Samruddhi

 Sameer Bhatia ek naujawaan ladka hain. Woh apne maata-pita ka iklauta ladka hain. Woh peshe se ek Computer Enginner hain. Sameer ke pita ka naam Arjun Bhatia hain aur maata ka naam Rasika Bhatia hain. Arjun Bhatia bhi ek engineer the. Woh bhi ek company kaam kiya karte the aur unki pagaar bhi acchi-khaasi thi. Filhal Arjun retire ho chuke hain aur har mahine ek thik-thak rakam Pension ke taur par unhe mil jaaya karti hain. 

Sameer ki yeh pehli naukri hain aur use is naukri par lag kar che mahine ho chuke hain. Woh har roz subah tayyar hokar Bus pakad kar apne office jaaya karta hain aur shaam mein dusri Bus se apne ghar laut aaya karta hain. Har Itvaar Sameer ki chutti hua karti hain aur woh apna chutti ka yeh poora samay, apne parivaar ke saath beetata hain. 

Ek din ki baat hain. Har roz ki tarah, us din bhi woh office se ghar ke liye nikla. Woh aksar Bus Stand tak paidal hi jaaya karta hain. Us din bhi, woh paidal chalte hue Bus Stand ki aur badh raha tha. Chalte-Chalte Sameer ki nazar sadak par lage hue ek Ad-Board par padi. Us Ad-Board par ek bohut hi sundar sa lekh likha hua tha, jise padh kar woh muskuraya. Us Ad-Board par likha hua tha, 'Thak Haar Kar Haaton Par Haath Dhare Baith Kar Apne Jeevan Ko Vyarth Mein Na Barbaad Kare. Balki, Mehnat Karke Aur Nirantar Prayaas Karke, Jeevan Ko Ek Uchit Disha Dein.'

Ad-Board par likha hua yeh lekh, Sameer ko behad bhaa gayi. Sameer ne yahan-wahan dekha aur uski nazar, sadak par chalte hue logon par padi. Sabhi log tez chal rahe the. Un logon ko dekh kar, Sameer ne socha; 'Shayad, veh log bhi apne ghar hi jaa rahe ho. Waise bhi shaam ka samay hain. Din bhar ki mehnat ke baad, is waqt yeh log apne-apne kaam se aazad hue hain. Waise bhi ghar toh ghar hi hota hain. Kya in logon mein se koi aisa bhi hoga, jo khud ka koi vyapaar kar raha hoga ?' 

Sameer ne aage socha, 'Aakhir ek aam aadmi ka jeevan hain hi kya ? Saara bachpan padhaayi karne mein nikal jaata hain aur saari jawaani kisi dusre aadmi ke neeche kaam karne mein nikal jaata hain. Kya ek aam aadmi keval aadeshon ka paalan karne ke liye hi janmaa hain ? Saara bachpan maata-pita, ghar ke bade-buzurg aur shikshakon ke dwaara bataye gaye raaston par chalo aur phir jawaan hokar, naukri pakad kar apne maalik ke aadeshon ka paalan karo.'

'Kya jeevan ka yahi saar hain ? Kya hamare jeevan ka keval yahi ek uddeshya hain, ki hum naukar bane rahe ? Aakhir kya fayada aise dimaag ka, jo keval kisi dusre vyakti ke aadeshon ka paalan karta ho. Yeh buddhi bhi toh vyarth hi barbaad ho rahi hain. Jab mujhe apna dimaag chalana hi nahi hain, toh mujhe Ishwar ki is adbhut sanrachna ko apne saath rakhna hi nahi chahiye. Shayad main is yogya hi nahi hoon.'

'Aisa kab hoga, jab main apni yogyata khud tai karunga ? Kya mere jeevan mein kabhi aisa bhi koi shan aayega, jab main poore adhikaar ke saath keh sakun ki maine apni buddhi ka poorna istemaal kiya hain ? Kya main kabhi khud ko apni hi buddhi ka swami kehlaa paaunga ?' 

Woh apne khayalon ki duniya mein poori tarah se khoya hua tha. Tabhi Sameer ka phone bajta hain aur woh apne vichaaron ki nadiya se bahar aata hain. Woh apni jeb mein apna haath daalta hain aur us jeb mein se apna mobile bahar nikaalta hain. Woh dekhta hain ki, Arjun ka call aa raha hain. Woh call uthata hain aur kehta hain, "Haan Papa ?"

Arjun - "Beta kaha ho ? Kab tak tum ghar aaoge ?"

Sameer - "Main toh Bus Stand ki aur abhi pohuchunga."

Arjun - "Matlab tum dus minute mein ghar pohuch jaaoge ?"

Sameer - "Nahi mera matlab hain ki, main office ke Bus Stop ki aur jaa raha hoon filhal."

Arjun - "Accha thik hain beta. Lekin, tum Jald Se Jald ghar pohuchne ki koshish karna beta."

Sameer - "Kyun kya ho gaya ?"

Arjun - "Bas aise hi. Hum log ghar mein tumhara intezaar kar rahe hain."

Sameer - "Thik hain Papa."

