Sangharsh

 Parikshit Khurana peshe se ek vyapaari hain. Woh apne maata-pita ka iklauta ladka hain. Parikshit ke pita ka naam, Ajit Khurana aur maata ka naam, Nandini Khurana hain. Parikshit abhi tak avivaahit hain. Parikshit bachpan se hi tez aur honhaar ladka raha hain. Do saal pehle hi uska graduation poora hua tha aur keval ek saal tak naukri karne ke baad, Parikshit ne khud ka online kaarobar shuru kar diya tha. Woh ek e-commerce company ka maalik hain. 

Parikshit ka vyapaar bohut acche se chal raha hain. Usne apne maata-pita ke liye ek ghar kharid liya, ek Car kharid liya. Aksar woh bade-bade hotelon mein apne maata-pita ko dinner karwaata hain. Duniya bhi uski kabiliyat ki badi tareef karti hain. Naujawan ladke Parikshit ko apna aadarsh maante hain. Ek hisaab uske paas zindagi mein sab kuch hain. Bohut kam umar mein hi, usne naam, daulat, shoharat, izzat sab kuch kamaa liya tha. Kisi cheez ki kami nahi thi, Parikshit ki zindagi mein. 

Ek din ki baat hain. Parikshit apne office mein baitha hua tha. Har mahine ke aakhir mein woh hamesha apni company ki sales report ki jaanch karta hain. Taaki, use pata chale ki har mahine use kitne ka nafaa-nuksaan hua.

Woh apne cabin mein baitha apne sales report ki jaanch kar raha tha. Woh ek-ek panna bade dhyaan se dekh raha tha. Woh aksar badi baariki se sales report ki jaanch karte rehta hain. 

Tabhi Parikshit ki nazar ek panne par padi jismein dikh raha tha ki koi ek product ki sales zyada nahi hui hain. Usne apna Computer chalu kiya aur usmein woh us product ki sales ke baare mein jaankari ki jaanch karne mein lag gaya. Dekhte Hi Dekhte do ghante beet chuke the aur ab bhi woh usi product ki jaankari ki jaanch jaari thi. Us product ke sales ki haal dekh kar Parikshit ke paseene chut gaye. Us product ka uski Company mein niryaat toh bohut zyada hua parantu, uska aayat naa ke barabar hua. Parikshit ne socha, 'Saara maal godaam mein padaa hua hoga. Jaa ke godaam ka haal dekh aata hoon.' Woh apni kursi se utha aur phir agle hi pal woh baith gaya. Usne socha ki, 'Baaki saare products ki sales ki bhi jaanch kar hi leta hoon. Uske baad, itminaan se godaam mein jaaunga.' 

Parikshit ne apni jaanch-padtaal jaari rakhi. Kaafi samay beet jaane ke baad, aakhir mein woh is nishkarsh par pohuncha ki zyadatar products ke orders nahi mil rahe hain aur jin products ke orders mil bhi rahe hain, usmein se bohut saare orders return bhi ho gaye. Jis wajah se dher saare graahakon ka paisa wapas dena pada. Woh samajh chuka tha ki, uska vyapaar ghaate mein chal raha hain. Is baat ka andaaza lagte hi, woh kaafi ghabra gaya. Lekin, Parikshit ne dhairya se kaam lena zyada uchit samjha. 

Sabse pehle woh ek glass paani peeya. Phir usne apni tie dheeli ki aur apne shirt ka upaari button khol diya. Uske baad, usne Cabin ka AC tez kar diya. Woh apna sar pakad kar baitha hua tha. Woh kuch samajh nahi paa raha tha, ki ab woh aage kya kare. Woh sochne ka prayaas kar raha tha. Lekin, woh sochne mein vifal ho raha tha. Aisa lag raha tha maano ki, uska dimaag jawaab de chuka tha. Jaise ki uski sochne samajhne ki shakti khatam ho chuki thi. 

Shaam ho chuki thi aur office band hone ka samay ho chuka tha. Daftar ke sabhi karmachari apne-apne ghar ki aur ravaana ho chuke the. Lekin, woh apni kursi se hila tak nahi. 

Kuch der baad, Parikshit ka phone baja. Usne apni jeb mein haath daala aur apna phone bahar nikaal kar dekha ki, call uske pita ka tha. Usne phone receive kiya aur behad dabi hui aawaz mein kaha "Hello." 

Parikshit Ke Pita - "Hello Parikshit."

Parikshit - "Haan Papa."

Parikshit Ke Pita - "Beta kaha ho tum ?"

Parikshit - "Papa woh main office mein hoon."

Parikshit Ke Pita - "Lekin tumhara office toh do ghante pehle hi band ho jaata hain na ?"

Parikshit - "Haan woh thoda kaam tha."

Parikshit Ke Pita - "Kaam zyada hain kya beta ?"

