Ishq

 Rudransh ek naujawaan ladka hain. Woh apne maata-pita ka iklauta ladka hain. Woh College mein padhayi karta hain. Rudransh ke saath, College mein ek ladki padhti hain. Us ladki ka naam hain, Urvashi. Yeh dono pichle teen saal se ek dusre ke dost hain. Dono College mein aksar saath mein rehte hain aur yeh dono ek dusre ko apna bohut accha dost maante hain.

 

College ka aakhri saal chal raha hain. Is saal yeh dono ka graduation poora ho jaayega. Dono har roz ek dusre se milte aur khaali samay mein khoob baatein karte. Pareeksha ka samay nazdeek hain. 

Ek din ki baat hain. Aakhri lecture khatam hone ke baad, sabhi vidyarthi Class ke bahar jaa rahe the. Rudransh bhi darwaaze ki aur do kadam badha hi chuka tha. Tabhi Urvashi use aawaz lagati hain, "Rudransh." 

Rudransh peeche mudta hain aur kehta hain, "Haan Urvashi ?"

Urvashi - "Kya tumhe ghar jaane ki jaldi hain ?"

Rudransh - "Bilkul nahi."

Urvashi - "Mujhe tumse kuch baatein karni thi."

Rudransh - "Haan kaho."

Urvashi - "Pehle tum baitho toh."

Rudransh bench par baith jaata hain. Urvashi uske saamne baith jaati hain. Phir woh kehti hain, "Aur batao kaise ho tum ?"

Rudransh - "Main toh thik hi hoon. Har roz toh dekhti ho tum mujhe."

Urvashi - "Haan. Woh baat toh hain. Mera matlab hain ki tumhare chehre par exams ke tension wali lakeer kahi nazar nahi aa rahi hain."

Rudransh hanste hue kehta hain, "Accha ? Aur tum toh badi tension mein dikh rahi ho."

Urvashi muskurati hain aur phir woh kehti hain, "Toh maine ek faisla liya hain."

Rudransh - "Kya tum exam nahi dogi ?"

Urvashi - "Are nahi baba. Woh baat nahi hain."

Rudransh - "Phir ?"

Urvashi - "Kal se lectures khatam hone ke baad, hum dono har roz class mein baithkar saath mein padhayi karenge."

Rudransh - "Toh meri Chatra-Chaaya mein tum exams mein top karogi."

Urvashi hanste hue kehti hain, "Shut Up."

Rudransh - "OK OK Iam Sorry."

Urvashi - "Toh kya tum kal se har roz, mujhe kuch der ke liye sahan kar pooge ?"

Rudransh - "Karna hi padega."

Urvashi - "Toh kya tum tayyar ho ?"

Rudransh - "Main koun hota hoon, manaa karne wala ? Waise bhi, 'Naa' keh kar mujhe marna hain kya ?"

Urvashi - "Agar aisi baat hain, toh abhi apna bag kholo aur kitaabein nikaalo."

Rudransh - "Are nahi nahi. Kam Se Kam, aaj ek din ke liye mujhe apni aazadi toh manaa lene do."

Urvashi - "Thik hain. Lekin kal se tum mere kaidi rahoge." 

Rudransh - "Ab main jaaun ?"

Urvashi - "Bye-Bye."

Rudransh - "Bye-Bye."

Phir Rudransh waha se chala jaata hain. 

Agle din, jaisa ki tay hua tha dono ke beech, dono hi lectures khatam hone ke baad Class mein ruk jaate hain. Phir Rudransh kehta hain, "Toh sabse pehle kounse Subject mein PhD ki jaaye ?"

Urvashi - "Tum batao."

Rudransh - "Bhai mera toh sabse kamzor vishay toh Accounts hain."

Urvashi - "Thik hain. Toh hum Accounts se shuruwat karte hain."

Dono apne-apne bag se accounts ki kitaabein nikaalte hain aur phir register aur pen nikaalte hain. Phir Rudransh kehta hain, "Toh shuru kare ?"

Urvashi - "Haan, Haan Zaroor."

Dono saath mein accounts ke sawaal ka hal nikaalna shuru kar dete hain. Woh dono ek hi sawaal ka hal apne-apne hisaab se nikaalte aur phir dono ek dusre ka register le lete. Phir woh dono text book mein sahi uttar ko dhundhte. Kareeb do ghante tak padhayi karne ke baad, Urvashi kehti hain, "Toh kya ab ghar ke liye jaaya jaaye ?"

Rudransh - "Haan Zaroor."

Dono kitaabon ko apni bags mein daal kar Class se bahar nikale. Bahar jaate samay, dono ek dusre se dher saari baatein kiye. College se bahar nikalkar, dono apne-apne raaste chal diye. 

Agle din, College ka samay samaapt hone ke baad; woh dono dobara saath baithkar kuch der padhaayi kiye aur ek dusre se baatein karte-karte College se bahar nikale. Ab yeh har roz ka silsila ho chuka tha. 

