Waqt

Vijay apne maata-pita ka eklauta ladka hain. Woh ek factory mein naukri karta hain. Woh roz subah uthkar, tayyar hokar naukri par jaata hain aur shaam mein kaam khatm karke apne ghar aa jaata hain. Woh ek plastic factory mein, quality department mein kaam karta hain. Uski factory ke bahar ek vada pav ka thela hain. Ek aadmi us thele par vada pav bechta hain. Uska naam hain, Champalal. Woh aksar Champalal ke thele par Vada Pav khate rehta hain.

 Ek din shaam mein, shift khatam hone ke baad woh jab apni factory ke bahar nikala tab usne dekha ki Champalal ke thele par ek baccha Vada Pav beach raha hain. Vijay waha par gaya aur usne Champalal se ek Vada Pav manga. Phir usne Champalal se yuhi puch liya, " Champalal yeh Baccha koun hain ?"

Champalal - "Yeh mera beta hain sahab."

Vijay - "Tumhare kitne bacche hain ?"

Champalal - "Bas yahi ek hi hain."

Vijay - "School jaata hain yeh ?"

Champalal - "Haan. Par abhi filhal iske school ki garmi ki chuttiyan chal rahi hain toh mere saath rehkar kaam seekh raha hain."

Vijay - "Beta aapka naam kya hain ?"

"Kunal naam hain mera." Bacche ne kaha.

Vijay - "Tum apni zindagi mein kya ban na chahte ho ?"

Kunal - "Main aapke jaisa naukri karne wala aadmi banunga bada hokar."

Vijay - "Good." Vada Pav khaane ke baad Vijay waha se chala gaya. 

Ek din ki baat hain, Vijay ne baithe-baithe socha ki agar woh kuch aisa kaam shuru kare, jisse ki woh thoda zyada kama le toh woh apne jeevan mein aage badh sakta hain. Phir usne socha ki woh online freelancing ka kaam shuru karega. Woh online teaching ka kaam karna chahta tha. Usne ek website par apna resume bheja aur online interview diya. Lekin woh reject ho gaya. Vijay lagatar online interviews deta raha aur aakhir kaar use ek website ne ek freelance lecturer ke taur par hire kar liya. Kuch mahino ki mehnat ke baad Vijay ne online kamana bhi shuru kar kiya. Dheere-Dheere uski kamayi bhi badhi. Vijay ki tarakki se uske ghar wale behad khush the. Vijay ki ab dugna kamayi ho rahi thi. 

Ek din ki baat hain, Vijay Champala ke thele par gaya, aur usne us se kaha, "Maine online tution lena shuru kiya hain. Agar tum chaho toh Kunal ko usme join karwa sakte ho. Uski padhai sudhar jaayegi. Bas roz ek ghanta session attend karna hain, aur woh bhi shaam ke waqt mein."

Champalal - "Us se kya hoga Sahab ?"

Vijay - "Uska gyaan badhega. Aage chalkar aachi naukri bhi mil jaayegi."

Champalal - "Thik hain Sahab. Jaisa aap kahiye."

Vijay - "Smartphone hain tumhare paas ?"

Champalal - "Woh kaanch wala dabba na ?"

Vijay (Hanste Hue) - "Haan wahi kaanch wala dabba. Use smartphone kehte hain Champalal."

Champalal - "Haan hain Sahab. Bas ek minute." Usne apni jeb se phone nikaala aur Vijay ko diya. Vijay ne ek website mein Kunal ka a/c banaya aur bina Champalal ko bataye online session ki fees bhi bhar di. 

Vijay - "Aaj raat ko 9 baje use online aana hain."

Champalal - "Thik hain Sahab."

Vijay waha se chala gaya. Us din Kunal ne online session attend kiya. Agle din office ka kaam khatam hone ke baad, woh Champalal ke thele par gaya aur usne Kunal se pucha, "Session kaisa laga ?"

Kunal - "Accha tha."

Vijay - "Interest aa raha hain tumhe ?"

Kunal - "Haan."

Vijay - "Good."

Kuch din beete. Kunal ka knowledge badhne laga aur usme improvements bhi aana shuru hua. Champalal bohut khush tha aur usne Vijay ka kai baar shukriyada bhi kiya.

Sab kuch aacha chal raha tha. Champalal ne Kunal ke classes ki baat jab apne padosi ko batayi, toh usne kaha ki iski har mahine ki fees bhi bharni padti hain. Champalal ne socha ki, 'aakhir yeh kitna bhala aadmi hain. Mujhe bina bataye isne mere bete ki fees bhi bhar di. Bhagwaan iska bhala kare.' Ek din achanak se khabar aayi ki, factory band hone wali hain. Kyunki, factory ke maalik ne ghotala kar diya hain aur woh shahar chod kar bhaag chuka hain. Ab Vijay ki kamayi sirf online tuitions par hi nirbhar ho chuki thi. Jisse jaise-taise uska guzara ho raha tha. Vijay thoda sa pareshan ho gaya tha. Aur usi waqt Kunal ka online classes ke monthly subscription ka package khatam ho chuka tha. Jab ek do din session login nahi hua aur website payment ke liye puchne lagi, tab Champalal ne Vijay ko call lagaya. Vijay ne call uthaya aur bola, "Hello."

