Pehchan

Rajeev ek call centre mein naukri karta hain. Woh ek mehnati ladka hain. Call Centre mein uske kai dost hain. Woh ek simple sa ladka hain. Office mein uske kai dost hain. Office mein doston ke saath, kai tarah ki desh duniya ki baatein bhi hoti hain. Ek baar ki baat hain ek dost ka Birthday tha. Woh sab log office ke canteen mein Birthday manane ka plan banaya. Cake Cutting hua sab logon ne ek dusre ko Cake khilaya aur us dost ko dher saari shubkamnaye di gayi. 

Tabhi Rajeev ko ek call aaya. Usne Call receive kiya aur do second ke baad hi kaat diya. Tab Anil ne pucha, "Kiska Call Tha ?"

Rajeev - "Customer Care ka."

Anil - "Tabhi tumne call do second mein hi kaat diya." Aur sab hasne lage. 

Tab Rohan ne kaha, "Customer Care Call yani ki Call Centre se call aaya tha."

Rajeev - "Haan."

Rohan - "Kitni ajeeb baat hain na, hum log ek Call Centre Executive hokar, dusre Call Centre Executive ka call kaat dete hain."

Rajeev - "Tum kehna kya chahte ho ?"

Rohan - "Hum yahan naukri karte hain. Yeh kaam hamari rozi-roti hain aur isi kaam se humara ghar chalta hain. Koi kam kamata hain, toh koi zyada. Lekin, filhal yahi humari pehchan hain."

Rajeev - "Baat ko ghumao phirao mat Rohan. Mudde pe aao."

Rohan - "Kya pata woh kisi Call Centre mein sales team ka ho aur shayad woh isi ummed mein tumhe call kiya ho ki, shayad kuch sales ho jaaye toh meri naukri bach jaaye ya mujhe thoda incentives mil jaaye. Thodi aur zyada kamayi ka raasta khul jaata shayad."

"Hum sab log bhi yahi karte hain. Aaj us call mein us anjaan shaks ki sirf aawaz thi, sach toh yeh hain ki tumhe call tumne hi kiya tha."

 "Mujhe bhi roz aise hi call aate hain. Main bhi call kaat deta hoon. Main roz khud ko call karta hoon is ummeed mein ki shayad, aaj main khud ki madad kar loon aur main roz khud ka call kaat deta hoon, yeh soch kar ki mera waqt barbaad na ho." 

Rohan ki baat ki gehrai ab sab samjhne lage. Kuch seconds ke liye sabhi chup the. Tabhi usme se ek dost Arjun ne kaha, "Hum kar bhi kya sakte hain ?"

Rohan - "Yahi toh baat hain. Hume apni zindagi ka kuch pata nahi hain. Humne kuch socha hi nahi ki, aage hume karna kya hain. Aur agar humne bhavishya ke baare mein soch kar rakha bhi ho, tab bhi hume yeh nahi pata hain ki hume kounsa maarg chunna chahiye ya hum aise kounse kadam uthaye jis se ki hum apni manzil tak pahuch sake. Main toh yeh nahi keh sakta hoon ki, sab log bhatke hue hain. Lekin, haan zyadatar logon ka yahi haal hain. Sapney toh humne dekh liye, lekin use poora kaise kiya jaaye, hume yeh hi nahi pata hain." 

Ab sab log ekdum sunn khade the. Maano jaise ki sabko bohut ghera jhatka pahucha ho.

Sameer - "Zara socho. Purane zamane mein jab koi technology nahi thi, tab ek se badhkar ek Raja, Baadshah aur Yoddha hue. Jinhone duniya ko kaamyabi ka ek udaharan diya. Aur woh log maanav jaati ke liye prerna ka strort ban gaye. Humari tarah toh woh log bhi insaan hi the. Unke jeevan mein bhi yahi 24 ghante the. Lekin woh log aasmaan ki bulandiyon ko chu gaye aur hum kuch bhi nahi hain." 

Rohan - "Yahi toh baat hain. Hum hain hi kya. Aakhir humari pehchan kya hain. Hum sirf ek naukar hain. Ek padhe-likhe naukar."

Sameer - "Lekin hum aisa kya kare, jis se ki humari ek alag chavi bane. Is duniya mein humari ek alag pehchan bane?"

Rohan - "Shayad uske liye hume kuch aisa karna hoga, jo aaj tak nahi hua ho. Aur jo aaj tak hua bhi hain woh bhi karke hum apni ek alag pehchan bana sakte hain. Bas usi kaam ko apne tareeke se karke. Jo humara apna ek unique tareeka ho." 