Sameer phone kaat deta hain. Kuch der baad, woh Bus Stop par pohuch jaata hain. Kareeb pandrah minute ke baad, Sameer ki Bus aati hain aur woh usmein baith jaata hain. Kuch der baad, Bus chal padti hain. 

Bus mein baithe-baithe, woh bahar ka nazara dekh raha tha. Sadak par dher saari alag-alag gaadiyan chal rahi thi. Tarah-Tarah ki gaadiyan Sameer ki nazron ke saamne se jaa rahi thi. Alag-Alag rangon ki gaadiyan chal rahi thi. Sameer ne socha, 'Aakhir kab tak main, yunhi Bus mein baitha safar karta rahunga ? Kaash mere paas bhi kuch is tarah ki koi gaadi ho. Lekin, is naukri se toh ek motorcycle bhi milne se rahi. Naukri toh acchi hain par, keval naukri ke bharose toh jeevan acche se chal nahi paayega. Mujhe khud ka koi na koi kaam shuru karna hi padega.'

Sameer dobara apne khayalon mein doob chuka tha. Lekin, na jaane kyun, uske chehre par halki si muskaan thi. Thandi-Thandi hawaa uske chehre ko choom rahi thi. Shayad isiliye itna sab kuch sochne ke baad bhi, uska mann prasanna tha. Aakhir Kaar Sameer ka Stop aaya aur woh Bus se neeche utra. Phir woh paidal chalte hue apne ghar pohucha, jaisa ki woh hamesha karta tha. 

Ghar pohuchte hi Sameer ne dekha ki uske ghar mein kuch mehmaan aaye hue hain. Sameer ko dekhte hi, Arjun ne kaha, "Yeh lo aa gaya mera beta. Aao beta. Andar aao."

Sameer ghar ke andar aata hain. Phir Sameer un mehmaanon ko dekh kar, haath jodkar unhe 'Namastey' karta hain. Arjun kehta hain, "Beta pair chuon sabke."

Bas ek mehmaan ko chodkar, Sameer ghar par aaye hue sabhi mehmaanon ke pair chuta hain. Kyunki woh ek jawaan ladki thi, jo ki Sameer ki hi hum-umar dikh rahi thi. 

Uske baad, Rasika Sameer ke paas aati hain aur kehti hain, "Lao beta. Apna Bag de do mujhe. Safar mein kaafi thak hoge na tum ?"

Sameer apna Bag use pakda deta hain. Tabhi Arjun kehta hain, "Baitho beta."

Sameer un logon ke saamne baith jaata hain. Phir Arjun Sameer se kehta hain, "Beta in logon se milo. Yeh hain Akshay Khurana aur yeh hain inki dharam-patni Aasha Khurana."

Sameer - "Namastey Uncle."

Akshay - "Khush Raho Beta."

Sameer - "Namastey Aunty."

Aasha - "Namastey Beta."

Phir Arjun aage kehta hain, "Tumhe inse milne mein zyada interest hona chahiye. Yeh hain inki iklauti beti Diksha."

Diksha - "Hi Sameer."

Sameer - "Hi Diksha."

Phir Rasika Sameer se kehti hain, "Beta kya tumhe pata hain, yeh log koun hain aur yeh yahan kyun aaye hain ?"

Sameer - "Nahi Mummy."

Arjun - "Yeh log tumse milne ke liye aaye hain."

Sameer - "Matlab ?"

Arjun - "Maine tumhari photo ek Matrimonial Site par upload kar di thi. In logon ko tumhari tasveer behad pasand aayi hain. Toh inhone kal hi call kiya aur aaj tumhe dekhne ke liye aa gaye."

Sameer - "Lekin filhal meri nayi-nayi naukri lagi hain aur pagaar bhi sirf tees hazaar hain."

Akshay - "Utna hamare liye kaafi hain beta. Agar aapko is Shaadi mein interest ho, toh hum aage ki baatein kar sakte hain. Lekin, agar koi aur ladki pasand ho, toh aap saaf-saaf keh dijiye. Hum yahan se muskurate hue hi chale jaayenge. Hume aapse koi shikayat nahi hogi."

Sameer - "Nahi Uncle. Aisi koi baat nahi hain. Bas aise achaanak se aap log aaye, toh bas us wajah se."

Akshay - "Toh kya hum aage ki baatein kare ?"

Sameer - "Ji Uncle."

Akshay - "Toh beta zara apni pasand napasand ke baare mein batao."

Sameer - "Mujhe movies dekhna pasand hain. Main ek company mein naukri karta hoon aur zyada kisi se baat-cheet nahi karta hoon. Toh is wajah se main office ke baad kisi ke saath kahi ghumne bhi nahi jaata hoon. Kaam khatam karke, main seedha ghar aa jaata hoon."

Arjun - "Khurana Sahab. Agar aapki aur Bhabhi Ji ki ijaazat ho, toh kya yeh dono bacche akele mein kuch der baat-cheet kar lein ?"

Akshay - "Haan, haan kyun nahi. Aakhir mein toh saari zindagi in dono ko ek dusre ke saath guzaarni hain."

