Vivaan apne maata-pita ka iklauta ladka hain. Woh apne ghar se dur ek anjaan shehar mein rehkar naukri karta hain. Woh roz subah uthta hain aur tayyar hokar office jaata hain aur shaam mein apne flat par wapas aa jaata hain. Ek din, jab woh office ke canteen mein baitha hua tha, tab uske saamne Vishakha aayi jo ki usi ke saath kaam karti thi; aur boli, "Hi Vivaan."
Vivaan - "Hi Vishakha. Kaisi ho tum ?"
Vishakha - "Main thik hoon. Tum kaise ho ?"
Vivaan - "Main bhi thik hoon. Aao baitho."
Vishakha uske saamne baith jaati hain. Dono ke beech mein baat-cheet shuru hoti hain.
Vishakha - "Toh tum yahan kahan par rehte ho ?"
Vivaan - "Main yahi nazdeek mein ek flat par rehta hoon."
Vishakha - "Kahan par ?"
Vivaan - "Mehak Nagar."
Vishakha - "Tab toh hum ekdum nazdeek rehte hain. Main Gunjan Nagar mein rehti hoon."
Vivaan - "Yeh toh bohut acchi baat hain. Kabhi chutti ke waqt mil liya karenge."
Vishakha - "Haan zaroor. Aur koun-koun rehta hain tumhare saath ?"
Vivaan - "Main akela rehta hoon."
Vishakha - "Aur tumhari family ?"
Vivaan - "Woh log Aurangabad mein rehte hain. Tum yahan family ke saath rehti ho ?"
Vishakha - "Nahi main bhi akeli hi rehti hoon. Meri family Nashik mein rehti hain."
Vivaan - "OK. Tab toh hume milte-julte rehna chahiye."
Vishakha - "Aaj shaam shift khatam hone ke baad hum saath mein chale ?"
Vivaan - "Haan zaroor."
Shaam mein dono saath-saath ek dusre se baatein karte hue gaye. Aur aisa har roz hone laga. Din bhar woh dono office mein kaam karte aur shaam mein saath-saath ek dusre se baatein karte hue ghar ke liye jaate. Ab toh Chutti ke din, yeh dono ek dusre se aksar mila karte hain. Kabhi ek dusre ke flat par, toh kabhi bahar.
Kuch mahine beete aur dekhte hi dekhte woh dono ek dusre ke acche dost ban gaye the.
Diwali ka din tha. Vishakha ne Vivaan ko call kiya. Usne call uthaya aur kaha, "Haan Vishakha. Happy Diwali."
Vishakha - "Happy Diwali Vivaan. Kahan par ho ?"
Vivaan - "Main flat par hi hoon."
Vishakha - "Tumhara Diwali ka kya plan hain ?"
Vivaan - "Abhi toh kuch socha nahi hain."
Vishakha - "Kya tum mere flat par aa jaaoge ?"
Vivaan - "Haan main thodi der mein aa jaata hoon." Aur woh call disconnect kar deta hain.
Thodi der baad, Vivaan uske flat par pahuch jaata hain aur ghanti bajata hain. Vishakha darwaza kholti hain aur woh andar aata hain. "Aaj toh bohut khubsurat lag rahi ho tum." Vivaan kehta hain.
Vishakha - "Thanks."
Vishakha kitchen se mithaiyan le aati hain aur woh dono saath mein ek dusre se yahan-wahan ki baatein karte hain. Tabhi achanak se pathakhon ki ek bohut tez awaaz aati hain. Vishakha darr ke maare cheekh uthti hain aur Vivaan ke gale lag jaati hain. Vivaan is baat ko bohut normal leta hain.
Kuch der baad, woh kehta hain, "Main ek call karke aata hoon." Aur woh flat ke bahar chala jaata hain. Thodi der baad, ghar ki bijli chali jaati hain. Vivaan ab bhi bahar baat hi kar raha hota hain. Kuch waqt baad, woh wapas andar aata hain. Use kuch thik se dikhayi nahi de paa raha hota hain, toh woh apne phone par torch jalata hain. Woh dekhta hain, ki Vishakha ab bhi wahi par hi baithi hui hain aur woh ab bhi utni hi dari hui hain, jitna ki kuch pal pehle thi. Vivaan uske nazdeek jaata hain aur kehta hain, "Vishakha kya hua ?" Woh kuch nahi kehti hain. "Main paani le aata hoon." Yeh keh kar woh jaa hi raha hota hain, ki use Vishakha ki rone ki awaaz aati hain. Vivaan uske nazdeek jaata hain aur woh use apne gale se lagakar rone lagti hain. Kaafi der tak uske sahanubhooti ke baad, woh jaise-taise shant hoti hain.
Uska mood halka karne ke liye, Vivaan use apne saath bahar le jaata hain. Thodi der baad, uska mann halka hota hain. Phir woh Vishakha se puchta hain, "Kya ab tum thik ho ?"
Vishakha - "Haan."
Vivaan - "Kya hua tha ? Tum achaanak se itna ghabra kyun gayi thi ?"
Vishakha - "Woh bas aise hi."
