Pratiroop

 Krishna Gaikwad ek businessman hain. Unki wafers ki factory hain. Unki ek biwi aur ek beta hain. Biwi ka naam hain, Sunidhi Gaikwad aur bete ka naam hain, Yash Gaikwad. Do saal pehle, unki factory mein aag lag gayi thi aur woh karz mein doob gaye the. Aaj us parivaar ka sab kuch bik chuka hain. Yahan tak ki unka apna bangla jise kai saalon pehle, Krishna ne bohut hi dil se banwaya tha, woh tak bik chuka hain. Jis bangle ki neev ki ek-ek int Krishna ne bohut hi pyaar ke saath rakhi thi, aaj us bangle ko chod; woh log ek bhade ke ghar mein reh rahe hain. Ghar kya kahe, use ek jhopda bhi kaha jaa sakta hain. Kaafi sangharshon ke bawjood, is parivaar ke haalat badalne ka naam hi nahi le rahe hain. Jaise-Taise karke inki zindagi kat rahi hain. Aaj yeh dono baap bete, alag-alag jagah par naukri kar rahe hain. 

Ek din, jab Yash office ka kaam khatam karke paidal ghar aa raha tha, tab woh dheere-dheere chal kar aa raha tha. Woh apne khayalon ki duniya mein mashgool chalte aa raha tha. 

Yash bohut dukhi tha aur chalte-chalte woh achaanak se ruk gaya. Usme ab chalne ki himmat nahi thi. Woh raaste ke kinare par pade ek patthar par jaakar baith gaya. Uski nazar aasmaan ki aur padi. Upar neela aakash aur kuch safed toh kuch kaale rang ke baadal use dikh rahe the. Woh bas aasman ki aur taktaki lagaye dekh raha tha. Dekhte-Dekhte usne socha, 'Yeh aasmaan aakhir kitna vishal hain. Aur aaj meri kya kaabliyat hain ? Meri koi haisiyat hi nahi reh gayi hain. Kitne sangharsh ka saamna karne ke baad, yeh aasmaan itna balwaan bana hoga. Na jaane kitne gehre zakhm dabe honge, is aasmaan ke bheetar. Kya kuch nahi jhela hoga isne. Mujhe bhi aisa hi vishal ban na padega. Tabhi jaakar meri samasya ka hal nikal paayega. Toh haan, uske liye mujhe bhi itna kuch jhelna hoga. Duniya bhar ki thokre khaani hogi aur tab jaakar shayad main apni zindagi mein kuch haasil kar paaun. Hum kya the aur kya ho gaye.' Yash ki aankhon se aansun chalak padte hain. Woh uthkar ghar ke liye nikal padta hain. Kuch der baad, woh apne ghar par pahunchta hain. Haath-Muh dhokar, khaana khaakar woh so jaata hain. 

Agle din, jab woh dubaara apne office se ghar aa raha hota hain, tab usi sunsaan sadak par; use pichle din ka drishya yaad aata hain. Woh usi patthar par jaakar baith jaata hain. Yash sochta hain, 'Is duniya mein kai log kitne mahaan bane. Kya kuch haasil nahi kiya hain unhone apne jeevan mein. Haan toh unhone utna sangharsh bhi kiya hain. Aaj internet par har ek cheez maujood hain aur har ek tarah ka business bhi internet par chalta hain. Toh aisi kya chiz hain jo mujhe aage badhne se rok rahi hain ? Kya mujhe naukri ke saath-saath khud ka kuch kaam shuru karna chahiye ? Haan zaroor kyun nahi. Har haal mein khud ka kaam shuru karna chahiye mujhe.' Yash us patthar par se utha aur turant apne ghar ke liye chal pada. Woh paidal hi chal raha tha, lekin woh tez-tez chal raha tha. Woh isi shan apne ghar par pahuchna chahta tha. Use aisa mehsus ho raha tha, maano agar woh thoda bhi late ho gaya; toh woh shayad koi beshkeemati cheez kho dega. Haan kho toh dega, waqt. Waqt se zyada keemati cheez aakhir kya hain is duniya mein ? 

Kuch der baad, woh apne ghar pahunch gaya aur usne darwaaza khat-khataya. Sunidhi ne darwaaza khola. Aur woh Yash ki haalat dekh kar dang reh gayi. Yash haanp raha tha. Uska chehra laal ho chuka tha aur aankhon se paani gir raha tha. Sunidhi turant uska haath pakad kar, use andar le aayi aur use chatayi par deewar se tek kar baitha di. Phir woh kitchen ki aur daudte hue gayi aur wahan se paani laakar, use chammach-chammach pilayi. Sunidhi ne Yash ka maatha chua. Uska maatha, tez bukhaar se tap raha tha. Usne Yash ke haath pair maley aur uska sar dabaya. Thodi der baad, woh gehri neend mein so gaya. 

