Raj ek company mein naukri karta hain. Woh online sales and marketing executive ki post par hain. Kuch mahino pehle hi usne apni degree haasil ki thi. Uski mahine ki salary 16,000 Rupaye hain. Haalanki Raj ne apni padhayi America se poori ki thi, lekin uske pass kisi naukri ka anubhav nahi hain, aur naa hi woh America mein rehkar naukri kar sakta hain, kyunki Raj ko zyada percentage nahi aaye the; is wajah se use wahan par koi bhi naukri nahi mili. Wahan ki padhayi kaafi mushkil bhi toh hoti hain. India mein uske pita ki bhi naukri hain aur woh kuch mahino mein retire bhi ho jaayenge. Raj ke pita ka naam Pratik hain.
Kyunki Pratik bhi ek private company mein naukri karte hain, is wajah se unhone Raj ko ucch shiksha dilane ke liye; bank se bohut moti rakam ka loan liya hua tha, jise woh aaj tak chuka nahi paaye hain. Jaise hi bank ko is baat ka pata chala ki Raj ki naukri lag gayi hain, unhone pehle mahine se hi, uski pagaar se paise kaatne shuru kar diye the. Aaj Raj ko naukri par lag kar 6 mahine ho chuke hain aur aane wale kareeban do saal tak uski pagaar se har mahine paise kat te rahenge.
Har mahine uski pagaar jab bhi aati, woh thoda sa dukhi ho jaata tha. Kyunki, har mahina Raj ki pagaar se kareeban 25 pratishat bank apna hissa kaat leti thi.
Ek din, Raj apne office se ghar par jaa raha tha. Har roz ki tarah, us din bhi woh apne ghar ki aur paidal jaa raha tha. Raaste bhar woh bohut kuch sochte hue jaa raha tha. Raj soch raha tha, 'Yaar aakhir yeh loan kaise khatam hoga ?' 'Yeh loan toh bohut lambe samay tak bharna hoga.' 'Agar mere pass koi bike hoti, toh kitna accha hota.' 'Woh bike bhi loan par aati aur har mahina uska bhi installment bharna padta, tab toh haath mein kuch bhi nahi aata.' 'Nahi Nahi. Accha hua jo ki bike loan par nahi liya maine. Aadhe paise toh bas education loan ka installment bharne mein chale jaa rahe hain.' 'Lekin, aakhir aisa kab tak chalega ?' 'Bhagwaan na kare, agar kal ko ghar mein kisi ne koi badi bimaari pakad li; toh kya hoga ?' 'Aakhir ilaaj kaise hoga ?' 'Kaha se aayenge itne saare paise ?' 'Koi na koi raasta toh nikaalna hi hoga.' Yeh sab sochte hue woh apne ghar par pahuncha.
Apne parivaar ke saath, khaana khaane ke baad woh apne kamre mein gaya aur apne mobile par online kaam ki jaankari dhundhne mein lag gaya. Kareeban ek ghanta beeta, lekin Raj ko koi khaas jaankari nahi mili. Phir woh so gaya.
Agle din, woh dubara apni naukri ke liye nikal pada. Din bhar wahan par kaam karne ke baad, woh shaam mein apne ghar ki aur chal diya. Thodi der baad, woh apne ghar par pahucha. Raj ko dekhte hi, Pratik ne us se kaha, "Beta haath muh dhokar paani pee lo aur uske baad, mere pass aa jaana. Mujhe tumse kuch baatein karni hain."
Raj - "OK Papa."
Raj andar gaya aur kareeban 15 minute ke baad, woh hall mein aaya. Woh Pratik ke pass gaya aur kaha, "Papa aapne bulaya tha."
Pratik - "Haan beta. Baitho. Mujhe tumse kuch baat karni hain."
"Kya baat karni thi Papa ?" Raj ne baithte hue pucha.
Pratik - "Beta woh main yeh kehna chahta hoon ki, ab toh tum naukri par lag hi gaye ho. Aur kabhi na kabhi toh tumahara apna parivaar hoga."
Raj - "Matlab main samjha nahi Papa."
Pratik - "Tumhara shaadi ke baare mein kya khayal hain beta ?"
Raj - "Abhi toh kuch socha nahi hain Papa."
Pratik - "Lekin beta, kabhi na kabhi toh tumhe shaadi karni hi hogi na ? Yahi sahi umar bhi hain beta."
Raj - "Lekin Papa meri kamayi kya hain ? Main aakhir kis basis par shaadi kar loon ? Kya main us ladki ki har zaroorat poori kar paaunga ?"
Pratik - "Toh kab karoge beta ?"
Raj - "Papa abhi toh kuch socha nahi hain maine. Thodi kamayi badhe toh uske baad dekha jaayega."