Vishakha ab bhi dari hui thi. Woh dono saath-saath chalte jaa rahe the. Thodi der baad, jab Vishakha ka mann halka ho jaata hain; tab woh kehti hain, "Mujhe shor se thoda sa darr lagta hain."
Vivaan - "Aisa kyun ?"
Vishakha - "Main bachpan mein kabhi ghar se zyada bahar nahi nikli hoon na. Isliye shayad. Bachpan mein kabhi kisi dost ke saath khelne ke liye bhi bahar nahi jaati thi."
Vivaan - "Koi baat nahi. Tum jab bhi akela mehsus karo, tum mujhe call kar diya karna. Thik hain ?"
Vishakha - "Thik hain."
Uske baad, woh Vishakha ko uske ghar chod kar apne ghar par chala jaata hain.
Agle din, woh dono office mein milte hain aur Canteen mein saath mein lunch karne ke liye jaate hain.
Vivaan - "Kya ab tum thik ho ?"
Vishakha - "Haan main thik hoon."
Vivaan - "Kal tumhari haalat dekh kar toh main khud darr gaya tha."
Vishakha - "Kal ke liye, tum mujhe maaf kar dena. Meri wajah se tumhara tyohaar kharab ho gaya."
Vivaan - "Are nahi aisi koi baat nahi hain. Tum jab bhi akela mehsus karo, toh bas mujhe ek call kar dena. Dil khol kar mujhse tum baat kar liya karna. Toh tumhara mann halka ho jaayega."
Vishakha - "OK. Thank You."
Ek din, Vivaan ne Vishakha ko call kiya. Do-Teen ghanti bajne ke baad, usne call uthaya aur kaha, "Hello."
Vivaan - "Hi Vishakha."
Vishakha - "Hi Vivaan."
Vivaan - "Kaisi ho tum ?"
Vishakha - "Main thik hoon. Tum kaise ho ?"
Vivaan - "Main bhi thik hoon. Kaha par ho tum ?"
Vishakha - "Main ghar par hoon."
Vivaan - "Kya is waqt tum free ho ?"
Vishakha - "Haan main free hoon."
Vivaan - "Kya tum abhi mujhse mil sakti ho ?"
Vishakha - "Haan zaroor. Kaha par milna hain ?"
Vivaan - "Inorbit Mall mein."
Vishakha - "OK main aa jaati hoon."
Thodi der baad, Vishakha Mall mein pahuchti hain. Aaj woh bohut khubsurat lag rahi thi. Usne neele rang ki jeans pehni hui thi aur safed rang ka top pehna hua tha. Dono ek dusre ko dekh kar muskurate hain aur "Hi" kehte hain. Phir woh dono saath mein Mall mein ek movie dekhte hain aur uske baad, woh dono saath mein Mall mein hi thodi der ghumte hain. Uske baad, woh dono Mall se bahar aate hain.
Mall se bahar aate hi, achaanak se barsaat shuru ho jaati hain. Woh dono ek dusre ka haath pakadte hain aur daudte hue, ek ped ke neeche chale jaate hain.
Barsaat ka thanda-thanda paani Vishakha ke chehre par gir raha tha aur woh apni aankhen band karke us ehsaas ko mehsus kar rahi thi. Vivaan use bohut dhyaan se dekh raha tha.
Vishakha ko dekhte hue aaj Vivaan ki bhavana badal rahi thi. Aaj se pehle Vivaan ne use is nazar se nahi dekha, jis nazar se woh aaj use dekh raha tha. Barsaat kam hui, aur Vishakha ki Vivaan par nazar padi. Is baat ka ehsaas hote hi, Vivaan yahan-wahan dekhne laga. Phir se Vivaan ki nazar Vishakha par padi aur woh use dekh kar bas dekhta hi reh raha tha. Is baar, Vishakha ne use pucha, "Kya hua Vivaan ?"
Vivaan - "Nahi. Kuch bhi toh nahi."
Vishakha ki nazar bhutte wale par padi. Toh usne Vivaan se pucha, "Bhutta khaye ?"
Vivaan - "Haan chalo."
Woh dono saath mein gaye aur Bhutta khaane lage. Thodi der baad, barsaat ruki aur woh dono saath-saath chalne lage.
Vivaan ab bhi chup tha. Uski khaamoshi dekh kar Vishakha ne usse pucha, "Kya hua tum itne chup kyun ho ?"
Vivaan - "Nahi. Kuch bhi nahi."
Vishakha - "Phir? Kuch kehte kyun nahi ho ?"
Vivaan - "Kya kahoon ? Bolo ?"
Vishakha - "Kuch bhi. Accha yeh batao, tumhara aage ka kya plan hain ?"
Vivaan - "Main abhi tumhe tumhare ghar chod kar, apne ghar chala jaaunga."
Vishakha - "Are buddhu, zindagi mein aage ka kya plan hain ?"
Vivaan - "Dekhte hain. Filhal toh yahi par hi kaam karunga, uske baad, agar kahi accha mauka mil jaaye toh wahan par join kar lunga."
Vishakha - "Aur tumne shaadi ke baare mein kuch socha hain ?"
