Prarabdh

 Nitin Desai ek vyapaari hain. Uski Daily Food Products ki dukaan hain. Us dukaan ko Nitin ke pita ne shuru kiya tha. Haal hi mein uski shaadi hui thi. Dukaan unke ghar ke nazdeek hi hain. Nitin ke ghar mein uske maata-pita aur uski patni hain. Nitin ke pita ka naam Ramesh Desai hain aur maata ka naam Sulochana Desai hain. Nitin ki patni ka naam Ritika Desai hain. 

Nitin har roz subah uthkar tayyar hokar apni dukaan par jaata hain aur shaam mein kaam khatam karke wapas ghar laut aata hain. Shaam mein poora parivaar saath mein baithkar dher saari baatein karte hue apna samay vyatit karte hain. 

Ek din ki baat hain. Shaam ka waqt tha aur ghar mein sabhi log baithe baatein kar rahe the. Tabhi achaanak se veh log bhukamp ke jhatke mehsus karte hain. Sabhi log turant apne aas-paas ki alag-alag chizon ko kas ke pakad lete hain. Kuch minton ke baad, bhukamp ruk jaata hain.

Har koi ghabraya hua tha. Sulochana aur Ritika ke maathe se paseena aa raha tha. Kuch der baad, sabhi logon ki ghabrahat thodi kam hui. Phir Ramesh kehta hain, "Bhukamp jaisa lag raha tha na ?"

Nitin - "Haan yeh bhukamp hi tha."

Ritika - "Papa aapko paani laa doon ?"

Ramesh - "Haan beta."

Ritika andar rasode mein jaati hain aur ek glass paani laakar Ramesh ko pakda deti hain. Ramesh paani peeta hain. 

Sulochana - "Abhi aap thik ho Ji ?"

Ramesh - "Haan."

Nitin - "Main ek baar bahar ka haal dekh aata hoon."

Ramesh - "Dhyaan se jaana beta."

"Haan Papa." Kehte hue Nitin bahar jaata hain. 

Sulochana - "Upar Wale ki dayaa hain ki hum bach gaye."

Ramesh - "Haan yeh baat toh hain. Ise hi upar wale ka chamatkaar kehte hain."

Ab sabhi log yahan-wahan ki baatein karna shuru kar dete hain. Baatein karte-karte kaafi waqt guzar jaata hain. Lekin, Nitin ka abhi tak ghar laut kar nahi aata hain. 

Sulochana - "Nitin kaafi der se bahar gaya hua hain."

Ritika - "Haan kaafi waqt toh ho hi gaya hain."

Ramesh - "Thik hain. Main use phone lagata hoon."

Ramesh apni jeb se apna mobile nikaalta hain aur Nitin ko call lagata hain. Phone ki ghanti bajti hain. Lekin, woh call nahi utahta hain. Phone ki ghanti baj-bajkar kat jaati hain. Lekin, Nitin ki taraf se koi jawaab nahi milta hain. Ramesh pareshan ho jaata hain. 

Sulochana - "Kya baat hain ?"

Ramesh - "Kai baar main use call laga raha hoon. Ghanti baj-bajkar kat jaa rahi hain, par woh call utha nahi raha hain."

Sulochana apne haath jodte hue kehti hain, "Bhagwaan mere bete ki raksha kare." 

Ramesh - "Main ek baar dukaan ho aata hoon."

Ritika - "Lekin aap sambhalkar jaana Papa. Bhagwaan na kare koi anhooni na ho jaaye."

Ramesh bed par se uthta hain aur do kadam chalta hain. Tabhi ghar ka darwaaza khat-khatakta hain. Ramesh daude hue darwaaze ki aur jaata hain is ummeed ke saath ki bahar shayad Nitin ho. Woh turant darwaaza kholta hain aur dekhta hain ki saamne Nitin khada hain. Nitin ko dekhte hi woh thodi chain ki saans leta hain. Sulochana aur Ritika ki toh aankhein bhar aati hain.

 Ramesh kehta hain, "Andar aa jaao beta." Nitin ghar ke andar aata hain aur woh bed par baith jaata hain. Uska chehra utra hua tha. Woh kaafi pareshaan lag raha tha. Nitin ke chehre ka haav-bhaav dekh kar hi Ramesh samajh jaata hain ki koi toh baat hain. Woh Ritika se kehta hain, "Beta zara paani le aana Nitin ke liye."

Ritika andar rasode mein jaati hain aur turant ek glass paani le aati hain. Woh paani ka glass Nitin ko pakdati hain. Nitin kanp-kapaati hui haaton se glass pakadta hain aur kuch ghunt peeta hain. Phir Ramesh Nitin se poochta hain, "Kya hua beta ?"

Nitin - "Sab kuch khatam ho gaya hain Papa."

Ramesh - "Matlab ?"

Nitin - "Hamari dukaan  dharaashaahi ho gayi hain. Is bhukamp ne hamari rozi-roti cheen li hain."

Sulochana - "Hey bhagwan ab kya hoga ? Ab aage zindagi kaise kategi ? Abhi-Abhi toh nayi-nayi Bahu laae the hum, bhagwaan se kya hamari yeh khushi bardaasht nahi hui ?"

