Swarg

 Swarg naam ki ek society hain. Wahan par saikdon parivaar rehte hain. Wahan par rehne wale sabhi rahivasi madhyam varg parivaar se aate hain. Us society ke sabhi logon mein bohut ekta hain. Alag-Alag paarivaarik prshthabhoomi se hone ke bawjood, un logon mein bohut ekta hain. Chahe koi bhi tyohar kyun na ho, sabhi parivaar saath milkar manate hain. 

Ek baar ki baat hain. Ek shaam, society ke sabhi log apne-apne ghar se bahar nikalkar; ek jagah ikattha hue. Tabhi Rohan Rathod ne baat shuru ki. Rohan ne kaha, "Bhaiyon kai dino se hamare ghar mein kharab paani aa raha hain. Kya humare baaki parivaar ke ghar mein bhi yahi samasya hain ?"

Ajit Kumar - "Haan mere ghar mein bhi kharab paani aa raha hain. Main kal se hi jar ka paani mangwana shuru karne wala hoon." 

"Are Ajit Bhai, jar ka paani pee toh loge, lekin nahaoge kis paani se ? Kya yeh paani nahane layak hain bhi ?" Amit Singh ne kaha.

Ajit Kumar - "Yeh bhi sahi kaha aapne Singh sahab."

Pratik Kashyap - "Society ka chairman hone ke naate, yeh mera farz banta hain, ki main Water Supply Department ke saamne hamari Society ki samasya rakhun. Main kal hi wahan jaakar, ek arzi daal aata hoon."

Arun Devgan - "Haan Kashyap Sahab, ek baar aap wahan par baat kar aaiye."

Uske baad, sabhi apne-apne ghar chale gaye. Agle din, sabhi log apne-apne kaam par chale gaye. Shaam mein, laut te waqt, Pratik Water Supply Department mein ek arzi daal aaya. Kuch din beete, lekin Water Supply Department ka ek bhi karmachari nahi aaya. 

Sabhi ne socha ki sarkaari kaam hain, thoda waqt toh lagega. Isliye, sabhi ne intezaar karna hi thik samjha. Intezaar karte-karte ek mahina ho gaya, lekin Water Supply Department se na koi aadmi aaya, nahi kisi tarah ka notice ya letter society ko aaya. Kharab paani se nahane ki wajah se baccho ke shareer ke rang par fark padna shuru ho gaya tha. Us kharab paani se society ke sabhi baccho ki sehat na bigad jaaye, isliye Pratik ne Water Supply Department mein dubara jaane ka socha. 

Pratik apni naukri ka shift khatam karke tez-tez chalne laga. Taaki woh office band hone se pehle, Water Supply Department mein pahuch jaaye. Uske paas koi gaadi nahi thi. Aur kyunki, mahine ka aakhri hafta chal raha tha; is wajah se use haath bandhkar kharcha karna tha. Jis wajah se woh koi bhade ki gaadi par bhi nahi jaa sakta tha. Use bas yahi darr tha ki kahi Water Supply Department ka daftar uske pahuchne se pehle band na ho jaaye. Jaise-Taise woh Water Supply Department ke daftar par pahuch gaya. Woh thoda haanf raha tha. Pratik ne dekha ki daftar abhi bhi khula hain. Usne thodi rahat ki saans li. Phir woh enquiry counter par gaya. Wahan par ek madhyam umar ka aadmi baitha hua tha. Woh koi 35-40 ki umar ka hoga. Pratik ne us aadmi se haafte hue kaha, "Sir woh maine kuch dino pehle... Ha. Uff. Ha. Woh maine kuch dino pehle ek arzi daali thi. Ha. Uff. Ha. Uska kya hua sir ?"

Us aadmi ko Pratik ki haalat dekh kar uspar thoda sa gussa aaya. Usne kaha, "Pehle jaao aur apna muh dhokar aao."

Pratik - "Sir ab kaha par dhundta baithun. Woh sir meri arzi ka kya hua ?"

Us aadmi ne pucha, "Aapke society ka naam ?"

Pratik - "Swarg Society."

Us aadmi ne apne saamne padi hui dairy ke kuch panno ko yahan-wahan kiya. Phir usne apne computer par kuch der dekha. Uske baad, us aadmi ne kaha, "Are bhai. Abhi kuch mahino ka waqt lagega aapke society ki samasya ko thik hone mein."

Pratik - "Lekin Sir. Mere society ke bacche bimar ho rahe hain. Please, jaldi se kuch kariye."

"Are bhai bohut kaam rehta hain hum logon ko. Faltu mein mera waqt barbaad mat karo. Ab jaao. Jab aapke society ka number aayega, tab hoga kaam. Abhi aur bhi log khade hain line mein. Jaao yahan se bhai." Us karmachari ne Pratik ko jhatakte hue kaha. 