Vivaan - "Nahi. Abhi toh kuch bhi nahi. Tum batao, tum kab kar rahi ho shaadi ?"
Vishakha - "Dekhte hain."
Vivaan - "Tumhare ghar wale, koi ladka toh dekh hi rahe honge na ?"
Vishakha - "Pata nahi. Kya tumhare ghar wale koi ladki dekh rahe hain tumhare liye ?"
Vivaan - "Abhi tak toh nahi. Tumhe kaisa ladka pasand hain ?"
Vishakha - "Bas acche swabhav ka ho. Jo mujhe samajhta ho. Jo mera humdard ho."
Vivaan - "Vishakha ?"
Vishakha - "Haan ?"
Vivaan - "Kya main tumse ek baat kahun ?"
Vishakha - "Haan kaho ?"
Vivaan - "Tum bura toh nahi maanogi ?"
Vishakha - "Bilkul nahi."
Vivaan - "I Love You."
Yeh sunte hi, Vishakha ruk jaati hain. Woh chup rehti hain.
Vivaan - "Tum chup kyun ho ? Kuch bolo toh ?"
Vishakha - "Main kya bolun ?"
Vivaan - "Agar tumhe meri baat ka bura laga ho toh, Iam sorry Vishakha."
Vishakha - "Sorry kis baat ke liye ? Pyaar karna koi gunaah thodi na hain. Aur yeh duniya pyaar se hi toh chalti hain."
Vivaan - "Agar tumhari zindagi mein ki aur ladka ho toh ? Main isliye puchna cah raha tha."
Vishakha - "Koi nahi hain."
Vivaan - "Toh kya tum bhi mujhse pyaar karti ho ?"
Vishakha - "Kya tum hamesha mere saath rahoge ?"
Vivaan - "Haan."
Vishakha - "Aur woh Diwali wale din jo meri ajeeb ghabrahat thi, tum meri us harkat se naaraz toh nahi ho na ?"
Vivaan - "Bilkul bhi nahi Vishakha. Insaan jab zindagi mein akela pad jaata hain, tab woh udaas ho jaata hain. Main bhi toh akela hi tha. Zindagi bas adhuri thi. Tumhare nazdeek aaya, toh main poora hua hoon."
Vishakha - "Lekin main shaadi itni jaldi nahi karne wali hoon."
Vivaan - "Haan abhi do teen saal toh nahi."
Vishakha - "Aur ghar walon ki marzi ke khilaaf jaakar hum shaadi kabhi nahi karenge."
Vivaan - "Haan. Bilkul bhi nahi."
Vishakha - "Thank You."
Vivaan - "Kis baat ke liye Vishakha ?"
Vishakha - "Tum itne understanding ho."
Vivaan - "Kya main ek baar, tumhe gale se laga sakta hoon ?"
Vishakha - "Haan. Kyun nahi."
Woh dono ek dusre ko gale laga lete hain.
Ek din ki baat hain, jab Vivaan office nahi aata hain. Vishakha yahan wahan apni nazar daudati hain lekin, woh kahi dikhayi nahi deta hain. Vishakha use call karti hain, lekin woh call nahi uthata hain. Phir woh apne sah-karmiyon se uske baare mein, pata lagane ki koshish karti hain; lekin, use kuch bhi pata nahi chal paata hain.
Shaam mein kaam khatam hone ke baad, woh Vivaan ki society mein jaati hain aur uske flat ka pata lagati hain. Woh uske flat ke saamne pahuchti hain aur uske flat ka door-bell bajati hain. Kaafi der ke baad, Vivaan darwaza kholta hain. Vishakha uski haalat dekh kar dang reh jaati hain. Use tez bukhaar chadha hua hota hain aur woh thand se kaanp raha hota hain. Vishakha use turant aspataal le jaati hain. Doctor uska test karte hain aur kuch dawaiyaan likh dete hain. Woh dono Vivaan ke ghar pahuchte hain. Vishakha khaana banakar use apne haathon se khilaati hain aur use dawaiyaan dekar sula deti hain. Uske baad, Vishakha Vivaan ke phone se number nikaal kar uske ghar walon ko call karke unhe uski tabiyat ki khabar deti hain. Woh unhe batate hain, ki woh do din baad, pahuch paayenge.
Aakhir mein, Vivaan ke maata-pita wahan par pahuch jaate hain. Vivaan se milkar woh uska haal-chaal lete hain. Uske baad, Vishakha waha se chali jaati hain. Vivaan ke maata-pita us se Vishakha ke baare mein puchte hain aur woh unhe un dono ke rishte ke baare mein, sab kuch batata hain. Uske maata-pita Vishakha ki maasumiyat aur acche swabhav ke baare mein jaankar, bohut khush hote hain.
Kuch dino ke baad, Vivaan office dubara aata hain aur Vishakha us se uski haal-chaal leti hain. Woh Vishakha se kehta hain ki uske maata-pita, Vishakha ke ghar walon se milna chahte hain.
Dono parivaar milte hain aur unke beech mein rishta tai ho jaata hain. Kuch waqt ke baad, un dono ki shaadi ho jaati hain.
- Ved Vineet Gautam
Comments
Post a Comment