Lakshya

 Ankit ek company mein naukri karta hain. Woh apne parivaar se dur, ek anjaan shehar mein rehkar naukri karta hain. Uske parivaar mein uske maata-pita ke alaava aur koi nahi hain. Uske maata-pita Uttar Pradesh ke ek chote se gaon mein rehte hain aur woh Mumbai mein rehta hain. 

Ankit har mahine apne maata-pita ko kuch paise bhejta rehta hain. Woh ek paying guest room mein kuch ladko ke saath room share karke rehta hain. Woh bohut mehnat se kaam karta hain. Har mahine ki aakhri tareekh ko salary aate hi, woh kuch paise apne gaon bhej deta hain. 

Ankit apne mobile par, aksar mehnge aur bade ghar ki photos dekhta rehta hain aur beech-beech mein, apne phone ke wallpapers badalte rehta hain. Uske phone ke wallpaper par alag-alag bungalow ki tasveer hoti hain. Yeh baat uske ek room-mate ne notice ki. Uska naam tha, Akshay. 

Ek din, jab apni naukri se chutkar Ankit wapas apne flat par aaya, tab usne haath-muh dhoya aur apne kapde badalkar woh kitchen mein apne baaki room-mates ke saath; khaana banana shuru kar diya. Sabhi ne milkar khaana aur khaana tayyar hone ke baad, woh sab log saath mein baith gaye khaana khaane ke liye. 

Khaana khaate-khaate woh log desh duniya ki baatein kar rahe the. Baatein karte-karte woh log ab ek dusre se apne-apne parivaar ke baare mein baatein karna shuru kar diye. 

Tabhi Akshay ne kaha, "Ankit."

Ankit - "Haan Akshay ?"

Akshay - "Ek baat punchu ?"

"Haan puncho." Ankit ne jawab diya. 

Akshay - "Bura toh nahi maanoge ?"

Ankit - "Bilkul bhi nahi."

Akshay - "Tum aksar apne phone par alag-alag bungalows ki tasveer kyun rakhte ho ?"

Ankit - "Darasal mera ek sapna hain ki, mere pass ek bada sa bangla ho aur do chaar cars ho. Ghar mein kuch naukar-chaakar ho. Jaisa ki zyadatar har ek aadmi ka sapna hota hain."

Akshay - "Tumhara jeevan mein lakshay kya hain ?"

Ankit - "Mera lakshay hain ki, main ek businessman banu. Main is kaabil banu ki main jo chahe, woh apne jeevan mein haasil kar sakun."

Akshay - "Aur kya us lakshay ko prapt karne ka koi maarg nishchit kiya hain tumne ?"

Ankit - "Filhal toh main bhatka hua hoon. Maarg dhundh raha hoon, dekhte hain kab tak manzil milti hain. Waise tumhara kya lakshya hain jeevan mein Akshay ?"

Akshay - "Main bhi khud ka ek business shuru karna chahta hoon. Mujhe bhi filhal apni manzil ki talaash hain."

Ankit - "Hum log nirantar prayaas karte rahenge toh, ek na ek din lakshya prapt ho hi jaayega."

Akshay - "Ummed toh yahi hain."

Uske baad, sab log apna-apna gadda laga kar sone ki tayyari karne lagte hain. Raat ke gyarah baj rahe hain aur Ankit ko abhi tak neend nahi lag paa rahi hain. Woh kuch sochne lag jaata hain. Ankit sochta hain, 'Mera bangla pure neele rang ka hoga bahar se aur andar se alag-alag kamre ke liye, alag-alag rang lagwaunga. Bangle mein dher saare naukar-chakar honge. Imported cars hongi, ek nahi balki kai. Sabhi cars ke liye khaas drivers honge. Sabhi drivers ke liye ek khaas kism ka uniform hoga. Ghar mein baawarchi se lekar maali tak har tarah ke naukar honge. 

Sapna dekhte-dekhte, Ankit ki aankh lag jaati hain aur woh gehri neend mein so jaata hain. 

Agle din, subah Ankit ki neend khulti hain aur woh tayyar hokar apne office ke liye nikal padta hain. Din bhar kaam karne ke baad, woh shaam mein apne ghar ke liye nikal padta hain. Kyunki, uska ghar office ke nazdeek hi hota hain; toh woh paidal hi apne ghar ke liye jaane lagta hain. 

Thodi der baad, mausam badal jaata hain. Baadal aasmaan ko dhakte hue, aage badh rahe the aur zameen par dhoop ke saamrajye ko khatam kar rahe the. 'Aaj mausam suhana hain.' Woh sochta hain. Tabhi barsaat shuru ho jaati hain. Barsaat shuru hote hi, sadak par chal rahe sabhi log yahan-wahan daud rahe the aur kisi na kisi dukaan ke tadpatri ke neeche aasra le rahe the. 'Kudrat ke saamne hum log kuch bhi nahi.' Ankit ne socha. 

