Subah Ka Bhula

 Hardik Khatri ek businessman hain. Uski raashan ki dukaan hain. Woh apne maata-pita ka iklauta ladka hain. Uske pita ka naam Arun Khatri hain aur maata ka naam Neelam Khatri hain. Haal hi mein Hardik ki shaadi hui thi, ek businessman ki hi beti se. Uski patni ka naam Richa hain. Unka ek chota sa bangla hain. 

Har roz ki tarah us din bhi, Hardik apne dukan par gaya aur apne kaam par lag gaya. Din bhar kaam khatam hone ke baad, woh shaam mein apne ghar laut hi raha tha, ki use ghar se call aaya. Hardik ne call receive kiya aur kaha "Hello."

"Hello. Main Richa bol rahi hoon." Richa ne kaha.

Hardik - "Haan bolo Richa."

Richa - "Woh khaane ka tel khatam ho gaya tha, agar aap aate hue le aate toh accha hota."

Hardik - "Thik hain main le aata hoon."

Hardik ne apni bike ghumayi aur dukaan ki aur chal pada. Usne dukaan kholi aur light jala kar, khaane ka tel le liya. Phir usne dukaan band ki aur ghar ke liye nikal pada. Kuch der baad, woh ghar pahuncha. Ghar ke andar aate hi Hardik ne Richa ko tel diya aur bathroom jaakar haath muh dhoya. Uske baad, woh hall mein aa baitha. 

Arun - "Toh aaj ka din kaisa raha ?"

Hardik - "Thik tha Papa."

Arun - "Kitne ka maal bika aaj ?"

Hardik - "Yahi kuch 12-15 hazaar ka.

Arun - "Chalo accha hain."

Sab log saath mein baithkar khaana khaate hain. Raat ke samay mein jab sab log apne-apne kamre mein the, tabhi Richa Hardik se kehti hain, "Accha main yeh soch rahi thi ki agar hum koi acche se ghar mein shift ho jaaye, toh kaisa rahega ?"

Hardik - "Kyun is ghar mein kya burayi hain ?"

Richa - "Nahi main bas aise hi keh rahi thi."

Hardik - "Accha. Agar tum koi baat kehna chahti ho toh kaho." 

Richa - "Nahi kuch nahi."

Hardik - "Thik hain."

Dono chup the. Kuch der baad, Richa ne kaha, "Darasal, kal hi meri Rekha se baat hui thi." 

Hardik - "Rekha koun hain ?"

Richa - "Woh meri chacheri behan hain. Hamari shaadi mein bhi toh aayi thi woh."

Hardik - "Yaad nahi. Shaadi mein itne saare log aaye the."

Richa - "Are woh jo gulabi rang ki saaree mein thi. Jiske gale mein heere ka haar bhi tha."

Hardik - "Maine itna dhyaan se nahi dekha hoga. Chehra yaad nahi aa raha hain."

Richa - "Accha woh chodo. Main jo keh rahi thi, ki uska pati kapde ka business karta hain. Meri kal hi Rekha se baat ho rahi thi. Woh bata rahi thi, ki woh log is diwali par ek car lene wale hain."

Hardik - "Yeh toh bohut acchi baat hain."

Richa - "Accha tum suno na ?"

Hardik - "Haan kaho ?"

Richa - "Woh kya hum is diwali par ek car kharid sakte hain ?"

Hardik - "Filhal hamari car kharidne ki haisiyat nahi hain Richa."

Richa - "Aaj kal toh loan bhi toh ho jaata hain na Jee ?"

Hardik - "Loan ka kaam bohut lamba hota hain. Aur har mahine byaaj bhi dena padega. Filhal yeh sab karne ke liye hum saksham nahi hain."

Richa - "Ek chota sa Car bhi nahi ho sakta hain kya ?"

Hardik - "Iam sorry Richa. Filhal nahi ho paayega."

Richa gusse mein apna haath jhatakti hain aur palang ke dusre aur muh karke leat jaati hain. 

Agle din, Hardik kaam khatam karke shaam mein ghar aata hain aur dekhta hain ki Arun hall mein baitha akhbaar padh raha hota hain. Hardik Arun ke bagal wali palang par baith jaata hain aur usse business ki baat-cheet karna shuru kar deta hain.

Hardik - "Papa woh aaj 18 hazaar ka maal bika."

"Bohut badhiya beta." Arun akhbaar padhte-padhte jawab deta hain. 

Hardik - "Papa woh main yeh soch raha tha ki, main naye orders de doon. Dukaan mein saamaan khatam ho raha hain."

Arun - "Jaisa tumhe sahi lage waisa karo."

Hardik - "Nahi agar aap kahenge toh hi main kar paaunga na."

"Tumhe jo sahi lage beta woh tum karo." Arun abhi bhi akhbaar mein hi aankh gaade jawaab deta hain. 

"Papa aap meri baat sun nahi rahi ho." Yeh kehkar Hardik akhbaar ko zara sa neeche kar deta hain. 