Ramesh - "Chup ho jaao Sulochana."

Sab log Ramesh ki aur dekhte hain. Phir Ramesh kehta hain, "Dukaan hi gayi hain na ? Zindagi thodi na gayi hain."

Nitin - "Haan Papa. Lekin, ab aage sab kaise hoga ?"

Ramesh - "Sab kuch ho jaayega. Bas tum sabr rakho. Aaj is baare mein tum kuch mat socho aur aaj main ghar mein kisi ke muh se is baare mein ek bhi shabd nahi sun na chahta hoon."

Nitin - "Lekin Papa ?"

Ramesh - "Bas maine keh diya. Aaj yeh vishay band karo. Ab tum apne kamre mein jaao aur so jaao. Kal phursat mein baat karenge."

Nitin apne kamre mein jaata hain aur baaki sab bhi apne-apne kamre mein chale jaate hain. Kaafi der tak koshish karne ke baad, jaise-taise sab log so jaate hain. Lekin, Nitin nahi so paata hain. Woh behad chintit ho jaata hain. Aur woh ho bhi kyun na, ek jhatke mein uska poora vyapaar chaupat ho chuka hain. Nitin ki saari raat bas karwat badalte-badalte nikal jaati hain. 

Agle din, woh kamre se bahar nikalta hain aur kitchen mein jaata hain. Woh ek glass bhar paani peeta hain. Tabhi Nitin ko ek aawaz sunayi deti hain, "Soye nahi abhi tak beta ?"

Nitin peeche mudta hain aur dekhta hain ki, Ramesh khada hain. Nitin ki nazrein jhunk jaati hain aur woh dabi hui aawaz mein kehta hain, "Nahi."

Ramesh - "Itna chintit mat ho tum. Koi Na Koi raasta nikal hi jaayega."

Nitin - "Lekin kaise Papa ?"

Ramesh - "Zindagi mein agar ek darwaaza band hota hain, toh dusra khulta hain. Upar Wale par bharosa rakho aur apna sabr mat khoo."

Nitin - "Thik hain Papa."

Ramesh dekhta hain ki Nitin ke maathe se paseena aa raha hain. Woh Nitin ka maatha pakadta hain aur mehsus karta hain ki Nitin ko bukhaar hua hain. Woh kehta hain, "Tumhe toh bukhaar hua hain."

Nitin - "Haan shayad."

Ramesh - "Abhi turant apne kamre mein jaao aur so jaao."

Nitin - "Thik hain Papa."

Nitin apne kamre mein jaata hain aur Ramesh bhi apne kamre mein chala jaata hain.

Agle din, Nitin ki neend khulti hain. Uska sar ab bhi thoda sa dard kar raha tha. Woh apne bistar se uthta hain aur dobara baith jaata hain. Nitin ko apne aankhon ke saamne apni poori zindagi dikhayi deti hain. Kaise uske pita ne uski har khwahish poori ki. Kaise uske pita ne use zindagi ki saari khushiyaan laakar uske jholi mein rakh di. 

Woh apne beete hue kal ki yaadon mein dooba hua tha aur woh dheere-dheere us yaadon ke samandar ki gehrai mein, aur bhi zyada doobta jaa raha tha. Tabhi Nitin apne kandhe par kisi ka haath mehsus karta hain. Woh peeche mud kar dekhta hain aur Ritika ko paata hain. Woh kuch nahi kehta.

Ritika - "Kya soch rahe the aap ?"

Nitin - "Kuch bhi nahi."

Ritika - "Woh main yeh keh rahi thi ki, Papa ne aapko Hall mein bulaya hain."

Nitin - "Thik hain main thodi der mein aata hoon."

Ritika - "Papa ne kaha hain ki main khud aapko lekar aaun."

Nitin - "Thik hain chalo."

Dono pati-patni saath mein Hall mein jaate hain. Hall mein Ramesh aur Sulochana baithe hue hote hain. Nitin ko dekhte hi, Ramesh kehta hain; "Aao beta baitho."

Nitin Ramesh ke saamne baith ta hain. Ramesh kehta hain, "Batao beta. Kaise ho ?"

Nitin - "Thik hoon."

Ramesh - "Lekin tum ab bhi pareshani mein dikh rahe ho ?"

Nitin - "Toh koi bhi pareshan hoga hi na Papa."

Ramesh - "Kya aaj se pehle aur kisi ki zindagi mein takleefein nahi aayi hain ? Kya tum is duniya ke pehle aise shaks ho, jo ki apni zindagi mein sab kuch kho diya hain ?"

Nitin - "Nahi Papa."

Ramesh - "Phir ?"

Nitin - "Lekin ab aage kya hoga Papa ? Main ab kya karun, kaise karun mujhe kuch samajh mein nahi aa raha hain."

Ramesh - "Ab tum thande dimaag se yeh socho, kya kar sakte ho tum is paristhiti mein. Bina koi tension liye, ek satik nirnay lo."

