Nazraana

 Falak Kumar ek naujawaan ladka hain. Woh apne maata-pita ka iklauta ladka hain. Woh ek Company mein naukri karta hain. Woh apne office se ghar tak ka safar, bike se poora karta hain. 

Ek din ki baat hain. Hamesha ki tarah, us roz bhi woh office se ghar ke liye nikal raha tha. Shaam ka waqt tha. Mausam suhana tha. Khule aasman mein halki si dhoop thi. Falak ne socha, 'Is khoobsurat nazaare se dur koi kaise jaana chahega. Kaash har roz mausam aisa hi hota.' 

Tabhi Falak ki nazar sadak kinare khadi hui ek ladki par padi. Ladki akeli thi aur khoobsurat bhi. Lekin, pareshan thi. Woh ladki kabhi apna phone dekhti, toh kabhi yahan-wahan apni nazar daudaati. 

Falak ko jigyasa hui yeh jaanne ki, ki aakhir is ladki ki takleef kya hain. Woh apni bike sadak ki dusri aur le gaya aur us anjaan ladki ke saamne ruk gaya. Ek anjaan ladke ki is tarah ki harkat se woh chaunk gayi. Lekin, woh kuch nahi boli. Dono ek dusre ki taraf dekhe. Tabhi Falak ne kaha, "Mam aap thodi pareshan lag rahi ho. Main yeh pichle do minute se dekh raha tha. Kya main aapki koi madad kar sakta hoon ?"

Ladki - "Kya aap mujhe yeh bataa sakte hain ki is waqt yahan nazdeek mein transport kaha par milega ?"

Falak ishaara karte hue kehta hain, "Woh is sadak ke aakhir mein aap baayi aur mud jaaiye aur kuch kadam chalne ke baad, aapko Rickshaw Stand mil jaayega."

Ladki - "Bus Stop kaha par hoga ?"

Falak - "Bus Stop tak jaane ke liye bhi aapko Rickshaw pakadni hogi."

"Oh Shit." Kehte hue, ladki apna maatha pakad leti hain. Yeh dekh, Falak kehta hain; "Aap rehti kaha par ho ?"

Ladki - "Main Vijay Nagar mein rehti hoon."

Falak - "Woh toh kaafi durr hain. Agar aapko koi aitraaz na ho toh kya main aapko ghar tak chod doon ?"

Ladki - "Nahi aapko takleef hogi."

Falak - "Ismein takleef ki koi baat nahi hain."

Ladki - "Agar aap mujhe chod denge toh badi madad ho jaayegi."

Falak - "Aap bike par baith jaaiye."

Ladki Falak ke peeche baith jaati hain. Woh bike start karta hain aur safar shuru ho jaata hain.0

Falak - "Mam kya aap is shehar mein naye ho ?"

Ladki - "Ji Haan."

Falak - "Woh agli baar se aapko jab bhi jaana ho, toh jis sadak par hum mile the; wahan se sadak ki aakhir tak aap chalte hue jaaiyengi, toh baayi aur hi Rickshaw Stand milega aur usse kahiyega, ki mujhe Sanjay Nagar Bus Stop par jaana hain. Pachaas rupaye Auto Wala lega."

Ladki - "Woh sach kahoon toh main aaj apne office ka raasta bhatak gayi thi aur office aate-aate maine itni gaadiyan badli ki mere aaj ke saare paise sirf aane mein hi kharach ho gaye."

Falak - "Hota Hain. Sab raaste samjhne mein waqt lagega."

Ladki - "Aapka naam kya hain ?"

"Mera naam Falak hain." Woh kehta hain.

Ladki - "Mera naam Nayantara hain."

Falak - "Bohut accha naam hain."

Phir woh dono yahan-wahan ki baatein kiye aur kuch der baad, Nayantara ka ghar aa gaya. Falak bike rokta hain aur woh bike se utarti hain. 

Nayantara - "Aapka bohut-bohut shukriya Falak."

Falak - "Ismein shukriya kaisa ? Main bhi isi aur hi jaa raha tha."

Nayantara - "Aap kaha par rehte ho ?"

Falak - "Main Kondhwa Nagar mein rehta hoon. Yahan se chaar-paanch kilometre durr hain."

