Pritam Shukla apne Maata-Pita ke saath Mumbai ke ek chawl mein rehta hain. Woh ek company mein naukri karta hain. Pritam store manager ke pad par hain. Uski mahine ki tankha 25,000 Rupaye hain. Woh bohut mehnati ladka hain. Uske Pita ek taxi driver hain. Unka naam, Ramesh Shukla hain. Pritam ke naukri par lagne ke baad bhi woh apna Taxi chalane ka kaam nahi chod rahe the, jis wajah se Pritam kabhi-kabhi unse naraaz ho jaata tha.
Ramesh - "Dekhte hain beta ab."
Pritam - "Kab aap yeh kaam chodoge Papa ?"
Ramesh - "Chod dunga kuch dino mein."
Pritam - "Pichle do mahino se aap bas yahi keh rahe ho, ki kuch dino mein main yeh kaam chod dunga. Kab chodoge Papa, mujhe ek date de dijiye."
Ramesh - "Beta ab aadat ho chuki hain na mujhe yeh kaam karne ki. Dheere-Dheere yeh aadat chhoot jaayegi."
Pritam - "Yani ki aap yeh kaam nahi chodoge."
Ramesh - "Kya tumhe sharam aati hain ek Taxi Driver ko apna pita kehne mein ?"
Pritam - "Nahi Papa. Lekin ab aapko yeh kaam karne ki zaroorat hi kya hain, jab main itna accha kama raha hoon."
Ramesh - "Haan zaroorat toh nahi hain. Lekin, yeh kaam karna mere liye zaroori hain."
"Matlab ?" Pritam ne yeh baat thoda gusse mein kahi.
Ramesh - "Beta waqt ka koi bhi bharosa nahi hain. Kab kaise palat jaaye, kuch bhi kaha nahi jaa sakta hain. Bhagwan na kare agar kal ko hamare din bure aa gaye, toh yahi chota sa kaam hi toh hamare kaam aayega na."
Pritam - "Toh bura din jab aayega, tab ka tab dekha jaayega Papa. Filhal toh hume zaroorat toh nahi hain na."
Ramesh - "Dekho main tumse koi bhi behas nahi karna chahta hoon. Main Taxi chalana nahi chodunga. Bas baat khatam."
Pritam gusse mein apne kamre mein chala jaata hain.
Agle din, woh apne kaam par jaata hain aur shaam mein woh apne ghar par laut aata hain. Shaam mein, Pritam dubara wahi sawaal karta hain aur Ramesh jawab mein yahi kehta hain ki woh yeh kaam nahi chodega.
Kuch mahino ke baad, Pritam ki naukri chali jaati hain. Woh bohut dukhi ho jaata hain. Use samjhate hue, Ramesh kehta hain, "Tum bilkul bhi chinta mat karo beta. Tumhe baad mein koi aur acchi naukri mil hi jaayegi."
Pritam - "Thik hain Papa."
Kareeb do mahino ke sangharsh ke baad, aakhir mein Pritam ko dusri naukri mil hi jaati hain. Lekin wahan par use sirf 18,000 Rupaye tankha mil rahi thi. Phir bhi woh yeh naukri karne liye raazi ho gaya, kyunki uske paas aur koi dusra raasta bhi toh nahi tha. Haalanki Pritam ka yeh naukri karne ka bilkul bhi mann nahi tha.
Ek shaam, jab woh apne ghar pahuncha, toh usne dekha ki uske chawl mein thodi si bheed jamaa hui hain. Usne waha jaakar logon se pucha, "Kya hua hain ?"
Tabhi chawl ke ek aadmi ne bataya, "Bansilal ab is duniya mein nahi raha. Woh marr chuka hain." Yeh sun kar woh dang reh jaata hain. Uske baad Pritam kehta hain, "Kya ? Yun achaanak se ? Kaise hua yeh sab ?"
Chawl ke dusre aadmi ne kaha, "Use Heart Attack aa gaya tha."
Pritam - "Par kaise yun achaanak se ? Bansilal Uncle toh itne tandurust the ?"
Tabhi waha khade ek aadmi ne kaha, "Ab honi ko koun taal sakta hain ? Bhagwaan ki marzi ke aage toh har koi bebas hain."
