Timir

Ravi college mein padhne wala ek naujawan ladka hain. Uske pita ki kapdon ki dukaan thi. Pehle sab kuch thik-thak chal raha tha uske jeevan mein. Lekin market slow down hone ki wajah se uske pita ka business aaj thap pad chuka hain. Brijesh Kumar jo ki Ravi ke pita ka naam hain, woh aaj bohut musibat mein chal rahe hain. Unke sar par laakhon ka karz hain aur duniya bhar ki koshishen karne ke bawajood aakhir kaar unki dukaan bik chuki hain.  

Aaj is parivaar ke jeevan mein keval andhera hi hain. Inka bhavishya khatre mein pad chuka hain. Bhagya bas itna hi accha hain ki aaj keval inka ghar bacha hua hain. Dukaan bikne ke bawajood inka karz abhi tak khatm nahi hua hain. 

Aaj Brijesh Kumar ek kapdon ki dukaan mein hi naukri kar rahe hain. Woh aksar pareshaan rehte hain. Dukaan bik gayi hain, lakhon ka karz sar par hain aur le de kar sirf ek ghar haath mein hain aur woh bhi kab tak rahega pata nahi hain. 

Aaj bhi Brijesh Kumar ko apne parivaar ke liye ek ujjwal bhavishya ki apeksha hain.

Ek shaam pora parivaar saath mein baitha hua tha. Tabhi Ravi ne Brijesh se poocha, "Papa ab aage kya karein hum ?"

Brijesh - "Pata nahi beta. Dekhte hain. Kuch na kuch ho hi jaayega. Tumhara College kaisa chal raha hain ?"

 Ravi - "Thik chal raha hain."

Brijesh - "Tum bas apni padhayi par dhyaan do."

Ravi - "Hmm."

Tabhi Brijesh ko ek call aata hain aur woh waha se uth kar chala jaata hain. Thodi der tak phone par baatein karne ke baad woh wapas aata hain.

Ravi - "Kiska Call tha Papa ?"

Brijesh - "Woh Mathur sahab ka call tha."

Ravi - "Kya keh rahe the?"

Brijesh - "Bas haal chaal liya aur kya."

Ravi - "Unse kuch madad maange aap ?"

Brijesh - "Nahi beta."

Ravi - "Aapne ek baar Mathur uncle ki bohut madad ki thi. Unhe bhi aapki madad karni chahiye."

Brijesh - "Ab unka bhi toh parivaar hain na beta."

Ravi kuch nahi kehta hain. Thodi der tak Ravi, Brijesh ki khamoshi dekhta rehta hain. Phir Brijesh ko uski khamoshi chubhne lagti hain. Aakhir mein Brijesh kehta hain, "Kya hua tumhe ? Achanak se chup kyun ho gaye tum ?"

Ravi - "Papa aapko yaad hoga, ek baar jab Mathur uncle ko paison ki sakt zaroorat thi, tab aapne unhe dus laakh rupaye diye the. Jise woh aaj tak nahi lautaye hain." 

Brijesh - "Haan toh us waqt unki beti ki shaadi thi."

Ravi - "Waqt. Haan Waqt. Waqt jab unka kharab tha, tab humne unke saamne madad ka haath badhaya tha. Lekin, aaj jab hum musibaat ke daldal mein phanse hue hain, tab woh kya kar rahe hain. Papa yahi paise aap agar bachaye hote, toh aaj shayad humare kaam aaye hote."

Brijesh - "Agar hum unki madad nahi bhi kiye hote, toh bhi aaj woh paise humare paas nahi hote. Aaj hum sar se lekar paav tak karz mein doob chuke hain. Ho jaayega kuch na kuch. Kisi aur se baat karenge. Dekhte hain kya hota hain."

  Tabhi inke ghar ka darwaza koi khatkaata hain. Ravi jaakar darwaza kholta hain. 

Ravi - "Namastey Dubey uncle." Dubey - "Kaise ho beta ?"

Ravi - "Thik hoon uncle."

Tabhi darwaze par Brijesh Kumar pahuchte hain, "Namastey Dubey Ji."

Dubey - "Namastey Brijesh Kumar Ji. Kaise ho aap ?"

Brijesh Kumar - "Thik hoon. Aaiye andar aaiye."

Dubey Ji ghar ke andar pravesh karte hain aur Brijesh Kumar unse baithne ka aagrah karte hain. 

Brijesh Kumar - "Are Ravi ki maa zara do cup chai lana. Dekho toh koun aaya hain."

Ravi ki maa - "Namastey Bhai Sahab."

Dubey - "Namastey Bhabhi. Aur tabiyat paani thik hain.

Ravi ki maa - "Ji Bhai Sahab. Aur bhabhi kaisi hain ?"

Dubey - "Thik hain."

Ravi ki maa andar chali jaati hain. 

Dubey - "Dekho Brijesh, main jaanta hoon ki tumne meri bohut madad ki thi ek baar. Aur main tumhara yeh ehsaan zindagi mein kabhi nahi bhoolunga. Lekin aaj main khud koi khaas stithi mein nahi hoon. Nahi toh main kuch kar leta tumhare liye."

