Nazariya

 Sagar Singh peshe se ek vyapaari hain. Uski kapdon ki dukaan hain. Uska vyapaar accha khaasa chal raha hain. Woh apne vyapaar se accha kama leta hain. Sagar ki ek patni hain. Uska naam, Samiksha Singh. Sagar aur Samiksha ka ek ladka hain. Us ladke ka naam, Nihaal Singh. Nihaal filhal School mein padhyaai kar raha hain. 

Sagar ne apne vyapaar ke vistaar ke liye, Bank se bees laakh rupaye ka karz liya hain. Karz milte hi, Sagar Bahar-Gaon gaya aur dher saare naye-naye kism ke kapde kharid laaya. Sagar ne ek lamba safar kiya. Woh sabse pehle Jaipur gaya aur naye-naye kadpon ki thok mein kharidaari ki aur woh us gaadi ko lekar Kashmir aur Srinagar ki aur nikal pada. Wahan par bhi Sagar ne dher saari kharidaari ki. 

Kapdon ki baarikiyon ke, Sagar ki paarkhi nazar ko badi acchi pehchan thi. In teeno sheharon mein kapde kaafi mehange mil rahe the. Phir bhi Sagar ne bina koi kanjusi kiye kapdon ke bade-bade order diye aur unhe Truck mein laadkar apne shehar le aaya. Kyunki, woh jaanta tha ki bhale hi kapde behad unchi daam mein mil rahe ho, lekin aage chalkar use vyapaar mein bohut zyada munafa hoga. 

Is baar, Sagar ne jis tarah ke kapde kharide hain, is tarah ke kapde poore shehar mein kahi bhi milna naamumkin ke barabar hain. Upar se Dhanteras aur Deepawali aane mein ab zyada samay nahi bacha hain. Toh use shat pratishat munafa hoga woh bhi bohut bade paymaane mein. Sagar ko is baat ka poora yakeen tha. 

Sagar apne Shehar ki aur badh raha tha apne kapdon se ladi Truck mein baithkar. Woh mann hi mann behad prasanna tha. Sagar ko apni aankhon ke saamne apna ka chappar phaad munafa baar-baar dikhaayi de raha tha. Sagar ne toh yahan tak soch liya tha ki agar use ummeed se badhkar kamayi hui, toh woh Samiksha aur Nihaal ko Bahar-Gaon ghumaane ke liye le jaayega. 

Kaafi lamba safar poora karne ke baad, aakhir kaar woh apne shehar pohunch hi gaya. Sagar ki aankhein betaab ho rahi thi, apne dukaan ko in sabhi naye kadpon se sajaa hua dekhne ke liye. Woh bada besabra tha. Use apni aankhon ke saamne, apne dukaan ki rang-birango kapdon se saji hui dukaan baar-baar dikhaayi de rahi thi. Sagar ko apne dukaan mein grahakon ki bheed bhi dikhaayi de rahi thi. Saath Hi Saath woh yeh soch-soch kar itraa raha tha ki, aakhir woh dher munaafa bhi kamayega. Kabhi uske mann mein, hone wale munaafe ka hisaab lagane ka khayal aata, toh kabhi woh yeh sochta ki aakhir woh kis Shehar ke kapdon ko woh apne dukaan ke kin hisson mein lagayega. Woh behad utsukh tha. 

Aakhir kaar woh Truck ke saath apni dukaan tak pohunch hi gaya. Dukaan ke bahar khadi badi Truck dekh kar, sabhi log samajh gaye the ki, is baar Sagar jamkar bikri karne wala hain. Aas-Paas ke vyapaari kabhi Truck ko dekhte, toh kabhi Sagar ko dekh kar muskurate. Sagar halki si muskaan dekar, zara sa itraata. 

Sagar ne bohut hanste-muskurate hue sabhi kapdon ko apne dukaan mein sajane laga aur dukaan mein kaam kar rahe ladkon ko, sabhi puraane kapdon ko godaam mein rakhne ka aadesh diya. Kapdon ko yahan-wahan karne mein kaafi samay beet gaya. Dekhte-Dekhte shaam ho gayi. Aakhir mein saare kapdein, Sagar ke mann ke hisaab se rakh diye gaye. Sagar ne jaisa chaha tha, thik usi tarah se dukaan sajaa tha. Pehle itna lamba safar, woh bhi Truck mein baithkar. Dusra shehar pohunchte hi, dukaan ki sajaawat mein poora din nikal jaana. Phir bhi, Sagar ko zara bhi thakaan mehsus nahi hui. Uske chehre ki muskaan ab bhi barkaraar thi. Usne Gaadi Chaalak aur sabhi Hamalon ko tay daam se zyada keemat de di. Veh log bhi behad khush hue. 

Uske baad, Sagar ne apne dukaan par baithne wale karmachariyon ko apne-apne ghar jaane ke liye kaha aur saath hi saath yeh bhi kaha, "Kal se tum logon ka kaam badhne wala hain. Kyunki, ab Dhanteras aur uske baad Deepawali aane wali hain. Yahi sahi samay hain, apni mehnat dikhaane ka. Tum sab jamkar kaam karna aur agar munaafa accha hua, toh is baar main zyada Bonus dunga."