Rajeev - "Lekin aisa kya kare hum? Aur us kaam ko aakhir kis tarah se kare hum?"

Rohan - "Yahi toh hume pata lagana hain. Aur na jaane aakhir kitne baar, haar ka saamna bhi karna pade hume. Lekin hume lagatar khud ko motivate karte rehna hoga, taaki hum aur behtar bante jaaye. Hum jo bhi kaam karna chahte hain ya jis bhi field mein naam kamana chahte hain, us field ke sabhi diggaj logon ke jeevan ke safar se hum seekh sakte hain. Aur agar koi sahi guru mil jaaye, toh uska maargdarshan lekar hum us field mein apne pair jama sakte hain."

Rajeev - "Humare mata pita ne itna kuch kiya hain humare liye. Bachpan mein sabhi maa-baap yahi kehte hain ki bada hokar humara ladka bohut naam kamayega. Aur zyadatar log, yahi bahana banate hain ki zindagi ki bhaag daud mein hum apne sapno ko poora karne ke liye waqt hi nahi nikaal paaye." 

Anil - "OK. Dekho hum sab yeh toh jaante hi honge ki hume kya karna hain. Lekin hum yeh nahi jaante hain ki woh kaam kis tarah karna hain. Ek baar ke liye yeh soch lo ki agar hum fail bhi hue toh kuch seekh lenge aur us seekh ko dhyaan mein rakhte hue ek nayi planning karke dubara koshish kare toh shayad hum safal ho sakte hain. Aur haan safalta itni jaldi humare haath nahi lagegi. Uske liye kai baar hume shayad aundhe muh girna pade, lekin hume nirantar prayas karte rehna hoga."

Ab in chaaron doston ne tay kar liya hain ki woh naukri ke saath hi saath kuch na kuch khud ka shuru karne ka prayas karenge. Phir charon wahan se chale gaye aur floor par pahuche. Sabhi apne-apne computer ke saamne baithe aur calls lena dubara shuru kiya. Shift khatam hone ke baad, chaaron apne-apne ghar chale gaye. Raat bhar veh log yahi sochte rahe ki kya kiya jaaye. Ab sabhi dost khud ki khoj mein nikal pade the.

Ab roz yeh sab ghar pahuchte aur net par kuch na kuch search karte rehte. Agle din office pahuchte aur ek saath break lekar office ke canteen mein milte. Canteen mein baithkar sabhi discussion karte unhone pichli raat kya prayas kiya ya kya search kiya internet par jis se ki woh, khud ko jaan sake. Yeh silsila do mahino tak chalta raha. Phir aakhir kaar sabhi ek nishkarsh par pahuche. Rajeev ne tai kiya ki woh writer banega. Anil, Rohan aur Sameer ne tai kiya ki woh businessman banenge. Teeno hi alag-alag tarah ka business karna chahte the. 

Kai mahino tak research karne ke baad unhe dheere-dheere idea aane laga ki aakhir, woh kaise apni manzil tak pahuch sakenge. Ab sabhi apne-apne kaam par lag gaye. Khud ki pehchan banane ke is safar mein in chaaron ki soch mein bohut badlaav aaya. Zindagi ko dekhne ka nazariya badalna bhi shuru ho gaya tha. In ladko ko apne jeevan se badi ummiden thi. Kai mahino tak koshish karne ke bawajood inke haath mein kuch nahi laga. Dheere-Dheere yeh ladke depression ka shikaar hone lag gaye the. Ghar wale jab bhi inke tension ke baare mein sawaal karte toh, yeh bas yahi kehte ki office mein kaam badh gaya hain, toh thoda sa thak jaa rahe hain. 

Aakhir mein inhone motivational videos ka sahara liya. Jab bhi in logon ko apna bhavishya andhakar mein dikhayi deta, tab yeh log na sirf motivational videos dekhte, balki ek dusre ko forward bhi karte rehte the. 

Aaj dedh saal beet gaye aur ab jaakar in charon ko apne-apne kaam mein kamyabi ki dundhli si raah dikhayi dena shuru ho gayi thi. Inke is andhiyare jeevan mein, in ladko ko ummed ki kiran kahi na kahi dikhayi de rahi thi. Kai freelancing websites par in charon ne pehle se hi apna a/c khol rakha hi tha aur apply bhi pehle se hi kar rahe the. Aakhir kaar in charon ladko ko ek chota sa project haath laga. Sabhi apna-apna kaam poora kiya aur sabhi ne thodi si kamayi bhi ki. Kisi ne 2,000 Rupay toh kisi ne 3,000 Rupay. Haalanki sabse pehli kamayi Rohan ki hui thi aur jab yeh baat, baaki doston ko pata chali toh woh sabhi bohut khush hue the. Rohan ne 2,500 Rupay kamaye the. 

