. Tabhi peeche se ek gaadi ka horn bajta hain. Pranav uspar dhyaan nahi deta hain aur woh chalte jaata hain. Tabhi ek Scotty uske saamne aakar rukti hain. Woh dekhta hain ki us Scotty par ek ladki baithi hui hain aur us ladki ne apne muh ko ek scarf se dhakaa hua hain. Woh Pranav ko 'Hi' ka ishaara karti hain. Lekin Pranav koi bhi pratikriya nahi deta hain. Tab woh ladki apna scarf utarti hain. Pranav us ladki ko dekh kar chaunk jaata hain. Woh ladki koi aur nahi balki, Pallavi hoti hain. 

Pranav - "Tum yahan kya kar rahi ho ?"

Pallavi - "Yahi baat toh main tumse puchna chahti hoon."

Pranav - "Main ghar jaa raha tha."

Pallavi - "Kya main tumhe tumhare ghar tak chod doon ?"

Pranav - "Nahi main chala jaaunga."

Pallavi - "Dekho main jaanti hoon ki mere rejection ne tumhe bohut dukh pahuchaya hain, lekin, please tum is baat ka bura mat maano. Mujhe ek dost samajhkar agar tum mere saath chal sakte ho, toh main samjhungi ki tumne mujhe maaf kiya."

Pranav - "Thik hain."

Pranav, Pallavi ki Scotty par baithta hain. Pallavi Scotty start karti hain aur Scotty chal padti hain. Pallavi baat-cheet shuru karti hain, "Aur batao Pranav kaise ho tum ?"

Pranav - "Main thik hoon."

Pallavi - "Tumhare mummy-papa kaise hain ?"

Pranav - "Woh log bhi thik hain. Tum apna haal sunao."

Pallavi - "Main bhi thik hoon."

Pranav - "Aur tumahre Papa-Mummy ?"

Pallavi - "Woh log bhi thik hain."

Pranav - "Aur zindagi mein kya chal raha hain ?"

Pallavi - "Sab thik hain."

Pranav - "Kya abhi kahi tumhara rishta tai hua ?"

Pallavi - "Nahi. Aur tumhara ?"

Pranav - "Mera bhi nahi."

Pallavi - "Kya main tumse ek baat kahoon Pranav ?"

Pranav - "Haan kaho."

Pallavi - "Dekho maine tumhe reject kiya, iske peeche ek wajah thi."

Pranav - "Haan woh toh main jaanta hoon."

Pallavi - "Nahi tum nahi jaante ho. Main darasal Dubai jaane wali hoon. Jis din main tumhare ghar aayi thi, usi din mujhe pata chala ki mera Visa approve ho chuka hain. Ab tumhare Papa-Mummy ko toh milne ki liye pehle hi keh chuke the mere Papa. Main bas jaise-taise jaldbaazi mein tumhare ghar se nikalana chahti thi. Ab dekho, main Dubai jaakar bhi aa gayi hoon. Ab bas waha par settle hone ki tayyari karni hain mujhe."

Tabhi Pranav ka ghar aa jaata hain aur woh Scotty rokti hain. Pranav utarta hain. 

Pallavi - "Uncle Aunty ko mera namastey kehna aur agar ho sake toh mujhe maaf kar dena."

Pranav - "Nahi. Tumhari koi galti nahi hain."

Pallavi chali jaati hain aur Pranav waha khada soch mein pad jaata hain. 'Yeh toh mujhse shaadi kabhi karna hi nahi chahti thi. Lekin haan agar mujhe us din yeh jhatka nahi laga hota, toh shayad main kabhi khudko badal nahi paata. Kabhi-Kabhi uparwala hamari zindagi mein kuch logon ko hume sahi raah dikhane ke liye bhejta hain. Aise log hamari zindagi mein bas kuch pal ke liye hi aate hain aur hume ek raah dikhakar hamari zindagi se wapas chale jaate hain.'

Pranav ko ehsaas ho jaata hain, ki Pallavi ka use reject karna, kitna zaroori tha. Woh sochta hain, 'Na woh mujhe reject karti. Na mujhe jhatka lagta aur na hi main khud ko badlne ki than leta.' Pranav muskurata hain aur apne ghar ki aur chal padta hain. 

                  - Ved Vineet Gautam