Shabdheen

 Karan Kashyap ek painter hain. Woh apne rajya mein kaafi mashoor hain. Paintings banakar bechna Karan ka pesha hain. Kyunki woh apni Paintings ke wajah se behad mashoor hain, isliye rajya ke raees log uski Paintings kharidne ke liye, laakhon kharch karne ke liye hamesha tayyar rehte hain. Apne dwara diye gaye ek saakshaatkaar ke dauran, Karan ne kaha tha ki, woh apni zyadatar Paintings vaastavik jeevan se prerana lekar hi banate hain. 

Karan ki kamayi acchi khaasi ho rahi thi. Lekin, woh apni zindagi mein bohut akela hain. Kareeb do saal pehle ek Car durghatna mein usne apne maata-pita ko kho diya tha. Duniya jab usse yeh puchti hain ki woh shaadi kab karega, tab woh bas ek hi jawab deta hain, "Zindagi mein kisi humsafar ki talaash nahi hain mujhe. Jab kabhi kisi se sacchi mohabbat ho jaayegi, tab main bina ek pal ko bhi deri kiye, shaadi kar lunga."

Yeh baat toh saaf thi ki Karan ek mashoor kalaakar tha, lekin woh kahi na kahi apne jeevan mein bohut hi akela tha. Is saara jahaan ne uski kabiliyat ke wajah Karan ko sar par bitha kar rakha tha. Woh laakhon logon ke dilon mein bas chuka tha. Bhale hi woh apni dil ki baatein zyada khul kar keh nahi paata hain, lekin, kahi na kahi use ek aise humsafar ki talaash thi jo use apne Dil mein jagah de. 

Ek din ki baat hain Karan ko apne nazdeek ke shahar mein apna Painting Exhibition karne ke liye jaana tha. Woh ek din pehle hi waha par pohuch gaya aur ek hotel mein kamra liya. Agle din, woh tayyar hokar Exhibition ki jagah pohuch kar apna kaam khatam kiya. Karan ne kai logon ko apna autograph bhi diya. Exhibition khatam hote hi woh Hotel pohucha. Waha se usne apna samaan nikala aur apni Car mein rakh kar wapas apne shahar ki aur nikal pada. 

Karan apni Car zara dheemi gati se chala raha tha. Car chalate-chalate woh suhane mausam ka lutf bhi utha raha tha. Aasman saaf tha aur Suraj dheere-dheere doob raha tha. Shayad thodi der pehle hi barsaat bhi hui ho, kyunki, sadak zara geeli thi aur asmaan mein indradhanush bhi dikhayi de raha tha. Car chalate-chalate Karan apne shehar ke dwar pohuch chuka tha. Shaam ki wajah se Sadak suna pada tha. Tabhi Karan ne dekha ki sadak kinare ek ladki khadi hain. Us akeli ladki ko dekh kar, usne apni Car uske saamne khadi kar di. Phir Karan ne Car ke dusre aur ka sheesha neeche kiya. Woh ladki Car ke nazdeek aayi. Ladki dikhne mein behad khoobsurat aur shareef lag rahi thi. Usne peele rang ki saree pehni hui thi. Karan us ladki se kehta hain, "Kya main aapko kahi chod doon Mam ?"

Ladki - "Haan. Agar aap shehar ki aur jaa rahe hain toh please mujhe chod dijiye."

"Thik hain." Kehkar Karan Car ka darwaaza kholta hain aur woh ladki andar aakar baith jaati hain. Karan Car chalana shuru kar deta hain. Is safar bhar yeh dono hi chup the. Dono ne ek dusre se ek shabd bhi baat nahi ki. Phir ek mod aata hain aur ladki bohut hi dheemi aawaz mein kehti hain, "Bas yahi rok dijiye." 

Karan Car rokta hain aur ladki Car se utarti hain. Uske baad, woh Karan ki aur dekhti hain aur halki si muskaan ke saath woh kehti hain, "Thank You." Woh bhi halka muskura deta hain. Phir woh ladki chale jaati hain aur Karan apne ghar ki aur nikal padta hain. 