Champalal - "Namastey sahab. Kaise ho aap ?"

Vijay - "Koun bol raha hain ?"

Champalal - "Main Champalal bol raha hoon sahab."

Vijay - "Haan bolo Champalal."

Champalal - "Kaise ho aap sahab ?"

Vijay - "Main thik hoon. Tum kaise ho ?"

Champalal - "Main bhi thik hoon Sahab."

Vijay - "Kunal kaisa hain ?"

Champalal - "Woh bhi thik hain sahab."

Vijay - "Aur tumhara kaam dhandha kaisa chal raha hain?"

Champalal - "Thik chal raha hain sahab."

Vijay - "Chalo badhiya hain."

Champalal - "Sahab aapse ek baat bolni thi."  

Vijay - "Haan bolo."

Champalal - "Woh Kunal ke classes ka paisa khatam ho chuka hain."

Vijay - "Classes ka ?"

Champalal - "Woh jo aap mobile mein Kunal ko class mein dakhila karaye the."

Vijay samajh gaya ki woh online classes ki baat kar raha hain. 

Vijay - "Haan Haan woh online classes ki baat kar rahe ho na tum. Haan bolo kya hua hain ?"

Champalal - "Ji woh uska paisa khatam ho chuka hain. Toh woh classes kar nahi paayega."

Vijay - "Thik hain tum tension mat lo main bhar dunga uska paisa. Thoda sa time lagega mujhe bas."

Champalal - "Agar jaldi bhar dete toh Kunal ke liye accha hota sahab."

Vijay - "

"Bhagwaan aapka bhala kare sahab."

Vijay - "Darasal meri naukri jaa chuki hain, toh mujhe thoda sa waqt lagega paisa arrange karne mein."

Champalal - "Thik hain sahab jab aap payment kar sakte ho tab kar dijiyega. Aur ghar mein sab thik hain ?"

Vijay - "Haan Champalal sab thik hain."

Champalal - "Thik hain sahab main phone kaatta hoon. Namastey sahab."

Vijay - "Thik hain Champalal."

Phir Champalal ne phone kaat diya. Jaisa Vijay ne Champalal se vaada kiya tha, usne shaam mein online classes ki payment kar di.

Ab Vijay din bhar interview deta tha aur shaam mein online sessions leta tha. Online classes se uski thik thak kamayi ho rahi thi. Jaise Taise bas namak roti nikal rahi thi. Kai dino tak interviews dene ke baad bhi use kahi job nahi mili. 

Ek din Vijay shaam mein apne ghar par hi baitha hua tha. Tabhi uske flat ki door bell baji. Usne darwaza khola, toh dekha ki Champalal bahar khada hain. Vijay use dekh kar hairaan tha, phir usne Champalal ko andar aane ke liye kaha. Champalal andar aaya. Vijay ne use sofa par baithne ke liye kaha. Champalal Sofa par baitha. Vijay uske saamne baitha.

Vijay - "Bolo Champalal."

Champalal - "Sahab kaise ho aap ?"

Vijay - "Main thik hoon. Tum kaise ho ?"

Champalal - "Thik hoon sahab."

Vijay - "Kunal kaisa hain ?"

Champalal - "Woh bhi thik hain."

Vijay - "Tumhara kaam kaisa chal raha hain ?"

Champalal - "Thik chal raha hain sahab. Aapko kahi naukri mili."

Vijay - "Nahi abhi tak toh nahi. Lekin tum Kunal ke classes ke payment ka koi tension mat lena. Main jald hi paisa arrange kar dunga. Tum fikar mat karo."

Champalal - "Main isliye nahi aaya hoon sahab."

Vijay - "Phir ?"

Champalal - "Main bas yeh kehne ke liye aaya hoon sahab ki itne dino tak Kunal ko classes se bohut kuch seekhne ko mila hain aur main bas aapka shukriyada karne ke liye aaya hoon."

Vijay - "Nahi uski koi zaroorat nahi hain."

Champalal - "Main toh aapke liye kuch kar toh nahi sakta hoon. Par phir bhi jab kabhi mere layak kuch kaam ho toh mujhe bataiyega zaroor Sahab."

Vijay ne muskurakar kaha, "Haan zaroor Champalal." Usne socha ki aakhir yeh mere liye kya kar paayega. Yeh khud tang haalat mein chal raha hain aur itni gareebi mein jee raha hain.

Phir Vijay ki maa ne Chai bana kar layi aur un dono ko Chai diya. Dono ne saath mein baithkar Chai pi. Uske baad Champalal Vijay ko namastey karke waha se chala gaya.