Parikshit - "Haan Papa."

Parikshit Ke Pita - "Thik hain toh tum sambhalkar ghar aa jaana. Haan beta ?"

Parikshit - "Thik hain Papa."

Parikshit Ke Pita - "Ab main phone rakhta hoon beta."

Parikshit - "Thik hain Papa."

Parikshit Ke Pita phone kaat dete hain. Woh dobaara gehri soch mein doob jaata hain. Kaafi der tak sochne ke baad bhi use kuch samajh mein nahi aata hain. Aakhir mein ek khayal uske dimaag mein aata hain. Woh sochta hain, 'Filhal ghar chala jaata hoon. Baaki kal se sochta hoon ki aage kya karna hain. Aage jo hoga, dekha jaayega.' 

Woh apni kursi se uthta hain aur apne Cabin se bahar nikalta hain. Poore Office mein sannata chaaya hua tha. Woh sochta hain, 'Agar kal ko Company band pad gayi, toh itne saare karmachari berozgaar ho jaayenge. Un sabhi logon ki rozi-roti cheen jaayegi, agar maine himmat har li toh. Filhal musibat sar par hain. Himmat baandh kar chalna padega. Main aakhir tak ladunga. Main tan kar khada rahunga.' 

Phir Parikshit chalte hue parking mein jaata hain. Use apni Car dhoondhne mein zyada dikkat nahi hui, kyunki office ke sabhi karmachari apne-apne ghar pehle hi jaa chuke the. Jis wajah se parking poori tarah se khaali tha. Woh apni Car mein baithta hain aur use start karta hain. Phir woh apni Car chalate hue, parking lot ke bahar nikalta hain aur baayi aur apni gaadi ghumata hain. Agle hi pal uski gaadi sadak par pohuch jaati hain. Kuch dur tak chalne ke baad, sadak par signal lagta hain. Woh apni Car rokta hain. Signal do minute ka tha. Woh sochta hain, 'Kya yaar ab do minute tak intezaar karna hoga.' Woh apni Car band kar deta hain. 

Parikshit yahan-wahan dekh raha tha, ki tabhi uski nazar sadak ke kinare khade ek buzurg aadmi par padti hain. Woh vridh aadmi sadak ke kinaare khadaa apna mobile kisi number par mila raha tha. Yeh dekh Parikshit sochta hain, 'Shayad yeh aadmi apne bete ya beti ka intezaar kar raha hoga. Jo ki use lekar ghar wapas jaayenge. Shayad uske paise khatam ho gaye honge. Ya kya pata, woh wapasi ke paise ghar se le jaana hi bhool gaya ho. Waise bhi, aakhir is umar mein kaha aadmi ko sab kuch yaad rehta hain bhalaa.' Tabhi signal khulta hain aur woh apni Car start karke wapas apne ghar ki aur ravaana hota hain. 

Raaste bhar uske zehan mein bohut saare khayal aate hain. Insaan ko zindagi mein jab koi bhi raasta nazar nahi aata hain, tab apne mann ko tasalli dene ke liye woh ek daarshanik ban jaata hain. Aisa hi kuch Parikshit ka haal tha. Woh swaym ko samjhane ke prayaas mein juta hua tha. Woh sochta hain, 'Kya zindagi mein utaar-chadhaav nahi aate hain ?' 'Kya jeevan mein keval safalta hi safalta hoti hain ?' 'Kya is sansaar mein aisa koi vyakti nahi, jisne duvidhaa saamna na kiya ho ?' 

Parikshit ke mastishk mein ek yudh shuru ho chuka tha. Kabhi uske dil mein dukhad baatein aati, toh kabhi aapda ko avsar mein badalne ki soch uske mann mein aati thi. Dekhte Hi Dekhte woh kab apne ghar pohunch gaya, use khud pata nahi chala. Ghar pohuchte hi, usne apni Car park ki aur jaise hi woh apni Car se bahar aaya usne dekha ki ghar ka darwaaza khul raha hain. Darwaaza khulte hi, usne apne pita ko dekha. Woh Parikshit ko dekh muskura rahe the. Parikshit apne pita ke paas gaya. Tabhi Parikshit ke pita ne usse kaha, "Ghar aane mein badi der laga di beta ?"

Parikshit - "Haan Papa. Woh main thoda kaam mein vyast tha."

Parikshit Ke Pita - "Aao. Andar aao."

Parikshit ghar ke andar aata hain. Ghar ke andar aate hi, woh apne kamre mein jaata hain aur apne bed par leat jaata hain. Kuch hi shan mein, use neend lag jaati hain. Kaafi der baad, uski neend khulti hain. Woh apne bed se uthta hain aur bathroom mein jaakar, woh apna muh dhota hain. Phir woh apne kamre se bahar nikalkar Hall mein aata hain. Parikshit ko dekhte hi, uske pita muskurate hue kehte hain, "Aao beta baitho."