Nayantara - "Toh ab main chalti hoon. Bye."

Falak - "Bye-Bye."

Nayantara buliding ke andar chali jaati hain aur Falak apni Bike shuru karke apne ghar ki aur nikal padta hain.

Kuch din beet jaate hain. Aaj Falak ko pagaar mili hain aur saath hi uski chutti bhi hain. Falak sochta hain, 'Aaj koi movie dekhne ke liye jaata hoon.' Woh apna mobile nikaalta hain aur usmein movie ka samay dekhta hain. 'Aaj toh aasani se ticket mil jaayega.' Woh sochta hain. Woh tayyar hota hain aur Cinema Hall ke liye nikal padta hain. 

Cinema Hall pohuchte hi, woh apni bike parking mein lagaakar Ticket Counter ki aur chal padta hain. Ticket Counter pohuchte hi, woh line mein khada ho jaata hain. Tabhi koi peeche se uske kandhe par haath rakh deta hain. Woh peeche mudta hain aur dekhta hain ki Nayantara khadi hain. Falak muskurata hain aur kehta hain, "Hi Nayantara."

Nayantara - "Hi Falak."

Falak - "Kaisi ho aap ?"

Nayantara - "Main thik hoon. Aap kaise ho ?"

Falak - "Main bhi thik hoon. Aapke ghar mein sab kaise hain ?"

Nayantara - "Sab thik hain aur aapke ?"

Falak - "Sab badhiya hain."

Nayantara - "Movie dekhne ke liye aaye ho ?"

Falak - "Haan."

Nayantara - "Doston ke saath ?"

Falak - "Nahi akele."

Nayantara - "Main bhi akeli hi aayi hoon."

Falak - "Toh agar aapko aitraaz na ho, toh kya hum saath mein movie dekh lein ?"

Nayantara - "Ismein aitraaz kaisa ?"

Falak - "Thik hain."

Falak dono ki tickets nikaalta hain aur dono saath mein movie dekhte hain. Interval mein dono saath mein bahar nikalte hain. Phir Falak kehta hain, "Kya tum kuch logi ?" 

Nayantara - "Bas Cold Drink."

Falak Cold Drink kharidta hain aur dono wapas andar chale jaate hain. Kuch der baad, movie khatam ho jaati hain aur dono saath mein bahar nikalte hain. Phir Falak kehta hain, "Toh aage ka kya plan hain ?"

Nayantara - "Tumhara kya plan hain ?"

Falak - "Bas bike nikaalunga aur apne ghar chala jaaunga."

Nayantara - "Kya tumhe ghar jaane ki jaldi hain ?"

Falak - "Bilkul nahi."

Nayantara - "Yahi baithke kuch baatein kar lete hain."

Falak - "Yeh bhi ek accha idea hain."

Woh dono saath mein baithte hain aur dono ek dusre se dher saari baatein karte hain. Kuch apne baare mein, kuch apne ghar walon ke baare mein. Baat-Cheet karte-karte Nayantara kehti hain, "Mujhe lagta hain ki hume aage bhi mulaakaatein karte rehni chahiye."

Falak - "Toh kya tum mujhe apna number dogi ?"

Nayantara - "Haan Zaroor."

Dono ek dusre ka contact number le lete hain aur uske baad dono apne-apne ghar ke liye nikal padte hain. Agle din ki baat hain. Falak office ka kaam khatam karke apne ghar pohuchta hain. Ghar pohuch kar woh haath-muh dhota hain aur apne kamre mein jaakar bed par leat jaata hain. Woh apna mobile nikaalta hain, apne regular messages check karne ke liye. Tabhi Falak ke mobile par Nayantara ka call aata hain. Woh muskurata hain aur call uthata hain. Call uthate hi, Nayantara kehti hain, "Hi Falak."

Falak - "Hi Nayantara. Kaisi ho tum ?"

Nayantara - "Main thik hoon. Tum kaise ho ?"

Falak - "Main bhi thik hoon."

Nayantara - "Lekin tum thik toh lag nahi rahe ho."

Falak - "Matlab ?"

Nayantara - "Tumhari aawaz bata rahi hain."

Falak - "Haan woh main abhi-abhi ghar pohucha hoon."

Nayantara - "Toh main baad mein call karti hoon."

