Bhatka Hua Maarg

Mahesh Joshi ek businessman hain. Unki patni ka naam hain, Shivani Joshi. Unhe ek beta aur ek beti hain. Bete ka naam hain, Rishi Joshi aur beti ka naam hain, Naina Joshi. Naina College mein padhti hain aur uska graduation khatam hi hone wala hain. Aur Rishi filhal saathvi kaksha mein padh raha hain. 

Ek din, jab Naina apne kamre mein baith kar padhayi kar rahi thi, tab, Mahesh waha par jaata hain aur woh Naina se puchta hain, "Beta tumhari padhayi kaisi chal rahi hain ?"

Naina - "Acchi chal rahi hain Papa ?"

Mahesh - "Tumhare exams kab hone wale hain ?"

"Agle hafte se shuru ho jaayenge Papa." Naina ne jawab diya. 

Mahesh - "All The Best Beta."

Naina - "Thank You Papa."

Uske baad, Mahesh waha se chala jaata hain. 

Kai din beet gaye aur Naina ke exams bhi khatam ho gaye. Ek shaam ki baat hain, jab poora parivaar saath mein baitha hua tha. Kaafi dino ke baad, poora parivaar saath mein baithkar dher saari baatein kar raha tha. Tabhi Mahesh ne Naina se pucha, "Toh beta ab tumhara aage ka kya plan hain ?"

Naina - "Papa main koi acchi job dekhungi."

Mahesh - "Beta kya tumne shaadi ke baare mein kuch socha hain ?"

Naina - "Papa main abhi is baare mein nahi sochna chahti hoon."

Shivani - "Lekin beta kabhi na kabhi toh tumhe shaadi karni hi hogi na ?"

Naina - "Haan mummy woh baat bhi sahi hain. Lekin, shaadi karne ki itni jaldi kya hain ?"

Mahesh - "Zaroori hain beta. Dekho yeh business aaj bhale hi acche se chal raha ho, lekin; kal ka kya bharosa. Agar kal ko market down ho jaaye, toh hum log utne acche se tumhari shaadi mein kharcha nahi kar paayenge. Aakhir mein hume shaadi kisi bade ghar mein karani hain. Toh dahej bhi toh accha khaasa dena hoga."

Naina - "Kya aap log saal do saal nahi ruk sakte ho ?"

Shivani - "Bilkul bhi nahi. Tumhari shaadi jald se jald karani hogi hume. Ek baar umar nikal gayi, toh koun puchega ? Kya saari zindagi tum isi ghar mein padi rahogi ? Ek toh aaj kal acche ladke kahi jaldi milte nahi hain."

Naina - "Main aap dono se kuch baat karna chahti hoon."

Shivani - "Filhal yahan par jo baat chal rahi hain, us baat se bhi kya zaroori baat hain beta ?"

Naina - "Main shaadi ke baare mein hi baat karna chahti hoon."

"Kya baat hain beta ?" Mahesh ne zara sa shaq ki andaaz mein sawaal kiya.

 Naina - "Main kaise kahoon, kuch samajh mein nahi aa raha hain. Aap log mujhe galat mat samjheiyega."

Mahesh - "Haan kaho toh kya baat hain."

Naina - "Papa woh mujhe ek ladka pasand hain. College mein mere saath padhta hain."

Kuch der ke liye sab log khamosh the. Uske baad, Mahesh ne pucha, "Us ladke ke baare mein zara khul kar bataogi ? Kya woh koi kaam kar raha hain ? Ya woh abhi job dhundh raha hain ?"

Naina - "Papa filhal toh woh apne liye job dhundh raha hain."

Mahesh - "Us ladke ka naam kya hain ?"

Naina - "Uska naam Rahul hain."

Mahesh - "Uske pita kya kaam karte hain ?"

Naina - "Uske Papa ek school mein teacher hain."

Mahesh - "Kitna kama lete hain uske pita ?"

Naina - "Mahine ki 20,000 salary hain unki."

Mahesh bilkul chup tha. 

Naina Mahesh ke pass gayi aur uska haath pakad kar kaha, "Papa aap please ek baar Rahul se mil lijiye. Agar aapko woh pasand nahi aayega, toh main us se shaadi nahi karungi. Kya main kabhi aapke faisle ke khilaaf jaa sakti hoon Papa ?"

