Arjun ek jawan ladka hain. Uska parivaar kaafi gareeb hain. Uske pita ka naam Anil hain. Woh peshe se ek driver hain. Woh ek businessman ke yahan par naukri karte hain. Arjun ki maa do saal pehle cancer ki bimari se guzar chuki thi. Ab ghar mein bas yeh dono baap-bete hi rehte hain. Jaise-Taise un dono ki zindagi kat rahi thi. Arjun ka MBA poora ho chuka hain aur woh ab apne liye naukri talaash raha hain. Din bhar naukri dhundhne ke baad, jab woh shaam mein apne ghar par aaya tab Anil ne Arjun se kaha, "Aao beta. Kaise ho tum ?"
Arjun - "Thik hoon Papa. Aap kaise ho ?"
Anil - "Main bhi thik hoon."
Arjun - "Aapka job kaisa chal raha hain Papa ?"
Anil - "Thik chal raha hain beta. Tum haath muh dho kar fresh ho jaao main khana laga deta hoon."
Arjun - "Thik hain Papa."
Arjun - "Main gaya tha do teen companies mein."
Anil - "Toh kya hua waha par ?"
Arjun - "Woh log keh rahe hain ki batayenge baad mein. Shayad yahan par bhi nahi hoga kuch."
Anil - "Tum apna dil chota mat karo. Har cheez mein waqt lagta hain."
Arjun - "Haan Papa."
Khaana khaane ke baad, dono baap bete sone ke liye chale gaye. Lete-Lete Arjun apne khayalon ke samandar mein dubki laga raha tha. Woh soch raha tha ki 'Agar mere pass bhi ek Car hoti, toh kitna accha hota. Filhal toh bike tak nahi hain mere pass. Zyadatar logon ka jeevan mein bas yahi sapna hota hain, ki unke pass unka khud ka ghar ho. Ek gaadi ho. Thode naukar-chaakar ho. Bank mein paisa aate rahe. Zyadatar logon ki zindagi, ek jaisi hi toh hoti hain. Unke jeevan ki samasyaein bhi ek jaisi hi hoti hain. Lekin haan is duniya mein har ek samasya ka hal hain. Bas hume sabr banaye rakhna hain aur kaam karte rehna hain.'
Sochte-Sochte usne tai kiya ki kahi bhi naukri pakadne ke baad, ek baar woh waha par set ho jaaye toh woh kuch na kuch apna khud ka koi kaam shuru karne ki koshish zaroor karega.
Kuch dino ke baad, aakhir kaar ek company mein Arjun ko naukri mil hi gayi. Woh roz subah uthkar, tayyar hokar jaata aur company mein din bhar kaam karne ke baad, wapas apne ghar aakar so jaata. Aisa do-teen mahino tak chala.
Ek din ki baat hain. Jab Arjun apna job khatam karke company se bahar nikla, tab usne dekha ki ek Safed rang ki Ferrari car sadak par chal rahi thi. Woh us car ko dekh kar dekhta hi reh gaya tha. Thodi der baad, woh Ferrari car Arjun ke saamne hi aakar ruk gayi. Usme se ek aadmi bahar nikla. Woh aadmi kuch 30-35 saal ki umar ka dikh raha tha. Usne bohut hi mehanga suit pehna hua tha aur uske jute bhi bohut mehange lag rahe the. Woh kabhi us aadmi ko toh kabhi uski car ko dekhta. Uski yeh harkat dekh kar woh aadmi Arjun ke pass aaya aur kaha, "Kya dekh rahe ho ?"
Arjun - "Nahi Sir woh kuch nahi."
Us aadmi ne kaha, "Are Sir kaho. Kya dekh rahe ho aap ?"
Arjun - "Bas aapki Car, aapka suit aur aapki shoes sabhi bohut hi chamakdar hain."
Us aadmi ne kaha, "Thank You."
Arjun - "Kaafi mehanga hoga na sab kuch ?"
"Haan mehanga toh bohut hain." Us aadmi ne jawab diya. "Agar chaho toh tum bhi yeh sab paa sakte ho."
