Abhishanka

 Veer Singh ek company mein naukri karte hain. Unki patni ka naam Tejaswini Singh hain. Veer aur Tejaswini ka eklauta beta hain. Us ladke ka naam hain, Karan Singh. Karan ka haal hi mein graduation poora hua hain aur ab woh apne liye naukri talaash raha hain. 

Kai mahino ke athak prayaas ke baad, aaj Karan ko naukri mil hi gayi. 

Shaam ka samay hain aur Karan ghar par pohuchta hain. Karan ko dekhte hi, Veer muskurate hain. Badle mein Karan bhi muskurata hain. Uske chehre par muskaan ab bhi barkarar hain. Is par Veer baat ko samajh jaata hain aur woh Karan se kehta hain, "Lagta hain aaj tumhe naukri mil hi gayi."

Karan - "Haan Papa. Lekin, aapne kaise pehchana ?"

Veer - "Tumhara baap hoon. Tumhare chehre ki muskaan hi sab bayaan kar rahi hain. Aao baitho beta."

Karan Veer ke bagal mein baith jaata hain. Tabhi Tejaswini Hall mein aati hain. Tejaswini ko dekhte hi, Karan kehta hain, "Mummy mujhe naukri mil gayi hain."

Tejaswini - "Bohut hi acche beta. Khoob mann lagakar kaam karna tum aur apni zindagi mein bohut tarakki karna."

Karan - "Bas aap dono ka aashirwad ho toh main bohut aage badhunga."

Veer - "Humara pyaar aur aashirwad hamesha tumhare saath rahega bete. Toh batao kabse tumhe kaam shuru karna hain ?"

Karan - "Kal se hi."

Veer - "Yeh toh aur acchi baat hain. Ab aage ka kya tumhara plan hain beta ?"

Karan - "Matlab ?"

Tejaswini - "Matlab yeh ki ab ghar mein Bahu ka swagat kab hoga ?"

Karan - "Dekhte hain. Filhal toh waqt hain."

Veer - "Agar tumhe koi ladki pasand ho toh tum bata dena."

Karan - "Haan ek ladki pasand toh hain Papa."

Veer - "Kaun hain woh beta ?"

Karan - "Kinjal naam hain us ladki ka. Woh mere saath College mein padhti thi."

Veer - "Kya kaam karte hain, ladki ke pita ?" 

Karan - "Woh ek businessman hain Papa."

Veer - "Us ladki ke ghar mein koun-koun hain ?"

Karan - "Kinjal ke Maata-Pita aur uska chota bhai. Kinjal ki padhai mere saath hi poori hui hain toh woh bhi naukri doondh hi rahi hain aur uska chota bhai filhal College mein padh raha hain." 

Veer - "Chalo badhiya hain."

Karan - "Aur main ek aur baat aap dono se kehna chahta hoon."

Veer - "Haan bolo bete."

Karan - "Darasal Papa woh main Kinjal ke Maata-Pita se mil bhi chuka hoon. Woh log pehle hi aap dono se milna chahte the, par maine kaha ki pehle naukri pakad loon; phir aage ki baat karunga."

Veer - "Chalo accha kiya."

Tabhi Karan ka phone bajta hain aur woh apne kamre mein jaakar baat-cheet karta hain. Thodi der ke baad, woh apne kamre se bahar aata hain. Phir woh kehta hain, "Papa woh Kinjal ke Maata-Pita ne hume agle hafte milne ke liye bulaya hain."

Veer - "Thik hain beta. Hum agle hafte zaroor jaayege."

Ek hafte baad, Karan apne maata-pita ke saath Kinjal ke ghar pohuchta hain. Kinjal ke Maata-Pita bohut hi khushi se unka swaagat karte hain. Dono parivaar ke beech, bade hi khule dil se baat-cheet hoti hain. Dono parivaar ko ek dusre ka swabhaav bohut pasand aata hain. Tab Kinjal ke Pita kehte hain, "Toh kya main yeh rishta pakka samjhun ?"

Veer - "Ji haan zaroor Bhaisahab."