Ek din ki baat hain. Class mein baithkar yeh dono padh rahe the. Aaj Urvashi ke baal khule the aur Class ki khidki bhi khuli hui thi. Tabhi achaanak se tez hawaa aayi. Hawaa ke tez jhonko se, Urvashi ke baal uske chehre par aa gaye. Urvashi apne baal sawaarne mein lag gayi aur Rudransh ki nazar uspar padi.

 

Woh Urvashi ko bohut dhyaan se dekh raha tha. Haalanki, itne saalon mein Rudransh ne kai baar Urvashi ko dhyaan se dekha tha. Lekin, aaj ki baat kuch aur thi. Aaj ke din mein na jaane kya khaas tha. Woh Urvashi ko behad alag nazar se dekh raha tha. Aaj se pehle tak, Rudransh ne Urvashi ko aisi nazron se kabhi nahi dekha tha. 

Kuch minton ke baad, Urvashi ki nazar Rudransh par padi aur use bhi ehsaas ho chuka tha ki, Rudransh use behad dhyaan se dekh raha hain. Tabhi Urvashi ne Rudransh ki aankhon ke saamne chutki bajayi. Rudransh ko is baat ka aabhas hua aur woh yahan-wahan dekhne laga. Phir Urvashi ne usse pucha, "Rudransh kaha khoye hue ho ?"

Rudransh - "Nahi. Nahi. Kahi toh nahi."

Urvashi kitaabon ki aur ishaara karte hue kehti hain, "Exams ke liye bas chand din hi bache hue hain. Dhyaan do."

Rudransh - "Haan. Haan."

Kuch der tak padhne ke baad, woh dono apne-apne ghar ke liye nikal gaye. Raat ka samay tha aur Rudransh apne kamre mein leta hua tha. Woh jab-jab apni aankhein band karke sone ki koshish karta, tab-tab use Urvashi ka wahi Hawaa ke jhonkon wala chehra nazar aata. Woh behad koshish kar raha tha sone ki. Par band aankhon mein, Urvashi ka chehre ka nazar aana; baar-baar Rudransh ki neend uda raha tha. Kaafi der tak mashakkat karne ke baad, jaise-taise use neend lag gayi. 

Agle din, phir se woh dono saath baith kar padhayi kiye. 

Kuch dino ke baad, aakhir kaar pareeksha ki ghadi aa hi gayi. In dono ne behad mehnat se padhayi ki thi aur in dono ne badi needarta ke saath pareeksha bhi di. Aakhir Kaar, pareeksha khatam hui aur garmi ki chuttiyan shuru ho gayi. Dono aksar ek dusre se phone par baatein kiya karte the. 

Ek din ki baat hain. Rudransh apne kamre mein baitha hua tha. Tabhi uske phone par Urvashi ka message aaya, 'Rudransh tum jab bhi free ho jaao, mujhe Call kar dena.' Message padhte hi, Rudransh ne turant Call lagaya. Urvashi ne pehli ghanti bajte hi Call utha liya. Call uthate hi, Urvashi ne kaha, "Hi Rudransh. Kaise ho ?"

Rudransh - "Hi Urvashi. Main thik hoon. Tum kaisi ho ?"

Urvashi - "Main bhi thik hoon."

Rudransh - "Aur batao kaisi chal rahi hain chuttiyan ?"

Urvashi - "Acchi chal rahi hain. Aur tumhari chuttiyan kaisi chal rahi hain ?"

Rudransh - "Meri bhi acchi chal rahi hain. Aur tumhare ghar mein sab log kaise hain ?"

Urvashi - "Sabhi log thik hain. Aur tumhare ghar mein ?"

Rudransh - "Sab Badhiya Hain. Toh tumne message kiya tha. Tumhe kuch baat karni thi ?"

Urvashi - "Haan. Kuch baat karni thi mujhe."

Rudransh - "Haan batao."

Urvashi - "Dekho Rudransh, hamari College ki chuttiyan chal rahi hain. Hum dono ko mile hue bhi kaafi time ho chuka hain. Toh main yeh soch rahi thi, ki kya hum kahi bahar mile ?"

Rudransh - "Haan Zaroor. Kyun nahi ? Batao kab aur kaha milna hain ?"

Urvashi - "Kal shaam mile ? R City Mall mein ?"

Rudransh - "Haan Zaroor."

Urvashi - "Toh kal waqt se Mall mein pohunch jaana."

Rudransh - "Yeh baat toh mujhe tumse kehni chahiye thi. Tayyar hone mein toh ladkiyon ko zyada waqt lagta hain na ?" 

Urvashi - "Main waqt ki paaband hoon."

Rudransh - "Ek kaam karo, abhi se hi tum tayyar hona shuru kar do, taaki tum kal waqt par pohuch jaao."

Urvashi - "Itna bhi waqt nahi lagta hain, haan."

Rudransh hans padta hain aur kehta hain, "Chalo thik hain; "kal shaam milte hain R City Mall mein." 