Arjun - "Kaise ?"
Us aadmi ne kaha, "Bas tum mehnat karte raho. Din Raat ek kar do apne kaam mein, dheere-dheere tumhare jeevan mein badlaav aana shuru ho jaayega."
Arjun - "Ji Sir. Sir agar aap bura na maano toh kya main aapse ek sawaal karun ?"
"Haan pucho ?" Us aadmi ne kaha.
Arjun - "Aap kaam kya karte hain ?"
"Isi building mein ek company hain, main uska maalik hoon." Us aadmi ne jawab diya.
Arjun - "Aapse milke bohut khushi hui Sir."
"Mujhe bhi." Us aadmi ne muskura kar jawab diya aur woh waha se chala gaya.
Arjun aaj thoda sa khush tha. Woh raaste bhar bas usi aadmi ke baare mein aur khaas kar uske pehnave aur uski Car ke baare mein soch raha tha. Bas uske dimaag mein sirf yahi drishya chal raha tha. Aur uske mann mein baar-baar ek hi sawaal uth raha tha, 'Aakhir Kaise ? Kaise main waha tak pahunchu ? Main aisa kya kaam karun, aisa kya kaam seekhun ki main bohut ameer ban jaaun ? Ki mujhe zindagi mein kabhi bhi kisi bhi cheez ke baare mein sochna na pade. Main aakhir aisa kya kaam karun?'
Raat mein khana khane ke baad, jab woh apne bistar par leta hua tha; tab usne google par Ferrari Car search kiya aur uski ek image apne mobile mein save kar liya.
Usne tay kiya ki woh affiliate marketing ke shetra mein kadam rakhega. Arjun ne kai e-commerce companies mein affiliate marketing member ban ne ke liye apply kiya.
Kuch din beete lekin, use kahi se bhi koi bhi jawab nahi mila. Usne socha ki woh mahina do mahina intezaar karega aur phir uske baad, use jawab mil jaayega. Aur woh apni naukri par dubara poore mehnat ke saath lag gaya.
Mahina beeta, do mahina beeta lekin use kahi se bhi, koi jawab nahi mila. Ab Arjun ko apply kare poore 6 mahine beet chuke hain, lekin kahi se bhi, use kuch bhi haath nahi laga.
Uske mann mein ab kai sawaal aane lag gaye the. 'Kya main kabhi bhi is kaam mein kuch kar paaunga ?' 'Kya mere haalat kabhi badlenge bhi ?'
Ek acchi zindagi ki talaash mein woh bas ek gola mein ghum raha tha. Jahan se woh shuru karta, ghum phir kar woh wahi par hi pahunch jaata.
Ab woh bohut udaas rehne lag gaya tha.
Ek din, shaam mein jab woh apne ghar par pahuncha, tab Anil ne Arjun se kaha, "Fresh hokar aa jaao tum. Hum saath mein phir khaana khaate hain."
Arjun - "OK Papa."
Arjun bathroom mein gaya aur thodi der ke baad, woh wapas aaya. Wapas aane ke baad, use bohut hi acchi khushboo ka aabhas hua. Aur woh farsh par aakar baith gaya. Usne dekha ki, puri bani hui hain aur do teen tarah ki sabzi bani hui hain aur saath hi saath mithayi bhi hain. Aaj khaane mein sab kuch Arjun ke pasand ka hi bana hua tha. Yeh sab dekh kar Arjun ne kaha, "Papa yeh sab kya hain ?"
Anil - "Aaj khana tumhare pasand ka hain. Aaj har cheez maine tumhare pasand ki hi banayi hain."
Arjun - "Lekin yeh sab ki kya zaroorat thi Papa ?"
Anil - "Bas aise hi beta."
Arjun - "Lekin Papa isme kharcha bhi toh thoda zyada hua hoga ?"
Anil - "Tumhe kharche ke baare mein sochne ki kya zaroorat hain beta ?"
Arjun chup tha.