Kuch hi mahino mein, Karan aur Kinjal ki shaadi ho jaati hain. Ghar mein aayi nayi-naveli Bahu ko dekhne ke liye ados-pados ke sabhi log aate hain. Mohalle ki aurantein Kinjal ki khoobsurati ki tareef karte nahi thak rahe the. Tabhi ek ladki kehti hain, "Aunty ab toh aap hume bhool hi jaayengi, aapko Bahu jo mil gayi hain."

Tejaswini us ladki se kehti hain, "Nahi beta aisi baat nahi hain. Yeh aaj bhi tumhara hi ghar hain. Tum aaj bhi usi haq ke saath is ghar mein aaogi, jaise ki pehle aaya karti thi."

Ladki - "Aapka bohut-bohut shukriya aunty. Accha hua aapne permission de di, nahi toh Mummy ne mujhe saaf-saaf keh rakha tha ki ab se Karan se mera milna-julna band ho jaayega."

Tejaswini - "Tumhari Mummy chahe kuch bhi bole, kya main kabhi tumhe ghar mein aane se rokungi bhala ?"

Ladki - "Nahi aunty. Bilkul bhi nahi. Accha ab main chalti hoon. Aapki Bahu ko bhi aaram ki zaroorat hogi. Main baad mein kabhi aakar ise pareshan karungi."

Tejaswini - "Thik hain beta."

Uske baad woh ladki waha se chale jaati hain. Saath Hi Saath mohalle ki baaki auranten bhi unke ghar se chali jaati hain. 

Sab logon ke jaane ke kuch der ke baad ki baat hain. Tejaswini rasoi mein bartan saaf kar rahi thi. Kinjal waha par aati hain aur use dekh kar Tejaswini muskurati hain. Phir Kinjal ek bartan uthati hain. Tabhi Tejaswini kehti hain, "Are baba. Tum rehne do."

Kinjal - "Nahi mummy. Aap akele kaise itna saara bartan saaf kar dengi. Main bhi haath bataati hoon na ?"

Tejaswini - "Nahi beta rehne do. Kam Se Kam aaj ke din toh tum kaam mat karo."

Kinjal - "Mummy main waise bhi akele baithe-baithe bore ho rahi hoon. Maine socha, thoda kaam bhi ho jaayega aur aapse do-chaar baatein bhi ho jaayengi."

Tejaswini - "Thik hain. Tum yahi par raho. Mujhse baatein karo. Lekin, kam se kam aaj ke din koi bhi kaam karne ki baatein mat karo."

Kinjal - "Thik hain mummy."

Tejaswini - "Toh batao kaisa laga tumhe yeh ghar ?"

Kinjal - "Bohut hi accha hain mummy."

Tejaswini - "Aur hamara beta toh tumhe pehle se hi pasand hain."

"Mummy aap bhi na.." Kinjal sharmaate hue kehti hain.

Tejaswini - "Yahan society ke log kaise lage tumhe beta ?"

Kinjal - "Bohut acche lage."

Tejaswini - "Chalo badhiya hain."

Kinjal - "Mummy aapse ek baat karni thi."

Tejaswini - "Haan bolo beta."

Kinjal - "Main soch rahi thi ki ek baar hum hamare society ke logon ko apne ghar khaane par bulate hain. Mere haath ka bana hua khaana ek baar aapke aur Karan ke dost bhi chakh lenge."

Tejaswini - "Yeh toh bohut hi acchi baat hain. Kab bulana hain ?"

Kinjal - "Jab bhi aap chahe."

Tejaswini - "Thik hain."

Kinjal kuch der ke liye sochti hain aur phir kehti hain, "Mummy ek kaam kariye aap sab logon kal hi bula lijiye."

Tejaswini - "Lekin beta, aaj hi toh aaye the sab log ?"

Kinjal - "Haan mummy lekin, koi bhi khaana toh nahi khaaya tha na. Isi bahane aapki taraf se sabhi logon ko daawat bhi mil jaayegi."

Tejaswini - "Thik hain beta. Main kal hi sabko bulati hoon."