Peeche line mein khade logon ne Pratik ko dhakka dekar side mein kar diya. Woh abhi bhi thoda sa haanf raha tha aur kyunki, paani ki samasya thik nahi ho paayi, Pratik ko bohut zyada tension chadh raha tha. Khaas kar ke baccho ki sehat ke baare mein use bohut zyada tension aa raha tha. Woh kuch kadam chala aur woh wahin par hi gir gaya.  Wahan par khade logon ne Pratik ko aspataal mein bharti karaya.

Pratik ki khabar milte hi, society ke sabhi mard us aspataal pahuche. Wahan par pahuchne ke baad, un logon ko doctor se pata chala ki Pratik ko dil ka daura aaya hain. Do din baad, use hosh aaya. 

Society ke sabhi logon ne Pratik ka haal-chaal liya. Uske baad, Pratik ne kaha, "Bhaiyon main apne logon ki samsya ka hal nikaalne mein asafal raha." Yeh kehte hi woh ro pada.

Ajit Kumar - "Kya hua Pratik bhai. Kya wahan par kuch hua tha kya ?"

Pratik ne rote hue wahan ka poora vakya sunaya. Yeh sunkar sabhi log zara se cidhe hue toh the, saath-hi-saath unhe Pratik ki haalat dekh kar bhi bohut dukh ho raha tha. Lekin, un logon ne tai kiya ki woh log pehle shaanti ka maarg apnayenge. 

Agle din, society ke sabhi log ek saath Water Supply Department ke daftar pahuche. Itne saare logon ko saath aata hua dekh Department ke sabhi karmachari soch mein pad gaye. 

Daftar ke andar pahuchte hi, Ajit Kumar ek counter par gaya aur usne wahan par baithe ek karmachari se kaha, "Humne ek arzi daali thi. Lekin, woh abhi tak poori nahi hui."

Karmachari - "Kaisi arzi ?"

Ajit Kumar - "Kharab paani ki samasya hain hamare society mein."

Karmachari - "Kounsi society ?"

Ajit Kumar - "Swarg Society."

Karmachari ne mez par padi kitaab ke kuch panne palte aur usne apne computer par thodi der dekha. Uske baad, usne kaha, "Thoda sa waqt lagega."

Ajit Kumar - "Hamari arzi daalkar bhi bohut waqt guzar chuka hain. Abhi tak kuch nahi ho paya."

Karmachari - "Haan toh ?"

Ajit Kumar - "Toh kyun nahi ho paya sahab ?"

Karmachari - "Matlab ?"

Ajit Kumar - "Main aapse bohut hi saadharan sa sawaal kar raha hoon. Hamari arzi abhi tak poori kyun nahi ho paayi hain ?"

Karmachari - "Sarkaari kaam hain. Waqt lagta hain."

Ajit Kumar - "Aur kitna waqt lagega ?"

Karmachari - "Kuch kaha nahi jaa sakta hain."

Ajit Kumar - "Sir hamare society ke bacche bimar ho rahe hain."

Karmachari ne koi jawab nahi diya aur woh apne computer par kaam karne laga.

Us karmachari ki yeh harkat dekh kar, Ajit Kumar peeche ki aur muda aur woh daftar se bahar nikalne laga. Uske peeche-peeche baaki log bhi chalne lage. Daftar ki thodi si duri par jaakar Ajit ruk gaya. Uske baad,  Vikram Behl ne pucha, "Kya hua Ajit bhai ?"

Ajit - "Wahi baat. Waqt lagega. Hume is samasya ka koi na koi sateek raasta nikalna hi padega. Lekin kya kiya jaaye ? Kuch samajh mein nahi aa raha hain."

Arun Devgan - "Koi baat nahi. Filhal toh hum log society mein chalte hain, wahan par aaram se baithkar hum sab log charcha karenge."

Uske baad, sabhi log society mein pahunche. Society par pahunchte hi, un logon ne dekha ki society mein ambulance aayi hui hain. Yeh dekh kar sabhi log hairaan ho gaye. Tabhi Ajit ne wahin par khadi apni biwi se pucha, "Kya hua Sujata ? Yeh ambulance kyun bulayi gayi hain ?"

Sujata ne rote hue kaha, "Woh Pankaj bimar ho chuka hain jee. Use bohut ultiyaan hui hain aur uska bukhar bhi nahi utar raha hain." Woh log turant ambulance ke andar chale gaye. Unhone dekha ki Pankaj bohut bimaar hain. Aur woh behosh avastha mein pada hua hain. Ajit ne uska maatha chua. Pankaj ka maatha, jwar se tap raha tha aur uske haathon ki ungliyaan bhi kaanp rahi thi. Ajit ambulance se bahar nikla aur uske aankhon se aansun chalak pade. Arun Ajit ke pass aaya aur kaha, "Ab hume har haal mein is samasya ka hal nikaalna hi hoga aur woh bhi jald se jald." Ajit ne 'Haan' mein apna sar hilaya. Phir usne kaha, "Sabse pehle hume us aadmi ke pass jaana hoga, jo ki is system ka pehla shikaar bana tha."