Anil - "Main kai dino se dekh raha hoon, tum bohut dukhi aur udaas rehte ho. Aaj Kal tum aakhir soch kya rahe ho ?"
Arjun - "Nahi Papa woh aisi koi bhi baat nahi hain."
Anil - "Phir kya baat hain ?"
Arjun - "Woh bas aise hi."
Anil - "Jo bhi kehna hain tumhe, tum zara khul kar batao."
Arjun chup tha.
Anil - "Kya koi ladki hain ?"
Arjun - "Nahi Papa woh bas kaam ka thoda sa tension hain."
Anil - "Itne dino se ek hi tension mein ho tum ? Agar kaam mein koi dikkat aa rahi hain, kuch samajh mein nahi aa raha hain, toh apne seniors se baat karo, unse kaam samjho."
Arjun - "Nahi woh main dusra kuch soch raha hoon."
Anil - "Kya beta ?"
Arjun - "Main actually online kaam dhundh raha hoon, aur abhi tak kahi koi baat ban nahi paayi; toh bas isi wajah se thoda sa tension hain. Aur kuch nahi."
Anil - "Tension lene se kuch bhi nahi hoga beta. Kisi bhi kaam mein safalta paane ke liye, bohut zyada samay lag jaata hain. Agar tum aise hi tension lete rahoge, toh agar koi mauka tumahre saamne aayega bhi; toh bhi tum use pehchan nahi paaoge. Isiliye sabr rakh kar kaam karo aur khush raho. Kaam ke saath-saath apna bhi khayal rakhna seekho tum."
Arjun - "OK Papa."
Anil - "Ab tum khaana kha kar so jaao. Kal tumhari chutti hain na ?"
Arjun - "Haan Papa."
Anil - "Chalo accha hain. Kal hum kahi bahar ghumne ke liye chalenge."
Arjun - "OK Papa."
Agle din, dono baap-bete ghumne ke liye nikal gaye. Woh dono, sabse pehle ek cinema hall gaye aur wahan par unhone ek movie dekhi. Uske baad, woh log ek thele par baithkar saath mein paani puri aur bhel khaye. Aur shaam mein, woh dono apne ghar wapas aa gaye.
Agle din se dono apni rozmarra ki zindagi mein vyast ho gaye. Ek din Anil ne Arjun se kaha, "Kya tumhe pata hain ki apni zindagi mein aage badh na paane ki wajah kya hoti hain ?"
Arjun - "Kya hoti hain Papa ?"
Anil - "Gyaan ki kami aur sabr ki kami. Agar kisi kaam mein tumhe naam kamana hain, toh uske liye sirf prayas karna hi kaafi nahi hota hain. Tumhe us kaam ka gyaan bhi toh hona chahiye na ?"
Yeh sunte hi Arjun soch mein pad gaya.
Anil - "Bina gyaan ke tum aage kaise badh paaoge ? Agar tumhe kisi bhi kaam mein aage badhna hain, toh pehle uska gyaan prapt karo."
Arjun - "Haan yeh baat bhi sahi hain. Ek baar pura gyaan prapt ho gaya toh, hum kaamyabi haasil kar sakte hain."
Anil - "Pura gyaan toh tumhe kabhi bhi ho hi nahi paayega. Tumhe har baar, kuch na kuch naya seekhne ko milta hi rahega aur is yatra mein mila hua anubhav ka istemaal kar tum aage badhne ke liye koshish karte rehna."
Arjun - "OK Papa."
Anil - "News bhi dekha karo. Jo bhi kaam tum karna chahte ho, us shetra mein kaun-kaun log safal hue hain, us baare mein jaano. Un logon ke jeevan ke baare mein jaano. Thoda dekho desh duniya mein kya ho raha hain. News bhi dekha karo tum. Yeh sab bhi toh zaroori hain. Yeh sab kab karoge tum ?"
Arjun - "Hmm. Aisa kabhi socha hi nahi."
Apne pita se mila hua guru mantra paa kar, Arjun ab ek naye sire se apne kaam mein prayaas karne mein lag gaya.
