Maargdarshan

Pankaj ek college professor hain. College mein baccho ko padhane ke saath hi saath woh apne students ke saath ghul-milkar rehte hain. Students ke saath unka rishta bada yaarana hota hain. Woh apne students ko unke bhavishya ke liye hamesha unhe bohut prerit karte rehte hain. Lekin, woh khud apne vyaktigat jeevan mein bohut udaas hain. Darasal, kai saal pehle, ek durghatana mein unke iklaute bete ki maut ho gayi thi. Unki biwi ko us durghatana ka gehra asar hua, aur us durghatana ke baad, woh maansik roop se bimar ho gayi hain.   

Apne jeevan mein itna dukh hone ke bawajood woh hamesha haste muskurate rehte hain. Logon se hamesha muskura kar hi baat-cheet karte hain.

College mein ek ladka hain, jiska ka naam hain Vijay. Woh apni zindagi se bohut maayus ho chuka hain. Woh aajeevan apne maata-pita ko ek dusre se ladte hue dekh kar bada hua hain. Vijay zindagi se haara hua ek ladka hain, jise apne bhavishya ko lekar koi khaas apeksha nahi hain. Na hi usne kuch socha hain, ki woh apne jeevan mein aage karega kya. Use ek kaayar bhi kaha jaa sakta hain. Woh ek aisa manushya hain, jo ki kisi bhi paristithi ke saamne bohut aasani se apne ghutne tek dega.

Vijay adhikatar samay bohut khamosh aur maayus rehta hain. Pankaj Sir kabhi-kabhi uske baare mein soch kar bhi chintit ho jaate hain. 

College mein Pankaj Sir ki nazar, aksar Vijay par tiki rehti hain. Woh Vijay ke ateet ke baare mein bhi bohut acche se jaante hain. Unhone tai kar liya tha, ki, woh is bacche ke jeevan ko sahi disha denge.

Ek din unhone Vijay ko apne paas bulaya aur kaha ki woh usse milna chahte hain. Aur unhone yeh bhi kaha ki, College ka samay samaapt hone ke baad woh aakar unse mile. Unhone use college ke library mein milne ke liye bulaya tha. Vijay ne yeh socha ki 'aakhir kis wajah se woh mujhse milna chahte hain ?' Woh thoda sa brahmit tha. 

Din bhar woh kisi bhi lecture par dhyaan nahi de paa raha tha. Woh bas yahi soch raha tha, ki, 'Aakhir kis wajah se woh mujhe aise achanak se bewajah milne ke liye bula rahe hain.' Aakhir Kaar college ka samay samapt hua. Vijay library mein chala gaya aur woh kursi par baithkar, Pankaj Sir ka intezaar karne laga.

 Kareeb aadhe ghante baad, woh library mein pravesh kiye. Unhe dekhte hi, woh kursi par se utha. Pankaj Sir use dekh kar muskuraye phir woh bina kuch bole pustak takhta mein kitaabein dekhne lag gaye.

Unhone kuch kitaabein nikali aur use table par rakh diya. Phir woh kursi par baith gaye aur unhone Vijay ko apne saamne baithne ke liye kaha. Vijay unki saamne wali kursi par baitha. Pankaj Sir ne poocha, "In aadhe ghanto mein tumne kya kiya ?"

Vijay - "Aapka Intezaar."

Pankaj Sir - "Hmm. Kaise ho tum ?"

Vijay - "Thik hoon."

Pankaj Sir - "Tumhare mummy aur papa kaise hain ?"

Vijay - "Woh log bhi thik hain."

Pankaj Sir - "Zindagi ke baare mein tumne kya socha hain ?"

Vijay - "Matlab Sir main samjha nahi ?"

Pankaj Sir - "Aage tum karna kya chahte ho ?"

Vijay (Thoda udaas hokar) - "Mujhe kuch bhi pata nahi hain."

Saamne padi hui kitaabon mein se ek kitaab Pankaj Sir ne uthayi aur unhone Vijay ko diya. Vijay ne kitaab apne haath mein liya aur us kitaab ka shirshak padha "Agni Ki Udaan."

Pankaj Sir - "Main chahta hoon ki, tum yeh kitaab padho. Apni rozmarra ki zindagi mein se kuch samay nikaal kar tum roz is kitaab ke kuch panne padho."

Vijay - "Kya yeh syllabus mein hain ?"

Pankaj Sir - "Haan. Lekin sirf tumhare liye." Vijay thoda sa bhramit ho gaya.

Vijay - "Main kuch samajh nahi paa raha hoon Sir."

Pankaj Sir - "Thoda samay lagega lekin, sab kuch samajh jaaoge tum. Ise tum apna assignment hi samjho. Yeh kitaab padhkar jab khatam ho jaaye, tab main tumhe dusri kitaaben bhi dunga padhne ke liye. Aur koi hoshiyaari nahi chal sakti hain. Main kabhi bhi tumse koi bhi sawaal kar sakta hoon." "Kya tum yeh kaam karoge ?"