Ek din ki baat hain. Karan ka ek exhibition hota hain aur kai log woh dekhne ke liye aate hain. Shehar ke kai raees uski painting kharid lete hain. Uske kai chahne wale usse autograph bhi lete hain. Sabhi ko autograph dete-dete Karan ko aabhas hota hain ki shayad koi bagal se use lagataar dekh raha hain. Karan apni nazar ghumata hain aur dekhta hain ki us raat ke safar wali ladki waha khadi hain. Ladki Karan ko dekh kar muskurati hain. Woh bina kuch soche samjhe dheere-dheere us ladki ki aur badhta hain aur woh uske saamne aakar khada ho jaata hain. Phir woh usse puchta hain, "Aap yahan ?"

Ladki - "Aapki paintings dekhne ke liye aayi thi. Kaafi dilchasp hain aapki paintings."

Karan - "Toh kaisi lagi aapko meri paintings ?"

Ladki - "Behad tanha hain."

Karan - "Main us din aapka naam puchna bhool gaya tha."

"Kavya." Ladki jawaab deti hain. 

Karan - "Agar aapko aitraaz na ho toh kya hum saath kahi baithe ?"

Kavya - "Ji zaroor."

Dono saath bahar nikalte hain aur chalte hue jaate hain. Thodi hi dur par unhe ek Coffee Shop dikhta hain. Karan us Coffee Shop ki aur ishaara kar Kavya ki aur dekhta hain. Kavya bhi apni nazron ke ishaare se 'Haan' kar deti hain. Dono Coffee Shop mein jaate hain. Dono Coffee lekar ek table par aamne-saamne baith jaate hain. Dono ekdum khaamoshi se Coffee ki do ghunt peete hain. Phir Kavya kehti hain, "Zara apne baare mein bataiye."

Karan - "Main ek painter hoon." Tabhi Kavya Karan ki baat ko kaat te hue, kehti hain, "Yeh baat toh saari duniya jaanti hain. Woh baat jo shayad koi aapke kareebi hi jaante ho."

Karan - "Duniya mujhe jaanti hain. Lekin, phir bhi koi mujhe nahi jaanta. Main is duniya ke saath chalta hoon. Lekin, phir bhi akela hoon."

Kavya - "Main bhi. Main ek company mein accountant ki naukri karti hoon. Pichle saal jo bhookamp aaya tha, usmein mere Maata-Pita bhi khatam ho gaye the."

Karan - "Yeh sunkar bada dukh hua."

Dono ek dusre ko kuch pal ke liye dekhte hain. Tabhi ek chota baccha waha par aata hain aur kehta hain, "Sir autograph please."

Karan us bacche ke gal ko bade pyaar se sehlata hain aur table se ek tissue paper uthakar uspar signature karke us bacche ko de deta hain. Tabhi Kavya apne purse se ek chocolate nikalti hain aur woh us bacche ko de deti hain. Baccha waha se chala jaata hain. 

Karan - "Aapko bacche bohut pasand hain ?"

Kavya 'Haan' mein apna sar hilati hain.

Karan - "Zindagi mein aage kya socha hain aapne ?"

Kavya - "Hamari soch ke hisaab se aakhir kaha chalti hain zindagi ?"

Karan - "Aapne bilkul sahi kaha hain. Insaan zindagi bhar yojna banate reh jaata hain aur ain waqt par uske saath aisi koi na koi ghatna ho hi jaati hain, jisse ki uski saari yojnayein toot kar bikhar jaati hain. Aur insaan ? Hmm. Insaan toh bas bebas hokar apni zindagi ka badlaav dekhta hi reh jaata hain."

Kavya - "Isi ka naam hain Zindagi."

"Agar aapko aitraaz na ho toh kya hum aksar milte reh sakte hain ?" Yeh baat Karan ne bejhijak kaha.

