Sambandh

 Sunil Kumar peshe se ek vyapaari hain. Unki patni ka naam, Anita Kumar hain. Us dampati ke do bacche hain. Ek ladka aur ek ladki. Ladke ka naam, Yug Kumar hain aur ladki ka naam, Neha Kumar hain. Yug Neha se umar mein teen saal bada hain. Yug Sunil ke saath vyapaar mein haath bantata hain. 

Haal hi mein, Yug ki nayi-nayi shaadi hui hain. Yug ki patni ka naam, Namrata Kumar hain. Dono baap-bete subah saath-saath daftar jaate hain aur shaam mein saath hi ghar laut aate hain. 

Ek din ki baat hain. Shaam ka waqt tha aur Sunil aur Yug ghar laut aaye the. Ghar ka darwaza khula hua tha aur lautne ke baad, dono ne dekha ki, Anita Hall mein hi baithi hui hain. Anita ke haathon mein thaali thi aur woh chaaku se sabzi kaant rahi thi. Un dono ko dekhte hi, Anita muskurayi aur woh dono bhi muskuraye. Phir woh dono chaarpayi par aa baith gaye. Dono chup the. Anita ne un dono se pucha, "Kya aap dono ke liye main paani le aaun ?"

Sunil - "Haan. Bohut pyaas lagi hain."

Anita uthi aur woh rasode mein chali gayi. Rasode mein jaakar, Anita ne dekha ki, Namrata ek kone mein baithi hui hain. Woh khaamosh baithi hui thi. Yeh dekh Anita ne Namrata se pucha, "Kya hua Bahu ?"

Namrata - "Kuch bhi toh nahi Mummy."

Anita - "Kya tum thak gayi ho ?"

Namrata - "Bilkul bhi nahi Mummy."

Anita - "Kya tum kuch udaas ho ?"

Namrata - "Nahi. Nahi. Aisa kuch bhi nahi hain."

Anita - "Phir tum yahan akele baithe kya kar rahi ho ?"

Namrata - "Main bas raashan dekh rahi thi Mummy. Ghar mein kya-kya saaman lana zaroori hain, main bas woh sab pata laga rahi thi. Mummy kya yeh dono aa gaye hain ?"

Anita - "Haan. Abhi turant hi aaye hain. Kya tum ek kaam kar dogi ?"

Namrata - "Kya Mummy ?"

Anita - "Woh mujhe gas par chaaval chadhana tha. Kya tum un dono ko paani de dogi ?"

Namrata - "Haan zaroor Mummy. Kyun nahi ?"

Namrata paani le jaati hain aur woh Sunil aur Yug ko paani de aati hain. Namrata dobara rasode mein chali jaati hain. Kuch der baad, Sunil Namrata ko pukarta hain. Namrata Hall mein jaati hain aur kehti hain, "Ji Papa ?"

Sunil - "Baitho Bahu. Tumse kuch baatein karni thi."

Namrata Sunil ke saamne baith jaati hain. Phir Sunil Namrata se puchta hain, "Toh Bahu. Kaisa laga tumhe yeh ghar ?"

Namrata - "Bohut accha laga Papa."

Sunil - "Ghar ke sabhi sadasya pasand aaye tumhe ?"

Namrata - "Bohut zyada Papa."

Sunil - "Tumhari aisi koi iccha hain, jo adhoori reh gayi ho ?"

Namrata - "Bilkul bhi nahi Papa."

Sunil - "Sankoch mat karo, yeh tumhara hi ghar hain beta. Jo bhi tumhare Dil mein hain, saaf-saaf keh diya karo. Hum tumhari har iccha poori karne ki koshish karenge."

Namrata - "Ji Papa."

Sunil - "Agar kabhi tumhara kahi bahar ghumne ke liye jaana ka mann ho, toh zaroor bata dena."

Tabhi Anita Hall mein aati hain aur kehti hain, "Mann toh zaroor hoga iska. Yeh ladki jabse ghar aayi hain, tabse kahi bhi bahar aaj tak gayi hi nahi hain."

