Saubhagya

 Sameer apne maata-pita ka eklauta ladka hain. Woh ek company mein naukri karta hain. Ek din, Sameer ek cinema hall mein movie dekhne ke liye gaya hua tha. Movie khatam hui aur woh cinema hall ke bahar nikla. Tabhi uska phone baja. Sameer ne dekha ki uske pita ka call aaya hua tha. Usne call uthaya aur kaha, "Hello."

Phone ke dusre aur se uske pita ne kaha, "Hello Sameer. Kya tum free ho abhi ?"

Sameer - "Haan Papa. Kya baat hain ?"

Sameer ke pita ka naam Mahesh hain. 

Mahesh - "Beta woh agar koi medical khuli ho, toh tum blood pressure ki dawa lete aana."

Sameer - "Ab kaha milegi yeh dawa ? Itne raat mein kaha khula hoga medical ?"

Mahesh - "Raaste mein dekhte hue aao. Agar mile toh thik, nahi toh kal kharid lenge."

Sameer - "OK Papa."

Uske baad, woh call kaat deta hain. 

Tabhi Sameer ke kandhe par peeche se koi haath rakh deta hain. Woh peeche mudkar dekhta hain, ki koi anjaan ladki khadi hain. 

Sameer - "Excuse Me Mam."

Woh ladki kehti hain, "Sorry but maine aapki baatein sun li thi. Kya aap ko kisi medical mein jaana hain ?"

Sameer - "Haan thoda sa urgent hain."

"Itne raat mein yahan koi medical nahi milega. Aapko Raja Marg par jaana padega." Woh ladki kehti hain.

Sameer - "Wahan kaise jaana hain ?"

Ladki - "Kya aapke pass bike hain ?"

Sameer - "Haan hain."

Ladki - "Thik hain. Aap mere scotty ke peeche-peeche aaiye."

Sameer - "Thik hain."

Dono saath mein parking mein jaate hain aur dono apni-apni gaadi nikalte hain. Sameer us ladki ki scotty ke peeche-peeche apni bike chalate hue jaata hain. Do-Teen mod par gaadi turn karte hue aakhir kaar 20 minutes ke baad, woh log ek medical par pohuch jaate hain. Sameer waha se dawaiyaan kharid leta hain aur us ladki ke pass jaakar kehta hain, "Thank You so much mam. Mujhe vakaai mein is dawaai ki sakt zaroorat thi."

"Kya aap is shehar mein naye ho ?" Ladki poochti hain.

Sameer - "Haan Mam."

"OK. Mujhe bhi late ho raha hain. Main bhi ab chalti hoon." Ladki kehti hain.

Sameer - "Thank You once again Mam."

Ladki - "You are welcome."

Uske baad, woh ladki waha se chali jaati hain aur Sameer bhi apne ghar ke liye nikal jaata hain. 

Kuch dino ke baad, Sameer apni shift khatam karke wapas aa raha hota hain. Tabhi signal lag jaata hain. Woh signal ke khulne ka intezaar kar raha hota hain, aur yahan-wahan dekh raha hota hain. Tabhi woh dekhta hain ki wahi ladki sadak kinare khadi hui hain. Aur signal khul jaata hain. Woh us ladki ko aawaz lagana chahta tha. Lekin, use uska naam bhi toh nahi pata tha. Gaadiyon ki horn ka shor bhi shuru ho chuka tha. Sameer ne jaise-taise karke apni bike uske saamne le gaya aur bike ko rok diya. Use dekhte hi, woh ladki aaschrya se kahi, "Hi."

Sameer - "Hi Mam."

Ladki - "Aap yahan ?"

Sameer - "Haan. Mera toh yeh daily travel ka route hain."

Ladki - "OK."

Sameer - "Aap yahan kya kar rahi ho ?"

Ladki - "Main bhi abhi apne office se nikli hoon. Sorry but, aapne apna naam kya bataya ?"

Sameer - "Mera naam Sameer hain. Aur aapka ?"

"Mera naam Raashi hain." Ladki kehti hain.

Sameer - "Toh Raashi Ji, aap yahan kaha par kaam karti ho ?"

Raashi ishara karte hue kehti hain, "Woh kaali kaanch wali building aapko dikh rahi hain ?"

Sameer - "Haan."

Raashi - "Wahi par. Aur aap kaha par kaam karte ho Sameer Ji ?"

Sameer - "Yahan se do signal peeche ek business park hain. Main wahi par kaam karta hoon."

Raashi - "Hum dono toh bohut nazdeek mein kaam karte hain."

Sameer - "Haan yeh baat toh hain."

Raashi - "Thik hain aapka contact number de dijiye. Hum khaali waqt mein mila karenge."

Sameer - "Thik hain."

Dono ek dusre ka number share karte hain. Uske baad, Sameer kehta hain, "Main aapko kahi par chod doon ?"

Raashi - "Nahi aapko late ho raha hoga."