Charon ladko ke ghar wale unki tarakki dekhkar behad khush the aur ab in ladkon mein din-ba-din atmavishwas badhta jaa raha tha. Ab yeh ladke har mahine apne skills se kuch na kuch kama rahe the. Tabhi bazaar mein mandi ka daur aa gaya. Mandi ne dastak dete hi kai logon ki naukri khaa gayi, jisme se yeh charon dost bhi the. 

Rajeev - "Ab kya karein hum ?"

Sameer - "Naukri bhi gayi aur sapne ? Unhe kaise poora karein ? Sapno ka toh kuch pata hi nahi hain ki aakhir unka ghar hain kaha par ?"

Anil - "Haan yaar kuch samajh mein bhi nahi aa raha hain ki zindagi aakhir jaa kaha rahi hain. Kya hum kabhi apni manzil paa bhi sakenge ? Kya humara khwab sirf ek vaham hain ?" Yeh kehte hi Anil ki aankhon mein aasun aa gaye. 

Rohan (Rote Hue) - "Aaj hum ek kasam khaate hain, chahe kuch bhi ho jaaye, chahe humari zindagi hi khatam kyun na ho jaaye lekin, hum aakhir tak koshish karte rahenge. Zindagi mein chahe kitni bhi badi se badi mushkil kyun na aa jaye, chahe kitna bhi bada pahad kyun na toot jaaye, chahe hum daldal mein hi kyun na dhans jaaye, hum apni manzil ko paane ki koshish aakhri saans tak karenge. Aur ek dusre ka saath bhi kabhi nahi chodenge." 

Yeh charon ek dusre ke gale mile aur jee bhar kar roye.

Zindagi mein musibat jab bhi aati hain toh poori baarat saath lekar aati hain. Anil ke pita ko heart attack aaya aur unhe aspataal mein bharti karana pada. Sabhi dost aspataal pahuche aur un sabne use  bhaavanaatmak sahaara diya aur saath hi saath yeh bhi yaad dilaya ki aakhir jeevan mein uska lakshya kya hain. Anil se sabhi ne vaada liya ki woh kisi bhi haal mein nahi tootega. Kuch paise Anil ke paas the, toh kuch madad baaki teeno doston ne bhi ki thi aur toh kuch madad rishtedaron ne ki. Kuch dino ke ilaaj ke baad Anil ke pita ki tabiyat mein sudhaar aaya aur ek mahine baad unhe aspataal se discharge mila. 

Yeh ladke apne liye naukri dhoondhna dubara shuru kiye. Charon ko alag-alag company mein naukri lag gayi aur freelancing se toh thik thak kamayi ho hi rahi thi. Kyunki ab mulakat ho nahi paa rahi thi, isiliye, Whatsapp messenger par daily chat karte rehte the yeh sab log aur ek dusre ke jeevan aur unke jeevan ke sangharsh ki jaankari lete rehte the. 

Poore teen saal ke sangharsh ke baad, aakhir kaar ek publication house ne Rajeev ki scripts ko pasand kiya aur use approve bhi kiya. Ab Rajeev apni kitaab likhne ke kaam mein lag gaya. Use us publication house se acchi moti rakam milne ki aasha hain. Anil ne online shopping ka business start kiya hain. Rohan ne khud ka software banaya hain aur Sameer ne khud ka online game create kiya hain, jo ki google play store par se aasani se download kiya ja sakta hain. Yeh charon ladke apne-apne vyavasaay mein, mahine ka kariban 50,000 rupaye kamana shuru kar diye hain. Aur agar isi tarah mehnat karte rahenge toh aur aage badh sakenge. In charon ladkon ke parivaar ko inki ab tak ki upalabdhiyon par naaz hain. Aur na keval parivaar balki, inke rishtedaar aur parivarik mitron ko bhi in ladko se badi aashayein hain.

Aaj bhi in ladkon ko apne jeevan se dher saari ummeedein hain aur inme abhi bhi aage badhne ki wahi chah hain. Yeh charon ladke dusre naujawano ka hausla afzai bhi karte rehte hain. Yeh sabhi ladke ek adrishya manzil ki talaash mein daud rahe hain. In ladko ka maan na hain ki, jeevan mein koi bhi lakshya antim nahi hota hain. Ek lakshya prapt karne ke baad yeh apne liye ek dusra lakshya tay karte aur us lakshya ko poora karne ke liye nirantar prayaas karte rehte hain. 

             - Ved Vineet Gautam