Woh apne ghar ki aur paidal hi jaa raha tha aur raaste mein dher saari mehngi aur badi cars kabhi daayi aur se, toh kabhi baayi aur se; uske saamne se guzar rahi thi. Ankit ne socha, 'Kya mehngi Cars hain. Is car ka maalik mahine ka laakhon toh kamaata hi hoga. Kya pata, karodon mein bhi khelta ho woh.' Ankit chalte-chalte soche hi jaa raha tha, 'Aakhir kitni mehnat karte honge yeh log. Din mein shayad 18-19 ghante kaam karte hi honge yeh log. Tabhi toh jaakar itna kuch haasil kiya hain in logon ne.' Sochte-Sochte woh kab apne ghar ke nazdeek pahunch jaata hain, use pata hi nahi chalta hain. 

Ghar par pahunch kar woh apne haath-pair dhota hain aur kapde badalkar khaana banana shuru kar deta hain. Ankit hamesha ki tarah aaj bhi apne baaki room-mates ke saath baithkar baatein karte hue khaana khata hain aur uske baad, woh apna gadda laga kar let jaata hain. 

Lete-Lete Ankit sochta hain, 'Main aakhir aisa kya kaam karun, ki main apne jeevan mein bohut aage badhun ? Aakhir kaise main apne sapno ko pura kar sakta hoon ? Aakhir kaise main ek kaamyab aadmi bankar dikhaun ? Main aakhir aisa kya kaam kar sakta hoon ? Aakhir aisa kounsa kaam hain, jo main bohut acche se kar sakta hoon ?' Tabhi Ankit ke mann se ek awaaz aati hain, 'Agar main koi online store shuru karun toh kaisa rahega ?' 'Accha hi hoga. Lekin uske liye toh mujhe bohut saare paison ki zaroorat hogi na ? Kisi bade investment ki zaroorat hogi. Kaha se aayega itna saara paisa ? Dekhte hain, koi na koi raasta zaroor nikalega.' Phir woh so jaata hain. 

Kuch dino baad ki baat hain. Ek din, Ankit ke office mein ek guest aate hain uske boss unka introduction karate hain, "Toh doston yeh hain Mr. Ajit Khandelwal. Inka shipping ka business hain. Aur hamari company jald hi inke saath tie-up karne wali hain." Sabhi taaliyan bajate hain. 

Kuch dino ke procedure ke baad, dono companies ka tie-up ho jaata hain. Ankit ke office mein aksar Mr. Ajit Khandelwal ka aana-jaana laga hi rehta hain. Ankit ko dheere-dheere unke baare mein bohut kuch jaan ne mila. Woh din bhar mein apna kitna saara waqt keval kaam karne mein hi laga dete hain. Kai baar, woh meetings ke liye dusre shahar bhi jaate hain aur kai dino ke baad, woh apne ghar laut te hain. Bina aaram kiye woh agle din se hi office dubara aana shuru kar dete hain. 

Ankit Mr. Ajit Khandelwal se bohut prabhavit tha. Ankit unki tarah ban na chahta tha. Dheere-Dheere, Ankit ki baaton mein aur chaal-chalan mein badlaav aane laga. Ankit ke baat-cheet karne ka tareeke mein bohut badlaav aa raha tha. Dheere-Dheere use yeh ehsaas hone laga, ki insaan ke shabd kitne maayne rakhte hain. Ankit ko waqt ki keemat bhi samajh mein aane lagi. Ab woh bas yeh sochne laga ki aakhir woh kaise apne waqt ka sahi istemaal kare. 

Ab shaam mein ghar lautne ke baad, woh khaana banate samay koi na koi motivational speech sunta aur jab woh apne bistar par sone ke liye jaata; tab woh online business ke baare mein jaankaariyan ikattha karte rehta. Ab aisa har roz chalta.

 

Ankit ne apne dincharya mein bohut saare badlaav karna shuru kar diya tha. Woh baatein kam karta aur saamne wale ki baat zyada se zyada sunta. Kaamyab log aakhir kya baat kar rahe hain aur kis tarah se baat kar rahe hain, woh sab samjhne ki koshish karta. Waqt ke saath-saath Ankit ki soch badalti gayi aur uske kaam karne ke tareeke mein bhi bohut badlaav aaye. 

Ek din, Ankit ko uske senior ne meeting room mein bulaya. Woh meeting room mein gaya. Meeting Room mein, office ke kai bade adhikari baithe hue the. Itne sab bade log aur apne saare seniors ko ek saath dekh kar, Ankit thoda sa ghabra gaya tha. Tabhi uske ek senior ne kaha, "Saamne wali is kursi par baitho Ankit." Woh badi hi ghabrahat ke saath us kursi ki aur badha aur uspar baitha. Kursi par baith te hi, uske pair kaanpne lag gaye the. 

"Aakhir tum itne ghabraye hue kyun ho ?" Ankit ke ek senior ne us se pucha.