Falak - "Nahi thik hain, main baat kar sakta hoon."

Nayantara - "Tum fresh ho jaao pehle."

Falak - "Main fresh ho chuka hoon."

Nayantara - "Thik hain. Aur bataao, baaki kya chal raha hain ?"

Falak - "Sab badhiya chal raha hain."

Nayantara - "Kya tumhe pata hain ki kal kya hain ?"

Falak - "Kya hain ?"

Nayantara - "Kal New Year hain."

Falak apne mobile mein tareekh dekhta hain aur kehta hain, "Are haan. Kal toh 31st December hain."

Nayantara - "Bilkul. Toh tumhara kal ka kya plan hain ?"

Falak - "Kuch khaas nahi. Aur tumhara kya plan hain ?"

Nayantara - "Tum batao. Is shehar mein, kaha par naye saal ka programme ho raha hoga ?"

Falak - "Phoenix Mall. Wahan par har saal bohut hi accha programme hota hain. Wahan par bohut joro-shoro se naye saal ka programme manaaya jaata hain."

Nayantara - "Toh kya tum wahan apne kisi dost ke saath jaane wale ho ?"

Falak - "Nahi. Abhi tak aisa toh koi plan banaya nahi hain maine. Kya tum wahan jaane ka soch rahi ho ?"

Nayantara - "Agar tum aaoge, toh main bhi aa jaaungi."

Falak - "Hum kal hi toh mile the."

Nayantara - "Toh kal phir se mil lenge."

Falak hansta hain aur kehta hain, "Thik hain. Kal shaam 7 baje hum dono wahan par mil lete hain."

Nayantara - "Agar tumhara koi aur plan hain, toh use meri wajah se kharab mat karo."

Falak - "Nahi. Aisa koi plan nahi hain. Kal hum dono zaroor milenge. Kal shaam kitne baje aaogi tum ?"

Nayantara - "Tum batao."

Falak - "Kal raat 8 baje milte hain."

Nayantara - "Thik hain. Raat 8 baje Phoenix Mall."

Falak - "Thik hain."

Nayantara - "Bye."

Falak - "Bye-Bye."

Call kat ta hain.

Agli shaam, Falak Phoenix Mall waqt se pohuch jaata hain aur woh Nayantara ko call karta hain. Lekin, woh call nahi uthati hain. Woh sochta hain, 'Shayad raaste mein hogi.' Woh yahan-wahan dekhta hain. Tabhi Falak ki nazar Nayantara par padti hain. Woh Neele rang ke top mein kisi gudiyaa ki tarah lag rahi thi. Dono ek dusre ko dekh kar muskurate hain aur woh Falak ke pass pohuchti hain. 

Nayantara - "Zyada intezaar toh nahi karna pada na tumhe ?"

Falak - "Bilkul nahi."

Nayantara - "Toh Mall ke andar chalte hain phir."

Falak - "Thik hain."

Dono saath mein Mall ke andar jaate hain aur naye saal ke programme ka lutf uthate hain. Kyunki Nayaa Saal tha, toh Mall mein acchi-khaasi bheed thi. Tabhi Falak ko kisi ka dhakka lagta hain aur woh Nayantara ke upar gir jaata hain. Ab dono farsh par gire hue the. Dono ki nazrein milti hain aur woh dono ek dusre mein kho jaate hain. Dono ko kuch alag hi mehsus ho raha tha. Woh dono ek dusre mein itne kho gaye the, ki woh is duniya ko bhool hi chuke the. Aisa lag raha tha, jaise un dono ke alaawa wahan aur koi maujood hi na ho. Dono hi ek dusre ki garm saanson ko mehsus kar paa rahe the, jisse ki woh dono madhosh hote jaa rahe the. 

Tabhi achaanak se gaana band ho jaata hain aur woh dono hosh mein aate hain. Dono farsh se uthte hain aur Nayantara dusre aur jaane lagti hain. Falak uske peeche-peeche jaata hain. Nayantara ek railing ke pass jaakar ruk jaati hain. Falak uske kareeb jaata hain aur woh apni nazrein jhuka leti hain. Woh sharmaa rahi thi. Falak ki nazrein bas Nayantara par tiki hui thi. Woh uski khoobsurati ko nihaar raha tha aur Nayantara ke chehre par aayi hui laaj, uski khoobsurati par chaar chand laga rahi thi. 

