Santusht

 Randhir Sharma ek bank mein naukri karte hain. Unki patni ka naam hain, Vaishali Sharma. Randhir aur Vaishali ke do bete hain. Bade bete ka naam hain, Anuj Sharma aur chote bete ka naam hain, Tanuj Sharma. Woh dono bhai ek private company mein naukri karte hain. 

Do mahine ke baad, Randhir ko naukri se retirement milne wala hain. 

Ek din, Randhir ne apne dono beton ko apne pass bulaya aur kaha, "Ab main retire hone wala hoon. Uske baad, mujhe  har mahine bas pension mila karegi. Jald hi ghar ki bhaag-daud tum dono ke kandhon par hogi. Main ummeed karta hoon, ki tum dono hi apni zimmedari bakhubi nibhaoge."

Anuj - "Papa aapke retirement ke baad bhi ghar mein wahi hoga, jo aap chahoge. Aap bas apna aadesh dijiye."

Tanuj - "Papa hum usi marg par chalenge, jo aap hume dikhayenge."

Randhir - "Lekin beta, zindagi mein kabhi na kabhi aisa bhi waqt aayega, jab tum dono ko apna faisla khud lena hoga. Aur aage chalkar parivaar ke bhavishya ka faisla bhi tum dono ko hi lena hain. Aakhir mein tum dono hi is parivaar ke uttaradhikari ho."

Anuj - "Nahi Papa. Jab tak aap zinda hain, tab tak hume bas aapke aadesh ka paalan karna hain."

Tanuj - "Main bhi bhaiyaan ki is baat se sehmat hoon."

Randhir - "Thik hain jaisa tum dono chaho."

Anuj - "Aap ki iccha kya hain Papa ?"

Randhir - "Woh main apne retirement ke baad bataunga."

Anuj - "Thik hain Papa."

Ek-Ek din kat ta gaya aur dekhte hi dekhte Randhir ke retirement ka din aa hi gaya. Daftar mein bade hi aadar aur samman ke saath, Randhir ki vidaai ki gayi aur woh apne ghar ki aur nikal pade. 

Daftar se bahar nikalte samay unka dil bhar aaya. Ek pal ke liye, unki aankhen bhar aayi thi. Dheere-Dheere Chalte-Chalte woh sadak par gaye aur ek rickshaw mein baith gaye. Raaste bhar, woh bas apne daftar mein bitaye hue samay ko yaad kar rahe the. Woh har ek shan unki aankhon ke saamne aa raha tha, jo ki unhone apne daftar mein anubhav kiya tha. 'Dekho sab kuch ek pal mein hi khatam ho gaya.' Randhir ne socha. 

Thode samay ke baad, rickshaw unke ghar ke bahar ruk gayi. Unhone apni palkein ponchi aur rickshaw se utar gaye. Rickshaw wale ko paise dekar unke kadam ghar ke liye chal pade. Unhone apne ghar ki ghanti bajayi aur Vaishali ne darwaaza khola. Randhir ghar ke andar aaye. 

"Toh kaisa raha aapke retirement ka jashn ?" Vaishali ne pucha.

"Jashn ? Hmm" Randhir ne thoda dukh ke saath kaha. 

"Main chai le aati hoon aapke liye." Yeh kehkar Vaishali kitchen ki aur chal padi. 

Randhir sofa par baith gaye. Thodi der ke baad, Vaishali chai lekar hall mein aayi aur Randhir ko pakda di. Chai ka pyala pakadate hue Randhir ne Vaishali se kaha, "Kya tumhe nahi lagta hain ki mera retirement thoda jaldi ho gaya hain ?"

Vaishali - "Ab aap aur kitna kaam karenge. Kabhi na kabhi toh retire hona hi tha na aapko."

Randhir - "Haan woh toh hain."

Vaishali - "Phir dikkat kya hain ?"

Randhir - "Kya tumhe lagta hain ki hamare dono bete sab kuch sambhalne ke layak ho gaye hain ?"

