Ek gaon tha. Wahan par ek budhi aurat apne eklaute 8 Saal ke naatu ke saath rehti thi. Beta-Bahu toh nadi mein doobkar Swarg sidhaar chuke the. Darasal jab veh dono nadi mein paani lene ke liye gaye the, tabhi achanak se baadh aa gayi aur woh baadh unhe kaal ke gaal mein pahucha di.
Is umar mein bhi woh logon ke ghar ka kaam kar ke apna aur apne naatu ka guzara kar rahi thi.
Us vridh aurat ko apne naatu ke bhavishya ki chinta hoti thi. Woh aksar yeh sochti thi ki mere mrityu ke baad, is naadan aur masoom baalak ka kya hoga ? Prati Din uski chinta badhti jaa rahi thi.
Ek din ki baat hain, jab woh apne ghar ke chaukhat par baithi apne laadle ki kamiz sil rahi thi, tabhi wahan se ek sadhu jaa rahe the. Us budhi aurat ne us sadhu ko roka aur apne ghar ke chaukhat par aane ka aagrah kiya. Usne us sadhu ko paani pilaya, bhojan diya. Sadhu tript ho gaya tha.
Phir Sadhu ne kaha, "Accha Amma ab main jaata hoon. Bhagwaan tumhara bhala kare."
Tabhi boodhi aurat ne kaha, "Main aapse ek prashn poochna chahti hoon."
Sadhu - "Poocho Amma."
Boodhi Aurat -"Kya aap kisi ka bhavishya bata sakte hain ?"
Sadhu - "Avashya bata sakte hain."
( Boodhi Aurat ne apne naatu ko awaaz lagayi aur woh aaya. )
Boodhi Aurat - " Yeh mera Naatu hain. Iska bhavishya yadi aap bata dete toh, main thoda nischint ho jaati Baba." "Umar dhal chuki hain meri, pata nahi kab jawaab de jaye. Mere parivaar mein aur koi hain bhi nahi."
Saadhu ne uska haath dekha aur kaha, "Maate iska bhavishya ujwal hain. Parantu.
Boodhi Aurat - "Parantu kya Baba ?"
Saadhu ne gehri saans li aur kaha, "Yeh ladka aajeevan vipatti se ghira rahega. Sankat aur iska jeevan saath-saath chalenge. Ise apne jeevan mein kabhi shanti aur sukh prapt nahi ho paayegi."
Yeh sun kar boodhi aurat bhaibheet ho gayi. Woh Saadhu se boli, "Kuch ho nahi sakta. Yeh ek nanha sa baalak hain. Mere sivay is sansaar mein iska koi nahi hain. Kuch karne ka prayaas kijiye. Iska bhavishya badal dijiye Baba."
Saadhu - "Main kya kar sakta hoon. Neeyati ka likha mit nahi sakta. Haan agar koi kuch kar sakta hain, toh woh ho aap."
Boodhi Aurat - "Main kya kar sakti hoon ?"
Saadhu - "Ise tayyar karo, Jeevan ke chunautiyon se saamna karne ke liye. Ise is yogya banao ki yeh nidarta se jeevan mein sangharsh kare." Yeh kehkar woh Saadhu waha se chale gaye.
Woh boodhi aurat behad chintit ho gayi. Usne ghar ka baaki sab kaam khatam kiya aur woh dono khaana kha kar raat mein sone chale gaye. Nanha baalak bohut maasumiyat se apni daadi se poocha, "Daadi woh Baba ne kya kaha tha ?"
Daadi - "Unhone kaha ki tum bade hokar Raja banoge. Tumhare paas bohut saare naukar-chaakar honge. Ek bada sa sone ka mahal hoga tumhara."
Baccha bohut khush ho gaya. Usne kaha, "Daadi tab aap khaana mat banana. Hum apne naukaron se sab kaam karayenge."
Daadi - "Par beta main nahi rahungi. Tum apne jeevan mein bohut safal ho jaaoge, lekin mere marne ke baad. Aur tumhe jeevan bhar Sangharsh karna hoga. Tabhi tum waha tak pohuch paaoge aur unchaio ko choone ke baad bhi tumhe sangharsh jaari rakhna hain, kyunki tabhi tum tik paaoge."
Baccha is baat se dukhi tha ki uski daadi uske saath nahi hogi. Agle din us boodhi aurat ne apne padosi Ramlal se kehkar use kaam par lagvaya. Woh wahan par kabhi bail ko charata toh kabhi kheti karta. Din bhar thak kar ghar aata aur so jaata. Kabhi-Kabhi toh woh itna thak jaata tha ki ghar pahuchte hi woh palang par gir jaata aur jald hi gehri neend mein so jaata. Gaon walon ko uski haalat dekh kar uspar badi dayaa aati.
Kuch samay baad Daadi chal basi. Ab toh woh baalak Ramlal ke yahan kaam karta aur wahi par khana bhi khata tha. Apne ghar kewal sone ke liye jaata tha. Aisa kuch saalon tak chala aur Ramlal use paise bhi zyada dene lag gaye the. Log use Daadu bulate the. Apni daadi ka laadla jo tha. Samay ke saath uska mann majboot ho gaya tha.
Ek din ki baat hain, Gaon mein ek haathi ne aatank macha diya tha. Sabhi ghabra gaye the. Jo bhi uske saamne aata ya toh woh use kuchal deta ya phir apne sundh mein lapetkar dur phenk deta. Sabhi seham gaye the aur apne-apne gharon ki aur bhagne lag gaye the. Yeh sab dekhkar, Daadu ne tay kiya ki woh us haathi se ladega. Usne badi bahaduri se uska saamna kiya aur use shaant kiya. Yeh baat gaon ke Raja ke kaanon tak pahuchi aur unhone use apne Mahal mein aane ka aadesh diya. Uske majboot gathile badan ko dekh kar Raja ne use apna mukhya angrakshak banaya.
Kuch samay baad Raja ki akaal mrityu ho gayi. Raja ke Bhai ne bal prayog karke Rajpaath hadap liya aur Rajkumar ko bhi jaan se maar daala. Ab Raja ke Bhai ne Gaon walon ki kamai par das pratishat tak kar badha diya tha. Sabhi Gaon wale pareshan ho gaye. Unki saari kamayi, kar chukta karne mein hi chali jaati. Sabhi ki haalat dayniya ho chuki thi.
Daadu ne rann neeti banakar Raja ke Bhai ka apharan kar liya aur Gaon walon ne Raja ke Bhai ko bandi bana diya.
Itne bade sankat se Daadu ne poore gaon ko bahar nikaala. Sabhi ne yeh nirnay liya ki Daadu ko hi unka Raja banaya jaaye aur uska Raj Tilak karke use Singhasan par baithaya.
Tab Daadu ko us Saadhu ki yaad aayi aur apni Daadi ki kahi hui baatein yaad aayi.
Padosi gaon ke Raja ne Daadu ko unse milne ka nyaota diya aur unke jeevan ke baare mein jaan ne ki iccha prakat ki. Tab Daadu ne kaha, "Chaliye main aapko ek kahani sunata hoon."- Ved Vineet Gautam
Comments
Post a Comment