Samip

 Priyansh Pathak ek sarkari naukri karte hain. Woh peshe se ek sarkaari vakil hain. Haal hi mein unki patni ki maut ho gayi thi, ek bimaari ke chalte. Unki pehli patni ka naam, Parvati tha. Unki pehli patni se unhe ek beta hain. Uska naam hain Karan Pathak. Woh filhal 8 saal ka hain. Priyansh dusri shaadi nahi karna chahte the. Lekin, rishtedaaron ke bohut samjhane par, woh shaadi ke liye tayyar ho gaye. Priyansh ki dusri shaadi unke pehli patni ki choti behan se hui thi. Us ladki ka naam tha, Karuna.

Shaadi ke agle din se hi, Karuna ne ghar ka kaam sambhalna shuru kar diya tha. Karan subah uthkar tayaar hokar, school ke liye nikal jaata aur shaam mein ghar par aa jaata. Priyansh bhi subah uthkar apne daftar chale jaate aur shaam mein ghar laut aate. Is poore din bhar mein, Karuna ghar par akeli pad jaati thi. Subah se shaam tak bahar rehne ki wajah se dono baap-bete thak jaate the. Jis wajah se woh dono Karuna ko waqt nahi de paate the. 

Ek din, chutti ka din tha. Karuna ne socha kyun na kuch accha khaane mein banaya jaaye. Karuna ko yaad aaya, jab ek baar usne apni behan se baat ki thi, tab unhone bataya tha ki Karan ko Gajar Ka Halwa bohut pasand hain. Usne wahi banane ka faisla liya. Woh apne kamre mein gayi aur cupboard kholkar usme se kuch paise nikaale. Uske baad, woh kamre se bahar nikali aur Priyansh ke pass gayi aur usne kaha, "Suniye Ji. Woh main bahar jaa rahi hoon, mujhe ghar ka kuch samaan laana hain."

Priyansh - "Kuch paise bhi le jaao tum."

Karuna - "Haan woh maine cupboard se paise nikaal liye hain."

Priyansh - "Thik hain. Agar zyada samaan laana hain toh hum bhi saath chale ?"

Yeh sunkar, Karuna bohut khush hui aur woh boli, "Haan ji. Kyun nahi ?"

"Thik hain. Hum dono tayyar hokar aa jaate hain." Yeh kehkar Priyansh, Karan ko apne saath lekar andar chala gaya aur Karuna hall mein hi un dono ka intezaar kar rahi thi. Thodi der ke baad, woh dono tayyar hokar kamre se bahar aaye aur woh teeno bazaar ke liye chal pade. Bazaar jaakar un logon ne bohut saari kharidaari ki. Kharidaari karte-karte dopahar ho gayi. Suraj sar par chadh aaya tha. Tab Priyansh ne kaha, "Saaman kharidne mein itna waqt lag jaayega, socha nahi tha."

Karuna - "Agar Karan ko bhookh lagi ho toh kya aaj hum bahar hi khaa lein ?"

Priyansh - "Thik keh rahi ho tum." Phir usne Karan se pucha, "Beta. Kya tumhein kuch khaane ka mann kar raha hain ?"

Karan - "Haan Papa. Bhookh toh bohut lagi hain mujhe."

Priyansh - "Thik hain."

Woh log nazdeek ke ek hotel mein gaye aur saath mein baithe. Phir Priyansh ne Karan se pucha, "Beta kya khaaoge tum ?"

Karan - "Main samosa khaunga Papa."

Priyansh - "Thik hain beta." Uske baad, usne Karuna se pucha, "Tum kya khaaogi Karuna ?"

Karuna - "Main bhi samosa hi khaaungi."