Vaishali - "Ab toh woh dono bhi bade ho gaye hain. Naukri karte hain. Itne samajhdar toh honge hi ki woh khud ka accha-bura soch sake."

Randhir chup tha.

Vaishali - "Aap kya soch rahe ho ji ? Apne beton par bharosa rakho."

Randhir - "Mujhe un dono par apne aap se bhi zyada bharosa hain Vaishali. Lekin, mujhe bas darr is baat ka hain ki, bhagwan na kare; agar in dono ke jeevan mein koi badi aapda aan padi, tab yeh dono kya kadam uthayenge."

Vaishali - "Bhavishya toh kisi ne dekha nahi hain. Kal ko kuch bhi ho sakta hain. Ek kaam kariye. Aap in dono ki shaadi kara dijiye. Biwi-Baccho ki zimmedari jab sar par pad jaayegi, tab woh dono apne aap hi aur gambhir ho jaayenge."

Randhir - "Tum thik keh rahi ho. Main aaj shaam mein hi un dono se baat karta hoon." Vaishali - "Chai thandi ho rahi hain. Ab aap chai pee lijiye."

Randhir kuch sochte-sochte Chai ki chuski le rahe the. Darasal woh yeh soch rahe the, ki woh apne dono beton se kya kahenge. Aur woh unse kis tarah se baat karenge. 

Shaam mein dono bete ghar pahunche aur haath muh dhokar Randhir ke saamne aa khade hue. Randhir ne un dono se apne saamne baithne ke liye kaha. Woh dono ek-ek kursi lekar Randhir ke saamne aa baithe. 

Randhir - "Toh jaisa ki kuch mahino pehle maine kaha tha, ki main apne retirement ke baad, tum dono se kuch maangunga. Shayad tum dono ko yaad hoga."

Anuj - "Mujhe yaad hain Papa."

Tanuj - "Mujhe bhi yaad hain Papa."

Randhir - "Yeh bohut acchi baat hain."

Anuj - "Aap chahte kya ho Papa ?"

Randhir - "Main aur tumhari maa yeh chahte hain, ki, tum dono ki shaadi ho jaaye."

Anuj - "Lekin Papa. Shaadi ki baat aise achaanak se kaha se aa gayi ?"

Tanuj - "Bhaiyaan ki shaadi ki baat main samajh sakta hoon. Meri shaadi abhi kyun ? Main toh abhi chota hoon. Mujhe thoda bada toh hone dijiye."

Randhir - "Ab aur kitne bade hoge tum ? Ghode bhar ke toh ho gaye ho. Agar tum dono ko koi ladki pasand hain, toh mujhe koi aitraaz nahi hoga. Aur agar tum dono ki zindagi mein koi nahi hain, toh main tumhare liye ladki dekhna shuru kar dunga. Main tum dono ko do din ka samay deta hoon. Agar koi ladki pasand ho toh us se baat karo. Kaho ki main uske parivaar se milna chahta hoon. Aur agar nahi, toh main jis bhi ladki se kahunga, tum dono un ladkiyon ki maang mein sindoor bharoge." 

Dono bhai chup the. 

Randhir - "Ab tum dono bhai jaa sakte ho." Anuj aur Tanuj dono hi apne-apne kamre mein chale gaye. Woh dono hi apne pita ke achaanak se badle hue vyavhar se hairaan the. Woh samajh nahi paa rahe the ki unke pita ka swabhaav raaton raat kaise aur kyun badal gaya.

Do din baad, shaadi ki charcha ka din aa hi gaya. Shaam mein dono bhai ghar par pahunche aur haath muh dhokar, Randhir ke saamne aa khade hue. Randhir ne un dono ko apne saamne baithne ke liye kaha aur Vaishali bhi Randhir ke bagal mein aakar baith gayi. Randhir ne apni baat shuru karte hue kaha, "Toh tum dono ne kya socha hain ? Main ek-ek karke tum dono ka jawaab sun na chahunga. Sabse pehle Anuj tum apni baat kaho. Kyunki tum bade ho, toh sabse pehle kehne ka adhikaar main tumhe deta hoon."

