Samajhauta

Kunal Saxena ek businessman hain. Unki khilono ki dukaan hain. Kunal Saxena ki patni ka naam hain Sujata Saxena. Kunal aur Sujata ke do bete hain. Bade bete ka naam hain Pranav Saxena aur Chote bete ka naam hain Rohan Saxena. Pranav ka College haal hi mein khatam hua hain aur woh apne pita ke saath rehkar unke kaam mein unka haath bataa ta hain, khilono ki delivery lena, unki payments karna, ityaadi. 

Ek din Pranav ne Kunal se kaha, "Papa woh dukaan mein khilono ki kami ho chuki hain. Toh ab hume naye orders dene honge."

Kunal - "Thik hain beta. Main do teen din mein naya maal le aaunga."

Pranav - "Thik hain Papa."

Kuch dino ke baad, Pranav ne Kunal se kaha, "Papa woh main aapse kuch kehna chahta hoon."

Kunal - "Haan kaho beta."

Pranav - "Papa woh main yeh soch raha tha ki hume apna business online bhi karna chahiye. Aaj Kal sab kaam online hi ho raha hain."

Kunal - "Lekin beta, apni dukaan acchi chal rahi hain; toh hume online kaam mein paisa phoonk ne ki kya zaroorat hain ?"

Pranav - "Papa iska hume bohut zyada fayda hoga aur agar hum aaj online nahi aaye toh hume nuksaan bhi bohut jhelna pad sakta hain."

Kunal - "Woh kaise ?"

Pranav - "Papa aaj kal duniya online ho chuki hain. Zyadatar log har tarah ke saamaan online kharidna hi pasand karte hain. Ghar baithe-baithe unhe delivery milti hain. Is se unke samay ki bachat hoti hain. Is wajah se, log ab bazaar mein ghumna utna pasand nahi karte hain."

Kunal - "Lekin beta online kaam shuru karne ke liye bhi toh hume kharcha lagega ?"

Pranav - "Haan Papa woh toh lagega. Yeh ek tarah se ek naya business shuru karne jaisa hoga. Hume shuru mein accha khasa invest karna hoga."

Kunal - "Nahi beta, yeh toh nahi ho paayega. Yeh apne hi pairon par kulhaadi maarne jaisa kaam hoga."

Pranav - "Papa agar hum aaj is kaam mein nahi aayenge toh hum apna sab kuch daanv par laga denge. Kyunki Internet ka hi bhavishya hain."

Kunal - "Beta aisa hain, insaan ki pehchan tab tak sahi dhang se nahi ho paati hain, jab tak ki us insaan se aamne-saamne baat na ho. Internet par duniya bhar ke fraud bhi pade rehte hain."

Pranav - "Lekin Papa, risk toh har jagah par hain. Jab tak hum koshish hi nahi karenge, tab tak hum aage kaise badhenge."

Kunal - "Mujhe is baare mein koi bhi baat nahi karni hain. Kaam jaisa chal raha hain, waisa hi chalta rahega."

Pranav - "Thik hain Papa. Lekin main dukaan mein nahi baith paaunga. Main online kaam karna chahta hoon."

Kunal - "Thik hain beta. Tum ab bade ho gaye ho aur tum samajhdaar bhi ho. Apna accha bura khud soch sakte ho. Main tumpar koi bhi dabaav nahi daalunga."

Pranav - "Thank You Papa."

Woh baat wahi par hi khatam ho gayi. Lekin, Pranav dukaan par jaana band nahi kiya tha. Kyunki use laga ki kahi na kahi, uske pita ko bura lag jaayega. Woh socha ki woh apne pita se is baare mein baad mein kabhi baat karke unka nazariya badalne ki koshish karega.

Kuch dino ke baad, Pranav ne Kunal se kaha, "Papa woh mujhe kuch paise chahiye the."

Kunal - "Kis kaam ke liye ?"