Ab woh apne office se ghar wapas aane ke baad, ek ghanta apne affiliate marketing ke kaam ke liye online apply karta. Uske baad, woh apne mobile phone par affiliate marketing ke baare mein jaankari dhundhte rehta tha. Aur apni har chutti ke din, woh motivational videos dekhta tha. Kaafi lamba samay beet gaya, lekin, phir bhi Arjun ko affiliate marketing ke kaam mein koi bhi safalta haasil nahi hui.
Ek baar, Arjun ne apne pita se pucha, "Papa kya mujhe kisi aur field mein online kaam dhundhna chahiye ?"
Anil - "Nahi beta. Bilkul bhi nahi. Abhi yeh jo bhi ek kaam mein tum koshish kar rahe ho, sirf aur sirf usi mein hi koshish karte raho. Dekho hota kya hain, ki insaan kisi bhi kaam mein jab haath daalta hain, toh pehle woh uska gyaan haasil karta hain aur phir woh galtiyaan kar kar ke aur bhi seekhta hain. Uske baad bhi uski shuruat hone mein thoda aur zyada samay lagta hain."
Arjun - "Toh aisa kyun hota hain Papa ? Itna samay kyun lagta hain ?"
Anil - "Ise hi toh sangharsh kehte hain na beta. Agar koi cheez aasani se mil jaaye, toh uski keemat thodi na hoti hain insaan ko."
Samay beet ta gaya aur affiliate marketing mein Arjun ka gyaan badhta gaya. Aakhir mein dus mahine baad, Arjun ko apni zindagi ka pehla online kaam mila. Us kaam mein usne do hazaar rupaye kamaye the. Tab Anil ne Arjun se kaha, "Tum apne liye kuch kharid laao."
Arjun - "Kya kharidun ?"
Anil - "Jo bhi lena chaho lo beta."
Arjun - "Dhai saal diya maine is kaam ko, aur uske baad mujhe mila bhi toh kya ? Bas do hazaar rupaye ?"
Anil - "Toh kya tumhe do lakh rupaye milne chahiye the ? Dekho hota kya hain, shuruat hone mein waqt lagta hain, yeh toh tum dekh chuke ho. Lekin, shuruat mein kamayi kam hi hoti hain. Dheere-Dheere kamayi badhti hain aur phir ek aisa samay aata hain ki paison ki baarish hone lagti hain. Aadmi ki chahe tarakki ho ya barbaadi, jo bhi hota hain full speed mein hi hota hain. Step By Step kuch bhi nahi hota hain."
Arjun - "Lekin maine toh itna zyada waqt diya hain is kaam mein aur haath mein kuch aa hi nahi raha hain."
Anil - "Dekho beta, waqt jo hain na woh insaan ke sabr ki inteha leta hi hain. Insaan ko aisa lagta hain ki usne sab kuch koshish kar liya hain. Lekin, phir bhi kuch samay baad, use koi na koi naya raasta mil hi jaata hain. Aur insaan hairaan reh jaata hain, ki bhai aisa bhi hota hain. Yeh bhi koshish karna baaki reh gaya tha. Dekho beta, tum koshish karte raho aur planning bhi karte raho. Thik hain ?"
Arjun - "Thik hain Papa."
Kuch samay baad, Arjun ko affiliate marketing mein aacha khaasa kaam milna shuru ho gaya aur usne acchi khaasi kamayi karna shuru kar diya. Ek din, jab woh shaam mein apne ghar ke liye jaa raha tha, tab phir se uske saamne se ek mehangi Car jaa rahi thi aur use dekhte hi Arjun ko yaad aaya, manzil abhi dur hain. 'Ek na ek din, main aisi Car lekar rahunga. Ek na ek din, main bhi aisi zindagi zaroor jiyunga. Bas mujhe lagatar mehnat karte rehna hain. Ummed par hi toh duniya tiki hui hain.' Aur woh muskura kar apne ghar ke liye nikal gaya.
- Ved Vineet Gautam
Comments
Post a Comment