Urvashi - "Thik hain. Bye-Bye."

Dono phone kaat dete hain. 

Agle din, Rudransh samay par Mall mein pohunch jaata hain aur woh Urvashi ka intezaar kar raha hota hain. Woh Urvashi ko Call lagata hain. Urvashi Call uthati hain aur kehti hain, "Main bas paanch minute mein pohunch rahi hoon. Tum kaha par ho ?"

Rudransh - "Main Mall ke main gate ke bahar hi khada hoon."

Urvashi - "Thik hain. Bas paanch minute de do mujhe."

Rudransh - "Thik hain."

Rudransh yahan-wahan dekh raha hota hain. Tabhi uski nazar Urvashi par padti hain. Woh laal rang ke gown mein chalte hue aa rahi thi. Woh apne gown ko sambhalte hue, dheere-dheere chal rahi thi. Urvashi ki nazar, Rudransh par padi aur usne, use haath dikhaya. Lekin, woh toh uski khoobsurati mein mantramugdh ho chuka tha. Woh Rudransh ke saamne aakar khadi ho jaati hain.  Urvashi ke patle hoton par laal rang ki lipstick bohut chamak rahi thi. Rudransh ki nazar uske hothon par tiki hui thi aur Rudransh ko dekh kar, muskura rahi thi. Tabhi Rudransh ke muh se nikalta hain, "Tumhari muskurahat behad pyaari hain, Urvashi."

Urvashi - "Thank You."

Rudransh - "Tum itni khoobsurat ho. Aakhir main kitna paagal hoon. College mein kabhi maine tumhari khoobsurati ko pehchaana hi nahi."

Urvashi - "Matlab ?"

Rudransh - "Kuch bhi nahi."

Urvashi - "Toh aaj kounse Subject ki padhayi kare ?"

Rudransh - "Tum batao. Tum kya padhna chahti ho ?"

Urvashi - "Zindagi."

Rudransh - "Zindagi ko vartamaan mein nahi, balki, bhootkaal mein samjha jaa sakta hain. Beete hue lamho ke baare mein jab hum sochte hain, tab hume samajh mein aata hain, ki Zindagi ne hume kya kuch sikhaaya hain aur hume kya-kya tohfe diye hain, jinki ahmiyat ka andaaza hume us samay pata hi nahi chalta hain."

Urvashi - "Aur aisa kounsa tohfa hain Rudransh, jiski ahmiyat ka andaaza tumhe ab hua hain ?"

Rudransh - "Kuch nahi."

Urvashi - "Jo bhi tumhare dil mein hain, khul ke kaho."

Rudransh - "Shayad tum bura maan jaao."

Urvashi - "Main bilkul bhi bura nahi maanungi."

Rudransh - "Main seedhi-seedhi baat kahunga Urvashi."

Urvashi - "Haan. Main sunn rahi hoon."

Rudransh - "Dekho mujhe ghuma-phirakar baat karna nahi aata hain. Main tumse mohabbat karta hoon. Agar tumhare dil mein bhi mere liye pyaar hain toh, kyun na hum hamare ghar walo se is baare mein baat-cheet kar lein. Agar woh log bhi ijaazat de dein, toh bas chaar din ki Zindagi hain, hanste-muskurate khushi-khushi kat jaayegi."

Urvashi kuch nahi kehti hain. Urvashi ko chup dekh, Rudransh kehta hain, "Agar tumhe meri baaton ka bura laga ho, toh mujhe maaf kar dena Urvashi."

Urvashi - "Lekin filhal main apne Career par dhyaan dena chahti hoon."

Rudransh - "Haan. Main samajh sakta hoon. Mujhe koi jaldi nahi hain Shaadi ki."

Urvashi - "Main bhi tumse pyaar karti hoon."

Rudransh - "Mohabbat mujhe itni aasani se mil jaayegi, maine kabhi socha nahi tha."

Urvashi - "Lekin itni aasani se thodi na kisi mohabbat milti hain. Thodi mashakkat karo."

Rudransh - "Kaise ?"

Urvashi - "Mujhe propose toh karo tum ?"

Rudransh - "Filhal toh mere pass ek phool tak nahi hain."

Urvashi - "Toh tumhe le aana chahiye tha na."

Rudransh - "Ab main bhi koi soch kar thodi na aaya tha, ki main tumhe propose karunga. Woh toh bas tumhe aise dekh kar, Dil ki baat Zubaan par aa gayi."

Urvashi - "Thik hain. Jaisa kehna hain, waisa kaho. Lekin, apni Dil ki baat aaj keh do tum Rudransh."

Rudransh - "Kya tum apni saari zindagi mere saath beetana chahogi ?"

Urvashi 'Haan' mein apna sar hilati hain.

Urvashi - "Ab bas ise samabhal kar rakhna."

Rudransh - "Haan bilkul. Ek zimmedari ki tarah."

Dono ek dusre ke gale lagte hain. 

                    - Ved Vineet Gautam