Anuj - "Papa main kaise kahoon, mujhe kuch samajh mein nahi aa raha hain."

Randhir - "Tum jis tarah se bhi kehna chahte ho kaho. Baat bohut saadharan si hain. Tumhe shaadi karni hain. Agar koi ladki pasand ho toh bata do, main aur tumhari maa us ladki ke parivaar se milna chahenge. Aur agar koi ladki pasand nahi hain, toh hum dono kal se hi tumhare liye ladki dekhna shuru kar denge."

Anuj - "Papa mujhe ek ladki pasand toh hain."

Randhir - "Kya naam hain us ladki ka ?"

Anuj - "Uska naam Anjali hain."

Randhir - "Woh karti kya hain ?"

Anuj - "Mere saath office mein hi kaam karti hain."

Randhir - "Aur uske pita kya karte hain ?"

Anuj - "Woh bhi naukri karte ek private naukri karte the. Retire ho chuke hain. Uska chota bhai bhi kuch samay baad, woh bhi naukri par lag jaayega. Darasal, Anjali apne bhai ke naukri par lagne ke baad hi shaadi karna chahti hain."

Randhir - "Aur tumhara kya haal hain Tanuj ?"

Tanuj - "Matlab ?"

Randhir - "Kya tumhe koi ladki pasand hain ?"

Tanuj - "Haan Papa."

Randhir - "Toh batao us ladki ka tumse shaadi ke baare mein kya khayal hain ?"

Tanuj - "Papa pehle bhaiyaan ki shaadi toh ho jaaye."

Randhir - "Woh main kar lunga. Anuj ke sasural walon ki samasya main samajh paa raha hoon, main us samasya ka koi na koi hal nikaal hi lunga. Tum apna batao. Kya tumhe koi ladki pasand hain ?"

Tanuj - "Haan pasand toh hain. Woh mere office mein hi mere saath kaam karti hain. Uska ek bada bhai hain, woh ek doctor hain. Uske pita bhi doctor the. Aur uska bhai shaadi-shuda hain."

Randhir - "Yani ki tumhare sasural walon ka shaadi ki koi bhi samasya nahi hain."

Tanuj - "Haan shayad."

Randhir - "Main tum dono ke sasural walon se milna chahunga. Aur Anuj, main tumhari samasya ka hal bhi is mulakat mein hi nikaalunga."

Anuj - "Thik hain Papa."

Randhir - "Is aane wale itvaar ko, hamare ghar dono ladki ke parivaar wale maujood hone chahiye. Thik hain baccho ?"

Anuj - "Thik hain Papa."

Tanuj - "OK Papa."

Dekhte hi dekhte poora hafta beet gaya. Shanivaar ki raat Randhir ne apne dono beton ko yaad dilaaya, ki kal un dono ki premikaon ke parivaar walon ko kal unke ghar par aana hain. 

Agle din, subah hote hi, Randhir bazaar jaakar mehmaanon ke swaagat ke liye kuch saaman kharid laaye. Randhir ke haathon mein dher saare saaman dekh kar, Vaishali puch padi, "Yeh sab kya hain ji ?"

Randhir - "Kya tum bhool gayi ? Aaj shaam humare ghar mehmaan aane wale hain. Shaam ki daawat ki tayyari karni hain hume. Bas aaj ke din Vaishali, tumhe thodi si takleef uthani padegi. Aaj tumhara kaam thoda sa badh jaayega."

Vaishali - "Koi baat nahi."

Randhir - "Bohut acche se tayyari karna tum. Aaj shaam kisi bhi cheez ki kami nahi padni chahiye."

Vaishali - "Ji zaroor."

Shaam mein, dono hi ladkiyon ke parivaar wale aaye apni-apni betiyon ke saath. Randhir ne bohut hi khule dil se un dono parivaaron ka swaagat kiya. Dono parivaaron ki khidmat mein koi bhi kami nahi rakhi gayi. Teeno parivaar saath baithkar duniya bhar ki baat-cheet kiye. Aur unke beech rishta tai ho gaya. 