Pranav - "Wahi apna online business shuru karne ke liye."

Kunal - "Toh beta kya tumhe dukaan par baithna chota kaam lagta hain ?"

Pranav - "Woh baat nahi hain Papa. Agar aap kahenge, toh main har roz ki tarah kal bhi dukaan par aa jaaunga aur kal ke baad bhi dukaan par aata rahunga. Lekin main ek naye zamaane ka ladka hoon. Meri soch aapse alag hain. Mere ideas aapse alag hain, toh zaahir si baat hain ki mera kaam karne ka tareeka bhi aapse alag hi hoga. Bas aur koi baat nahi hain."

Kunal - "Thik hain beta. Tum mujhe bas do mahine ka waqt de do main paison ka intezaam kar dunga."

Pranav - "Thank You Papa."

Kunal ne, kuch dino ke baad hi Pranav ko paise de diye. Pranav ne apna kaam shuru kiya aur kuch mahine beet jaane ke baad bhi use safalata prapt nahi hui. Uske bawjood, Kunal ne Pranav se kuch bhi nahi kaha. 

Ek din ki baat hain, jab dono baap-bete ghar mein baithe TV par news dekh rahe the. Tabhi achaanak se khabar aayi ki shahar ke kuch hisson mein bhukamp ke jhatke aaye hain. News channel par, shahar ke un hisson ke baare mein bataya jaa raha tha, jahan par bhukamp hue the. Unme se ek jagah woh bhi thi, jahan par Kunal Saxena ke khilono ki dukaan thi. Yeh khabar dekhte hi dono baap bete dukaan ke liye turant hi nikal pade. 

Dukaan par pahunchte hi, unhone dekha ki unki dukaan dhwast ho chuki hain aur saare ke saare khilone toot-phont chuke hain. Yeh drshy dekhte hi, un dono ke pairon tale zameen khisak gayi. Woh dono wahan par raat bhar ruke rahe aur agli subah apne ghar laute. Un dono ko dekhte hi Sujata ne pucha, "Sab thik toh hain na ?"

Kunal ne bohut hi dard bhari awaaz mein kaha, "Sab kuch khatam ho chuka hain."

Sujata - "Matlab ?"

Kunal - "Dukaan dha chuki hain. Saare khilone bhi toot chuke hain. Sab kuch barbaad ho chuka hain." Yeh sunkar Sujata chaunk gayi. 

Din Prati Din, us parivaar ke halaat bigadate chale gaye. Kunal ne ek bank se loan bhi liya hua tha. Jise chuka na paane ki wajah se, bank ne unka ghar jabt kar liya. Aur unhe apna ghar chodna pada. Ab woh log ek bohut hi saste se flat mein bhade par rehna shuru kar diye the. Pranav ne apne online business mein din raat ek kar diya. Ristedaaron se thodi bohut madad lekar jaise-taise un logon ka guzaara ho raha tha. Kunal bhi apne business ko dubara shuru karne ki koshish kar raha tha. Woh apne doston se baat-cheet karta rehta tha. Lekin, un logon ke kuch haath nahi lag paa raha tha. Dono ke saare prayaas vifal ho rahe the. 

Ek din, Rohan ki tabiyat achaanak se kharab ho gayi. Use bohut tez bukhaar chadh chuka tha. Unhone use doctor ko dikhaya. Doctor ne kuch der tak uski jaanch ki aur bataya ki Rohan ko Dengue ho gaya hain aur use aspataal mein admit karna padega. 

Kunal ne apne kuch rishtedaaron ko call lagaya aur unse paise mangwakar, Rohan ko turant aspataal mein bharti karwaya. Rohan ki dekh-bhaal ke liye, Sujata aspataal mein hi ruk gayi. Ghar mein sabhi log, bohut zyada tension mein aa chuke the. Kuch dino ke ilaaj ke baad, Rohan ko aspataal se discharge mil gaya. 

