Sanjeeda Haalaat

 Hiten Kumar peshe se ek vyapaari hain. Unki raashan ki dukaan hain. Unki patni ka naam, Radhika Kumar hain. 

Hiten aur Radhika ke teen bacche hain. Do bete aur ek beti. In teeno Bhai-Behenon mein sabse badi is dampati ki beti hain. Beti ka naam, Anjali Kumar. Anjali ke baad, Sanjay hain aur ghar mein sabse chota Sameer hain.

Pichle saal hi Anjali ki shaadi hui thi. Anjali ke pati ka naam, Rakesh Rathod hain. Rakesh bhi peshe se ek vyapaari hain. Rakesh ki kapdon ki dukaan hain. Sanjay aur Sameer abhi tak kunware hain. 

Sanjay aur Sameer, yeh dono Bhai, Hiten ke saath vyapaar mein haanth bantate hain. Is parivaar ka vyapaar din pratidin badh raha hain. Din doguna aur raat chauguna inke vyapaar ki tarakki ho rahi thi. 

Ek din ki baat hain. Har roz ki tarah, us din bhi teeno baap-bete saath mein kaam par gaye aur din bhar ka kaam khatam karke, shaam mein ghar laut aaye. 

Teeno saath mein Hall mein baithe hue the. Tabhi achaanak se Rakesh aur Anjali unke darwaaze par dastak de pade. In dono ka aana anapekshit tha. Un dono ko darwaaze par dekh kar teeno muskuraye aur takthe par se uthkar, Hiten, Sanjay aur Sameer teeno un dono ka swaagat kiye. 

Hiten ne muskurate hue kaha, "Aao beta. Aao." Phir Anjali aur Rakesh ghar ke andar aaye. Uske baad, sabhi log saath mein baithe. 

Hiten - "Bohut hi accha kiye beta, jo aap dono aa gaye."

Rakesh - "Uncle woh maine toh Anjali se pehle hi kaha tha ki, aap logon ko Call karke bata diya jaaye. Lekin, yeh hi zidd par ad gayi ki, bina bataye hi chale chalo."

Anjali - "Papa agar main bata deti toh aap log dher saari tayyariyon mein jut jaate aur khaas kar Mummy. Apne Damaad ki khaatir daari jo karni padti."

Hiten - "Toh ismein galat hi kya hain ? Hamari iklauti beti hain. Agar hum apne Damaad ki khaatir daari nahi karenge, toh aur koun karega ?"

Rakesh - "Nahi uncle aap krupya karke aisa na kahe. Yeh toh ghar ki baat hain. Hum dono Parivaar alag thodi na hain."

Hiten - "Woh baat toh hain Beta. Hum ek hi Parivaar hain."

Sanjay andar jaata hain aur baaki log saath mein baithkar baat-cheet kar rahe hote hain. Thodi der baad, Sanjay aur Radhika Chai aur Namkeen lekar, Hall mein aate hain. Yeh dekh Anjali kehti hain, "Are Mummy, in sab ki kya zaroorat thi ?"

Rakesh - "Kyun abhi-abhi toh Uncle ne kaha ki, hum ek hi Parivaar hain aur pal bhar mein tum ab paraayi ho gayi ?"

Sab log hans padte hain. 

Radhika - "Hamari beti ki Shaadi toh badi acchi ho gayi. Behad Heera Damaad mila hain. Bas tum dono mil-julkar hansi-khushi raho aur Bhagwaan aap dono ko kabhi koi takleef na de. Bas itna hi chahti hoon main."

Hiten Rakesh se kehta hain, "Aur batao beta, tumhara vyapaar kaisa chal raha hain ?"

Rakesh - "Bohut hi accha chal raha hain uncle.

Hiten - "Chalo acchi baat hain."

Rakesh - "Aapka karobaar kaisa chal raha hain Uncle ?"

Hiten - "Bas upar wale ki krupa hain beta. Aur baaki haal-chaal batao beta."

Rakesh - "Sab badhiya Uncle."

 "Main kuch naashta bana laati hoon." Kehte hue, Radhika rasode mein chali jaati hain. 