Priyansh ne sabke liye samosa order kiya aur woh sab log saath mein baatein karte-karte khaane lage. Aaj ke din in sab logon ke beech mein jitni baatein hui, utni aaj se pehle kabhi bhi nahi hui thi. Aaj Karuna bohut khush thi. Kyunki, jis akelepan se woh guzar rahi thi, use aaj us akelepan se bahar nikalne ka raasta mil raha tha. Karuna un dono baap-bete ka saath paana chahti thi. Unki zindagi ka hissa ban na chahti thi, aur saath-hi-saath woh yeh baat bhi bohut acche se samajhti thi ki, ismein thoda sa waqt lagega. Use un dono ke kareeb aane ka zyada se zyada samay, sirf chutti ke din hi mil paata tha. Isiliye, Karuna ne tai kiya, ki woh har chutti ke din ko, kisi na kisi tareeke se khaas banane ki koshish karegi. Kabhi woh un dono ke pasand ka kuch khaane ke liye bana deti, toh kabhi woh Karan ke bhavishya ke baare mein baatein karti. Karuna ka Karan ke prati dilchaspi dekh kar, ab Priyansh ko Karan ke bhavishya ko lekar nischint the. Priyansh ko ab pehle ki tarah, Karan ke bhavishya ki chinta nahi sataati hain. 

Ek din, Priyansh apne kaam par gaya hua tha aur use ghar aane mein der hone wali thi. Isliye usne Karuna ko call karke yeh baat batana thik samjha. Priyansh ne Karuna ko call kiya. Do-Teen ghanti bajne ke baad, Karuna ne call uthaya aur kaha, "Hello."

Priyansh - "Haan main bol raha hoon."

Karuna - "Haan ji kahiye."

Priyansh - "Kya kar rahi ho tum ?"

Karuna - "Woh main abhi kapde sukhaane ke liye, chath par jaane wali hoon."

Priyansh - "Accha Karuna mujhe tumse ek baat kehni thi."

Karuna - "Haan kahiye na ji."

Priyansh - "Woh aaj main ghar par der se aaunga."

Karuna - "Kyun kya hua ?"

Priyansh - "Woh mujhe thoda sa kaam hain."

Karuna - "Lekin court toh shaam mein band ho jaata hain na ji ?"

Priyansh - "Haan thoda sa sarkaari kaam hain. Tum dono saath mein khaana khaa lena. Thik hain ?"

Karuna - "Thik hain ji."

Priyansh - "Toh main rakhta hoon phir."

Karuna - "Thik hain ji."

Uske baad, Priyansh call kaat deta hain. Shaam mein Karan, School se ghar aaya. Ghar pahuchne ke baad, Karan ne Priyansh ko hall mein nahi paaya. Jab ki woh aksar us samay hall mein hi upasthit rehta hain. Phir usne Priyansh ko ghar mein dhundhna shuru kiya. Lekin woh kahi par bhi nahi mila. Karan apne kamre mein gaya aur bed par baith gaya. Apna ghar ka kaam khatam karne ke baad, Karuna Karan ke kamre mein gayi. Woh bed par akela baitha hua tha. Use akela dekh Karuna ko, Karan par dayaa aa rahi thi. Woh Karan ke pass gayi aur uske sar par apna haath ghumaya. Karan ne uski taraf dekha. Phir woh puchi, "Kya kar rahe ho beta ?"

Karan - "Kuch nahi mummy. Main bas baitha hua hoon." Karuna Karan ke pass aakar baithi.

Karuna - "Kya tum apni mummy ke baare mein kuch jaan na chahoge ?"

Karan ne 'Haan' mein apna sar hilaya. 

Karuna - "Beta Karan, tumhari mummy bohut acchi swabahav ki thi. Unhe padhne ka bohut shauk tha. Woh bhi tumhare Papa ki tarah, ek vakil ban na chahti thi. Lekin." Yeh kehkar woh chup ho gayi.

Karan - "Lekin kya mummy ?"

Karuna chup thi. 

Karan - "Kuch kahiye na mummy."

Karuna phir bhi chup thi.

Karan - "Aap kuch bol kyun nahi rahi ho ?"

Karuna - "Kya tumhe pata hain beta. Tumhari mummy ki maut kaise hui thi ?"

Karan - "Woh toh bimaar thi na ?"

Karuna - "Aur kya tumhe pata hain, tumhari mummy ko bimaar kisne kiya ?"

Karan - "Kisne mummy ?"

Karuna - "Tumhare Papa ne."