Sagar ke sabhi karmachari muskuraye aur kahe, "Thik hain sahab." Uske baad, woh sab apne-apne ghar chale gaye. 

Sagar dukaan par hi baitha raha. Woh ek baar, apni dukaan ki khoobsurati ko jee bhar kar nihaarna chahta tha. Woh dheere-dheere chalte hue, apni dukaan mein tahal raha tha. Aisa lag raha tha maano, woh apne dukaan ki sair kar raha ho. In naye kapdon ki sajaawat se, Sagar ke dukaan ki khoobsurati mein chaar chand lag gaye the. 

Woh baitha hua muskura raha tha. Tabhi Sagar ka phone baja. Usne apna phone uthaya aur dekha ki Nihaal ka Call hain. Woh muskurate hue aur behad utsaah ke saath kaha, "Hello beta."

Nihaal - "Hello Papa. Kaha par ho aap ? Aap toh aaj ghar aane wale the na ? Aapne vaada kiya tha, aapko yaad hoga."

Sagar apne bacche ki naadaani par hans hain aur kehta hain, "Are beta ek saath itne saare sawaal ? Zara saans toh le lo."

Nihaal - "Nahi. Papa agar aap aaj ghar nahi aaye, toh main khaana nahi khaaunga aur na hi School jaaunga."

Sagar - "Waise bhi kuch dino mein tumhara toh band hi hone wala hain. Tumhe toh jald hi Diwali ki chuttiyaan milne wali hain."

Nihaal - "Are haan. Main toh yeh baat bhool hi gaya tha. Aakhir main bhi kitna buddhu hoon Papa."

Sagar hans padta hain. Phir Nihaal kehta hain, "Papa aap kab tak ghar aa rahe ho ?" 

Sagar - "Bas tum apni aankhein band kar lo aur ginti ginna shuru karo. Ginti poori hote hi main ghar aa jaaunga."

Nihaal ekdum joshile andaaz mein kehta hain, "Thik hain."

 Nihaal ki naadaani par Sagar hans padta hain. Phir woh phone kaant deta hain. Uske baad, Sagar ek baar apni dukaan ko jee bhar kar dekh leta hain. Uski aankhon mein ummeed thi. Ummeed zyada se zyada munafa kamane ki. Ummeed kaamyaabi ki. Ummeed tarrakki ki. Woh upar wale ka naam leta hain aur apni dukaan ki lights bujha deta hain. Phir woh dukaan ka shutter neeche karke, uspar taala lagakar apne ghar ki aur nikal padta hain. 

Sagar apne ghar ki aur nikal padta hain. Woh paidal chalte hue jaane lagta hain. Raat ka samay tha. Lekin, sadak par har roz ke mukaable thodi zyada bheed thi. Kyunki, Deepawali aane wali hain isiliye, sabhi vyapaari is shubh tyohar par hone wali dhanvarsha ki aasha mein, adheek se adheek samay apne vyapaar ko dena pasand kar rahe the. Yahi toh sahi avsar hain, tarakki karne ka. Toh aakhir is avsar ko koi kaise chunke. Saal bhar vyapaari jitni kamaayi nahi karte hain, usse zyada kamaayi Dhanteras aur Deepawali ke tyohar mein kar jaate hain. Toh koi bhi vyapaari kamaayi ka yeh sunhera avsar aakhir kyun gawaye. 

Chalte-Chalte Sagar apne ghar pohunch jaata hain. Woh apne ghar ka darwaaza khatkhatata hain. Samiksha darwaaza kholti hain. Sagar ko dekhte hi, Samiksha muskurati hain. Phir woh bagal mein mud kar, Sagar ke andar aane ke liye raasta banati hain. Sagar ghar ke andar aata hain aur Hall mein pade hue palag par aakar baith jaata hain. 

Phir Samiksha Sagar se puchti hain, "Paani laaun ?"

Sagar 'Haan' mein apna sar hilata hain. Samiksha rasode mein jaati hain aur ek glass paani lekar biscuits ke saath Hall mein aati hain. Sagar do ghunth paani peeta hain. Phir woh Samiksha ki aur dekhta hain aur dobara muskurata hain. Sagar ke chehre ki muskaan dekh kar, Samiksha puchti hain, "Aaj aap bade khush nazar aa rahe hain ?"

Sagar - "Haan. Deepawali ka tyohar aane wala hain. Bas is baar acchi kamayi ho jaaye, toh mazaa aa jaayega."

Samiksha - "Zaroor hogi acchi kamayi. Bas upar wale ki krupa hum par bani rahe."

Sagar muskurata hain aur kehta hain, "Hmm."

Samiksha - "Ab aap khaa-peekar so jaaiye. Kal se aapka kaam bohut badh jaayega. Hain na ?"

Sagar - "Haan. Tum sahi keh rahi ho."

Samiksha Sagar ke liye khaana laati hain. Sagar peat bhar ke khaana khaata hain aur phir palang par let jaata hain. Dekhte Hi Dekhte chand minton mein woh gehri neend so jaata hain. Kyunki, woh behad thakaa hua bhi tha. Is wajah se use jaldi neend lag jaati hain.