Mahesh - "Woh baat nahi hain beta. Lekin, woh tumhe kya khushi de paayega. Tumhari zarooraton ko woh pura kaise kar paayega ? Tum khush reh paaogi wahan par ?"

Naina - "Bas ek baar aap Rahul se mil lijiye. Agar woh aapko pasand nahi aayega, toh main us rishte ko bhool jaaungi. Phir aap jis ladke se kahenge main us se shaadi kar lungi."

Mahesh ne kuch der socha. Phir kuch pal baad, apni khaamoshi todte hue usne kaha, "Thik hain beta, tum jab chahe tab tum us ladke ko ghar par milne ke liye bula lena."

Naina - "Thank You Papa."

Naina ne Rahul ko aane wale Ravivaar ko apne ghar par aane ka nyota diya. Is poore saptah bhar Mahesh bohut gehri soch mein duba hua tha. Woh andar hi andar chintit tha. Uske mann mein kai chinta bhare khayal aa rahe the. 'Kya woh ladka acche swabhav ka hoga ?' 'Kya woh Naina ka acche se khayal rakh paayega ?' 'Kahi woh meri beti ko phansa toh nahi raha hain ?' 'Kahi woh ladka shaadi ke baad, Naina ko pareshan toh nahi karega ?' 

Jaise-Jaise din beet ta gaya, waise-waise Mahesh apne aap ko chinta ke baadal mein ghirta hua paa raha tha. Use apni naadan beti ke bhavishya ki chinta sataye jaa rahi thi. Aakhir mein mulakat ki ghadi aa hi gayi. 

Ravivaar ki subah Naina bahar jaakar coffee kharid le aayi. Kyunki aaj ka din, Naina ke liye bohut khaas tha. Aakhir mein shaam 5 baje, Rahul ne Mahesh ke ghar ke darwaaze par dastak di. Kyunki darwaaza khula hi tha, Rahul ne Hall mein baithe hue Mahesh se kaha, "Namastey Uncle."

Mahesh ne Rahul ki taraf dekha. Woh dikhne mein sundar aur shareef tha. Usne apne Shirt ki bahi ko mod rakhi thi. Uske Jeans par halka sa kichad laga hua tha. Uske chehre ko dekh kar aisa lag raha tha, ki usne daadhi aaj hi banayi ho. Uska chehra halka sa chamak raha tha. Maano usne apne chehre par chandan ka lep lagaya ho. 

Mahesh ne Rahul se kaha, "Andar aaiye beta."

Woh ghar ke andar aaya. Mahesh ne Rahul se baithne ke liye kaha. Woh Mahesh ke saamne wali kursi par baitha. Mahesh ne Shivani ko aawaz lagayi aur use dekh kar Rahul ne Shivani ko bhi 'Namastey' kiya. 

Uske baad, Shivani ne kaha, "Main Coffee banakar laati hoon beta." Yeh keh kar woh andar kitchen mein chali gayi. 

Mahesh ne Rahul se kaafi der tak baatein ki. Thodi der baad, Shivani Coffee le aayi usne Rahul ko Coffee dekar wahi par baith gayi. 

Kaafi der tak baatein karne ke baad, Rahul waha se chala gaya. Is dauraan, Naina aakhir tak apne kamre se bahar nahi aayi.

Shaam mein Naina, Mahesh ke pass aayi aur punchi, "Papa kya aap abhi free ho ?"

Mahesh - "Haan beta."

Naina - "Papa woh aap Rahul se mile. Us se baatein kiye. Kya aapko woh mera matlab hain, aapko kaisa laga woh ?"

Mahesh - "Haan beta woh thik ladka hain."

Naina - "Matlab aapne aage ke baare mein kuch socha hain ya... ?"

Mahesh - "Kya Rahul bhi tumhe utna hi pasand karta hain, jitna ki tum use ?"

Naina - "Haan Papa. Woh bhi mujhe bohut pasand karta hain."

Mahesh - "Beta tumne apne liye ladka pasand kiya hain. Tumhari pasand kabhi galat ho hi nahi sakti hain."

Naina - "Aap khush toh ho na is rishte se Papa ?"

Mahesh - "Haan beta. Main khush hoon."

Naina muskura kar kehti hain, "Thank You so much Papa." Aur woh andar apne kamre mein chali jaati hain. 

Agle din, Mahesh Rahul ke ghar jaakar uske Parivaar se milta hain aur Naina ka rishta wahan par pakka kar deta hain. Haalanki, woh is rishte se bilkul bhi khush nahi tha. 