Sunil - "Thik hain. Toh Bahu, kal tum Yug ke saath bahar ghumne ke liye chale jaana."

Anita - "Kal shaam mein acche se tayyar ho jaana tum."

Namrata - "Ji Mummy. Waise Mummy, main soch rahi thi ki, agar kal hum dono ke saath Neha bhi jaaye toh kaisa rahega ?"

Yeh sunkar, Neha Namrata se kehti hain, "Main aap dono ke saath jaakar kya karungi Bhabhi ?"

Namrata - "Tum bhi hamare saath ghum lena."

Neha - "Are Bhai. Aap dono ki abhi-abhi toh nayi-nayi shaadi hui hain. Ab main aapke aur Bhaiyaa ke beech, kabab mein haddi ban kar kya karungi Bhabhi ?"

Anita - "Thik hi toh keh rahi hain yeh. Tum dono ko akele jaana chahiye Bahu."

Namrata - "Agar meri Nanad saath nahi hogi, toh safar mein mazaa kaise aayega ? Waqt-Waqt par mujhe tang koun karega ?"

Neha muskurati hain aur kehti hain, "Thik hain Bhabhi. Jaisi aapki iccha."

Namrata - "Kal tum bhi acche se tayyar hona Neha. Dekhte hain, kal zyada khoobsurat koun lagta hain. Bhabhi ya Nanad."

Sabhi log hans padte hain.

Agle din, har roz ki tarah Sunil aur Yug tayyar hokar daftar ke liye nikal jaate hain. Namrata aur Neha subah se hi, shaam ke liye jaane ki tayyariyon mein lag jaate hain. Woh dono almaari se alag-alag kapde nikal kar pehen-pehen kar dekhte aur ek dusre ki khoobsurati par apni rai bhi dete. Woh dono ek dusre ke kapde pehen-pehen kar bhi dekhte.

 Alag-Alag kapde badal-badal kar dekhne mein kaafi samay bhi beet gaya. Tabhi achanak se, Namrata ko khayal aata hain ki, uski saans rasode mein akele kaam kar rahi hogi. Woh Neha se kehti hain, "Mummy rasode mein akeli hongi. Mujhe bhi yeh baat itni deri se kaise yaad aayi ? Main abhi aati hoon."

Neha - "Are Bhabhi itna mat sochiye. Waise Mummy bhi akele kaam kar lengi. Ek din ki hi toh baat hain."

Namrata - "Phir bhi. Main ek baar Mummy se mil kar aati hoon."

Neha - "Thik hain Bhabhi."

Namrata rasode mein jaane lagti hain. Woh zara tezz chal rahi thi. Woh ek ajeeb si jaldbaazi mein thi. Chalte-Chalte achaanak se, Namrata ka pair mud jaata hain aur woh dhadaam se neeche gir jaati hain. Achanak se girne ki wajah se, Namrata ko bohut dard mehsus hota hain aur woh karraah uthti hain. Namrata ki cheekh sunn kar, Neha uske paas daudi chali aati hain. Woh Namrata ko farsh par gira hua dekh kar, uske haath pakad leti hain aur woh Namrata ko uthane ki koshish karti hain. 

Tabhi Anita daudte hue wahan par aati hain aur puchti hain, "Kya hua ?"

Neha - "Woh Bhabhi achaanak se gir padi hain."

Anita - "Kaise ?"

Namrata - "Bas achaanak se mera pair mud gaya Mummy."

Anita aur Neha Namrata ko uthate hain aur use pakad kar dheere-dheere chalte hue, Namrata ke kamre tak le jaate hain. Phir woh dono use bistar par leta dete hain. Namrata ke pairon ki nas dab chuki thi. Jis wajah se use aur bhi zyada dard mehsus ho raha tha. Pairon ka dard woh sehan nahi kar paa rahi thi. Woh dard ke maare cheekhe jaa rahi thi. Anita turant rasode mein gayi aur woh tel garam karke le aayi. Phir woh kuch der, Namrata ke pairon ki maalish ki.