Chawl ke sabhi logon ne milkar, Bansilal ka antim sanskaar kiya.
Ek raat ki baat hain. Jab Pritam apne bistar par leta hua tha, tab woh Bansilal ke baare mein hi soch raha tha. Woh soch raha tha, 'Bansilal Uncle kitne acche swabhav ke the. Woh mujhe kitna maante bhi the. Bachpan se hi mujhe itna pyaar diya hain unhone. Matlab, aadmi ko pata hi nahi chalta hain aur uski saansein achanak se ruk jaati hain. Kya insaan ko kabhi bhi maut ka aabhaas hota hain ? Kya use is baare mein andaaza lag jaata hain ki, ab uska wajood is duniya se khatam hone wala hain ? Insaan na jaane kya-kya yojana banate rehta hain apne bhavishya ke liye, lekin uski saari ki saari yojanayein, uski saari ki saari ranneeti sab kuch dhari ki dhari reh jaati hain.'
Agle din se woh apne kaam par dubara jaana shuru karta hain. Roz subah uthkar tayyar hokar naukri par jaana aur shaam mein ghar laut jaana, bas yahi uski zindagi reh gayi hain. Ek din, jab Pritam apne kaam se wapas aa raha tha, toh woh apne khayalon mein duba hua paidal chale jaa raha tha. Chalte-Chalte woh kisi se takraya. Usne dekha ki saamne uska Boss khada hain. "Oops sorry Sir. Main galti se takra gaya."
Pritam ke boss ka naam tha, Mr. Rajeev Singhania.
Rajeev Singhania - "It's alright Pritam. Kounse khayalon mein tum khoye hue the ?"
Pritam - "Kuch nahi Sir."
Rajeev Singhania - "Are Bhai agar koi tension hain toh kaho tum. Main koshish karunga tumhari madad karne ki."
Pritam - "Nahi Sir. Aisi koi baat nahi hain. Woh actually meri chawl mein ek uncle rehte the, woh expire ho gaye the kuch din pehle. Toh main bas thoda sa dukhi tha."
Rajeev Singhania - "Aise koi bhi tension mat liya karo. Yeh sab toh hote rehta hain zindagi mein. Is duniya mein jo aaya hain, woh wapas jaayega bhi. Be brave. Sab kuch thik ho jaayega."
Pritam - "Ji Sir."
Rajeev Singhania - "Kya tum chai peeyoge ?"
Pritam - "Haan Sir."
Rajeev Singhania - "Aao mere saath."
Rajeev Singhania chalte hue jaata hain aur Pritam uske peeche-peeche jaata hain. Kuch dur par chalne ke baad, woh ek tapri par ruk jaata hain aur waha padi hui ek bench par baith jaata hain. "Aao baitho." Woh Pritam se kehta hain. Pritam uske bagal mein baith jaata hain. Phir Pritam Chai Wale se kehta hain, "Bhaiyaa do cup Chai dijiyega." Rajeev Singhania ke haath mein lagi hui ghadi dekhkar woh dekhta hi reh jaata hain. Woh bohut khubsurat ghadi thi aur bohut mehngi bhi lag rahi thi. Rajeev Singhania samajh jaata hain ki Pritam uski ghadi ko dekh raha hain. Aur woh kehta hain, "Rolex hain."
Pritam - "Mehangi hogi Sir ?"
Rajeev Singhania - "Do Laakh ki hain."
"Do Laakh ?" Pritam bohut aascharya se kheta hain.
Rajeev Singhania - "Hmm."
Pritam - "Sir ?"
Rajeev Singhania - "Haan ?"
Pritam - "Kya main aapse ek baat puchu ?"
Rajeev Singhania - "Haan pucho Pritam."
Pritam - "Sir aap itna sab kuch handle kaise kar lete ho ?"
Rajeev Singhania - "Karna padta hain Bhai."
Pritam - "Family ko bhi time de paate ho aap ?"
Rajeev Singhania - "Haan. Time deta hoon. Har ek rishte ke liye waqt nikaalna padta hain Bhai aur woh bhi bina apne kaam par koi bhi asar pade."
Pritam - "Sir aap mere aadarsh ho. Agar aap mujhe koi guru gyan de sakte ho toh ?"