Woh Hardik ki taraf dekhta hain. Phir Hardik kehta hain, "Papa main kab se aapse baat karne ki koshish kar raha hoon, lekin aap meri baat sun hi nahi rahe ho."

Arun - "Yahi baat toh tum par bhi laagoo hoti hain beta."

Hardik - "Matlab main samjha nahi Papa."

Arun - "Matlab yeh hain ki, Bahu kabse tumse keh rahi hain, ki use apni behan ko ghar par bulaana hain aur tum bas uski baaton ko tavajjo hi nahi de rahe ho."

Yeh sunkar Hardik hairaan reh gaya aur woh soch mein pad gaya. Tabhi Arun kehta hain, "Kya soch rahe ho beta ?"

Hardik - "Nahi woh kuch nahi."

Richa ne Hardik se yeh baat kabhi kahi hi nahi thi. Lekin, us samay woh chup tha, yeh soch kar ki khamakha baat badh jaayegi. 

Hardik - "Toh un logon ko kab bulana hain Papa ?"

Arun - "Woh log kal shaam mein aa rahe hain. Kal tum ghar par jaldi aa jaana."

Hardik - "Thik hain Papa."

Dono baap-bete saath mein khaana khaate hain aur Hardik apne kamre mein chala jaata hain. Thodi der baad, Richa kamre mein aati hain. Woh aaine ke saamne khadi hokar apni bindi nikaalti hain aur cupboard ko kholkar woh apne gehno ka set nikaalna shuru kar deti hain. Yeh dekh kar Hardik kehta hain, "Yeh sab is waqt tum kyun nikaal rahi ho ?"

Richa kuch nahi kehti hain aur gehno ke set ko bed par rakh-rakh kar dekhti hain. 

Hardik - "Main tumse kuch punch raha hoon Richa."

Richa - "Main yeh dekh rahi hoon, ki kal main kya pehnu."

Hardik - "Kal kya khaas hain ?"

Richa - "Tumhe pata nahi ? Rekha aane wali hain na."

Hardik - "Tumhari behan. Jiske pati ka kapde ka business hain ?"

Richa - "Haan un logon ki kapde ki dukaan hain."

Hardik - "Haan woh aa rahi hain. Toh tum yeh saamaan kyun phaila rahi ho ?"

Richa - "Are tum bhi ghazab ki baat karte ho ? Kal na jaane woh kitna saj-dhaj kar aayegi. Usne na jaane kitne saare gehne pehne honge aur main uske saamne itne saade kapdon mein rahoon ?"

Hardik - "Are bhai, woh log toh kal shaam ko aayenge na ? Tum abhi se yeh sab kyun phaila rahi ho ?"

Richa - "Tum nahi samjhoge."

Hardik Richa se kuch nahi kehta hain. 

Agle din, Richa uthkar tayaar hoti hain aur woh poora din bas sajne-sawarne mein laga deti hain. Use is baat ka bhi dhyaan nahi hota hain, ki Rekha aur uske pati ke swaagat ke liye, use khaana bhi bana na hain. Neelam saari tayaariyan kar leti hain. Woh Richa se kaam mein haath batane ke liye bhi nahi kehti hain, yeh sochkar ki, aaj woh ek lambe samay baad, apni behan se milne wali hain. Toh ho sakta hain ki isi khushi mein woh aaj ka kaam karna bhool gayi ho.

Shaam mein Hardik ghar par aata hain, toh Richa turant use andar aane ko kehti hain. Woh Richa ke peeche-peeche andar kamre mein chala jaata hain. Kamre mein pahunchte hi, Richa kehti hain, "Batao main kaisi lag rahi hoon ?"

Hardik - "Bohut khubsurat."

Richa - "Sirf khubsurat ?"

Hardik - "Toh main aur kya kahoon ?"

Richa - "Accha tum haath pair dho lo. Maine tumhare liye ek bohut hi accha sa shirt nikaala hain. Tum aaj wahi pehan na."

Woh Richa se kuch nahi kehta hain aur bathroom jaakar fresh hokar aata hain. Bed par ek neele rang ka shirt pada hua hota hain. Woh chup-chap us shirt ko pehan kar bahar aata hain. 

Hardik ko dekhte hi, Richa kehti hain, "Dekhna aaj toh tum Rekha ke pati ko bohut zabardast takkar doge." Woh Richa se kuch nahi kehta hain.

Kuch der baad, woh dono unke ghar mein dastak dete hain. Hardik aur Arun un dono bohut khule dil se swaagat karte hain. 

Richa ko apne behan aur jeeja ko apni raisi dikhane ki bohut zyada jaldi hoti hain. Woh bas is soch mein pad jaati hain ki woh aakhir kis bahane se Hall mein jaaye. Tabhi Arun Richa ko aawaz lagata hain, "Bahu. Dekho tumhari behan tumse milne ke liye aayi hain."