Phir Rasika, Sameer se kehti hain, "Jaa beta. Zara is ladki ko apna kamra dikha la aur khul kar isse baat-cheet karna. Diksha beta tum bhi isse jee-bhar kar saare sawaalat kar lena. Apne mann mein koi bhi baat dabaa kar mat rakhna. Tum dono bina kisi sankoch ke ek dusre se baatein karo."

 Sameer aur Diksha dono andar kamre mein jaate hain. Phir Sameer kehta hain, "Please baitho na."

Diksha - "Tum bhi baitho."

Dono saath mein Bed par baith jaate hain. 

Diksha - "Toh batao. Kya socha hain tumne aage ka ?"

Sameer - "Bas Zindagi mein ab aage badhna chahta hoon. Agar mere humsafar ko mere sapno ki kadar ho, toh zindagi aasaan ho jaayegi."

Diksha - "Tumhara sapna kya hain ?"

Sameer - "Main kaamyaab banna chahta hoon. Haan maine Computer Engineering zaroor ki hain, par mujhe aur acchi kamayi ki iccha hain."

Diksha - "Aadmi asal mein kaamyaab tabhi banta hain, jab woh apne pasand ka kaam kar raha ho. Tumhe kya pasand hain ?"

Sameer - "Mujhe Writing mein interest hain. Main aksar apne hi khayalon mein khoya hua rehta hoon."

Diksha - "Thik hain. Main kabhi tumhare kaam mein koi dakhal nahi dungi. Bas jab tumhe apne kaam se fursat mil jaaya kare, tab thoda sa waqt mujhe bhi de diya karna."

Sameer - "Thik hain."

Diksha - "Toh bahar sabko 'Haan' keh dein ?"

Sameer - "Thik hain."

Dono bahar jaate hain aur sabko batate hain, ki dono ek dusre se shaadi ke liye raazi hain. Dono parivaar bohut khush ho jaate hain aur teen mahine baad, dono ki shaadi ho jaati hain. 

Kyunki, ab Sameer ke sar par zimmedari aa gayi hain, toh office ka kaam khatam karne ke baad, woh aksar ghar jaldi aa jaata hain. Aksar khaali waqt nikaalkar, Sameer kuch na kuch likhte rehta aur shahar ke alag-alag Publication Houses ke chakkar kaat ta. Kaafi samay guzar jaane ke bawjood Sameer ko koi bhi safalta prapt nahi hui. Lekin, Diksha ab bhi Sameer ke sapno par poora vishwaas rakhti aur uske prayason ki sarahna bhi karti. 

Aakhir Kaar, kareeb dedh saal ki kadi mehnat ke baad, Sameer ko ek Publication House ke liye likhne ka mauka mila. Us kaam ko poora karne ke baad, Sameer ko acchi rakam ka Cheque mila. Dono parivaar Sameer ki is tarakki par behad khush the aur Sameer ko bhi apne jeevan ke liye ek naya lakshya mil gaya. 

Ab Sameer ne tai kiya ki woh apne lekhan ke kaam ko aur aage le jaayega. Sameer ne shahar ke dusre lekhakon ke baare mein jaankari ikattha karna shuru ki aur unke dwara likhi gayi kahaniyan padhna shuru kiya. Aakhir mein usne ek badaa nirnay liya. Sameer ne nirnay liya ki ab woh khud ki Publication House shuru karega. 

Ab Sameer ne Shehar ke naamcheen vyapaariyon se milna shuru kiya aur unhe apni yojna ke baare mein bataya. Kuch mahino ki daud-bhaag ke baad, ek vyapaari Sameer ke is idea par apna paisa lagane ke liye raazi hua. Sameer ne ek acchi jagah dekh kar, apna office khol diya. Woh akele hi saara kaam karne ka prayaas karta. Jis wajah se woh behad thak jaaya karta tha. Lekin, Sameer ne haar nahi maani. Aakhir mein use kuch lekhak mile aur unki kahaniyan prakashit karna shuru kar diya. Kahaniyan bikna shuru hui aur dekhte hi dekhte, kuch samay baad Sameer ka vyapaar tezi pakad liya. Ab Sameer ne ek badaa ghar kharid liya hain, jahan woh apne parivaar ke rehta hain. Saath hi, Sameer ne ek gaadi bhi kharid li hain.  

Ab Sameer itna saksham ban chuka hain, ki woh dusron ki madad kar sake. Jo bhi Jaan-Pehchan ka aadmi Sameer se madad maangne aata, woh hamesha koshish karta ki woh unki madad kar sake.

 

Is parivaar ke jeevan mein samruddhi aa gayi. Woh aaj bhi utni hi kadi mehnat ke saath kaam karta hain, jitna ki woh pehle karta tha. 

Sameer ki is tarakki ko dekh sabhi jaan pehchaan wale, uski sarahana karte nahi thakte aur apne bacchon ko Sameer ka udaaharan dekar, unhe prerit karne ka prayaas karte. Jaana-Pehchana ke kai naujawaan Sameer se prerna lekar, uski tarah banne ka prayaas karte.

                 -  Ved Vineet Gautam