Pratik - "Dekho beta, har cheez ka ek waqt hota hain aur agar woh kaam waqt par na ho paaye toh bohut mushkil hoti hain. Chaho toh tum ladki se milne ke baad, shaadi se inkaar kar dena. Lekin, ek baar ladki se mil toh lo."
Raj - "Kya aapne koi ladki dekhi hain ?"
"Nahi. Tumhare mama ne dekhi hain. Unke dost ki beti hain. Ladki ka photo bhi whatsapp par aaya hua hain. Ek baar dekh lo. Agar pasand aaye toh, hum ladki se mil sakte hain." Yeh kehte hue, Pratik ne apna mobile khola aur Raj ko pakda diya.
Raj ne mobile apne haath mein liya aur ladki ki photo dekhi. Ladki dikhne mein sundar aur sushil lag rahi thi. Tabhi Pratik ne kaha, "Pasand aayi beta ?"
Raj - "Haan thik hain."
Pratik - "Toh kya hum jaa sakte hain ladki se milne ke liye ?"
Raj - "Lekin Papa, shaadi thodi jaldi nahi ho rahi hain ?"
Pratik - "Umar toh yahi sahi hain beta."
Raj - "Shaadi mein kharcha bhi toh bohut hoga Papa. Education Loan ka installment khatam hone mein bhi toh bohut time hain."
Pratik - "Sab kuch dheere-dheere ho jaayega. Tum koi tension mat lo. Yeh sab toh saari zindagi laga rahega."
Raj - "OK Papa."
Pratik - "Toh kya hum ladki se milne ke liye jaa sakte hain ?"
Raj - "Haan Papa."
Pratik - "Tum apne office mein chutti ke liye baat kar lo. Phir main un logon se baat kar leta hoon."
Raj - "Thik hain Papa."
Kuch dino ke baad, woh log ladki dekhne ke liye chale gaye. Dono parivaar ke beech baat-cheet hui aur rishta tai ho gaya. Shaadi ki tareekh do mahine baad ki nikli. Dekhte hi dekhte, shaadi ka din aa gaya aur Raj ki shaadi ho gayi.
Ab Raj aur bhi zyada zimmedari ke saath rehne lag gaya tha. Ladki ka naam Priya tha. Priya swabhav ki bohut acchi thi.
Ek din, office se ghar aate waqt woh soch raha tha, 'Ab toh shaadi bhi ho gayi hain. Kal ko bacche honge. Unka kharcha bhi hoga. Itni si salary mein kya-kya hoga ? Aage kaise chal paayega ? Ab toh main raasta nikalunga hi.'
Raj ko naukri bhi karni thi. Apne online kamayi ke liye kaam bhi dhundhna tha. Aur saath hi saath apne maa-baap aur biwi ko bhi waqt dena tha.
Raj ne kuch freelancing websites par apna account banaya. Use writing ka bohut shauk tha. Isliye usne sabhi freelancing websites par writer ke kaam ke liye apply karna shuru kar diya.
Ek din, jab woh shaam mein apne ghar par aaya, tab Pratik ne Raj se kaha, "Beta tum fresh hokar aao, mujhe tumse kuch baat-cheet karni hain."
"OK Papa." Yeh kehkar Raj andar chala gaya aur thodi der ke baad, woh wapas aaya aur Pratik ke saamne baitha. Raj ko dekhte hi usne kaha, "Beta kya kal tumhari chutti hain ?"
Raj - "Haan Papa."
Pratik - "Toh kal ka tumhara kya plan hain ?"
Raj - "Kuch khaas nahi."
Pratik - "Toh beta kal tum bahurani ko kahi ghumane ke liye le jaao."
Raj - "OK Papa. Jaisa aap kahe."
"Do minute ruko." Yeh kehkar Pratik andar gaya aur thodi der ke baad, woh wapas aaya aur Raj ko kuch paise dete hue kaha, "Yeh lo." Raj ne woh paise liye aur unhe ginna shuru kar diya.
"Yeh toh 6,000 Rupaye hain." Raj ne kaha.
Pratik - "Haan beta. Bahu ke saath tum pehli baar bahar jaa rahe ho, kharcha karne mein zara bhi kanjusi nahi karna."
Raj - "OK Papa."
Agle din, Raj aur Priya bahar ghumne ke liye gaye. Pehle woh dono saath mein ek movie dekhe. Uske baad, woh dono ek thele par baithe. Raj ne Priya se pucha, "Kya logi tum ?"
Priya - "Main paani puri lungi."
Raj ne dono ke liye paani puri order kiya aur Priya ke bagal mein aakar baith gaya.
Raj - "Toh kaisa laga hamara shahar tumhe ?"
Priya - "Bohut hi khubsurat hain."
Raj - "Tumhari pasand na-pasand ke baare mein batao thoda."
Priya - "Mujhe street foods bohut pasand hain."
Raj - "Aur na-pasand ?"
Priya chup thi.
Raj - "Khul ke baat karo Priya. Ab hum jeevan-saathi hain."