Kuch dino ke baad, Naina aur Rahul ki shaadi ho jaati hain. Rahul ko ek company mein naukri bhi lag jaati hain. Shuru-Shuru mein toh sab kuch thik chal raha tha, lekin; dheere-dheere haalat badalne lage the. Logon ke vyavhar badalne lage the. Aas-Pados ke log yeh keh kar taane maarte the ki, "Rahul ne toh kya bada haath maara hain." "Usne apni saari zindagi bhar ka bima kara liya. Jab paison ki zaroorat ho, tab Sasur ko bas ek call laga lo." "Badi hi Raees ladki ko phasaya hain Rahul ne." "Bohut hi tagda jaal bichaya hain Rahul ne." "Aaj kal ke ladke bohut tez hain. Unhe pyaar hota bhi hain toh kisi na kisi raeeszaadi se hi." 

Shuru-Shuru mein toh Rahul in sab baaton par dhyaan nahi deta tha. Lekin, din prati din logon ke taane badhte gaye. Samaaj mein Rahul ki na sirf hansi udaayi jaa rahi thi, balki; use ek 'Chaalbaaz' ki upaadhi dekar uske swabhimaan ko lalkaara jaa raha tha. 

Ab Rahul ka jeena haraam ho chuka tha. Woh apne kaam par bhi jaata toh, logon se apni nazrein bacha kar jhat-jhat chal padta. Dheere-Dheere Rahul ko yeh saari baatein chubhne lagi. Use samajh mein nahi aa paa raha tha ki woh kare toh kya kare. 

Ek din ki baat hain, din bhar kaam khatam karke woh apne ghar par pahuncha aur ghar ka darwaaza khatkaaya. Naina ne darwaaza khola. Rahul ghar ke andar aaya. Uska chehra bohut udaas tha. Naina ko laga ki aaj shayad woh kaam mein bohut zyada thak gaya hoga. Naina ne Rahul se kaha, "Aap haath muh dho lijiye, main khaana laga deti hoon."

"Main koi muft ka khaana khaane walon mein se nahi hoon. Mujhe kya tumne koi thag samajh rakha hain ?" Rahul ne yeh baatein bohut hi ladkhadati hui zubaan mein kaha. 

Naina ko shaq hua. Woh Rahul ke nazdeek gayi aur uska muh sungha. Rahul ne sharaab pi hui thi. Yeh jaankar Naina ko bohut gehra dhakka laga. Uski aankhein bhar aayi aur uske muh se aawaz nahi nikal paa rahi thi. Naina ko hairaan pareshan dekh kar uske sasur ne usse pucha, "Kya hua bahurani ?"

Naina - "Papa woh inhone sharaab pi hui hain."

Rahul ke pita Rahul ke pass gaye aur usko kas ke ek thappad maara. Uske baad, woh Rahul ko daantne phantkaarne lage. Yeh sab dekh kar Naina bas apna sar pakad kar roye jaa rahi thi. 

Rahul ki maa Naina ke pass aayi aur use apne saath andar le jaakar use samjhane lagi. Rahul ke pita ne uska pakad kar use uske kamre tak le gaye aur bistar par lita kar Rahul ko sula diya. 

Agle din, Rahul ki neend khuli. Usne ghadi mein dekha toh dopahar ke 2 baj rahe the. 'Aaj main itna late kaise utha ?' 'Agar aisa chala toh meri naukri hi chali jaayegi.' 'Main aakhir itna gair zimmedar kaise ho sakta hoon ?' Yeh sab khayal uske mann mein aa rahe the. Woh apne bistar se utha aur kamre ke bahar gaya. Naina ne Rahul ko dekha, lekin us se kuch kahe bina woh hall mein jaakar uske pita ko bataya ki woh jaag gaya hain. Rahul ke pita andar aaye aur Rahul se kaha, "Beta tum zara hall mein aana." Rahul hall mein gaya. Rahul ke pita ne us se kaha, "Baitho. Mujhe tumse kuch baatein karni hain."

Rahul sofa par baitha. 

Rahul Ke Pita - "Kaisa mehsus ho raha hain tumhe ab ?"

Rahul - "Matlab ? Kaisa mehsus hoga ? Mujhe aakhir hua kya hain ?"

Rahul Ke Pita - "Kyunki mujhe aisa lag raha hain ki, tum ab apni zimmedariyan bhool rahe ho."