Agle din, uski neend khuli. Yash ko abhi bhi bukhaar tha. Use jaga hua dekh, Sunidhi ne kaha, "Beta main paani le aati hoon. Tum baithe raho." Yeh kehkar woh kitchen mein chali jaati hain. Thodi der ke baad, woh ek glass bhar paani le aati hain aur Yash ko glass pakda deti hain. Woh paani peeta hain aur glass farsh par rakh deta hain. Din bhar woh bistar par hi pada hua tha. Lekin, woh apne smartphone par online jobs ke baare mein jaankariyan ikattha kar raha tha. Use designing ka bohut shauk tha. Use internet par online designing se jude jo bhi jaankariyan mil rahi thi, use woh apne phone ke notepad par likhte jaa raha tha. Dekhte-Dekhte dopahar ho gayi. Dopahar mein, Sunidhi ne halka-phulka khaana banaya aur Yash ko diya. "Ab tumhe kaisa mehsus ho raha hain beta ?" Sunidhi ne pucha.

Yash - "Ab thik lag raha hain Mummy."

Sunidhi - "Kya kal tum bahar kuch ulta-seedha kha liye the ?"

Yash - "Nahi mummy."

Sunidhi - "Toh kya sadak ka paani piya ?"

Yash - "Bilkul nahi."

Sunidhi - "Thik hain. Abhi do teen din tumhe office jaane ki koi zaroorat nahi hain. Tumhare papa ne tumhare office mein chutti ke liye, subah hi baat kar li thi."

Yash - "Thik hain Mummy."

Shaam mein Krishna ghar par aaye aur unhone Yash ka bukhaar check kiya aur thodi der baithkar us se baat-cheet ki. 

Chauthe din se Yash apne office jaana, dubara shuru kar diya. Har shaam woh usi sunsaan sadak se guzarta lekin, wahan par woh rukta nahi. Aur ghar pahunchkar woh internet par online designing se jude jaankariyan dhundhta. Ek din, jab Yash kaam se laut raha tha; tab woh dubara usi sadak par tha. Har din ki tarah us din bhi woh sadak sunsaan aur viraan thi. Yash chalte-chalte ruk gaya aur usne yahan wahan nazar daudaayi. Woh us patthar ko dhundh raha tha, jis par woh kuch dino pehle baitha tha.

Kuch seconds baad, achaanak se use woh patthar dikha aur woh us patthar par jaakar baith gaya. 'Koun hoon main ? Aakhir mera wajood kya hain ?' usne socha. Tabhi uske aankhon ke saamne ek roshni chamki aur kuch der baad woh chamak dhundhali pad gayi. Yash ke aankhon ke saamne uska pratiroop khada tha. Woh Yash ki taraf dekh kar muskuraya. "Koun ho tum ?" Yash ne us se pucha.

"Main tumhara pratiroop hoon." Usne jawab diya. 

Yash - "Kya chahte ho tum mujhse ?"

Pratiroop - "Kuch bhi toh nahi."

Yash - "Phir kyun aaye ho tum ?"

Pratiroop - "Main bas tumhe tumhara bhavishya dikhane ke liye aaya hoon."

Yash - "Aur kya hain mera bhavishya ?"

Pratiroop - "Wahi jo tum chaho."

Yash - "Matlab ?"

Pratiroop - "Tumhe designing ka kaam karna hain na ?"

Yash - "Yeh baat tum kaise jaante ho ?"

"Main kaise jaanta hoon ?" Yeh kehkar woh Pratiroop hans pada. "Kaise jaanunga main ? Main aakhir tum hi toh hoon. Hum dono ek hi hain Yash. Lekin, phir bhi hum bhinn hain."

Yash - "Matlab ?"

 Pratiroop - "Matlab yeh ki main tum hi hoon. Lekin, main tumse alag hoon. Meri soch tumse mail nahi khaati hain. Tumhe online designing karna hain na ? Ek kaam karo. Abhi tum kuch jagah par kaam ke liye apply kar do aur kal aakar tum mujhe batana ki tumne kaha apply kiya hain. Ab tum jaao. Nahi toh agar us din ki tarah, mausam dubara kharab ho gaya; toh tum phir se bimaar pad jaaoge."

Yash wahan se uth kar apne ghar ke liye chala jaata hain. Khaana khaane ke baad, jab raat mein woh apne kamre mein hota hain tab woh kuch freelancing sites par apna account banakar kuch jagah par apply bhi kar deta hain aur uska screenshot apne mobile mein save kar leta hain. 

Agle din, jab woh office se ghar ke liye nikalta hain, tab woh dubara usi patthar par baitha hota hain aur kuch der ke baad, uska pratiroop dubara uske saamne prakat hota hain. 

Pratiroop - "Kaise ho Yash ?"

Yash - "Main thik hoon. Tum kaise ho ?"

Pratiroop - "Main toh hamesha hi thik rehta hoon. Toh batao, kya-kya kiya tumne kal ?"

Yash - "Kal maine kuch jagah par freelance job ke liye apply kiya hain."

Pratiroop - "Good."

Yash - "Kya tum puchoge nahi ki maine kaha-kaha apply kiya hain ?"

Pratiroop - "Nahi. Main tumse sirf utna hi puchunga, jitna ki main puchna chahta hoon."