Sameer - "Ismein late ki kya baat hain Raashi Ji. Us din aapne bhi toh meri madad ki thi."

Raashi - "Hmm. Thik hain lekin ek shart par."

Sameer - "Please mujhse meri bike mat maangna."

Raashi hans padti hain aur kehti hain, "Pehle aap meri shart toh sunn lo ?"

Sameer - "Haan bataiye."

Raashi - "Aap mujhe Raashi Ji nahi, sirf Raashi kahiye."

Sameer - "OK."

Raashi - "Kya ab main aapki bike par baith jaaon Sameer ?"

Sameer - "Ofcourse."

Raashi bike par baithi hain aur woh dono saath mein Raashi ke ghar ke liye nikal padte hain. Woh use apne ghar ka raasta batati hain aur thodi der ke baad, woh Raashi ke ghar par pohuch jaate hain. Sameer Raashi ko uske ghar ke bahar chod kar chala jaata hain. 

Shaam mein, dono ek dusre se thodi der message par chat karte hain. Us din ke baad se woh dono aksar kabhi message par, toh kabhi call par ek dusre se baatein karte rehte hain. 

Ek din, Raashi ne Sameer ko call kiya. Sameer ne call uthaya aur kaha, "Hi Raashi. Kaisi ho tum ?"

Raashi - "Main thik hoon. Tum kaise ho ?"

Sameer - "Main bhi thik hoon."

Raashi - "Accha mujhe tumse kuch baat karni thi."

Sameer - "Haan kaho na."

Raashi - "Kya kal tum free ho ?"

Sameer - "Haan. Main free hoon."

Raashi - "Toh kya kal hum koi movie dekhne ke liye chale ?"

Sameer - "Haan kyun nahi."

Raashi - "Thik hain. Toh kal dopahar mein, tum mujhe usi Cinema Hall ke bahar milna."

Sameer - "Thik hain."

Raashi - "Toh kal milte hain ?"

Sameer - "Haan pakka."

Raashi - "OK. Bye Sameer."

Sameer - "Bye-Bye."

Agle din, woh dono mile aur saath mein movie bhi dekhi. Tabhi movie ka interval hua aur woh dono saath mein bahar aaye. Phir Sameer ne Raashi se pucha, "Kya tum kuch logi ?"

Raashi - "Haan."

Woh dono saath mein cafeteria jaate hain aur Soft Drinks aur Wafers lekar wapas seat par baith jaate hain. Movie dubara shuru hoti hain aur packet mein se Wafers nikalte waqt, dono ki ungliyaan ek dusre se takra jaati hain. Dono ki nazrein ek dusre se milti hain aur kuch pal ke liye, woh dono ek dusre ko dekhte hi rehte hain. Tabhi film mein ek shor hota hain aur woh dono hosh mein aate hain. Dono dubara screen ki aur dekhna shuru kar dete hain. Lekin, dono ka dhyaan movie par kam, ek dusre par zyada hota hain. Movie khatam hone ke baad, Cinema Hall ki light jalti hain aur dono hi ek dusre ki chor nazron ko pakad lete hain. Ek dusre se nazrein milte hi, dono yahan-wahan dekhne lagte hain. Dono saath mein bahar nikalte hain aur ek dusre se bina koi baat-cheet kiye, woh dono apni-apni gaadi se apne-apne ghar ke liye nikal jaate hain. 

Agle din, dono ek dusre ko na koi call karte hain aur na hi koi message. Dono ek dusre se baat karna chahte hain, lekin, baat karne se ghabra rahe hain. Dono hi ek ajeeb si kashmakash mein phanse hue hain. Woh dono, ek dusre se kuch kehna chahte hain, chahkar bhi kuch keh nahi paa rahe hain. 

Ek din, Raashi ne Sameer ko message kiya, 'Sameer main kuch dino ke liye bahar gaon jaa rahi hoon. Tum apna khayal rakhna.'

Yeh message dekhte hi, woh paagal sa ho jaata hain. Lekin, woh is baat se zyada pareshan ho jaata hain ki, usne message do ghante ke baad padha. Woh Raashi ko call lagata hain. Lekin, woh call nahi uthati hain. Woh sochta hain, 'Kaha par gayi hogi Raashi ?' 'Aakhir kitne dino ke baad woh wapas aayegi ?' 'Woh dubara laut kar aayegi bhi ki nahi ?' Yeh sab khayal uske dimaag mein chalte rehte hain. Yahi baatein sochte-sochte uska sar pakad leta hain aur dard ke maare, woh apne bed par leat jaata hain. Leate-Leate Sameer ko neend lagi jaati hain. Aakhir mein, kuch ghanto ke baad, uski neend khulti hain. Woh apne mobile mein time dekhta hain. Raat ke teen baj rahe the. Phir uski nazar mobile ke notification par padti hain. Woh dekhta hain ki, Raashi ke paanch missed calls hain. 