Ankit - "Nahi Sir. Woh main. Pata nahi." Aur woh chup hokar apna sar neeche jhuka diya. 

Tabhi Ankit ke dusre senior ne apni baat kehna shuru kiya, "Ankit office mein sabhi log tumhari mehnat aur lagan se bohut khush hain. Tumne sach mein apne aap ko puri tarah se kaam mein jhonk diya hain."

Ankit - "Thank You Sir."

Ankit ke senior ne apni baat aage badhayi, "Isliye humne tai kiya hain, ki tumhe ab finance team mein daala jaaye aur tumhari salary bhi dugni hogi. Saath hi saath, tumhe company ki taraf se ek flat bhi milega."

Yeh sab sunkar Ankit bohut khush hua. Woh kehna chah raha tha, lekin kuch keh nahi paa raha tha. Lekin, uski aankhein uski khushi bayaan kar rahi thi. 

"Kya ab tum khush ho ?" Ankit ke senior ne pucha.

"Bohut sir." Ankit ne nam aankhon se jawab diya. 

"Tumhara parivaar shayad, kahi dusre shahar mein rehta hain na ?" Ankit ke ek senior ne pucha.

Ankit - "Haan Sir."

Ankit Ke Senior - "Thik hain. Ab tum unhe yahan le aao aur apne naye flat mein unke saath raho." 

Yeh sab sunkar, Ankit ki khushi ka thikana nahi tha. Use yeh sab kuch bas ek sapne jaisa lag raha tha. Lekin, ab khwab haqeeqat mein badalne ke liye, tayyar ho rahe the. Use ek naye flat ki chabi mil gayi aur kuch dino ki chutti bhi mil gayi. 

Woh agle din hi apne naye flat mein shift hua aur do din baad, gaon jaakar apne maata-pita ko apne saath Mumbai le aaya. Ankit ko yeh nayi zindagi bohut pasand aa rahi thi. Office mein uski post badhi aur pagaar bhi. Aur uske saath hi kaam ka bojh bhi badhta gaya. Aisa kareeban ek saal tak chalta raha.

 Ek din chutti ka din tha. Woh balcony mein baitha hua tha. Ankit ke pita uske pass aaye aur kaha, "Beta tum badi tarakki kar liye ho. Hum dono ko tumpar bohut garv hain."

"Thank You Papa." Ankit ne muskura kar kaha. 

Ankit Ke Pita - "Ab tum bas shaadi kar lo. Ek rishta aaya tha tumhare liye beta."

Ankit - "Kaha se Papa ?"

Ankit Ke Pita - "Woh Rajdeep Uncle nahi the jo tumhare school ke pass rehte the, unhi ki ladki hain."

Ankit - "Kya woh log abhi bhi gaon mein hi rehte hain ?"

Ankit Ke Pita - "Haan beta."

Ankit - "Iam sorry Papa. Lekin, main gaon ki ladki se shaadi nahi kar sakta hoon."

Ankit Ke Pita - "Beta woh log bade zamindar hain. Tumhari jitni saal bhar ki pagaar hain, utna toh woh bas kuch dino mein hi kharcha kar dete hain."

Yeh baat Ankit ko chubh gayi. Is se pehle woh kuch kehta, Ankit ko yaad aaya ki kareeban ek saal pehle usne ek business shuru karne ka sapna dekha tha. 'Jis kaam ko maine shuru kiya tha, maine use kabhi pura hi nahi kiya.' Ab woh gheri soch mein pad chuka tha. 'Main aakhir itna gair zimmedar kaise ho sakta hoon. Aakhir meri aukaat hi kya hain ? Aakhir main hoon toh bas ek naukar hi. Us ladki ke pita ke saamne meri haisiyat hi kya hain ? Naukri ki is chakaachaundh mein, main kahi kho gaya tha. Main chahta toh kya kuch nahi kar sakta tha. Main na jaane aaj kis mukaam par hota. Ab karunga main mehnat aur apna har ek sapna pura kar dikhaunga.'

Ankit turant balcony se utha aur apne kamre mein gaya, usne apna laptop nikaala aur online kaam dhundhna shuru kar diya. 

Naukri se jab bhi use khaali waqt milta, woh apne business ko shuru karne ke jaddo-jehad mein lag jaata. Ab woh poore samarpan ke saath kaam mein lag gaya tha. Usne apni koshishon ko aur dhaar di aur apne online store shuru karne ka idea kai investors ke pass le gaya. Din bhar woh naukri karta aur shaam mein do teen ghante niveshakon se meeting karke apne business ko shuru karne ki koshish karta. 

Kareeban teen saal ki kadi lagan ke baad, use ek bada niveshak mila aur uske nivesh se Ankit ka business jaise-taise shuru hua. Usne apni naukri se resign kar, apne business par ab pura dhyaan dena shuru kar diya hain. Lekin, manzil abhi bohut dur hain. Aur ek na ek din woh use paayega zaroor. 

             - Ved Vineet Gautam