Richa ko jis mauke ka intezaar tha, woh use mil hi gaya. Woh bohut utsaah ke saath, Hall mein jaati hain aur un dono ko dekhte hi, uska muh utar jaata hain. Rekha aur uske pati ne koi bohut mehnga kapda nahi pehna hua tha aur yahan tak ki Rekha ne apne gale mein mangalsutra aur haathon mein chudiyon ke alaava aur kuch bhi nahi pehna hua tha. 

Richa ko itna sajaa-dhaja dekh kar, Rekha us se kehti hain, "Are waah yaar, tu toh aaj bohut khubsurat lag rahi hain."

Richa chup rehti hain. 

Hardik aur Arun, Rekha ke pati se desh-duniya ki baatein karna shuru kar dete hain. Rekha andar kitchen mein jaati hain aur Neelam ka kaam mein haath batane mein lag jaati hain. Jis par Neelam kehti hain, "Yeh aap kya kar rahe ho beta ? Aap mehmaan bankar aaye ho."

Rekha - "Hum log mehmaan kaha hain aunty ? Aap meri behan ki saas ho. Aur saas maa samaan hoti hain. Kya main apne maa ka haath nahi bataa sakti hoon kaam mein ?"

Is baat par Neelam muskura deti hain. 

Yeh sab dekhar Richa dang reh jaati hain. Tabhi  Rekha kehti hain, "Aunty sewai ki khushboo toh bohut acchi aa rahi hain."

Neelam - "Yeh sab hamare Bahu ka kamaal hain."

Jis par Rekha, Richa se kehti hain, "Are waah yaar. Tu toh bohut hi accha khaana bana na seekh gayi hain. Ab toh tere ghar par har roz aana padega."

Richa chup rehti hain. Richa ko hairaan aur chup-chaap dekhkar, Rekha kehti hain, "Aakhir kaha khoyi hui hain tu ? Jaldi se plates nikaal, bahar sabko khaana parosna hain." 

Richa aashcharya se bas yahan-wahan dekhti hain. Woh samajh nahi paati hain, ki woh kya kare. Phir Rekha, Richa ke haath mein ek plate pakda deti hain aur kehti hain, "Chal. Hall mein sabko khaana parosna hain."

Woh dono behne Hall mein jaate hain aur sabko khaana parsote hain. Sabhi mard khaana khaana shuru kar dete hain. Thodi der baad, khaate-khaate Arun Rekha ke aadmi se puchta hain, "Aapko khaana kaisa laga ?"

Rekha Ka Aadmi kehta hain, "Bohut hi swaadist bana hain Uncle."

Arun - "Yeh sab hamare bahu ke haathon ka kamaal hain."

Sabhi mardon ka khaana khatam hone ke baad, sabhi auraten andar ke kamre mein baithi hoti hain. Rekha aur Neelam, aapas mein duniya bhar ki baatein kar rahi hoti hain. Wahi dusri aur Richa abhi bhi ek gehri soch mein doobi hui rehti hain.

Richa ko apne-aap par bohut sharmindgi mehsus ho rahi hoti hain. Use ehsaas hota hain, ki dikhaawa karne wale vyakti ki koi ahmiyat nahi hoti hain. Aapas mein pyaar aur sneh bana rahe, yahi mahattvapoorn hota hain. Rekha aur Neelam ko aapas mein itna ghul-milkar baatein karte hue dekh Richa ko apne akelepan ka bhi ehsaas hota hain. Richa ko samajh mein aata hain ki, uska yeh dikhaavapan use uske apno se dur karke rakh dega aur saath hi saath use is baat ka bhi ehsaas hota hain ki, uska logon ko daulat ke tarazun mein taulna use uske apno se dur le jaa raha hain. 

Richa sochti hain, 'Main sabke saath rehkar bhi akeli hoon. Main itne samay se is ghar mein reh rahi hoon, phir bhi apni saans ke main itne kareeb nahi ho paayi. Aur Rekha ? Meri apni behan, pehli baar meri saans se milne ke bawjood; woh unse kitna ghul-mil gayi hain. Main saath rehkar bhi akeli hoon aur itne dur rehkar bhi meri saans ke kitne kareeb hain. Aisa lagta hain, maano Rekha nahi, balki main is ghar mein mehmaan hoon.'

Kuch der baad, Rekha aur uske pati wapas apne ghar chale jaate hain. Neelam kitchen mein sab bartan rakhna shuru kar deti hain aur Richa kitchen mein jaakar uska haath batati hain. Uske baad, woh apne kamre mein chali jaati hain aur Hardik ko dekhte hi uski aankhen bhar aati hain. "Tum ro kyun rahi ho ? Kya hua ?" Hardik badi hairaani se puchta hain. 

Richa - "Main aapse car kharidne ke liye kabhi bhi nahi kahungi."

Hardik, Richa ke aansun ponchta hain aur use apne gale se laga leta hain. 

                 - Ved Vineet Gautam