Agle din, mohalle ke sabhi log ghar par aate hain. Shaam ka waqt tha aur Hall mein baith kar sabhi log aapas mein baat-cheet kar rahe the. Tabhi society ka ek aadmi poochta hain, "Karan kahi dikhayi nahi de raha hain ?"

Veer - "Woh abhi thodi der mein hi aa jaayega."

Kuch der ke baad, Karan ghar par aa pohucha tha. Kinjal kitchen mein kaam kar rahi hoti hain, tabhi woh bahar se kisi ko kehte hue sunti hain, "Aao Karan. Aane mein badi der kar di tumne."

Yeh sunte hi, Kinjal Hall mein jaati hain aur dekhti hain ki Karan wahi par baith gaya hain aur woh sabse baat-cheet kar raha hain. Baat-Cheet karte-karte Karan kehta hain, "Main bas kuch der mein kapde badal kar aata hoon."

Sabhi Log - "Thik hain Karan."

Karan apna bag utha ta hain aur andar kamre mein jaa raha hota hain, tabhi Kinjal Karan ke saamne aati hain aur woh uska bag apne haathon mein le leti hain. Karan apne kamre mein jaata hain aur Kinjal uske peeche-peeche jaati hain. 

Karan aur Kinjal ke kamre mein, sabhi aurantein baithkar aapas mein baat-cheet kar rahi hoti hain. Un dono ko dekhte hi, sabhi aurantein muskurati hain. Tabhi wahi ladki kehti hain, "Are kya Karan. Tumne toh apni biwi ko apna assistant bana diya hain. Ek bag tak nahi pakda jaa raha hain tumse ?"

Karan - "Aisi baat nahi hain Sanjana."

Sanjana - "Aisi hi baat hain."

Karan - "Accha baba tum jeeti aur main haara."

Sanjana - "Bohut khoob. Aur tum ab apni biwi se kab haaroge ?"

Sabhi hans padte hain. Tabhi Sanjana kehti hain, "Karan tum jabse shaadi kiye ho, mere saath ek bhi photo nahi kheeche ho. Abhi aao mere saath ek photo kheech lo."

Karan - "In kapdon mein ?"

Sanjana - "Toh tum kya chahte ho, tumhare liye koi naye kapde manwaaye jaaye ? Agar tum kaho toh koi Raaj-Poshakh tumhare liye silwaaya jaaye ? Seedhi tarah se abhi aao aur ek acchi si photo kheecho."

Karan - "Accha baba thik hain."

Karan waha jaata hain aur woh Sanjana ke thik bagal mein jaakar khada ho jaata hain. Sanjana apne jeb se apna mobile nikaalti hain aur woh mobile ka camera chalu karti hain. Phir woh Karan ke kandhe par haath rakh deti hain aur dono saath mein photo kheechte hain. 

Yeh dekh kar, Kinjal hairaan reh jaati hain. Karan ke kandhon par pada hua Sanjana ka haath dekh kar, Kinjal ke mann mein shak paida kar deta hain. Woh mann hi mann aag mein jal rahi thi, lekin us waqt kuch kehna usne thik nahi samjha.

Kuch samay ke baad, sab log apne-apne ghar chale gaye. Raat ka waqt tha aur saari duniya sone ki tayyari kar rahi thi. Karan aur Kinjal bhi apne kamre mein the. Karan bistar par leta hua tha aur woh apne mobile par kuch messages padh raha tha. Kinjal kaafi der se Karan ko bas chup-chap dekh rahi hoti hain. Karan ab bhi apne mobile mein vyast tha. Woh is baat se anjaan tha ki Kinjal use dekh rahi hain, is ummeed se ki shayad ab woh usse kuch pyaar bhari baatein karega. Lekin, Karan toh maano jaise koi alag hi duniya mein tha.

Ab Kinjal ka sabr toot chuka tha. Kinjal Bed ke thik bagal mein pada hua Vase uthati hain aur use zameen par patak deti hain. Vase toot jaata hain. Vase ke tootne ki aawaz sunkar, Karan ka dhyaan mobile se toot ta hain. Woh yahan waha dekhta hain lekin, use kuch bhi samajh mein nahi aata hain. Phir woh Kinjal ki tarah dekhta hain aur usse poochta hain, "Kya hua ?"