Yash - "Lekin phir bhi main tumhe dikhaunga. Aao dekho, mere phone mein screenshot hain." Pratiroop Yash ke bagal mein aa baithta hain. Yash use sabhi screenshots dikhata hain. Yeh sab dekh kar Pratiroop Yash se kehta hain, "Mujhe tumse bohut saari ummedin hain aur ek na ek din mujhe tum par garv hoga." Aur woh hawa mein gayab ho jaata hain. Yash ghar ke liye nikal jaata hain. Aaj uske chehre par muskaan thi. Ek arse baad, woh bohut khushi mehsus kar raha tha. Ghar pahuchte hi, woh apne kamre mein gaya aur online kaam dhundhna turant shuru kar diya. Aakhir use apne Pratiroop ko jawab dena tha. 

Yash har roz usi sadak par apne Pratiroop se milta aur us se apni dikattein batata. Uska Pratiroop use har samasya ka hal de deta. Woh use apne sapney aur apni musibaton ke baare mein batata aur Pratiroop use protsahit karta. 

Samay beet ta gaya aur Yash ki online kaam se thodi si kamayi bhi shuru ho chuki thi. Apni pehli kamayi ke baare mein, apne Pratiroop ko batate waqt woh bohut khush hua. Uska yeh utsaah dekh kar Yash ka Pratiroop bas use ghur raha tha. 

"Kya hua ?" Yash ne badi hairaani se pucha.

Pratiroop - "Tumhe yahan par nahi rukna hain ?"

Yash - "Matlab ?"

Pratiroop - "Apna bangla yaad aa raha hain tumhe ?"

Yash chup tha. 

Pratiroop - "Kitna aalishan bangla tha tumhara aur aaj kaha par tum reh rahe ho ?"

Yash ki aankhein bhar aayi. 

Pratiroop - "Apne bangle ko dubara paana tumhara lakshya hona chahiye. Ab tumhe bohut zyada mehnat karni hain. Tum udaas mat hoo. Main hoon na tumhare saath aur hamesha hi saath mein rahunga. Ab tum ghar jaao aur aaj tum sirf aaram karo. Main kal milunga tumse." 

Yash - "Lekin kal toh meri chutti hain."

Pratiroop - "Koi baat nahi. Aaj aur kal tum sirf aaram karo. Main parson tumse milunga aur hum parson bhi dher saari baatein karenge. Thik hain ?"  

Yash - "Thik hain."

Pratiroop - "Ab tum jaao aur yeh do din sirf aur sirf tumhe aaram hi karna hain."

Yash wahan se chala jaata hain. Woh do dino tak aaram karta hain aur thoda sa udaas bhi rehta hain. 

Do din baad, woh apne kaam se jab wapas aa raha hota hain, tab woh dubara usi sadak par khada apne Pratiroop ka intezaar kar raha hota hain. Kaafi samay beet jaata hain, lekin uska Pratiroop wahan par prakat nahi hota hain. Woh aur intezaar karta hain, lekin, phir bhi uska Pratiroop use dikhayi nahi deta hain. Aakhir mein Yash ke sabr ka baandh toot jaata hain aur woh zor se chillata hain. Uska Pratiroop uske saamne aa jaata hain. "Kya hua bhai ? Kyun itna shor macha rahe ho tum ?" Pratiroop Yash se puchta hain.

Yash - "Mera sabr toot chuka hain."

Pratiroop - "Aaj ek din maine aane mein deri kar di, toh itna gussa ?"

Yash - "Naaraz main tumse nahi hoon."

Pratiroop - "Phir ?"

Yash - "Main aage kaise badhun ?"

Pratiroop - "Chalkar. Upar wale ne tumhe do pair diye hain. Uska istemaal karo."

Yash - "Main zindagi mein aage badhne ki baat kar raha hoon."

Pratiroop - "Koshish karna mat chodo tum."

Yash - "Woh toh main kar hi raha hoon."

Pratiroop - "Lekin tum apna sabr kyun kho rahe ho ?"

Yash - "Kyunki main besabr ho chuka hoon ab."

Pratiroop - "Tum yahi galti kar rahe ho."

Yash - "Aakhir tum kehna kya chahte ho ?"

Pratiroop - "Main yeh kehna chahta hoon ki, tum apna sabr baandh kar apna kaam karte raho."

"Kab tak aisa chalta rahega ?" Yash ne thoda gusse se pucha.

Pratiroop - "Yeh toh neeyati ke haathon mein hain. Hamara kaam hain karm karna. Phal toh hame neeyati degi. Bina sabr khoye hume nirantar prayaas karte rehna hain. Yahi hamara kartavya hain. Ek tum hi sangharsh nahi kar rahe ho. Is duniya mein zyadatar log apne jeevan se pareshan hain. Har koi apne jeevan mein sangharsh kar raha hain. Tum akele nahi ho."

Yash ko apne Pratiroop ki baatein samajh mein aati hain aur use sabr ki ahamiyat ka ehsaas hota hain. Uske baad uska Pratiroop, hawa mein gayab ho jaata hain aur woh muskura kar apne ghar ki aur chal padta hain. 

                     - Ved Vineet Gautam