Brijesh Kumar - "Main samajh sakta hoon Dubey. Tumhe kisi bhi tarah ki safai dene ki koi bhi zaroorat nahi hain. Aur batao, tumhare bete ka college kaisa chal raha hain ?"

Dubey - "Haan thik chal raha hain."

Tabhi Ravi ki maa chai le aati hain aur dono hi chai pete hain.

Dubey - "Aur Ravi, tumhara college kaisa chal raha hain beta ?"

Ravi - "Thik chal raha hain uncle."

Thodi der tak baat-cheet karne ke baad Dubey wahan se chala jaata hain.

Ravi - "Aag mein ghee daal diye aur chale gaye."

Brijesh Kumar - "Yeh kya bol rahe ho tum ?"

Ravi - "Aur kya kahoon Papa. Yeh karenge humari madad? Inki beti ki shaadi mein inki humne acchi madad ki thi. Aur aaj aaye hain yeh humdardi jatane ke liye."

Brijesh Kumar - "Toh kya ab tum har kisi se ladte phiroge? Musibat humari hain aur raasta bhi hume hi nikalna hain."

Ravi - "Duniya bhale hi kitni bhi daya kyun na dikha de Papa, lekin, log toh peeth peche bas hansi hi udate hain."

Brijesh Kumar - "Tumhare is bachpane par mujhe bada taras aata hain beta. Sabr rakhna seekho. Insaan badi se badi musibat se bhi bahar nikal sakta hain, agar woh dhairya ke aasan par jam kar baithna seekh jaaye toh."

Kai mahine beet gaye, lekin is parivaar ki paristhiti jas ki tas thi. Jaise-Taise bas namak roti nikal rahi thi. Kai baar apne jeevan ke swarn dino ko yaad karke, Brijesh ki aankhon mein aansoon bhar aate the. Woh bas khud ko dilasa dete aur apni himmat badhane ki koshish karte. Woh Ravi ko bhi samjhate ki, "Yeh humare jeevan ka bas ek bura daur chal raha hain, aur yeh bhi kat jaayega. 

Ek baar ki baat hain, Brijesh Kumar roz ki tarah us din bhi apne maalik ke dukaan par the. Dukaan mein ek aadmi daakhil hota hain aur woh dukaan ke maalik se puchta hain ki,"Kya mujhe ek resham ka kapda mil sakta hain?"

Dukaan Maalik - "Haan. Zaroor mil sakta hain."

Woh Brijesh Kumar ko aawaz lagata hain aur use grahak ko resham ka kapda dikhane ke liye kehta hain. Brijesh Kumar us grahak ko tarah-tarah ke resham ke kapde dikha dete hain aur unka acche se prastuteekaran bhi karte hain. Woh grahak resham ke do shirt aur teen saari kharid kar chale jaata hain. 

Dukaan Maalik Brijesh Kumar ko bulata hain, "Brijesh zara yaha aana."

Brijesh - "Jee Maalik."

Dukaan Maalik - "Tumhe resham ke baare mein itni acchi jaankari kaise hain ?"

Brijesh - "Jee woh darasal meri apni kapdon ki dukaan thi. Toh us wajah se mujhe thodi bohut jaankari hain."

Dukaan Maalik - "Toh tumhari dukaan ka kya hua ?"

Brijesh - "Jee woh bik gaya hain toh, uske baad main aapke yahan aaya naukri karne ke liye."

Dukaan Maalik - "Aur ghar ki stithi kaisi hain ?"

Brijesh - "Abhi toh sar par karza hain sahab aur dukaan bhi bik chuki hain meri."

Dukaan Maalik - "Dhairya rakho."

Brijesh - "Jee sahab."

Dukaan Maalik - "Thik hain tum jaa sakte ho."

Ek din dukaan maalik ne Brijesh ko apne paas bulaya aur kaha, "Tumhe Bhagalpur jaana hoga. Hume acche aur naye resham ke kapdon ki zaroorat hogi, jo hume Bhagalpur mein milenge. Tol-Mol kar bhaav lagana aur baaki apni paarkhi nazron se asli maal le aana. Wahan tumhare rehne aur khaane ka intezaam bhi main kar dunga."

Brijesh - "Thik hain sahab."

Do din baad Brijesh Bhagalpur ke liye nikal pada aur usne wahan par kai dukaano ke chakkar lagaye. Aakhir mein usne wahan se resham ke kai tarah ke kapde jaise ki Shirt, Pant aur Saree sab khareede aur ek truck mein sab kuch laad kar dukaan par le aaye. Maalik kapdo ki gunavatta dekh kar bohut khush hue aur unhone Brijesh ki tankhva bhi badha di. Brijesh ne yeh baat jab apne ghar par bataye toh, uski Biwi aur Ravi dono hi bohut khush hue. 