Yeh sunkar, Karan ke aankhon se aansun aa gaye. Karuna ne uske aansun ponche aur uske dimaag mein, Priyansh ke khilaaf zehar bharna shuru kar di. Yeh sab sunkar Karan bas rota hi jaa raha tha. Lekin, Karuna ki zehar bhari baatein band hone ka naam nahi le rahi thi. Thodi der ke baad, Karuna bed par se uthkar, Karan ke kamre se bahar chali gayi. Yeh sab sunkar Karan ko gehra sadma laga. Usne khudko apne kamre mein band kar liya aur woh bohut hi dheemi awaaz mein rone laga. Woh bohut dukhi tha. Karan ko har ek apna dushman lag raha tha. Use apna jeevan ek nark lagne lag gaya tha. Woh bohut kuch soch raha tha aur bas roye jaa raha tha. Rote-Rote Karan ki aankh lag gayi. 

Shaam mein jab Priyansh ghar lauta. Toh Karuna ne darwaza khola. Ghar mein andar aate hi, Priyansh ne Karan ko hall mein nahi paaya. Jabki woh aksar is samay hall mein hi rehta tha. Is baat se woh hairaan tha. Phir Priyansh ne Karuna se pucha, "Karan nahi dikh raha hain ?"

Karuna - "Woh apne kamre mein hain. So raha hain."

Priyansh - "Accha ?"

Phir woh Karan ke kamre ke pass gaya aur usne dekha ki kamra andar se band hain. Priyansh ne kai baar Karan ke kamre ka darwaaza khat-khataya. Lekin usne nahi khola. Karuna uske nazdeek gayi aur boli, "So gaya hoga woh. Kyun use aap disturb kar rahe hain ? Aap fresh jo jaaiye. Main khaana laga deti hoon."

Priyansh - "Nahi mujhe filhaal bhukh nahi hain."

Priyansh ne kai baar darwaaza khatkaya. "Karan. Beta darwaaza kholo. Beta main tumhara Papa hoon."

Karan ne darwaaza nahi khola.

Priyansh - "Beta maine tumhare liye chocolates laaye hain. Koi jawaab toh do beta."

Karan ne koi bhi jawaab nahi diya. 

Priyansh pareshan ho gaya aur woh apna sar pakad kar baith gaya. Kaafi der tak sochne ke baad, Priyansh ko ek tarkeeb soojhi. Woh turant Karan ke kamre ke darwaaze ki taraf gaya aur usne kaha, "Beta tumhare Mama ka phone aaya tha. Woh keh rahe the ki, woh humse milne ke liye aane wale hain."

Kuch der ke baad, Karan ne darwaaza khola. Woh paseene se lathpath tha. Uski naak se khoon beh raha tha aur woh kaanp bhi raha tha. Karan ki aisi dainiya haalat dekh kar Priyansh hairaan reh gaya. Woh turant Karan ke nazdeek gaya aur use apne seene se laga liya. Apne bete ko apne seene se lagate hi, woh dang reh gaya. Kyunki, Karan ka badan bukhaar se tap raha tha. Us maasoom bacche ki haalat dekh kar aisa lag raha tha, maano usne kai dino se khaana bhi na khaaya ho. Priyansh ne Karan ko apne goad mein uthaya aur use turant apne saath aspataal le gaya. Doctor ne kaha, "Ise do-teen din ke liye, aspataal mein admit karna hoga."

Priyansh ne use turant admit karwaya aur woh wahi par hi ruk gaya. Usne apne daftar mein call karke chutti le li. Karan aspataal mein poore chaar din tak admit tha aur in chaar dino mein, Priyansh Karan se ek pal ke liye bhi alag nahi hua. Un dono ne ek dusre se dher saari baatein ki. Paanchve din, Karan ko aspataal se chutti mil gayi aur Priyansh use ghar par le aaya. 

Ghar aate hi, Karan apne kamre mein gaya aur darwaaza andar se band kar liya. Yeh dekhte hi, Karuna ne kaha, "Yeh kahi dubaara bimaar na ho jaaye."

Priyansh - "Nahi woh doctor ne use injection diya hua hain. Use neend ki zaroorat hain."

Karuna - "Thik hain."

Uske baad, Priyansh ghar ke chath par gaya aur usne kisi ko call lagaya. Woh phone par bohut der tak baat-cheet karta raha aur Karuna neeche se bas use dekh rahi thi. 