Randhir ne yeh shart rakhi, ki unke dono beton ki shaadi, ek hi din, ek saath, ek hi mandap mein ho. Aur is shart ko dono ladkiyon ke ghar wale maan gaye. 

Kaafi der tak baat-cheet karne ke baad, aakhir mein shaadi ki tareekh tai ki gayi. Shaadi ki tareekh do mahino ke baad ki thi. 

Agle din se hi, Randhir ne apne beton ki shaadi ki tayyariyan karna shuru kar di. Randhir ki daud bhaag dekhkar, sabhi log hairaan reh gaye the. Kuch padosi toh taunt bhi maarne lag gaye the. Kehne lage ki, "Aisa lagta hain, jaise ki Sharma ji apne beton ki nahi, balki, betiyon ki shaadi kara rahe hain."

Randhir ne apne beton ki shaadi ki tayyari mein koi bhi kami nahi rakhi. Aakhir Kaar, shaadi ka din aa hi gaya. Dono ladkon ki shaadi badi dhoom-dhaam se hui. Aur Randhir aur Vaishali dono hi, apni dono bahuraniyon ko bohut hi khushi-khushi ghar le aaye. 

Ghar mein aate hi dono bahuon ne ghar ka saara kaam-kaaj sambhal liya. Dono hi bahuein bohut hi sushil swabhav ki thi. 

Randhir ko is baat ki tasalli ho gayi ki unki dono hi bahuein bohut hi shaant swabhav ki hain. Ek din, Randhir ne apne dono beton se kaha, ki woh apni-apni biwiyon ko ghumane ke liye le jaaye. Dono hi ladke, apni-apni biwiyon ko tayyar hone ke liye keh diye. Hall mein aane ke baad, jab dono bahuon ko pata chala ki dono bahar jaane wali hain. Tab un dono ne hi kaha ki, jahan bhi jaayein, veh charon saath mein jaayein. Yeh sunkar, Randhir aur Vaishali dono hi khush hue. Ab woh dono aashwasth ho chuke the, ki unhe dono bahuein bohut hi acche swabhaav ki mili hain. Aur woh dono hamesha ghar ko jod kar rakhengi. 

Ek din, baithe-baithe Randhir soch raha tha, ki ab uske dono beton ka bhavishya kahi na kahi, thoda sa surakshit hain. Woh thoda sa muskura diya. Tabhi use achaanak se dil ka daura pad gaya aur woh kursi par se gir pada. Dono beton ne Randhir ko aspataal mein bharti karaya.

Kuch ghanton ke baad, doctor ne unse milne ki ijaazat de di. Anuj aur Tanuj dono hi Randhir ke pass gaye aur woh dono hi chup the. Randhir ne ishaare se un dono ko apne nazdeek bulaya aur bohut hi dheemi awaaz mein kaha, "Ab main jaane wala hoon bacchon." Yeh sunkar dono ke aankhon mein aansun aa gaye. "Ro o mat bacchon. Main bas tum dono ko apne pairon par khada dekhna chahta tha aur meri woh iccha tumne bakhubi poori ki. Hamesha tum dono isi tarah saath rehna. Zindagi ke har sukh-dukh mein tum dono ek dusre ke saath hi rehna. Kisi bhi haal mein tum dono ek dusre ka saath kabhi nahi chodoge. Yeh vaada karo mujhse." Dono bhaiyon ne 'Haan' mein apna sar hilaaya aur unki aankhen aur bhar aayi. 

Randhir ke chehre par halki si muskaan aayi aur woh apna dam tod diye. Randhir is santushti ke saath guzre, ki unke dono bete zimmedar aur samajhdar ban gaye hain aur woh dono hi apne jeevan mein aane wale har ek samasya ka saamna karne ke liye tayyar hain. 

                   - Ved Vineet Gautam