Parikshit apne pita ke saamne baith jaata hain. 

Parikshit Ke Pita - "Toh thakaan dur hui ki nahi ?"

Parikshit - "Haan Papa. Poori tarah se dur ho gayi."

Parikshit Ke Pita - "Lagta hain aaj office mein kaam zyada tha." 

Parikshit - "Haan thoda zyada toh tha."

Tabhi Parikshit ki Maa aati hain. Unke haath mein ek tray tha. Woh tray neeche rakh deti hain. Tray ki taraf dekhte hi, Parikshit muskura deta hain. Woh behad khushi se kehta hain, "Are vaah. Gaajar Ka Halwa ?"

Parikshit Ki Maa - "Haan. Aaj khaas tumhare liye hi banaya hain."

Parikshit Halwa uthata hain aur ek chamach khaata hain aur kehta hain, "Bohut hi swaadist Halwa bana hain Mummy."

Parikshit Ke Pita - "Are Baba aur khaao."

Parikshit khaana shuru kar deta hain. Tabhi Parikshit ke pita kehte hain, "Beta kya tumhe pata hain, jab main is shehar mein aaya tha, tab maine driver ki naukri ki thi."

Parikshit - "Haan Papa acche se pata hain. Aapke jeb mein keval sau rupaye the aur aapne kai-kai din keval mungfali kha-kha kar guzaare hain."

Parikshit Ke Pita - "Beta bina kadi mehnat aur dhairya ke kuch haasil nahi hota hain."

Parikshit - "Sab kuch haasil karne ke baad, jab aapki aankhon ke saamne aapka sab kuch jaata hua dikhe toh ? Tab kya kare ?"

Parikshit Ke Pita - "Beta yeh jeevan hain. Bante-Bigadte rehti hain. Yeh jeevan ek sangharsh hain aur yeh sangharsh zindagi ki aakhri saans tak chalte rehti hain. Aadmi ko lagatar ek se ek kathin pareekshayein deni padti rehti hain. Itna aasaan nahi hota hain zindagi jeena."

Parikshit sochta hain, 'Papa bilkul sahi keh rahe hain. Agar main is musibat se bahar nikal bhi gaya, toh kya aage chalkar koi aur musibat ka saamna nahi karna padega ? Ek khatam hogi toh dusri aayegi aur silsila zindagi bhar chalta rahega.'

Tabhi Parikshit ko mehsus hota hain ki uske pita use pukaar rahe hain. Woh apne pita ki aur dekhta hain. Phir uske pita usse kehte hain, "Phir se tum kahi kho gaye beta."

Parikshit - "Nahi Papa. Aisi baat nahi hain. Lekin, aaj aapne ek bohut badi seekh di hain. Yeh zindagi bhar yaad rahega mujhe."

Woh apne maata-pita se kuch der tak baat-cheet karne ke baad apne kamre mein chala jaata hain. Woh raat bhar apne laptop par aage ke kaam ki rann-neeti banata hain. 

Parikshit apni sales team ko aadesh deta hain ki woh log advertising ke saath-saath is baat par bhi dhyaan de ki kounse product ko kis type ke graahak pasand karte hain. Graahakon ki pasand ko jaankar, unhe wahi products ke messages bheje jaaye.

Parikshit ka yeh idea kaam kar jaata hain. Kareeb do mahine baad, uski company ke sales mein thoda sa sudhaar aata hain. 

Woh aage bhi kai rann-neeti banata hain aur apne karmachariyon ko un sabhi nayi-nayi rann-neetiyon par kaam karne ke liye kehta hain. 

Dekhte Hi Dekhte ek saal beet jaata hain aur uski Company ki khoob tarakki hoti hain. Pichle saal ke mukaable is saal use teen guna munaafa hua hain. 

Ek din ki baat hain. Woh apne kaam mein vyast tha. Shaam ho chuki thi aur office ke saare karmachari apne-apne ghar ke liye nikal pade the. Jab woh apne Cabin se bahar nikalta hain, toh use office mein apna ek bhi karmachari nazar nahi aata hain. Tabhi Parikshit ko ek saal pehle ka poora yaad aata hain. Thik ek saal pehle ka vaakya, uske aankhon ke saamne aane lagta hain. Us bure daur ka sangharsh use yaad aata hain. 

Parikshit sochta hain, 'Aakhir bohut kuch seekha hoon main is ek saal mein. Accha hua, jo us waqt bura hua. Dekho aaj main kitne aage pohunch gaya. Ab bhi aur maidaan fateh karne baaki hain. Yeh jeevan ek sangharsh hain aur sangharsh aajeevan chalte rehta hain.' Woh muskurata hain aur parking ki aur chal padta hain.

                 - Ved Vineet Gautam