Agle din, Priyansh subah uthkar tayyar hua aur woh Hall mein hi aakar baith gaya. Karuna uske pass aayi aur poochi, "Kya aaj aap office nahi jaayenge ?" 

Priyansh - "Nahi maine chutti li hui hain." 

Kuch der ke baad, ghar ka bell baja. Karuna ne darwaaza khola. Bahar Karuna ke bhai aur bhabhi khade the. Unhe dekhkar woh bohut khush hui. "Are bhaiyaa aap ? Bohut hi accha surprise diya aapne." Yeh kehkar woh un dono ke pair chui. Un dono ne use aashirwad diya. Phir Karuna ne unhe andar aane ka nyota diya. Woh dono andar aaye. Un dono ko dekhte hi, Priyansh muskurate hue unke pass gaya aur Karuna ke bhai ne Priyansh ko apne gale se laga liya. Dono ki aankhen bhar aayi. Woh dono saath mein baithe aur ek dusre se apna sukh-dukh baate. Tabhi baatein karte-karte Priyansh ki pehli patni ka zikr hua aur Karuna ke bhai ne jo ki Priyansh ki pehli patni ke bhi bhai hain, unhone Karan ko apne seene se laga liya aur woh rone lage. Phir unhone kaha, "Beta Mama tumhare bagair ab nahi reh paa rahe hain. Lekin mujhe chutti bhi nahi mil paa rahi hain. Kya tum kuch dino ke liye Mama ke ghar par reh loge ?"

Karan ne Priyansh ki taraf dekha. Priyansh uske pass aaya aur kaha, "Beta tum kuch dino ke liye chale jaao. Mama-Mami ka mann bhi laga rahega. Aakhir tumhare Mama-Mami tumhe mujhse zyada pyaar karte hain. Tumhare Mama-Mami se zyada, tumhe is duniya mein aur koi nahi pyaar kar sakta hain. 

Karan - "Thik hain."

Karan andar apne kamre mein gaya aur uski Mami bhi uske saath-saath andar gayi. Thodi der ke baad, woh log Karan ka samaan pack karke bahar aaye aur Karan apne Mama-Mami ke saath unke ghar chala gaya. 

Priyansh aksar Karan se phone par baatein karta tha. Kuch din beete aur Karan ki wapas aane ki koi baat nahi hui. Poora mahina beet gaya, lekin, phir bhi uski dubara aane ki koi bhi baat nahi hui. 

Ek din, Karuna ne Priyansh se pucha, "Karan ab wapas kab aayega ?"

Priyansh - "Abhi waqt hain."

Karuna - "Aur uska school ?"

Priyansh - "Jaane do. Abhi uska wahi par mann lag raha hain, toh use wahi par hi rehne do."

Kuch mahine beet gaye lekin phir bhi, Karan wapas nahi aaya. Karuna ab samajh chuki thi, ki Karan dubara ghar nahi aayega. Ab use apna parivaar chahiye tha. Karuna ne Priyansh ke nazdeek aane ki bohut koshish ki. Lekin, Priyansh usse dur bhagta tha. Usne apna saaman Karan ke kamre mein shift kar diya. Ab woh Karan ke kamre mein hi sone laga. Woh Karuna se bohut acche se baat-cheet karta lekin, use apne nazdeek nahi aane deta. Aise kai saal beet gaye. Lekin, Priyansh ne aakhir tak Karuna ko bacche ka sukh bhogne nahi diya. 

Samay beet ta gaya aur woh dono pati-patni par budhaape ne dastak dena shuru kar diya. Tabhi khabar aayi ki Karan ki padhayi poori ho chuki hain aur woh ek bada officer ban gaya hain. Itne saalon mein Priyansh kabhi-kabhar ke liye hi Karan se milne ke liye gaya.

Ek din, woh dono vrudh apne ghar mein baithe hue the, tabhi unke ghar ka door-bell bajta hain. Priyansh darwaaza kholta hain. Aur dekhta hain ki saamne Karan khada hain. Priyansh ne use dekhte hi pehchan liya. Priyansh ki aankhein bhar aayi. Karan Priyansh ko bohut gusse se dekh raha tha. Karuna bhi Karan ke saamne aa khadi hui. Priyansh ne unke haath mein card thamate hue kaha, "Mere Papa Mummy chahte the ki main aapko yeh card de doon."