"Chalo ek musibat toh khatam ho gayi." Kunal ne kaha. 

Pranav - "Ab aage kya Papa ?"

Kunal - "Dekhte hain beta."

Pranav - "Hum kaise shuruaat karenge ? Aakhir hum kaise is musibat se bahar nikal paayenge ?"

Kunal - "Upar wale par bharosa rakho. Wahi hume koi na koi raasta dikhayenge. Dheere-Dheere, sab kuch thik ho jaayega."

Kuch dino ke baad, Pranav ne ek company mein naukri pakad li. Use mahine ki 30,000 Rupaye tankha mil rahi thi. Is baat ka pata chalte hi, Kunal ne Pranav se kaha, "Tum naukri kyun kar rahe ho ?"

Pranav - "Filhal musibat hain na Papa. Ghar mein do paise aana bhi toh zaroori hain na."

Kunal - "Aur tumhara online business ? Uska kya ?"

Pranav - "Uspar bhi main kaam kar raha hoon. Ek baar mera business set ho gaya toh main naukri chod dunga."

Kunal - "Haan tumhe apne business par bhi dhyaan dena chahiye."

Pranav - "Aap toh kabhi bhi nahi chahte the ki main online business karun."

Kunal - "Nahi tumhare ideas bhi sahi ho sakte hain. Us waqt apna kaam bohut acche se chal raha tha. Maine socha ki tumhe shuruat karne mein bohut sangharsh karna padega, is wajah se main tumhare faisle ke khilaaf tha. Ab toh sab kuch hume shuroo se shuroo karana hain. Khair dheere-dheere sab kuch thik ho jaayega. Tum bas dhairya rakh kar kaam karo aur saath hi saath apne sehat par bhi dhyaan do. Thode se duble ho chuke ho tum."

Pranav - "Ji Papa. Abhi aapka kaam kaisa chal raha hain ?"

Kunal - "Kal ek meeting hain. Agar woh safal ho gayi, toh bohut kuch accha ho jaayega."

Pranav - "Aapki kal ki meeting zaroor kamyaab hogi Papa."

Kunal - "Thank You Beta."

Agle din, Kunal tayyar hokar apne meeting ke liye nikal pada. Shaam mein ghar aane ke baad, usne Sujata se paani maanga. Sujata ne kitchen se paani laya aur paani peete hi, Kunal ghar se bahar jaane laga. Yeh dekh kar Sujata hairaan reh gayi aur usne pucha, "Are aap kaha jaa rahe hain ?"

Kunal - "Main bas abhi thodi der mein hi aa raha hoon."

Yeh kehkar woh chala gaya. Thodi der ke baad, Kunal ghar lauta. Uske haath mein kuch carry bags the. Yeh dekh kar Sujata puchi, "Yeh sab kya hain Ji ?"

Kunal - "Yeh main mithaiyan laaya hoon."

Sujata - "Mithayi kyun ?"

Kunal - "Mera kaam jald hi shuru hone wala hain. Mujhe aaj ek badi jeet mili hain. Bas usi khushi mein."

Tabhi Pranav ghar par aata hain aur mithayian dekh kar kehta hain, "Yeh sab kya hain Papa ?"

Kunal - "Woh mujhe ek investor mil gaya hain. Mera business ab jald hi shuru ho jaayega."

Pranav - "Yeh toh bohut khushi ki baat hain Papa."

Poore parivaar ne saath baithkar mithayian khayi. Dheere-Dheere sab kuch thik hona shuru ho chuka tha. Ab is parivaar ki gaadi, patri par aa rahi thi. 

Ek din Kunal ne Pranav se kaha, "Beta tumhare liye ek rishta aaya hain. Ab tumhari umar bhi ho rahi hain Shaadi ki. Agar tum chaho toh hum ladki ke ghar jaa sakte hain milne ke liye."

Pranav - "Lekin Papa, Shaadi itni jaldi ?"