Agle din, Sagar ki neend khulti hain. Woh behad taaza aur pehle se bhi zyada chust mehsus kar raha tha. Tabhi Sagar ko kuch aabhas hota hain. Use kuch alag si khushboo mehsus hoti hain. 

'Yeh toh mitti ki khushboo lag rahi hain.' Sagar sochta hain. 

'Lekin mitti ki khushboo toh tab hi pataa chalti hain, jab bahar barsaat hui ho.' Sagar aage sochta hain. 

Phir woh darwaaza kholta hain aur bahar ka nazaara dekh kar woh hairaan ho jaata hain. 

Sadak par paani bhara hua tha. Bemausam barsaat hui thi. Lekin, sadak dekh kar lag raha tha ki, barsaat kaafi tagdi hui hain. Sadak par paani bhara hua tha. 

Tabhi, achaanak se Sagar ko khayal aaya, 'Sadak ka itna bura haal hain. Ek baar dukaan ki aur jaa kar aaun ? Bhagwaan na kare, kya pata meri dukaan mein bhi. Nahi Nahi. Subah-Subah aise ashubh vichaar mann mein nahi aane chahiye. Lekin, jab tak main jaaunga nahi, tab tak asliyat kaise pata chal paayegi ?'

Sagar turant apne pairon mein chappal daalta hain aur woh bahar jaane ke liye pehla kadam badha hi raha hota hain ki, Samiksha peeche se puch padti hain, "Kaha par jaa rahe ho aap ?"

Sagar - "Bas dukaan se hokar aa raha hoon."

Samiksha - "Itni Subah-Subah ?"

Sagar - "Bahar ka haal dekho. Bemausam barsaat hui hain aur sadak poora paani-paani ho chuka hain. Kya pata aakhir dukaan ka kya haal hua hoga."

Samiksha - "Chai toh peete jaaiye."

 "Baad mein."  Kehte hue, Sagar turant ghar se bahar chala jaata hain. Woh tezz-tezz chalte hue dukaan ki aur badhte jaata hain. Badhte hue kadmon ke saath, Sagar ki bechaini bhi badhti jaati hain. Uske mann mein koi khayal toh nahi aa raha tha. Woh is mano-stithi mein nahi tha ki woh kuch soch sake. 

Sagar kaafi ghabraya hua tha. Ghabrahat ke maare, Sagar ke sochne-samajhne ki shakti gayab hoti jaa rahi thi. Ab bhi halki-halki boonda-baandi ho rahi thi. Thandi hawaa dheemi gati se chal rahi thi. Woh thandi hawaayein, Sagar ko apne badan par kaanton ki tarah chubhti hui mehsus ho rahi thi. 

Aakhir kaar, woh apne dukaan par pohunch hi jaata hain. Woh apni dukaan ke saamne khada tha. Tabhi Sagar ko apne parion par kuch mehsus hota hain. Woh neeche dekhta hain. Dekhte hi woh paata hain, apne pairon ke paas paani. Woh paani jo ki uske dukaan ke andar se aayi aur uske pairon ko chu gayi. 

Sagar samajh chuka tha ki dukaan ke andar paani bhar chuka hoga. Woh shutter kholkar ek baar, andar ka haal dekhna chahta tha. Par uski himmat nahi ho paa rahi thi. 

Sagar ke maathe se paseena chuthne lagta hain. Woh samajh chuka tha ki barsaat ne uska nuksaan kar diya hain aur ho sakta hain ki, nuksaan shayad kuch zyada hi hua ho. Shutter ke andar ka haal dekhne ka Sagar mein sahas nahi tha. Par dekhna bhi toh zaroori tha. Woh pehle apni aankhein band karta hain aur phir ek gehri saans leta hain. Chaabhi se woh shutter ka taala kholta hain. Phir woh dheere-dheere shutter upar karta hain. Chand palon mein, Shutter poori tarah se upar ho jaata hain. 

Shutter upar hote hi, andar ka nazaara dekh kar, Sagar ki aankhein fati ki fati reh jaati hain. Dukaan ke andar paani bharaa hua tha aur dher saare kapde kharaab bhi ho chuke the. 

Sagar ka bhaari nuksaan ho chuka tha. Yeh sab dekh kar, Sagar ka Dil baith gaya. 

Kuch pal ke liye woh kuch bhi samajh nahi paata hain. Phir na jaane, Sagar ke dimaag mein kya aata hain ki woh turant Shutter band karke uspar taala laga deta hain. Phir woh behad dheemi gati se chalte hue, ek mithaayi ki dukaan mein jaata hain aur wahan se ek kilo laddoo kharidta hain. Uske baad woh apne ghar laut aata hain aur woh Samiksha aur Nihaal ko Hall mein baitha hua paata hain. Un dono ki bhi Sagar par nazar padti hain aur Sagar un dono se kehta hain, "Deepawali ki dher saari shubhkaamnayein."

                    - Ved Vineet Gautam