Rajeev Singhania - "Kya gyan paana chahte ho tum ?"
Pritam - "Main apni zindagi mein aage kaise badhu mujhe kuch bhi samajh mein nahi aa raha hain. Bas ek daayara bana hua hain aur main usi mein hi ghume jaa raha hoon."
Rajeev Singhania - "Tum aakhir apni zindagi mein karna kya chahte ho ?"
Pritam - "Abhi kuch socha nahi hain. Mere Papa ek taxi driver hain aur mere laakh samjhane ke bawjood woh apna kaam nahi chod rahe hain. Main chahta hoon ki main itna kamaun ki Papa ko ab yeh kaam karne ki zaroorat na pade."
Rajeev Singhania - "Sabse pehle yeh dekho ki tum karna kya chahte ho. Apne aap ko tum samjho. Ek baar sab kuch clear ho gaya, toh pata lagao ki aise kounse log hain, jinhone us field mein safalta paayi hain. Unke jeevan aur unke sangharsh ke baare mein jaano. Uska baad, tum apna khud ka ek plan banao. Aage badhne ki poori ranneeti banao. Ho sakta hain ki tumhe kai baar apni ranneeti ko badalna pade. Lekin, tum apne lakshya ko kabhi bhi mat badalna."
Pritam - "Ji Sir."
Rajeev Singhania - "Koshish karte raho. Zindagi mein kahi na kahi toh tum pohuchoge hi. Bas chalte jaao, raaste apne aap bante jaayenge."
Pritam - "Ji Sir."
Rajeev Singhania - "Aur tum khush raha karo. Dekho har ek aadmi ko ek na ek din is duniya ko alvida kehkar jaana hi hain. Chahe woh ek Arabpati ho ya ek gareeb aadmi. Lekin, zaroori yeh baat hain ki hum apni zindagi ko kis tarah se jeete hain."
Pritam - "Ji Sir."
Rajeev Singhania - "Toh ab main chalta hoon." Yeh kehkar woh khada ho jaata hain aur Pritam bhi uske saath khada hota hain.
Pritam - "Thank You so much Sir."
Rajeev Singhania apna haath aage badhata hain aur Pritam bhi apna haath badhakar us se haath milata hain. Rajeev Singhania chai wale ko paise dekar chala jaata hain. Apne boss se mile guru gyan se Pritam ki soch mein bohut badlaav aata hain.
Apne ghar par jaane ke baad, woh internet par kuch inspirational videos dekhta hain aur kuch inspirational kahaniyan bhi padhta hain.
Dheere-Dheere uske dimaag mein bohut kuch clear hone lagta hain. Pritam ko ek idea aata hain. Woh sochta hain ki, 'Agar main koi information share karne ka kaam karun toh ?' Phir woh tay karta hain ki woh khud ka ek Youtube Channel banayega. Pritam ne apne channel ka shirshak bhi tay kar liya. 'Gyaan Ki Baatein' usne tay kiya ki woh isi shirshak se apna channel shuru karega. Phir usne socha, 'Main apna pehla video kis topic par banau ?' Kaafi der tak sochne ke baad, usne tay kiya ki woh Jamsehdji Tata ke jeevan par Video banayega.
Usne kaafi dino tak, unke baare mein jaankari ikattha ki aur ek plan banaya jaisa ki uske Boss ne us se kaha tha, plan banane ke liye. Usne poora plan banaya ki woh kaise apne video ki shuruat karega aur kaise us video ko aage badate hue use khatam karega. Kareeb ek mahine ke baad uska video bankar tayyar ho gaya. Kuch views mile aur kuch logon ne comments bhi kiya. Logon se mila response dekhkar, Pritam ka utsaah badha. Ab woh din bhar apni naukri karta aur shaam mein, ghar pahunchkar woh apne Youtube Channel par kaam karta. Aisa karte-karte usne ek saal mein apne Youtube Channel par kareeb 15 videos banaye. Dheere-Dheere uski kamayi bhi shuru hui. Kamayi kam hi ho rahi thi. Lekin, woh khush tha. Waqt ke saath-saath Pritam ke Youtube Channel par views, comments aur likes badhte gaye. Ab zyada se zyada log uske Youtube Channel ko visit kar rahe the. Channel shuru karne ke kareeb do saal ke baad, use uski pehli kamayi mili. Usne 5,000 Rupaye kamaye. Lekin Pritam khush tha. Uski kamayi ke baare mein jaankar uske maa-baap bhi bahut khush hua. Aur kyunki, Mr. Rajeev Singhania, uske liye ek prerna the, Pritam ne yeh baat unhe bhi batayi. Woh bhi bohut khush hue yeh baat jaankar aur unhone Pritam ki peeth thaptapayi.