Phir woh kehti hain, "Mujhe lagta hain ki ab mujhe jaana chahiye." Uski nazrein ab bhi jhuki hui thi. 

Falak - "Abhi hi toh hum mile hain."

Nayantara chalte hue jaati aur Falak uske bagal mein saath chal raha hota hain. Tabhi achaanak se dono ke haathon ki ungliyan ek dusre se takraa jaati hain. Dono thoda asahaj mehsus karte hain. Phir woh dono ek jagah jaa kar baith jaate hain. Dono ek dusre ke saamne baithe hue the. Woh dono ek dusre ko bohut dhyaan se dekh rahe the. 

Mall mein Jashn chal raha tha aur in dono ke dil mein ek alag hi shor shuru ho chuka tha. Dono ke hi Dil mein bohut tezz hulchal chal rahi thi. Dono ke Dil ka toofan ab kaabu se bahar ho chuka tha. Tabhi dobara un dono ki ungliyan takraati hain aur dono ek dusre ki ungliyon mein apni ungliyan phansaa lete hain. Nayantara sharmate hue, neeche dekhti hain. Phir Nayantara kehti hain, "Mujhe der ho rahi hain." Aur woh jhat se uthti hain aur bhaagte hue chali jaati hain. 

Agle din, Falak ko Nayantara ka message aata hain, 'Main ek rishtedaar ke yahan shaadi ke liye jaa rahi hoon. Do-Teen din lag jaayenge.'

Falak ka kaam mein mann nahi lag raha tha. Woh khoya hua tha. Chauthe din, woh Nayantara ko call karta hain. Woh call uthati hain aur behad dheemi aawaz mein kehti hain, "Hello."

Falak - "Kaisi ho tum ?"

Nayantara - "Thik hoon."

Falak - "Tumhari tabiyat toh thik hain ?"

Nayantara - "Haan. Kyun ?"

Falak - "Bohut dheemi aawaz mein baat kar rahi ho."

Nayantara - "Ghar mein sab so rahe hain. Raat ke do baj rahe hain Falak."

Falak - "Are haan. Maine tumhari neend toh kharab nahi kar di."

Nayantara - "Tumhe bhi toh neend nahi lag rahi hain."

Falak - "Kya hum mil sakte hain ? Tum wapas aa gayi ho na ?"

Nayantara - "Haan. Kal shaam restaurant mein tum aa paaoge ?"

Falak - "Haan."

Nayantara - "Toh main phone rakhun ?"

Falak - "Thik hain. Kal tum aaogi na ?"

Nayantara - "Haan. Bye Falak."

Falak - "Good Night."

Agli shaam dono restaurant mein milte hain. Dono ek dusre ke saamne baithe hue the. Dono ek dusre se yahan-wahan ki baatein karte hain. Lekin, koshish karne ke bawjood dono ek dusre se khul kar baat-cheet nahi kar paa rahe the. Ek ajeeb si hichkichahat dono ke darmiyaan aa chuki thi. 

Dono ki aankhein bayaan kar rahi thi ki, dono ek dusre se dobara milne ke liye kitne besabr the. Kuch der baad, Nayantara kehti hain, "Mujhe ghar jaana padega."

Dono bahar nikalte hain aur tabhi hawaa chal padti hain. Us hawaa ke jhonke se Nayantara ka dupatta udd jaata hain. Falak bhaagte hue jaata hain aur us dupatte ko pakad leta hain. Phir woh Nayantara ke kareeb jaata hain aur use dupatta odha deta hain. Nayantara sharmaati hain aur Falak ki nazarein Nayantara par tiki hui thi. Woh uske chehre ko chuta hain aur Nayantara ki aankhein bhar aati hain. Dono ek dusre ka haath pakad lete hain aur Falak apni ungliyon se Nayantara ke haathon par 'I Love You' likhta hain. Nayantara Falak ke haathon ko chum leti hain. Dono ek dusre ki aankhon mein doob jaate hain aur aankhon hi aankhon mein, apni mohabbat ka izhaar kar dete hain.

                 -  Ved Vineet Gautam