"Kya Pratik Bhai ?" Arun ne hairaani se pucha.

Ajit - "Haan."

Arun - "Lekin unse kya poochoge aap Ajit Bhai ?"

Ajit - "Sab kuch."

Sabhi Ajit ki aur ek ummed bhari nazron se dekhne lage. Uske baad, Ajit ne kaha, "Hum ek baar, Pratik Bhai se unke saath ghatit poora vakya dubaara sunenge. Uske baad, hum sab log aapas mein charcha karke tai karenge ki hume aage karna kya hain."

Sabhi log Ajit ki baat se sehmat hue. 

Agle din, sabhi log aspataal pahunche Pratik se milne ke liye. Aspataal pahuchte hi, unhe pata chala ki Pratik ko do din baad, discharge milne wala hain. Isliye unhone tai kiya, ki woh log uske ghar aane ke baad hi usse poora vakya pochenge. 

Yeh do din ka intezaar bohut mushkilon se guzra. Aakhir kaar, jaise-taise yeh 48 ghante kat gaye. Pratik apne ghar pahuncha. Pratik se milne ke liye society ke sabhi log aaye. Aur khaas kar bacche toh Pratik ko itne dino ke baad dekhkar uske gale lag rahe the. Pratik ko bohut hi accha mehsus ho raha tha. Woh bohut hi khush tha. Baccho ki maasoom bhari muskaan dekh kar, use apne shareer mein bohut furti bhi mehsus ho rahi thi. 

Thodi der baad, woh thoda sa soch mein pad gaya. Use gehri soch mein baitha dekh, Arun ne Pratik se pucha, "Kya hua Pratik bhai ? Bohut gehri soch mein ho ?"

Pratik - "Pankaj dikhayi nahi de raha hain ?"

Arun - "Pankaj bimar hain."

 "Kaise ?" Pratik ne hairaani se pucha.

Arun ne Pratik ko poora vakya bataya. Yeh sab sunne ke baad, Pratik ne gehri saans li. Phir usne kaha, "Jitna jaldi ho sake, hume is samasya samadhan nikaalna hi hoga."

Ajit - "Lekin kaise ?"

Pratik - "Wahi toh sochna hain."

Rohan - "Lekin samadhan bohut hi sateek hona chahiye."

Sabhi log soch mein pad gaye. Kaafi der tak, sabhi khamoshi se sochte rahe. Poore society mein khamoshi chayi hui thi. Tabhi us khamoshi ko cheerte hue, Pratik ne kaha, "Saikadon lakdiyon ko ek vaar mein todna mushkil hota hain. Ekata mein atoot shakti hoti hain. Abhi tak hum Water Supply Department ke daftar mein kai baar gaye, lekin, hume koi kamyaabi haasil nahi hui. Humne apni shikayat hamesha bohut shaanti se karne ki koshish ki hain. Aage bhi hume shaanti ka hi raasta apnana hain. Lekin ab hum Water Supply Department ke karmchariyon se nahi balki, uske head se shikayat karenge aur woh bhi poori shaanti se. Raat bhar sabhi logon ne apni-apni shikayatein likhkar ek-ek lifafe mein band kar di.

Agle din, sabhi logon ne ek saath Water Supply Department ke daftar mein dastak di. Aur bina kisi bhi karmachari se kisi bhi tarah ki baat kiye, woh log seedha Department Chief ke cabin ke bahar khade peon se kaha ki unhe shikayat darj karani hain aur sabhi ne apne-apne lifafe us peon ko pakda diye. Aur Pratik ne kaha, "Hume Department Chief se shikayat karni hain."

"Kya aap sab log saath mein hi ho ?" Peon ne yeh sawaal badi hairaani se kiya.

Ajit - "Haan."

Peon ne saare lifafe liye aur andar Department Chief ke cabin mein chala gaya. Woh bhi apne computer par kaam kar raha tha. Peon ne usse bina kuch kahe, saare lifafe uske table par rakh diye. 

Department Chief - "Yeh kaisi badtameezi hain Manohar ?"

Manohar ( Peon ) - "Aandhi aayi hui hain Sir."

Department Chief - "Matlab ?"

Manohar ( Peon ) - "Ek hi society ke kai log shikayat lekar aaye hue hain. Aur filhal woh sab log ek saath bahar hi khade hain ?"

Yeh sunte hi Department Chief turant apni kursi se utha aur bahar nikal gaya. Itne saare logon ko ek saath dekhkar uske paseene chut gaye. Usne un logon se baat ki aur unhone apni samasya batayi. Uske baad, Department Chief ne peon se kaha, "Turant hamare do teen executives ko bulao."

Peon daudte hue gaya aur kuch der ke baad, chaar executives aaye. Department Chief ne un chaaron se kaha, "Abhi isi waqt, aap charon inki society mein jaayenge aur inki samasya ka hal turant isi waqt karenge." 

Aakhir mein Swarg Society ki paani ki samasya thik ho hi gayi. 

             -  Ved Vineet Gautam