Kuch dino baad Vijay ko dusri company mein naukri mil gayi. Woh thoda sa tanaav mukt ho gaya. Salary aate hi usne Kunal ke online sessions ki fees bhar di aur usne Champalal ko keh diya ki Kunal apni online classes dubara shuru kar sakta hain.

Ek din ki baat hain, Vijay apni motorcycle se ghar ki aur aa raha tha. Tabhi uski motorcycle ek truck se takrai aur woh wahi par gir gaya. Sadak par chal rahe logon ne use aspataal mein bharti kiya. Vijay zakhmi ho gaya tha. Akhbaar mein Vijay ki accident ki khabar aayi. Jab Kunal ne yeh khabar padhi toh woh chintit ho gaya aur usne yeh baat Champalal ko batayi. Champalal ne bina deri kiye aspataal pahuch gaya. Woh Vijay ke maa baap se mila aur Vijay ki tabiyat ka haal chaal liya. Tabhi doctor bahar aaye aur unhone bataya ki Vijay ko aur khoon ki zaroorat hain. Vijay ke maa baap ne apna khoon dene ki baat kahi par doctor ne mana kar diya, kyunki woh vridh the. Tab Champalal ne doctor se pucha, "Kya mera khoon diya jaa sakta hain Sahab ko ?"

Doctor - "Haan. Lekin us se pehle hume aapka blood group check karna hoga."

Champalal - "Thik hain."

Doctor ne Champalal ka blood group check kiya aur khushkismati se, uska blood group Vijay ke blood group se match ho gaya. Doctor Champalal ko apne saath lekar gaye aur unhone Vijay ko uska khoon chadhaya. 

Do din baad Vijay ko hosh aaya. Vijay ke pita ne use bataya ki Champalal ne use blood donate kiya hain aur tab jaakar uski jaan bach payi hain. Vijay ne socha ki 'agar aaj yeh na hota toh main shayad bach bhi na paaya hota. Ise hi kehte hain waqt ki taaqat. Jiski main hamesha madad karta raha aaj woh meri aisi madad kar gaya ki main uske is ehsaan ka badla apni zindagi mein kabhi chuka nahi paaunga.' Woh apne aapko uska ehsaanmand maanne lag gaya tha. Use ehsaas hua, ki 'koi bhi aadmi chota ya bada nahi hota hain. Bada toh waqt hota hain. Waqt ek maamuli aadmi ko bhi balwaan bana sakta hain aur ek bade se bade aadmi ko bhi nirbal kar sakta hain. Kuch dino tak Vijay ka ilaaj chalta raha. Uske baad use aspataal se discharge mil gaya. 

Ab Vijay ne apni naukri par jaana phir se shuru kar diya hain. Ek baar Vijay ne socha ki 'Main, ek din waqt nikaal kar Champalal se mil aata hoon. Kunal ko dekhe bhi bohut din ho gaye hain.' 

Kuch dino baad, woh Champalal ke thele par pahucha. Champalal use dekhte hi bohut khush hua. 

Champalal - "Kaise ho sahab ?"

Vijay - "Main bilkul thik hoon."

Champalal - "Abhi tabiyat thik hain ?"

Vijay - "Haan thik hain."

Champalal - "Aapke maata-pita kaise hain ?"

Vijay - "Woh log bhi thik hain."

Champalal - "Chalo accha hain. Vada Pav khaoge ?"

Vijay - "Haan do bana do."

Champalal - "Baithiye Sahab."

Vijay - "Kunal kaisa hain ?"

Champalal - "Woh bhi thik hain. Filhal apne Mama ke ghar gaya hua hain. Kuch dino baad woh wapas aa jaayega. Sahab ab woh aur bhi behtar ho gaya hain. Classes uska bohut accha chal raha hain."

Vijay - "Chalo badhiya hain."

Champalal - "Sahab woh toh accha hua jo aapne uske liye yeh classes lagayi. Aapka bohut ehsaan hain uspar."

Vijay - "Nahi Champalal agar tumne mujhe apna khoon na diya hota, toh, main aaj shayad bach bhi nahi paaya hota."

Champalal - "Kya baat kar rahe ho sahab."

Vijay - "Aadmi bada nahi hota hain Champalal, waqt bada hota hain. Har insaan ko kabhi na kabhi kisi na kisi ke madad ki zaroorat padti hi hain. Aadmi ko khud pata hi nahi hota hain ki kab use kaise kiski madad ki zaroorat pad jaaye." 

Champalal - "Haan sahab."

Tabhi Kunal waha par aaya aur woh Vijay ko dekhte hi bola, "How are you doing Sir ?"

Vijay ne hanskar kaha - "Iam fine Kunal. Aise hi seekhte raho aur aage badhte raho beta."

Tabhi Champalal ne poocha, "Vada Pav laga doon sahab ?"

Vijay (Muskura kar) - "Haan 2 laga do."

                      - Ved Vineet Gautam