"Main bhi aati hoon Mummy." Kehte hue, Anjali bhi andar chali jaati hain. 

Ghar ke sabhi aadmi Hall mein baithe hue the. Woh log aapas mein, Desh-Duniya ki baatein kar rahe the. Tabhi baat-cheet karte-karte, Rakesh ne Hiten se pucha, "Uncle ab aap hamare dono Bhaiyon ki Shaadiyan kab kara rahe ho ?"

Hiten - "Ab dekhte hain beta."

Rakesh - "Are Bhai hamare dono Saale Sahab apna ghar acche se basaa lein. Sahi waqt bhi toh aa gaya hain. Umar toh ho hi chuki hain in dono ki Shaadi ki."

Hiten - "Haan woh toh hain Beta."

Rakesh - "Agar aap ijaazat de, toh Sanjay ke liye koi ladki dekhun kahi ?"

Hiten - "Jaisa tumhe thik lage."

Rakesh - "Mera matlab hain ki, agar Sanjay ke liye baat kahi chal rahi ho toh thik hain, nahi toh meri nazron mein hain ek Parivaar."

Hiten - "Agar tumne dekha hain toh, thik hi dekha hoga Beta. Waise kaha ke hain, yeh log ?"

Rakesh - "Mera ek dost hain. Ladki uski Mauseri Behan hain. Toh main us ladki ke liye, Sanjay ke baare mein soch raha tha Uncle."

Hiten - "Woh log kaha rehte hain ?"

Rakesh - "Woh log Nashik mein rehte hain. Ladki ke pita ek Company mein naukri karte hain. Ladki ki padhai abhi-abhi poori hui hain aur us ladki ka ek chota Bhai bhi hain, jo ki filhal College mein padh raha hain. Behad khule dil ke aur suljhe hue hain yeh log."

Hiten - "Thik hain beta. Aap jab chaho, hum tab milne ke liye tayaar hain."

Rakesh - "Thik hain Uncle, main un logon se baat-cheet kar leta hoon."

Hiten - "Thik hain Beta."

Uske baad, woh log aapas mein yahan-wahan ki baat-cheet karte hain. Thodi der baad, Radhika aur Anjali khaana banakar laate hain aur Ghar ke sabhi sadasya saath mein baithkar khaana khaate hain. Phir Rakesh aur Anjali wapas apne ghar laut jaate hain. 

Kuch dino ke baad, Hiten ka poora parivaar Rakesh aur Anjali ke saath, Nashik chale jaate hain. Teeno Parivaar saath mein baithkar baat-cheet karte hain. 

Jis ladki se is Sanjay ka rishta tay hone wala hain; us ladki ka naam, Amrita hain. Amrita ke Pita ka naam, Ajay Singh hain. Unki patni ka naam, Payal Singh hain aur Amrita ke Bhai ka naam, Nitin Singh hain. 

Hiten Ajay se kehta hain, "Bhai Sahab, dekhiye main saaf-saaf baat karta hoon aur saaf-saaf baat hi samajh paata hoon. Isiliye main behad saaf mann se ek baat kehna chahta hoon."

Ajay - "Ji kahiye na Bhai Sahab."

Hiten - "Dekhiye Bhai Sahab, zindagi in dono ko saath mein bitaani hain. Toh sabse zyada zaroori hain, ki hamare dono bacche ek dusre ko pasand kare. Toh main bas itna hi chahta hoon ki, agar yeh dono aapas mein kuch der baat-cheet kare, akele mein. Aur agar in dono ko lagta hain ki, yeh dono saath mein apni zindagi hansi-khushi beeta sakte hain; toh meri taraf se bhi 'Haan' hi hogi."

Ajay - "Main bhi aapke is vichaar se poori tarah se sehmat hoon, Bhai Sahab."

Phir Ajay, Payal se kehta hain, "Tum in dono ko chath par le jaao. Wahan in dono ko ekaant mil jaayega. Kuch der yeh dono ekaant mein baat-cheet karenge toh yeh dono, apni zindagi ka sahi faisla le paayenge."

Payal - "Thik hain."

