Anil naam ka ek ladka tha jo ki ek company mein job karta tha. Woh Online Marketing ka job karta tha. Woh behad mehnati tha aur mahine ka 30,000/- Rupees woh kamata tha. Uski zindagi mein sab kuch thik chal raha tha. Ek din baithe-baithe usne socha ki main itni mehnat kar raha hoon aur agar main thodi aur mehnat kar loon toh kya main aur aage badh sakta hoon ? Use khayal aaya ki woh online marketing toh kar hi raha hain. Agar woh koi online business shuru kar de toh woh bohut aage badh sakta hain.
Ab woh jab bhi kaam karke ghar wapas aata toh, fresh hokar, khana-peena karne ke baad woh thoda sa rest leta aur internet par research karna shuru kar deta.
Kuch mahino ki research ke baad usne apni ek website banayi jisme ki woh Marketing se related tips deta tha. Dheere-Dheere Anil ki online kamayi bhi shuru ho gayi, aur ek saal baad woh apni salary se bhi double kamane lag gaya tha apne online business se. Ghar wale bhi uski tarakki se behad khush the.
Sab kuch accha chal raha tha. Tabhi uski zindagi mein ek naya mod aaya. Mr. Sanjeev Yadav ne Anil ki post badha di aur use zyada kaam bhi dene lag gaye, jis wajah se use zyada der tak office mein rehna padta tha.
Ab woh office se apne ghar bohut der se pohuchta aur ghar aate hi woh thakaan ki wajah se bed par padte hi gehri neend mein so jaata. Dheere-Dheere woh office bhi late pohuchne laga. Aur is baat par uske boss yani ki Mr. Sanjeev Yadav ne naarazgi jatayi.
Kai din ho gaye Anil apni website par kaam nahi kar paa raha tha. Uski zindagi ka poora system bigad chuka tha. Use shak hua ki kahi uske Boss ko is baat ki bhanak toh nahi lag gayi. Aur woh mann-hi-mann apne boss ko kos raha tha. Use yeh lag raha tha ki uske saath
zyadti ho rahi hain.
Aakhir-Kaar Anil ne tai kiya ki woh apne job se resign karega. Aur woh apna resignation letter type karna shuru kar diya. Tabhi uske zehan mein khayal aaya ki ek baar use apne boss se baat kar leni chahiye. Aakhir kaafi time se woh unke saath kaam kar raha tha.
Agle din woh Mr. Sanjeev Yadav ke cabin mein gaya aur unse andar aane ki permission maangi. Mr. Sanjeev Yadav ne use andar aane ki ijaazat de di. Woh andar gaya aur Mr. Sanjeev Yadav se permission lekar unke saamne wali seat par baith gaya.
Mr. Sanjeev Yadav - "Bolo Anil. Kya kehna chahte ho."
Anil - "Sir main pichle do saal se is company mein job kar raha hoon."
Mr. Sanjeev Yadav - "Haan."
Anil - "Kya maine aapko kabhi bhi shikayat ka koi mauka diya ?"
Mr. Sanjeev Yadav - "Tum kehna kya chahte ho. Seedhe mudde par aao."
Anil - "OK Sir. Main resign karna chahta hoon."
Mr. Sanjeev Yadav - "Thik hain. Tum apna resignation mujhe mere mail id par email kar dena. Aur resignation mail karne ke ek mahine ke baad tum job chod sakte ho."
Anil - "Kya aap wajah jaan na nahi chahoge ki main kyun resign kar raha hoon ?"
Mr. Sanjeev Yadav - "Pichle kuch mahino se tum apna online business chala rahe ho aur ab tum apna poora focus usi par karna chahte ho."
{ Yeh sun kar woh hairaan reh gaya. }
Anil - "Aapko kaise pata chala ?"
Mr. Sanjeev Yadav - "Bhai company ka maalik hoon har ek employee par dhyaan rakhna padta hain. Agar mujhe yeh nahi pata rahega ki mera employee kar kya raha hain toh mera business down nahi ho jaayega?" "Ab jab tumne tai kar liya hain toh ek seekh hamesha yaad rakho apne har ek employee ke saath connected raho. Uske dukh-dard ko samjho aur uske saath har haal mein khade raho. Tabhi woh aadmi apni poori mehnat ke saath kaam karega. Aur tabhi tumhari company business mein bani rahegi." "Aur haan stress management sikho aur har haal mein thande dimaag se kaam karo aur logon se hamesha muskura kar baat karo, chahe tension kitna bhi kyun na ho."
Anil ko apne aap par sharam aa rahi thi. 'Maine Sir ke baare mein aakhir kitni galat rai bana li thi. Maine kaise sir par Shak kar liya?' Usne socha ki, 'Ek aadmi jo na sirf apna business dekta hain balki, apne saare employees par dhyaan bhi deta hain. Unke sukh-dukh ke baare mein bhi sochta hain, apne parivaar ko bhi time deta hain. Itna sab kuch ek saath manage karta hain. Yahi hota hain ek badaa aadmi.'
Anil Mr. Yadav ke Cabin se bahar nikla lekin ek bade badlaav ke saath. Woh badlaav jo ki uski soch mein hua. Woh badlaav jo shayad uske liye zaroori tha.
- Ved Vineet Gautam
Comments
Post a Comment