Pritam ne apne sabhi jaan pehchan walon ke beech mein apne Youtube Channel ke baare mein jaankari di. Apne rishtedaar, dost sabhi se usne yeh baat batayi, aur unse darkhast ki, ki woh log uske dwara upload kiye gaye videos ko dekhte rahe. Kaafi samay beet jaane ke baad, use apne Youtube Channel se acchi khaasi kamayi hona shuru ho gayi. Ab woh mahine ka 50,000 se 60,000 Rupaye kama paa raha tha. Pritam ne apne ghar ki bohut saari zaroori saaman kharide. Uski tarrakki dekhkar uske maata-pita bohut khush hue. Unhe Pritam par bohut nazz ho raha tha. Chawl ke baaki log apne baccho ko, Pritam ka udaharan dekar kehte, 'Us ladke ke jaisa bano. Woh tum logon ke liye ek prerna hain.'
Yeh sun kar Pritam ne socha ki is baar woh ek video prerna par banayega. Kaafi research ke baad bhi use samajh nahi aa paya ki woh yeh video kaise banaye. Phir usne socha, 'Main us insaan ke baare mein agar video banau jo mere liye ek prerna hain ?' Agle din woh jab office pahuncha, tab shaam mein woh Mr. Rajeev Singhania ke cabin ka darwaaza khat khataya. Unhone Pritam ko andar aane ka ishaara kiya aur woh andar gaya. "Baitho Pritam." Mr. Rajeev Singhania ne kaha.
Pritam baitha aur usne kaha, "Sir main aapse kuch kehna chahta hoon."
Rajeev Singhania - "Haan kaho."
Pritam - "Sir lekin please aap bura na maniyega."
Rajeev Singhania - "Main kyun bura maanunga ?"
Pritam - "Sir aapko toh maine apne Youtube Channel ke baare mein bataya hi tha."
Rajeev Singhania - "Haan. Kaisa chal raha hain tumhara channel ?"
Pritam - "Woh accha chal raha hain Sir. Baat darasal dusri hain."
Rajeev Singhania - "Kya baat hain ?"
Pritam - "Main prerna ke topic par video bana raha hoon Sir. Aur mere liye mere prerna, mere aadarsh aap ho Sir. Isliye main apne video mein aapke baare mein bhi kuch kehna chahunga."
Rajeev Singhania - "Kya mera naam lena zaroori hain ?"
Pritam - "Ji Sir. Agar aap bura na maano toh."
Rajeev Singhania - "Agar mera naam lene se tumhare Youtube Channel ka kuch fayda ho jaata hain, toh thik hain; tum mera naam le lena."
Pritam - "Thank You very much Sir. Aur woh video upload karte hi main aapko jaankari de dunga. Aap please use zaroor dekhna."
Pritam apna video banata hain aur us dauraan kai baar uski aankhen bhar aati hain. Video shuru hota hain kuch is tarah, "Prerna. Yeh Prerna hume kaha se milti hain ? Hum jaise logon ke hi beech mein rehti hain Prerna. Kisi na kisi roop mein, kisi na kisi insaan ki taraf se milti hain hume Prerna. Mujhe Prerna mili apne Sir Mr. Rajeev Singhania ki taraf se." Us video mein woh apne aadarsh ke jeevan ke sangharsh ke baare mein batata hain. Video shoot karne ke dauraan kai baar uski aankhon mein aansun aa jaate hain. Aakhir mein video khatam hone ke baad, woh use upload karta hain aur kai log use pasand karte hain. Pritam ka yeh video logon dwara sabse zyada pasand kiya gaya video saabit hota hain. Ab toh usne ek sasti si Car bhi kharid li hain.
- Ved Vineet Gautam
Comments
Post a Comment