Payal, Sanjay aur Amrita ko chath par le jaati hain aur woh dobara neeche aa jaati hain. Neeche sabhi log baithkar aapas mein Desh-Duniya ki charcha karne mein vyast ho jaate hain. 

Sanjay aur Amrita chath par akele the. Woh dono jhule par baithe hue the. Dono ke beech ek ajeeb si hichkichaahat thi. Aisi hichkichaahat, pehli mulaakaat mein aksar naujawano ko hota hain. Dono yahan-wahan dekh rahe the aur ek un dono ki ek dusre se nazrein milte hi, dono phir yahan-wahan dekhne lag jaate. Phir woh dono ek dusre ko chor nazron se dekhte aur aapas mein nazrein milte hi, woh dono dobara apni-apni nazrein chura lete.

Tabhi Sanjay himmat karke kehta hain, "Aapka Shehar behad khoobsurat hain."

Amrita - "Ji Shukriya."

Sanjay - "Aapke Shehar ke baare mein kuch bataiye. Aakhir kya khaasiyat hain aapke Shehar mein ?"

Amrita - "Har saal ek Kumbh Mela is Shehar mein bhi lagta hain."

Sanjay - "Bade bhavya tareeke se manaaya jaata hoga na yeh tyohar ?"

Amrita - "Beshak. Behad shaandar tareeke se manaaya jaata hain yahan par tyohar. Mela bhi bohut bade istar par lagta hain."

Sanjay - "Tab toh yahan Mela dekhne ke liye toh aana hi padega."

Amrita - "Zaroor aaiyega. Yeh Shehar bhi behad khoobsurat hain. Aap is Shehar se kabhi niraash nahi honge."

Uske baad, woh dono aapas mein, aur bhi dher saari baatein karte hain. Tabhi Sanjay ko ek Call aata hain aur woh Amrita se kehta hain, "Ek behad zaroori Call aaya hua hain. Main yeh bhi jaanta hoon ki, hamari yeh mulakaat behad zaroori hain. Zindagi ka sabse bada faisla lene ki ghadi hain yeh. Lekin, filhal mere liye yeh Call utaana bhi zaroori hain."

Amrita - "Thik hain."

Sanjay - "Aap mujhe maaf kar dijiyega."

Amrita - "Koi baat nahi. Main is baat ko samajh sakti hoon."

Sanjay - "Main bas thodi hi der mein aata hoon."

Amrita - "Ji Zaroor."

Sanjay jhula se uth khada hota hain aur woh zara aage jaakar phone par baat-cheet karne lagta hain. Amrita wahi par akele baithi hui thi. Woh kabhi yahan-wahan dekhti, toh kabhi Sanjay ki aur dekhti.

Sanjay ko phone par baat-cheet karte hue kareeb pandrah minute beet chuke the. Phone par baat-cheet khatam hone ke baad, woh dobara wahan par aata hain aur woh Amrita ke bagal mein jaakar baith jaata hain. 

Phir Sanjay kehta hain, "Kaafi der ho gayi. Mujhe maaf kar dijiyega."

Amrita - "Kaafi zaroori Call raha hoga ?"

Sanjay - "Haan. Kaam hi kuch aisa hain. Please mujhe maaf kar dijiyega."

Amrita - "Toh aapki pasand napasand ke baare mein kuch bataiye."

Sanjay - "Bas mujhe Movies dekhna pasand hain aur kitaabein padhna aur bas. Ab aap bhi apni pasand napasand ke baare mein kuch bataiye."

Amrita - "Movies dekhna toh mujhe bhi behad pasand hain. Par ghumna itna nahi. Ghar mein ya kahi bhi, jahan parivaar ho ya hamare apne ho; un logon ke saath apna samay vyateet karna mujhe bohut pasand hain."

Sanjay - "Mujhe maaf kariyega. Shayad main aapko utna samay nahi de paaun, lekin main hamesha koshish karunga ki aapko kabhi bhi; meri taraf se koi takleef na ho."

Amrita muskurati hain. 

Sanjay - "Agar aapko apni taraf se manaa karne mein koi dikkat ho toh, main samajh sakta hoon. Neeche jaate hi, main sabko manaa kar dunga."