Kunal - "Ab umar toh yahi sahi hain beta."

Pranav ne kuch der socha aur kaha, "Thik hain Papa. Aap jab kahenge, hum log ladki se milne ke liye chale jaayenge." 

Kuch dino baad, woh log ladki dekhne ke liye chale gaye. Ladki dikhne mein behad sundar aur sushil lag rahi thi. Dono parivaar ke beech kuch der tak baat-cheet ke baad, rishta tai ho gaya. Pranav ki jis ladki se shaadi tai hui thi, us ladki ka naam Madhu tha. Kuch dino ke baad, un dono ki shaadi ho gayi. 

Shuruat ke kuch din toh thik-thak nikal gaye. Lekin, dheere-dheere Madhu ke asli rang saamne aana shuru ho gaye the. Ek din ki baat hain, din bhar ke thakaan baad, jab Pranav shaam mein ghar lauta tab usne Madhu se paani maanga. Jis par Madhu ne keh diya, "Apne liye paani tum khud lo. Main tumhari biwi hoon koi naukrani nahi."

Yeh sunte hi Pranav dang reh gaya. Haalat ko sambhalte hue, Sujata ne kitchen se paani laaya aur Pranav ko de diya. Madhu kabhi ghar ka kaam karti, toh kabhi na karti. Kabhi-Kabhi woh Sujata ko bina bataye ghar se bahar chali jaati aur jab woh wapas ghar laut ti toh Sujata Madhu se puch leti ki woh kaha gayi hain. Jis par woh kehti, "Main bahar kuch kaam se gayi thi." Aur jab Sujata us se puchti ki woh kya kaam se gayi thi, toh woh keh deti ki, "Main apni marzi ki maalik hoon. Aap mujhse meri zindagi ke baare mein koi sawaal na kiya kare." Woh bas apne mann maani harkat kar rahi thi. Din-Ba-Din Madhu ki badhti hui mann maani aur badtameezi dekh kar ek din Pranav ne Madhu kaha, "Tum meri mummy se aisi badtameezi se baat nahi kar sakti ho."

Madhu - "Ab sawaal ke hisaab se hi jawaab milega na."

Pranav - "Agar tumhe is ghar mein rehna hain, toh is ghar ke taur-tareeke ke saath rehna hoga."

Madhu - "Main azaad panchi hoon. Koi toota nahi jise koi bhi pinjare mein kaid karke rakh sake."

Pranav - "Main tumhe jald hi tumhare ghar par chod kar aa jaaunga." Yeh sunkar Kunal waha par aaya aur usne Pranav se kaha, "Pranav. Zara tum yahan aana." Aur woh Hall mein chala gaya.

Woh bhi Kunal ke peeche-peeche chala gaya. 

Kunal - "Yeh sab tum kya kar rahe ho ?"

Pranav - "Aur kya karun Papa ?"

Kunal - "Dekho beta hum dono toh kuch samay ke hi mehmaan hain. Uske baad toh tumhe apni patni ke saath saari zindagi beetani hain."

Pranav - "Main bhi kaise reh paaunga Papa ?"

Kunal - "Aadat daal lo beta. Dekho ghar ke maamle ka agar zyada tension loge toh, tum kuch bhi nahi kar paaoge. Itni mushkil se hum log itni badi musibat se bahar aa paaye hain. Ab bas tumhe kaam karte rehna hain aur sabko saath bhi lekar chalte rehna hain. Bas isi tarah se tum apni zindagi ki gaadi ko acche se chala paaoge. Nahi toh, tum bas dal-dal mein phanste chale jaaoge."

Pranav chup tha. Aur usne zindagi bhar chup rehne ka hi faisla kar liya. Woh samajh gaya ki use jeevan bhar samjhote ke saath rehna hoga. Aur samaaj mein izzat bachaye rakhne ke liye, yahi sahi hain.

               - Ved Vineet Gautam