Kavya use apna number deti hain. Phir woh kehti hain, "Kabhi khaali waqt mile toh aap mere ghar milne ke liye aa jaaiyega."

Karan - "Aapka ghar kaha par hain ?"

Kavya - "Main ghar ka pata baad mein message kar dungi."

Dono Coffee khatam karte hain aur ek saath bahar jaate hain. Phir kuch pal ke liye dono ek dusre ko dekhte hain. Phir Karan kehta hain, "Alvida." Uske baad, dono apne-apne raaste chale jaate hain.

Karan apne ghar pohuchta hain. Haath-Muh dhota hain aur apne kapde badalkar apne bistar par aakar leat jaata hain. Phir woh apna mobile uthata hain aur dekhta hain ki Kavya ne koi message bheja hain. Woh message kholta aur dekhta hain ki us message mein Kavya ke ghar ka pata likha hua tha. Aur saath hi saath neeche ek aur message likha tha. Message tha, 'Is ghar ke darwaaze hamesha aapke liye khule rahenge.'

Kuch din beet jaate hain. Aur is dauraan un dono ke beech na koi baat-cheet hoti hain. Na hi ek dusre se milna julna hota hain. Ek din ki baat hain. Shaam ka waqt tha aur Kavya apne ghar mein baithi hui thi. Woh Hall mein hi apni khidki ke pass baithi bahar ka nazara dekh rahi thi. Bahar aasmaan ko badal ghera hua tha aur sadak par bas kuch hi gaadiyan chal rahi thi. Kavya baithe-baithe kudrat ki khoobsurati ka nazara dekh rahi thi. 

Tabhi uske ghar ki ghanti bajti hain. Woh darwaaze ki aur jaati hain aur darwaaza kholti hain. Darwaaza kholte hi woh muskurati hain. Kavya dekhti hain ki bahar Karan khada hain aur uske haath mein ek canvas bhi hain. Kavya kehti hain, "Aakhir Kaar aaj intezaar khatam hua."

Karan - "Andar aane ke liye nahi kahogi ?"

Kavya - "Apne hi ghar mein aane ke liye, ijaazat ki zaroorat padti hain bhala ?"

Karan ghar ke andar aata hain. Dono saath mein Sofa par baithte hain. 

Kavya - "Toh batao kaisa kataa yeh poora hafta ?"

Karan - "Jisa zindagi bhar kat ta aa raha hain. Tanha."

Kavya - "Kya aapne ek aur painting banayi hain ?"

Karan - "Haan. Abhi tak is painting ko kisi ne nahi dekha."

Kavya uth ti hain aur kitchen ki aur jaane lagti hain. Yeh dekh kar Karan poochta hain, "Aap kaha par jaa rahi ho ?"

Kavya - "Aaj tak maine aapko apne haathon se banakar Coffee nahi pilayi hain. Aaj mauka mil raha hain."

Karan - "Abhi-Abhi aapne mujhe apna kaha aur ab aap mehmaan-nawaazi karke mujhe gair bana rahi ho ? Pal bhar mein hi aapne mujhe dur kar diya."

Kavya - "Baat mehmaan-nawaazi ki bilkul nahi hain. Main mere apne ka poora khayal rakh sakoon, kya mujhe itna bhi haq nahi hain ?"

Karan - "Coffee peene ke liye toh saari zindagi padi hui hain. Zaroori hain ki hum saath mein kuch pal beetaye aur hum ek dusre ke aur kareeb aaye." 

Kavya - "Aakhir aap kitne kareeb aana chahte ho mere ?"

Karan - "Itna kareeb ki hum aap se tum ho jaaye. Humare beech kabhi koi parda na rahe. Samaaj ki koi bhi deewar hamare saamne khadi na ho sake."