Karuna - "Koun ho aap beta ?"

Priyansh - "Yeh Karan hain."

Karuna - "Lekin tumhare Papa Mummy toh hum hain beta."

Karan - "Lekin mujhe paal-poskar Mama-Maami ne bada kiya hain na ? Toh wohi mere maa-baap hain. Main darasal yaha aana bhi nahi chahta tha, lekin, Papa Mummy ke dabaav daalne par mujhe yahan aana pada. Agar time mile toh meri shaadi mein aa jaaiyega. Agar aap nahi aayenge, toh zyada accha hoga." Yeh kehkar woh chala jaata hain. 

Karuna rone lagti hain. Priyansh bas waha par khada hokar use dekhta rehta hain. Tabhi rote-rote Karuna kehti hain, "Itne saalon ke baad, mera beta mujhse milne ke liye aaya aur mere haath ka paani tak nahi piya."

Priyansh - "Tumhara beta woh kabse ho gaya ?"

Karuna - "Kya maine maa hone ke farz mein koi kami rakhi thi ?"

Priyansh - "Woh toh tum apne dil se pucho."

Karuna - "Matlab ?"

Priyansh - "Yaad hain kai saal pehle jab Karan bimaar hua tha. Uske do-teen din baad, tumhare bhaiyaa aaye aur Karan ko apne saath le gaye the ?"

Karuna - "Haan toh ?"

Priyansh - "Uske kuch dino pehle tumne Karan se kuch kaha tha."

Karuna - "Kya kaha tha ?"

Priyansh - "Thik se yaad karo."

Karuna - "Mujhe kuch yaad nahi aa raha hain."

Priyansh - "Jab Karan aspataal mein admit tha, tab usne mujhe sab kuch bataya tha. Tumne Karan ke dimaag mein mere khilaaf zehar bharna shuru kar diya tha. Tumhe pata hain, main jab baccha tha, tab meri bhi maa bachpan mein guzar gayi thi. Aur meri sauteli maa ne mujhe mere baap ke khilaaf bhadkaana shuru kar diya tha. Shuru-Shuru mein mujhe apne baap par bohut gussa aata tha. Lekin, dheere-dheere mujhe apni sauteli maa ke swabhaav ke baare mein samajh mein aaya aur mere dil se apni dono maa ke liye, izzat khatam ho chuki thi. Yahan tak ki mujhe apni sagi maa ke liye dayaa tak mehsus nahi hoti thi. Yeh jaan ne ke bawjood, ki marte waqt unhe kitni takleef hui thi. Maine tai kar liya tha ki main zindagi mein kabhi bhi shaadi nahi karunga aur aurton se hamesha dur hi rahunga.  

Phir meri zindagi mein, Parvati aayi. Usne meri soch badal di aur main uske pyaar mein pad gaya tha. Uske pyaar ne meri zindagi badal di thi. Lekin, kismat ne mujhe yeh sukh zyada din tak bhogne nahi diya. Maine use kho diya. Shayad yeh bhi mere hi karmon ki saza hi hogi. Kyunki, maine kabhi bhi apni sagi maa ko apne pyaar ke kaabil nahi samjha. Main nahi chahta tha ki mera beta bhi wahi galti dohraye aur meri tarah saari zindagi pachtaye. Isliye maine uske acche bhavishya ke liye, use apne se dur kar diya. Aur na hi tumhe kabhi apne kareeb aane diya. Main aaj bhi Parvati se bohut zyada pyaar karta hoon aur hamesha karta rahunga. Tumhare saath toh main sirf apna farz nibha raha hoon. Parvati ki behan hokar bhi, tum uske jaisi kabhi bhi nahi ban paayi. Aur na hi tum is kaabil ho ki tum Parvati ke jaise ban paao." 

Yeh kehkar Priyansh andar kamre mein chala gaya aur Karuna waisi ki waisi hi khadi rahi. 

           - Ved Vineet Gautam