Vijay ne kuch shan ke liye socha aur kaha, "Thik hain main yeh kaam zaroor karunga."

Pankaj Sir - "Good. Ab tum jaa sakte ho."

Vijay waha se chala jaata hain. Pankaj Sir aksar usse puchte rehte hain ki usne kitaab ke kitne panne padhe aur use padh kar kya samajh aaya. Woh unhe batata aur woh sirf itna hi kehte ki "kuch seekhne ki koshish karo."

'Agni Ki Udaan' kitaab poori hone ke baad unhone Vijay ko dusri kitaab di. Vijay ne kuch dino mein use bhi padh kar khatam kiya. Aur aise kai kitaabein unhone usse padhvaye. Un kitaabon ko padh kar woh bohut prabhaavit hua. Woh yeh sochkar bhi hairaan reh gaya tha, ki aakhir log apne jeevan mein kitni vikat paristithi ka saamna karte hue kaise bohut aage badhe.

Dheere-Dheere Vijay mein atmavishvas badhta gaya, aur woh dheere-dheere aashavadi hone laga. Jeevan ke baare mein uski rai badalna shuru hui. 

Vijay mein yeh badlaav dekh kar uske maata-pita bohut khush hue. Ek baar unhone Vijay se uske college ke baare mein kuch sawaal kiye. Usne Pankaj Sir ke baare mein bataya, aur woh unse milne ke liye ichhuk hue. Vijay ne yeh baat Pankaj Sir ko batayi aur unhone use aane wale itvaar ko apne parivaar ke saath, apne ghar aane ka nyota diya. 

Vijay apne maata-pita ke saath bataye gaye samay par, Pankaj Sir ke ghar pahucha. Unhone unka swaagat kiya, aur woh ghar ke andar pravesh kiye. Pankaj Sir ne unse baithne ka aagrah kiya. Woh sab sofa par baithe.

Pankaj Sir - "Aap kya lena pasand karenge ?"

Vijay Ke Pita - "Ji nahi Sir. Kuch bhi nahi."

Pankaj Sir - "Pehli baar aap ghar aaye hain, ek cup chai toh banti hain." Aur unhone apni patni se sabke liye chai banane ke liye kaha. 

Vijay Ke Pita - "Vijay bohut badal gaya hain. Ab use lekar humari fikra thodi kam hui hain. Aur yeh sab keval aapke kaaran hi sambhav ho paaya hain."

Pankaj Sir - "Ji nahi. Yeh ladka bohut mehnati hain. Shayad thoda sa bhatka hua tha, maine toh bas ise ek disha de di."

Vijay Ki Maa - "Ab toh thodi bohut baat-cheet karna bhi shuru kiya hain isne. Nahi toh pehle ekdum khamosh rehta tha. Aapke baare mein bolte nahi thakta hain yeh."

Vijay Ke Pita - "Ise lekar ab hum thoda sa nischint ho gaye hain."

Pankaj Sir muskura diye. Unki patni chai lekar aa gayi aur unhone sab ko chai di. Unke beech thodi bohut desh-duniya ki baat-cheet hui. Tabhi Vijay ki maa ne sawaal kiya, "Aapke bacche kya karte hain ?"

Pankaj Sir - "Humare bacche nahi hain. Ek beta tha humara, lekin woh ab is duniya mein nahi raha. Darasal kai saal pehle ek durghatna mein uski maut ho gayi thi. Woh sirf 8 saal ka tha, jab khelte-khelte woh main road par pohuch gaya tha. Usi samay ek car jo ki badi tez gati se aa rahi thi aur woh us car ke neeche aa gaya. Aspataal mein kai dino tak uska ilaaj chalta raha lekin, woh bach na saka. Aur humne apne bete ko kho diya."

Vijay Ke Pita - "Mujhe maaf kar dijiyega Sir."

Pankaj Sir - "Ji nahi. Koi baat nahi. Zindagi mein insaan ko har khushi nahi milti hain. Yahi zindagi hain. Ab bas mere students hi mere bacche hain. Vijay mera bete jaisa hi hain. Main jab-jab is ladke ko dekhta hoon, pata nahi kyun, mujhe apne bete ki yaad aati hain." "Isiliye toh main ek shikshak hoon. Taaki main logon ko prerit kar sakun. Unhe sahi maarg dikha sakun. Unka margdarshan kar sakun." Vijay bohut hairaani se unhe dekh raha tha.

Pankaj Sir ne Vijay se kaha - "Kya hua ? Itne hairaan kyun ho tum ? Jeevan mein peeda kya sirf tumhe hi hain? Is duniya mein zyadatar log kisi na kisi roop se apne jeevan se pareshan hain. Phir bhi is duniya mein kai logo ne apne jeevan mein bohut unchaiyon ko chua hain aur dusro ke liye prerana bane hain. Ek din tumhe bhi duniya ke liye, aane wali peedhi ke liye, prerana ka strot banna hain."  