 Thodi der baad, Namrata ko thoda aaram mehsus hua. Phir Anita Namrata se kehti hain, "Abhi tum kuch der aaram karo Bahu. Rasode ka poora kaam aaj main dekh lungi."

Neha - "Haan Bhabhi. Aaj aap bistar se hiliyega bhi mat aur agar aapko kisi bhi cheez ki zaroorat ho, toh bas mujhe aawaz laga dijiyega aap."

Namrata - "Thik hain."

Uske baad, Neha wahan se chali jaati hain. Dopahar mein Neha Namrata ke liye khaana le aati hain. Neha ke haathon mein khaane ki thaali dekh kar, Namrata kehti hain, "Are iski kya zaroorat thi ?"

Neha - "Kyun nahi thi. Aaj aap bimar ho, toh kya mera farz nahi banta hain aapka khayal rakhne ka ?"

Namrata - "Haan. Woh baat toh hain, par main itni bhi bimar nahi hoon."

Neha - "Ab toh aap mujhe paraya samajh rahi hain Bhabhi. Kya mujhe aapka khayal rakhne ka koi haq nahi hain ?"

Namrata - "Zaroor Hain."

Neha - "Aur mera ek aur haq hain Bhabhi."

Namrata - "Woh kya ?"

Neha - "Aapko apne haathon se khaana khilane ka."

Namrata hans padti hain. Yeh dekh Neha kehti hain, "Ismein hansne ki kya baat hain Bhabhi ?"

Namrata - "Main kitni khush-kismat hoon, jo mujhe itna pyaar karne wali aur mera itna khayaal rakhne wali Nanad mili hain."

Neha - "Mujhe bhi aapke jaisi Bhabhi mili hain, main bhi bohut khushnaseeb hoon."

Namrata - "Khushnaseeb toh woh bhi honge, jinke ghar tum byaah kar jaaogi."

Neha sharma jaati hain aur apni aankhein jhukaate hue kehti hain, "Bhabhi aap bhi na ?"

Namrata - "Are sharma gayi kya ?"

Neha - "Main aapko chod kar kahi nahi jaaungi."

Namrata - "Toh thik hain, main tumhare Bhaiyaa se keh deti hoon, ki Neha ke liye ladka dekhne ki koi bhi zaroorat nahi hain. Woh saari zindagi kunwari hi rahegi."

Neha - "Nahi. Nahi. Bilkul Nahi."

Namrata - "Haan."

Neha sharma jaati hain aur dono haathon se apna muh chupa leti hain. Namrata hans padti hain.

Agle din subah-subah uthkar sab log tayyar hote hain. Namrata aur Anita sabke liye naashta banati hain aur Hall mein le aati hain. Naashta dekh kar, Sunil aur Yug bohut khush hote hain. Sunil kehta hain, "Bhai vaah. Aaj naashte mein Halwa bana hain ?"

Anita - "Haan aur dopahar mein Sewai aur Poodi banegi."

Yug - "Aaj koi khaas din hain kya ?"

Namrata - "Aaj Janmashtami hain."

Yug - "Are haan. Main bhool gaya tha."

Sab log hans padte hain. Phir Anita kehti hain, "Ghar mein saara samaan nahi hain. Dopahar aur Raat ke khaane ke liye zaroori cheezein kharidni hogi."

Yug - "Ab kya-kya saaman lana padega, yeh sab toh aap log jaano Mummy. Aaj toh main aaraam karunga."

Namrata - "Thik hain. Main aur Neha jaakar saamaan le aate hain."

Sunil - "Yeh bhi thik hain."

Neha tayyar ho jaati hain aur woh Namrata ke saath kharidaari ke liye nikal padti hain. Raaste bhar dono Nanad-Bhabhi khoob gup-shup ladate hain. Baat-Cheet karte-karte dono kharidaari bhi karte hain. 