Kinjal - "Yahi toh main jaan na chahti hoon."

Karan - "Matlab ?"

Kinjal - "Kya chal raha hain Karan ?"

Karan - "Tum kya kehna chahti ho ?"

Kinjal - "Tum samjhe nahi ?"

Karan - "Nahi."

Kinjal - "Koun hain woh ladki ?"

Karan - "Koun ladki ?"

Kinjal - "Sanjana."

Karan - "Woh meri dost hain."

Kinjal - "Sirf dost hain woh tumhari ?"

Karan - "Haan."

Kinjal - "Kya tum dono ke beech dosti ke alaawa aur koi rishta nahi hain ?"

Karan - "Bilkul nahi."

Kinjal - "Toh tum us Sanjana ke saath itna chipak chipak kar kyun photo kheechwa rahe the ?"

Karan - "Tum kehna kya chahti ho Kinjal ?"

Kinjal - "College ke waqt toh tumne kabhi bhi mujhse uska zikr tak nahi kiya. Main toh sochti thi ki mere alaawa aur aisi koi ladki nahi hogi, jo ki tumhare kareeb ho. Lekin, ab samajh mein aa raha hain ki, tumhari zindagi mein mujhse bhi zyaada khaas aur bhi log hain."

Karan - "Kya tum mujh par shaq kar rahi ho ?"

Kinjal - "Nahi. Mujhe poora yakeen hain ki tum aur Sanjana ek dusre ko pasand karte ho."

Karan - "Kya tumhe mere pyaar par ab yakeen nahi raha ?"

"Tum khud hi samajh lo." Yeh keh kar Kinjal karwat badal leti hain. Karan uske kandon par rakhta hain par woh use jhatak deti hain. 

Karan bhi dusre muh kar ke leat jaata hain. Par woh raat bhar so nahi paata hain. Kinjal ke dimaag mein kya chal raha hain, woh bohut acche se samajh jaata hain. 

Agle din, Karan office jaata hain. Shaam ka waqt hota hain aur ghar ki ghanti bajti hain. Kinjal darwaaza kholti hain. Woh dekhti hain ki, Karan aur Sanjana bahar khade hain. Kinjal bina kuch kahe wapas jaane lagti hain. Tabhi Sanjana kehti Kinjal ko pukarti hain. Kinjal mudti hain. Sajana Kinjal ke pass aati hain aur uska haath pakad kar use Karan ke kamre mein lekar jaati hain. 

Kinjal - "Yeh kya badtameezi hain ?"

Sanjana - "Main tumhe kuch dikhana chahti hoon."

Kinjal - "Kya ?"

Sanjana jeb se apna mobile nikaalti hain aur Kinjal ko pakda deti hain. Kinjal mobile dekhti hain aur woh messages padhna shuru karti hain. Karan ne Sanjana ko kai messages kiye the, jisme usne Kinjal ke baare mein likha tha. Ki woh Kinjal se kitna pyaar karta hain aur woh uske bagair jee nahi sakta. Aur yeh sabhi messages Karan ne Sanjana ko shaadi se pehle kiye the. 

Ab Kinjal ki aankhein bhar aati hain. Phir Sanjana kehti hain, "Tumne Karan se mohabbat ki lekin itna bhi nahi samajh paayi ki, mohabbat vishwaas ke dor par hi tik paati hain. Agar vishwaas toot gaya toh, na mohabbat rehti hain aur na hi woh insaan hamari zindagi mein rehta hain. Ab se bhi waqt hain tumhare paas. Apna ghar tootne se bacha lo Kinjal."

Kinjal - "Na jaane mujhe kya ho gaya tha. Main bohut sharminda hoon."

Sanjana - "Apna pyaar khone se aur apne ghar ki khushiyan khone se bacha lo."

Tabhi Karan kamre mein aata hain. Kinjal uske gale lag kar rone lagti hain aur woh usse maafi bhi maangti hain. Karan use bade pyaar se samjhaata hain. Sanjana kamre se bahar chali jaati hain.

               - Ved Vineet Gautam