Rahul - "Maine aakhir kiya kya hain Papa ?"

Rahul Ke Pita - "Kya tumhe sach mein kuch bhi yaad nahi hain ?"

Rahul ne 'Na' mein apna sar hilaya.

Rahul Ke Pita - "Thik hain. Main batata hoon. Toh beta aisa hain, mujhe tumse bohut saari ummeedein thi. Ek waqt tha jab mujhe tum par fakr mehsus hua karta tha. Lekin, ab mujhe tumse baithkar baat karne mein bhi beizzati mehsus ho rahi hain."

Rahul - "Maine aakhir aisa kya kiya hain Papa ?" 

Rahul Ke Pita - "Kal raat tum sharab pee kar aaye the. Aur tumne ghar mein, bohut tamaasha bhi kiya tha."

Rahul chup tha.

Rahul Ke Pita ne apni baat ko aage badhate hue kaha, "Yeh ladki apna ghar parivaar chodkar tumhara saath dene aayi hain. Tum par vishwas karke apne zindagi ke saare aisho-aaram chod aayi hain aur tum use is vishwas ka yeh sila de rahe ho ?"

Rahul - "Aapko pata hain log kya-kya baatein kar rahe hain mere baare mein ? Mere office mein, humare society mein. Log mujhe kya-kya taane maarte hain ? Mujhe is samaaj se kya-kya sun na padta hain. Main aakhir kis haalat se guzar raha hoon, aap kabhi samajh nahi sakte ho Papa."

Rahul Ke Pita - "Yeh is duniya ka kaam hi hain taane maarna. Chahe tum kitna bhi sahi kaam kyun na kar do, log usme bhi nuskh nikaal hi denge. Toh kya tum sharaab ka sahara loge ?"

Rahul - "Lekin Papa...." Uski baat ko kaat te hue uske Pita ne kaha, "Mujhe tumse koi behas nahi karni hain. Agli baar se yeh galti nahi honi chahiye. Maine bahu ke pita se bhi kal ke masle ke baare mein baat ki hain, woh log shaam mein ghar aa rahe hain. Agar woh log tumse naarazgi jataye, toh bhi tum unse koi bhi behas nahi karoge. Galti saari tumhari hain. Filhal jaao aur jaakar bahu ko manaa aao."

Rahul andar apne kamre mein jaata hain aur woh Naina se apni galti ki maafi maangta hain. 

Shaam mein, Mahesh, Shivani aur Rishi; teeno Rahul ke ghar pahuchte hain. Rahul ke pita unka swaagat karte hain aur sabhi log Hall mein saath mein baith te hain. Dono parivaar ke beech mein baat-cheet hoti hain aur Mahesh aur Shivani use samjhate hain. 

Mahesh - "Dekho beta, main toh apni beti de chuka hoon tumhe. Aadmi chahe kitna bhi bada kyun na ho, woh kabhi apni beti ki shaadi ke baad, use apne ghar wapas nahi laana chahega. Main samajh sakta hoon, ki tumhe logon se bohut kuch sun na pad raha hain; lekin, duniya ka muh band toh koi bhi nahi karwa sakta hain na beta ? Logon ka kaam hi hain taane maarna. Tum chahe kitne bhi sacche kyun na raho, lekin; log tum par waqt waqt par ungliyaan uthate rahenge. Logon ke wajah se hum apna ghar sansaar bigaad le, yeh sahi nahi hain na beta."

Rahul - "Mujhe maaf kar dijiyega uncle, main agli baar se aisi galti nahi dohraunga."

Rahul apne ghar se bahar nikalta hain. Log phir se taane maarna shuru kar dete hain, "Toh aaj Lazez khaana banega." "Dekho logon ki kismat kya chamakati hain, aaj Five Star Hotel khud chal kar jhopde mein aaya hain." Rahul samajh chuka tha, log taane zindagi bhar maarte rahenge, hume bas khamoshi se apna kaam karte rehna hain aur apne parivaar ko sambhalte hue chalna hain. Rahul nazdeek ke ek dukaan mein gaya aur kaha, "Bhaiyaan ek Dudh ka packet dena."

Dukaan wale ne kaha, "Kya bhai aaj toh bohut khaas din hoga. Aaj khub kharche hone wale hain shayad." Rahul ne us se kuch nahi kaha, woh muskuraya aur dubara apne ghar ki aur chal diya.

              - Ved Vineet Gautam