Amrita - "Ji nahi. Uski koi zaroorat nahi hain. Main aapse hi Shaadi karungi."

Sanjay - "Aap chahe toh main sochne ke liye kuch dino ka waqt maang lunga sabse. Phir aap thik se soch Vichaar karke apna faisla le lijiyega."

Amrita - "Aap bohut adjust karte ho. Aapki ek aur khaasiyat ke baare mein turant pata chal gaya."

Sanjay - "Ek aur khaasiyat ? Matlab aur kounsi khaasiyat ke baare mein aapko pata chala ?"

Amrita - "Yahi. Ki aap behad mehnati hain. Apna kaam bohut lagan ke saath karte hain."

Sanjay - "Main aapko har khushi dene ki koshish karunga."

Amrita - "Bas aapka thoda sa samay chahiye hoga mujhe."

Sanjay - "Aapki khushi ka khayal main poori tarah se rakhne ki koshish karunga. Kisi farz ki tarah nahi, balki dil se main is rishte ko nibhaaunga."

Amrita - "Toh neeche chalkar, kya hum sabko 'Haan' keh dein ?"

Sanjay - "Zaroor."

Sanjay aur Amrita neeche jaate hain aur woh dono Shaadi ke liye, 'Haan' kar dete hain. Dono ki Shaadi ki tayaari bade zor-shor se hoti hain aur badi hi dhoom-dhaam se un dono ki Shaadi ho jaati hain. 

Jald hi, Sanjay apne vyapaar mein vyast ho jaata hain aur woh Amrita ko behad kam samay de paata hain. Jiska use behad khed bhi rehta hain. Amrita bhi poori shiddat ke saath apna rishta nibhaane ka prayaas karti hain, na keval Sanjay ke saath balki, poore Kumar Parivaar ke saath. 

Sanjay Amrita ko apni zindagi ka utna waqt nahi de paa raha tha, jitne ki woh haqdaar thi. Yeh baat ghar ke sabhi sadasya ko dheere-dheere samajh mein aa rahi thi. 

Diwali ka tyohaar aane wala tha. Shaam ka waqt tha aur ghar ke sabhi sadasya saath mein baithe hue the. Tabhi Hiten ne kaha, "Main aap sab logon se ek behad zaroori baat kehna chahta hoon."

Sabhi sadasya Hiten ki aur behad dhyaan se dekhne lage. 

Hiten - "Maine yeh tay kiya hain ki is baar ki Diwali hamari Bahu Raani hamare saath nahi, balki apne maayke waalon ke saath manayegi."

Radhika - "Par aisa kyun ? Hamare Bahu ki is ghar mein yeh pehli Diwali hain. Yahan par use, yeh tyohaar manana chahiye na."

Hiten - "Haan. Par jabse yeh ghar aayi hain. Tabse yeh ladki ek baar bhi apne maata-pita se nahi mil paayi hain. Aur saath hi, Sanjay bhi Amrita ke saath uske ghar jaayega. Maine Samdhi Ji se pehle hi saari baatein kar li hain aur bas jald se jald hume in dono ki vidaai karni hain."

Amrita ki khushi ka koi thikaana nahi tha. Radhika Hiten ke paas aati hain aur puchti hain, "Aise achaanak se aapne yeh faisla le liya. Aas-Pados ke log kya kahenge ? In dono ko bhejne ki koi khaas wajah hogi ?"

Hiten - "Pati-Patni ka rishta behad naajuk hota hain, Radhika. Agar aaj in dono ko humne akela nahi choda, toh mujhe darr hain ki, aage chalkar yeh dono apni shaadi shuda zindagi mein kahi akele na pad jaaye. Agar waqt rehte yeh dono ek dusre ko waqt nahi de paaye, toh woh din durr nahi; jab in dono ka rishta behad khokhala ban jaayega. Isse pehle ki, in dono ka rishta apna dum tod de, hume inke rishte mein naya rang bharna hoga."

Radhika Hiten ki baat samajh jaati hain aur haalat ki gambhirta bhi use dikhaayi dene lagti hain. 

                     - Ved Vineet Gautam