Kavya Karan ke bagal mein aakar baith jaati hain. Phir woh Karan ka haath pakadti hain. Karan bade pyaar se uske hothon ko choota hain. Kavya apni aankhein band kar leti hain. Dono ek dusre ke aur kareeb aate hain. Phir Kavya apni aankhein kholti hain. Dono ek dusre ki aankhon mein aakhein daal kar kuch der ke liye, ek dusre ko dekhte rehte hain. Phir Kavya kehti hain, "Yeh jo pal hain. Is pal ke baad aakhir kya hoga Karan ?"

Karan - "Main is baat ko nahi jaanta hoon aur na hi main jaan na chahta hoon. Agar main kuch jaanta hoon toh yeh, ki bas yeh pal mere liye bohut khaas hain aur main chahta hoon ki, yeh pal kabhi bhi guzare nahi."

Kavya - "Tum mere baare mein kuch bhi nahi jaante ho."

Karan - "Main jaan na bhi nahi chahta hoon. Main bas tumse milte rehna chahta hoon. Tumhe bas dekhte rehna chahta hoon. Tumhare saath apni saari zindagi beetana chahta hoon."

Kavya - "Main bhi bas yahi chahti hoon."

Karan - "Tum itne saalon se kaha thi Kavya. Aakhir itne saalon mein, tumhare bagair main kitna tanha raha hoon. Tumhe is baat ka andaaza bhi nahi hain."

Tabhi Karan ka phone bajta hain aur dono ek dusre se alag ho jaate hain. Karan dekhta hain ki uske ek dost ka call aaya hain. Karan ke us dost ka naam hain, Amit. 

Karan - "Mere dost ka call hain."

Kavya uth ti hain aur Karan uska haath pakad leta hain aur kehta hain, "Hamare beech kisi bhi kism ka parda nahi rahega Kavya."

Kavya baith jaati hain. Karan call uthata hain aur kehta hain, "Haan kaho Amit."

Amit - "Aakhir tum is waqt ho kaha par ?"

Karan - "Hoon ek jagah."

Amit - "Tum is waqt kisi ladki ke ghar ho na ?"

Karan - "Tumhe kaise pata ?"

Amit - "Mujhe kya. Saari duniya ko pata hain yeh baat. Tum zara news chalu karo."

Karan apne mobile mein news lagata hain. News mein yeh khabar dikhayi jaati hain ki, 'Mashoor Painter Karan Kashyap jo ki saaf aur khule dil ke jaane jaate hain, woh ek bohut hi bade chupe rustom nikale. Unki zindagi mein ek ladki hain aur is baat ko woh kai samay se chupa rahe hain. Woh aksar us ladki se milte rehte hain aur is waqt woh usi ladki ke ghar mein hain.'

Yeh khabar dekh kar kuch der ke liye dono khaamosh ho jaate hain. Phir Kavya kehti hain, "Tum aaj raat yahi par ruk jaao. Jab bahar sannata ho jaaye, tab tum khaamoshi se nikal jaana."

Karan - "Nahi aisa main hargiz nahi karunga."

Kavya - "Lekin Karan meri wajah se tum bohut dikkat mein aa sakte ho."

Karan - "Kya tum mujhse mohabbat karti ho ?"

Kavya - "Apni jaan se bhi zyada."

Karan - "Toh mere saath chalo."

Kavya - "Thik hain."

Karan Kavya ka haath pakad kar bahar jaata hain aur kuch hi pal mein, media wale Karan ko gher lete hain. Ek ke baad ek unke sawaal shuru ho jaate hain, "Aakhir koun hain yeh ladki Karan ?" 

"Aapka rishta kya hain is ladki ke saath ?"

"Ab toh aap yahi kahenge ki yeh bas meri acchi dost hain ?"

Karan - "Jee nahi. Main yeh baat khule aam kehta hoon ki main is ladki se pyaar karta hoon. Aur hum bohut jald shaadi karne wale hain."

Tab Karan apne ghutno par baith ta hain aur Kavya ka haath thaame usse puchta hain, "Kya tum mere saath apni saari zindagi beetana chahogi ?"

Kavya - "Hum apni saari zindagi ek dusre ke saath beetayenge."

                   - Ved Vineet Gautam