Woh sochta hain, 'Kya main use call lagaun ?' 'Nahi yeh sahi waqt nahi hoga. Itni der raat mein main kaise use phone kar sakta hoon.' 'Shayad woh is waqt so rahi ho.' 'Ek message kar hi doon kya ?' 'Lekin woh apne maata-pita ke saath hogi. Filhal use message karna bhi sahi nahi hoga.' 'Hey bhagwaan main bhi aakhir kitna bada bewakoof hoon. Main kaise uska call miss kar sakta hoon.' 'Lekin main aisa kyun mehsus kar raha hoon ?' 

Tabhi Sameer ke Mann se aawaz aati hain, 'Shayad tum Raashi ko chahne lage ho.' 

Phir Sameer sochta hain, 'Aisa kaise ho sakta hain ?' 'Kya woh bhi mujhe chahti hain ?' 'Kya main ek baar, Raashi se is baare mein baat kar loon ?' 'Kahi woh bura toh nahi maan jaayegi ?' 'Hey bhagwaan, yeh sab kya ho raha hain mere saath ?' Yahi sab khayalat sochte-sochte subah ho jaati hain. Sameer abhi bhi jaga hua tha. Maano uski aankhon se neend ud chuki ho. Woh tayyar hokar apne office ke liye nikalta hain uska kaam mein mann nahi lag raha hota hain. Maano woh bas apna waqt kaat raha tha. Aaj Sameer se koi kaam nahi ho paa raha tha. Dekhte-Dekhte shaam ho jaati hain. 

Ab woh apne ghar ke liye nikal raha hota hain. Woh apni bike chala raha tha. Bike chalate-chalate use jhapki lag jaati hain aur uski bike ek ped se takra jaati hain. Uska accident ho jaata hain. Sadak ke kinare khade kuch log Sameer ko aspataal bharti kara dete hain aur aspataal karmachari uske I Card se uski jaankari paakar uske ghar walon ko uske accident ki khabar kar dete hain. 

Do din ke ilaaj ke baad, Sameer ko hosh aata hain. Woh apne aap ko aspataal ke bed par paata hain. Saamne baithi nurse, Sameer ko hosh mein dekh kar kamre se bahar jaati hain aur Doctor ko uske hosh mein aane ki khabar deti hain. Kuch der baad, doctor aakar Sameer ki jaanch karte hain aur woh bahar chale jaate hain. Thodi der ke baad, Sameer ke maata-pita andar aate hain aur us se baatein karne lagte hain. Use kaafi kamzori mehsus ho rahi thi. 

Phir thodi der ke baad, Raashi andar aati hain. Use aspataal mein dekh kar Sameer hairaan reh jaata hain aur uske muh se ek bhi lafz nikalta hain. Tab Raashi kehti hain, "Tum itne hairaan kyun ho Sameer ?"

Sameer - "Tum wapas kab aayi ? Aur tumhe mere accident ki khabar kaise lagi ?"

Raashi - "Tumhare accident ke agle din, maine tumhe call kiya tha. Lekin, call tumhare Papa ne uthaya tha. Unse baat karne ke baad, mujhe pata chala."

Tab Sameer ke pita us se kehte hain, "Tumhare accident ke baare mein pata chalte hi yeh ladki, turant flight pakad kar wapas is shehar mein aayi. Aur seedha aspataal pohunchi. Tum poore teen din baad hosh mein aaye ho. Aur in teen dino mein, yeh ladki ek pal ke liye bhi is aspataal se bahar nahi gayi. Tumhari maa ka toh ro-rokar bohut bura haal ho gaya tha. In teen dino mein, isi ladki ne tumhara poora khayal rakha hain. Tumhare bhagya acche hain, jo itni acchi ladki tumhe mili hain."

Yeh sunte hi, Sameer ke aankhon se aansun aa jaate hain. Phir Raashi uske pass aati hain aur uska haath pakad kar usse kehti hain, "Kya tum apni baaki ki saari zindagi mere saath bitana chahoge ?"

Sameer - "Lekin aaj jo meri yeh haalat hui hain, kya iska bawjood tum mujhse shaadi karna chahogi ?"

Raashi - "Main tumse pyaar hamesha karti rahoongi. Hume apna har sukh-dukh saath mein baatna hain Sameer."

Sameer - "Aur tumhare maata-pita ? Unhe kaise manaogi ?"

Raashi - "Woh already maan chuke hain Sameer. Bas tumhare 'Haan' ki deri hain.

Sameer soch mein pad jaata hain. Use ulajhan mein dekhkar Raashi us se puchti hain, "Tum kya soch rahe ho Sameer ?"

Sameer - "Main khudko khush-kismat maanu ya tumhare badkismati par apne aap ko zimmedar maanu ?"

Raashi - "Aaj humne ek dusre ke pyaar ko paa liya hain. Is se badhkar khushi ki baat aur kya hogi. Bas is pal ko mehsus karo aur hamare aane wale kal ke baare mein socho."

Sameer ki aankhen bhar aati hain. 

                  - Ved Vineet Gautam