Ek dukaan par woh dono kuch saamaan dekh rahe the. Tabhi achaanak se kisi ne Neha ko pukara. Neha palat kar dekhi aur paayi ki ek ladka khada hain. Woh ladka Neha se kehta hain, "Pehchana ?"

Neha kuch der sochti hain aur behad khushi se kehti hain, "Ajay ?"

Ladka - "Chalo kam se kam tumne mujhe pehchan toh liya ?"

Neha - "Aur batao. Kaise ho tum ?"

Ajay - "Bas thik. Tum kaisi ho ?"

Neha - "Main bhi thik hoon. Waise yeh meri Bhabhi hain."

Ajay - "Namastey Bhabhi."

Namrata - "Namastey Bhaiyaa."

Kuch der tak woh log wahi khade-khade baat-cheet karte hain aur phir Ajay wahan se chala jaata hain. 

Dono Nanad-Bhabhi wahan se saaman lekar ghar ke liye nikal padte hain. Kuch kadam chalne ke baad, Namrata Neha se kehti hain, "Toh Ajay naam hain Rajkumar ka ?"

Neha - "Nahi Bhabhi aisi baat nahi hain."

Namrata - "Jis tarah se tum dono baat-cheet kar rahe the, aisa lag raha tha ki shayad tum dono dost se kuch zyada ho."

Neha - "Main aapse kuch nahi chupaungi Bhabhi. Lekin, haan yeh sach hain."

Namrata - "Toh pehle kehne mein sharma kyun rahi thi ?"

Neha - "Ab main kya kahoon."

Namrata - "Toh kabse tum dono saath ho ?"

Neha - "Pichle ek saal se. Mujhe aapse yeh baat pehle batane mein koi aitraaz nahi tha. Lekin, Ajay chahta hain ki pehle woh apne pairon par khada ho jaaye. Uske baad hum yeh baat ghar mein bataye. Lekin, sach maaniye Bhabhi, mujhe bohut bura lagta hain jab bhi is baat ka ehsaas hota hain ki maine aap logon se yeh baat chupayi hain."

Namrata - "Kya Ajay ke saath tumhare rishte ki koi ahmiyat nahi hain ?"

Neha - "Hain."

Namrata - "Phir ? Ladka jitna khoobsurat hain, utna hi samajhdaar bhi hain. Jab ladka khud yeh keh raha hain ki woh kamayi shuru hone ke baad sabse yeh baat kahega, toh yeh baat saaf-saaf jhalakati hain ki us ladke ko apni zimmedariyon ka ehsaas hain."

Neha - "Aapki kya rai hain Bhabhi ?"

Namrata - "Ladka dikhne mein toh sharif hain."

Neha - "Kya aapko yeh rishta manzoor hain ?"

Namrata - "Hamare Jeejaji pehli mulakat mein hi hamara Dil jeet chuke hain."

Neha - "Bhabhi."

Namrata - "Hmm."

Neha - "Ek baat kahoon ?"

Namrata - "Ab yeh raaz hum dono ke hi beech rahega. Yeh hum Nanad-Bhabhi ke beech ki baat hain aur hamesha hamare beech hi rahegi."

Neha - "Mujhe maaf kar dijiyega Bhabhi, jo maine aapse yeh baat chupayi."

Namrata - "Ismein tumhe maafi mangne ki koi zaroorat nahi hain. Tumhe us ladke par yakeen hain aur mujhe tumpar. Aur mujhe yakeen hain ki yeh ladka kabhi bhi tumhara bharosa nahi todega. Rishton ki buniyad vishwaas hoti hain. Ek baar vishwaas ki dor toot gayi, toh gehre se gehra rishta bhi pal bhar mein khatam ho jaata hain. Insaan ka sabse kareebi palak jhapakte hi ajnabee ban jaata hain. Mujhe tum par aankh band karke bharosa hain. Bas tum dono ek dusre ka yakeen banaye rakho."

Neha - "Ji Bhabhi."

Uske baad dono khaamosh ho jaate hain aur chup-chap ghar ki aur badhte hain.

                         - Ved Vineet Gautam