Thodi der tak desh-duniya ki charcha karne ke baad un logon ne saath mein dinner kiya. Dinner ke dauraan, unhone Vijay ke bhavishya ke baare mein bhi charcha ki. Baad mein woh log waha se chale gaye. Pankaj Sir ke ghar se Vijay ek naye badlaav ke saath bahar nikla. Jo Vijay thodi der pehle unke ghar gaya tha, us Vijay ko woh wahi par chodkar aur ek naye Vijay ko lekar waha se bahar nikla. Ab yeh Vijay woh purana wala Vijay nahi raha hain. Ek bohut bada badlaav aaya hain usme.

Ab Vijay jeevan mein kuch ban kar dikhana chahta hain. Ab usme jeevan mein kuch kar dikhane ki, kuch haasil karne ki iccha jaag gayi hain. Aur woh apne maata-pita ka aur apne Pankaj Sir ka naam roshan karna chahta hain. Us din ke baad se, Vijay ne apne dincharya mein kuch badlaav kiye. Ab woh roz subah uthkar Yoga karta hain aur College khatm hone ke baad woh roz do ghante library mein bitata hain. Library mein woh alag-alag kitaabein padhta rehta hain. Dheere-Dheere uska gyaan badhne laga. Woh ek baat samajh chuka tha, ki gyaan hee shakti hai aur ek agyani aajeevan udas rahega.

Kuch mahino baad Vijay ke College mein Campus Placements shuru hue. Vijay ne kai companies mein interviews diye, par uska kahi par bhi selection nahi hua. College ke zyadatar students ka selection ho chuka tha aur Vijay abhi tak kahi par bhi naukri nahi pakad saka. Woh thoda sa udaas hua. Woh college mein ek kone mein akela baitha tha. Yeh dekh kar Pankaj Sir ne us se kaha, "Ab yaha se zindagi ki asali pariksha shuru hoti hain. Tumhe kisi bhi haal mein naummid nahi hona hain. Ek baat samajh lo, is duniya mein har taale ki chabi hain." 

College mein campus placements ka daur khatm ho gaya aur Vijay ko abhi tak naukri nahi mili. Woh thoda sa udaas hua.

Pankaj Sir ne us se poocha, "Kya hua Vijay ? Itne udaas kyun ho tum ?"

Vijay - "College mein placements khatam ho chuke hain, aur mera selection hi nahi hua."

Pankaj Sir - "Toh kya hua. Kya yahan par zindagi khatm ho gayi? Kya iske aage tumhe kahi mauka nahi milega?"

Vijay - "Haan par pata nahi ki aakhir kitna samay lag jaayega."

Pankaj Sir - "Dekho bete, zindagi ek jung hain. Aur jung jeetne ke liye, maidaan mein utarna padta hain. Jeevan ki har ek chunautee ka saamna karna padta hain. Aur jo sabse badi bhool, jo tum aajeevan karte aaye ho aur abhi bhi kar rahe ho; woh yeh hain ki, kisi se bhi tum khul kar baat-cheet karte hi nahi ho. Thoda logo se ghulo-milo. Sabke saath utho-baitho. Thoda khule dimaag se baat kiya karo. Tab kuch hoga. Are bhai, log agar tumhe jaanenge nahi, samjhenge nahi toh koi tumhe kaam kaise dega. Jeevan mein aage badhne ka mauka kaha se milega tumhe."

Tab usne socha ki woh companies mein ja-ja kar interviews dega. Vijay apne har interview ke baad, Pankaj Sir ko call karke apne experience ke baare mein batate rehta hain. Aur woh use margdarshan dete rehte hain. Kai mahino ki koshish ke baad aakhir kaar use ek company mein naukri mil hi gayi. Wah bohut khushi se mithai lekar Pankaj Sir ke ghar gaya aur unhe naukri milne ki khush-khabri sunayi. Dheere-Dheere Vijay ki post badhi aur saath hi saath kamayi bhi. Ab usne apni kamayi se ek car bhi kharidi hai. Ab toh uska videsh bhi jaana aana hote rehta hain. Company use kaam se videsh bhejti rehti hain. Lekin abhi bhi usne, kitaab padhna nahi choda. Use jab bhi koi acchi kitaab milti hain toh, woh use kharid leta hain. Aur aksar apne vyast jeevan se samay nikaal kar, un kitabon ko padhte rehta hain. Vijay ko jab bhi mauka milta hain, woh Pankaj Sir se milne ke liye zaroor jaaya karta hain aur woh aaj bhi uska maargdarshan karte rehte hain.

               

                                                         - Ved Vineet Gautam