Dheere ghar ki stithi saamanya ho rahi thi magar sar par karz jas ke tas tha. Unke ghar mein thodi si khushiyan aayi. Sab kuch thik thak hi chal raha tha, ki ek din khabar aayi ki dukaan ke maalik ko vyapar mein bohut hi bada jhataka laga aur na chahte hue bhi unhe Brijesh ko naukri se nikaalna pada. Maalik Brijesh ki paristhiti se parichit, aur usne Brijesh se is baat ke liye shama bhi maangi. Brijesh waha se chup chap chala gaya.

Woh paidal apne ghar ke liye nikal pada. Jab woh apne ghar ki aur jaa raha tha, tab woh behad dukhi tha. Yeh peeda us se ab sahi nahi jaa rahi thi. Aankhon ke saamne use keval, andhera hi dikhai de raha tha. Aaj use aisa lag raha tha jaise ki Aasha ki har ek kiran, kisi kaale ghane baadal mein lupt ho chuki ho. Brijesh raaste par ek taraf chal raha tha aur dusri taraf use apna poora jeevan dikhai de raha tha. Aaj uska ateet uske saath-saath chal raha tha. Aisa lag raha tha maano, woh apne ateet ko apne saath lekar, apne bhavishya ki aur badh raha hain. Aakhir kaar woh apne ghar pahucha aur apne biwi aur bete ko yeh buri khabar sunayi. 

Aaj se pehle un dono ne Brijesh ko isse zyada toota hua kabhi nahi dekha tha. Aaj Brijesh ke sabr ka bandh toot chuka tha. Woh chah kar bhi kuch thik se bol nahi paa raha tha. Har ek pal ke saath uske dil ki dhadkan bhi badhti jaa rahi thi. Un dono ne use pehle bed par taik dekar bithaya aur Brijesh ki patni turant kitchen se paani lekar aayi. Ravi ne use paani pilaya aur phir use bed par leta diya. Ravi uska sar dabata aur Brijesh ki patni uska haath malti. Brijesh ke muh se koi aawaz na nikalti. Thodi der baad woh gehri neend mein chala gaya. Ravi ne Brijesh ki dil ki dhadkan jaanchi aur woh thoda sa santusht hua. 

Agle din Subah jab suraj ki kiran Brijesh ke chehre par padi, tab uski neend khuli. Use apna sar halka mehsus ho raha tha. Use aisa lag raha tha jaise ki ek arse baad utha ho. Usne apna muh dhoya aur woh fresh hua. Naashta karne ke baad woh ghar se bahar chal diya. 2 ghante se zyada samay beet gaye aur Brijesh ghar nahi aaya. Dono hi bohut pareshan ho gaye the. Ravi ne Brijesh ko call lagaya. Pehli baar toh phone ki ghanti bajte-bajte kat gayi lekin, koi jawaab nahi mila. Ravi ne dubara call lagaya is baar paanchvi ghanti bajne ke baad Brijesh ne call uthaya. Ravi ne us se baat ki aur woh nischint ho gaya ki woh thik hain. Brijesh ne Ravi se kaha ki use ghar aane mein deri hogi. 

Aakhir kaar Brijesh shaam mein ghar pahucha. Ghar pahunch kar usne haath muh dhoya aur thoda sa paani piya. Phir woh bed par baitha. 

Brijesh, "Main Dubey se milne gaya tha."

Ravi - "Toh aapki kya baat hui waha par."

Brijesh - "Woh meri madad karne ke liye tayyar hain."

Ravi (Gusse Mein) - "Toh ab aap Dubey ke yahan par naukri karoge? Ab bas yahi din dekhna baaki reh gaya tha kya humare liye."

Brijesh - "Nahi woh baat nahi hain."

Ravi - "Phir kya baat hain ?"

Brijesh - "Dubey ne mujhe ek aadmi se milvaya jo MP se kapde laata hain aur main in kapdon ko market mein bechunga toh mujhe 25 % profit milega."

Brijesh ne Ravi ko 500 rupaye ka note thamaya aur us se mithai laane ke liye kaha. Ravi ne mithai layi aur sabhi ne mithai khaayi. Kaafi lambe samay baad us ghar mein khushiyan aa rahi thi. Ravi ko ehsaas ho raha tha ki usne Dubey ko pehchane mein bohut badi galti ki. Aaj Ravi khush bhi tha aur naaraz bhi. Woh apne aap se naaraz tha. Woh kahi na kahi apne aap ko Dubey ka gunehgar maan raha tha aur apne is badi galatfehmi par use khud par gussa bhi aa raha tha. 

Dheere-Dheere Brijesh ke pair dhandhe mein dubara jamna shuru ho gaye the. Ab woh logon se liya hua karza chukane mein bhi safal ho raha tha. Kaafi logon ke karze usne chuka diye aur kaafi baaki hain. Ummed hain ki dheere-dheere sab kuch thik ho jaayega. Lekin haan kam mein hi sahi lekin Brijesh ka vyapar dubara chalna shuru ho chuka tha. 

                       - Ved Vineet Gautam