Nitin - "Filhal toh main bas yahi soch raha hoon ki, ab zindagi ka ek bohut hi kathin samay aa chuka hain. Yeh jeevan ki bohut hi kathin pareeksha ki ghadi hain."

Ramesh - "Aur is kathin pareeksha ko tum ek na ek din safalta-poorvak paar kar jaaoge."

Nitin - "Zindagi mein bohut hi bada musibat ka pahad toot pada hain Papa."

Ramesh - "Is musibat par tum ek na ek din, vijay zaroor paaoge."

Nitin - "Lekin kaise Papa ? Mujhe toh apne aankhon ke saamne bas andhera hi nazar aa raha hain."

Ramesh - "Tum yeh socho is samay tum kya-kya kar sakte ho ?"

Nitin - "Maine marketing ka course kiya hain. Toh main marketing kar sakta hoon."

Ramesh - "Dekha raasta mil hi gaya na tumhe. Ab tum yeh pata karo ki marketing ka kaam kaha par mil raha hain."

Nitin - "Thik hain Papa. Main kal se kaam shuru karunga."

Ramesh - "Thik hain beta."

Agle din se, Nitin apne kaam par lag jaata hain. Woh kuch dino tak internet se Companies ki jaankari ikattha karta hain aur un saari companies ko apply karna shuru kar deta hain.

Saat mahine beet jaate hain, lekin Nitin ko kisi bhi company se koi jawaab nahi milta hain. 

Ek din ki baat hain, Nitin ghar aata hain. Woh behad hataash aur niraash rehta hain. Ghar ke andar aate hi, woh bed par baith jaata hain. Nitin ko pareshan dekh kar, Ramesh poochta hain, "Kya hua beta ?"

Nitin - "Kuch nahi Papa."

Ramesh - "Tum kaafi hataash lag rahe ho beta."

Nitin - "Papa main thak chuka hoon."

Ramesh - "Matlab ?"

Nitin - "Ab tak main saikdon companies mein baat kar chuka hoon, par abhi tak main kuch bhi haasil nahi kar paaya hoon."

Ramesh - "Beta zindagi insaan ki kai pareekshayein leti hain."

Nitin - "Ab aur kitni pareeksha deni hogi mujhe ?"

Ramesh - "Jab insaan koi nayaa kaam shuru karne ki koshish karta hain, tab jeevan ki chunotiyaan baar-baar uske saamne aakar khade ho jaati hain. Us samay vyakti ko apni asaflta se seekh lene ki aadat daalni chahiye."

Nitin - "Aur jab insaan ko lage, ki saare darwaaze band hain. Tab woh kya kare ?"

Ramesh - "Koshish karta rahe."

Nitin - "Jab insaan ke saamne ek lohe ki deewar khadi ho aur us deewar par apna sar takrane ke alaawa us aadmi ke paas aur koi raasta na ho. Tab woh kya kare Papa ?"

Ramesh - "Tab bhi woh koshish karta hi rahe aur ummeed ka daaman na chode. Ummeed par hi yeh duniya tiki hui hain beta."

Nitin - "Papa main aapki har baat maanta hoon. Lekin, aadmi ke sabr ka baandh kabhi na kabhi toh toot hi jaayega. Aur jab baandh toot jaata hain, tab gaon mein baadh aa jaati hain aur sab kuch barbaad ho jaata hain."

Ramesh - "Beta jab jungal mein baadh ya toofan aata hain na, tab jungal ke saare jaanwar yahan-wahan bhaag kar apni jaan bachane mein lag jaate hain. Lekin, bohut kam hi log bach paate hain. Wahi dusri aur, us kathin paristhiti mein; Baaz uncha udne ka prayaas karta hain. Woh us toofan ka saamna karne ka prayaas karta hain. Woh baar-baar neeche girta hain, lekin, phir se udne ki koshish karta hain. Baaz kabhi bhi apne prayaas karne ki pravutti ko chodta nahi hain. Aakhir mein, woh safalta-poorvak us toofan ko paar kar khule aasman mein pohuch hi jaata hain. Jahan us Baaz ko shaant aur sthir hawaa uske sangharsh ke tohfe ke roop mein milta hain. Tumhe keval nirantar prayaas karte rehna hain beta. Baaki sab kuch tumhe sahi samay aane par milte jaayega."

Ramesh ki baaton se Nitin thoda aashwast hota hain. 

Kuch mahino ke sangharsh ke baad, Nitin ko safalta prapt hona shuru ho jaata hain. Use ek company se ek kaam milta hain, jis mein Nitin ko us company ke liye Freelance Marketing ka kaam karne ka mauka milta hain. Woh kaam milte hi Nitin din-raat ek karke apna presentation banata hain aur company ko woh presentation bohut pasand aata hain. Nitin ko ek acchi rakam mil jaati hain. Dheere-Dheere use kuch aur companies se contract milta hain aur dekhte hi dekhte woh safalta-poorvak apni khud ki ek marketing company khadi kar deta hain. 

Kareeb do saal baad, is ghar ke haalat dobara sudhar jaate hain. 

                 - Ved Vineet Gautam