Priya ke aankhon mein aansun aa gaye.
Yeh dekhte hi Raj ne uske aansun ponche aur kaha, "Tum ro kyun rahi ho ? Kya koi galti hui hain mujhse ?"
Priya ne 'Na' mein sar hilaya.
Raj - "Toh kya apne ghar ki yaad aa rahi hain ?"
Priya ne dubara 'Na' mein sar hilaya.
Raj - "Phir kya problem hain ?"
Priya - "Itne dino ke baad, aaj aap khul kar baat kar rahe ho. Accha lag raha hain."
Raj - "Haan bas thoda sa tension hain na ?"
Priya - "Kya koi aur ladki pasand thi kya ?"
Raj - "Are nahi nahi. Aisi baat nahi hain. Bas thoda sa kaam ka tension hain."
Priya - "Agar aap mujhe batane mein comfortable ho toh bata dijiye."
Raj ne Priya se apne kaam ke baare mein khul kar baat-cheet ki. Woh Raj ki baatein bohut dhyaan se sun rahi thi. Poori baat samjhne ke baad, Priya ne kaha, "Agar aap chahe, toh main online kaam dhundha shuru kar dungi aur koi bhi lead milti hain toh aapko bata diya karungi."
Raj - "Kya tum meri yeh help karne ke liye tayyar ho ?"
Priya - "Isme help kaisa hain Raj. Hum dono jeevan-saathi hain. Ek dusre ka saath nibhana toh hamara farz hain."
Raj ne kuch der socha aur phir kaha, "Thik hain." Raj ne Priya ko pura kaam samjhaya aur bataya kaam kaise dhundhna hain.
Agle din se Raj subah kaam par jaata aur Priya ghar ka kaam karke dopahar mein khaali hoti aur us samay woh Raj ke online writing ke kaam se jude jaankari ikattha karti thi. Priya ko jo bhi jaankari milti, woh use apne mobile ke notepad mein likh deti. Jab woh shaam mein ghar aata toh, uske fresh hone ke baad, Priya Raj ko woh saari jaankariyan de deti.
Kuch mahino ke baad se Raj ko online writing ke kaam ke offers aana shuru ho gaye. Woh jald se jald un sab kaam ko khatam karta aur do teen din baad, Raj ko payment bhi mil jaati thi. Shuruwat mein kamayi kam thi, lekin, dheere-dheere kamayi badhti gayi.
Yeh baat jab Pratik aur unki patni ko pata chali toh woh dono bohut khush hue. Woh dono na keval Raj ko, balki, Priya ko bhi bohut sahra rahe the.
Raj jald se jald karz-mukt hona chahta tha. Dekhte Hi Dekhte do saal mein hi, Raj ka education loan khatam ho gaya. Raj aur Priya ko ek ladka hua. Ab Raj ko apne bete ke bhavishya ke liye aur zyada kamayi karne ki zaroorat thi. Kuch mahino mein hi, Raj ne ek kitaab likhi aur Priya uski kitaab ke baare mein, online publishers se baat karne ki koshish karti. Kareeban aanth mahine ke baad, ek publication house Raj se milne ka ichhuk hua. Unhone Raj ko milne ke liye bulaya. Woh us publication house mein gaya aur meeting shuru hui. Publication House ke maalik ka naam tha, Madan Kumar.
Madan Kumar - "Toh Mr. Raj. Aap likhne ke alaava aur kya kaam karte hain ?"
Raj - "Sir main ek company mein online sales and marketing executive ki post par hoon."
Madan Kumar - "Yeh likhne ka shauk kaha se aaya aapko ?"
Raj - "Mujhe bachpan se hi likhne ka shauk tha. Lekin, kai kaarno ke wajah se, main is kaam ko pura nahi kar paa raha tha. Ab jaakar kaam pura kar paaya hoon."
Madan Kumar - "Aapki ummeed kya hain ?"
Raj - "Matlab main samjha nahi Sir."
Madan Kumar - "Matlab aap kitna paisa charge karoge hume ?"
Raj - "Sir meri ummeed dus se pandrah laakh ke beech ki hain."
Madan Kumar - "Hum aapko aanth laakh se zyada nahi de paayenge."
Raj ne kuch der socha. Uske baad, usne kaha, "Thik hain Sir. Main aanth lakh mein bhi tayyar hoon."
Madan Kumar - "OK."
Unhone check bharke sign kiya aur Raj ko pakda diya. Raj wahan se bohut khushi se nikla aur ghar jaakar sabko yeh bataya. Raj ki tarakki se ghar mein sabhi behad khush the.
"Bohut zyada waqt lag gaya. Lekin, khair aakhir mein kuch toh mila."
Pratik - "Beta. Bhagwaan ke yahan der hain, andher nahi. Aise hi sabr ke saath kaam karte raho, zindagi mein bohut tarakki karoge tum."
Comments
Post a Comment